ជនភៀសសឹកខ្មែរមួយចំនួន ដែលមកស្នាក់នៅតាមជំរំ និងផ្ទះសាច់ញាតិបងប្អូនក្នុងខេត្តសៀមរាប បានឱ្យដឹងនៅថ្ងៃទី២ខែមករានេះថា ពួកគេកំពុងស្ទាក់ស្ទើរចិត្ត មិនទាន់ហ៊ានវិលត្រឡប់ទៅលំនៅឋានរបស់ខ្លួនវិញ នៅឡើយទេ ដោយសារពួកគាត់បារម្ភពីសុវត្ថិភាពក្រុមគ្រួសារ និងមិនទុកចិត្តបទឈប់បាញ់លើកទី២នេះ ពីសំណាក់យោធាសៀម ដែលបានបើកការឈ្លានពានកម្ពុជា ជាង២០ថ្ងៃមកនេះ។
គិតត្រឹមថ្ងៃទី០២ ខែមករានេះ ស្ថានភាពជនភៀសសឹកទូទាំងស្រុក ក្រុង ក្នុងខេត្តសៀមរាប មិនទាន់មានអ្វីប្រែប្រួលជាដុំកំភួនឡើយ ដោយពលរដ្ឋភៀសសឹកខ្មែរភាគច្រើន មិនទាន់ហ៊ានសម្រេចចិត្តត្រឡប់ទៅផ្ទះសម្បែងវិញ នៅឡើយ ដោយពួកគេថា បារម្ភពីសុវត្ថិភាព មិនទុកចិត្តយោធាសៀម។
ជនភៀសសឹករស់នៅស្រុកអន្លង់វែង ខេត្តបន្ទាយមានជ័យ លោក ខាន់ ខន ប្រាប់វីអូឌីនៅថ្ងៃទី០២ ខែមករានេះថា លោកមិនទាន់ហ៊ានវិលត្រឡប់ទៅផ្ទះវិញនៅឡើយទេ ព្រោះបារម្ភពីសុវត្ថិភាពក្រុមគ្រួសារ ជាពិសេសកូនតូចៗ។
លោកថា ការរត់ភៀសសឹកម្តងៗ បង្កការលំបាកច្រើនរួមមាន ចំណាយសោយហុយ បញ្ហាស្មារតី សុខភាព និងអាហារហូបចុក ជាដើម។
លោកថា៖ «បារម្ភពីសុវត្ថិភាពផ្ទះសម្បែង ទ្រព្យសម្បត្តិ មានតែផ្ទះ និងស្រូវ តិចតួចគ្រាប់ទម្លាក់ខ្លះៗទម្លាក់តាមផ្លូវ»។
របាយការណ៍អាជ្ញាធរខេត្តសៀមរាប ឱ្យដឹងថា ជនភៀសសឹកកំពុងស្នាក់នៅតាមជំរំចំនួន ១៣ ក្រុង/ស្រុក សរុបជិត១២ម៉ឺននាក់ ស្មើនឹងជាង៣ម៉ឺន ៦ពាន់គ្រួសារ (៣៦ ០០០គ្រួសារ) គិតត្រឹមថ្ងៃទី១៥ ខែធ្នូ ឆ្នាំ២០២៥។
ជនភៀសសឹកខ្លះ មកស្នាក់នៅតាមផ្ទះសាច់ញាតិបងប្អូន វត្តអារាម សាលារៀន និងមួយចំនួនធំ ស្នាក់នៅក្នុងជំរំភាគច្រើននៅតាមវត្តអារាម។ ពួកគេភាគច្រើនបានកែច្នៃគោយន្តកន្ត្រៃជាផ្ទះចល័ត ដោយយកតង់រុំធ្វើជាដំបូល បិតបាំងជុំជិត ដើម្បីងាយស្រួលទុកដាក់សម្ភារប្រើប្រាស់ខាងក្នុង។ ស្ត្រី និងកុមារ ដេកលើគោយន្ត ហើយបុរសៗពេញកម្លាំងជាអ្នកបើកបរគោយន្ត។
ពួកគេធ្វើដំណើរតាមគោយន្តចាប់ពីព្រំដែនថៃ ឆ្ពោះមកខេត្តសៀមរាប តម្រង់មកកន្លែងសុវត្ថិភាពនៅតាមវត្តអារាម និងផ្ទះសាច់ញាតិបងប្អូនក្នុងក្រុងសៀមរាប និងតាមស្រុកមួយចំនួន។
ជនភៀសសឹកម្នាក់ទៀត រស់នៅខេត្តស្រុកអន្លង់វែង ខេត្តឧត្តរមានជ័យ អ្នកស្រី ប៊ុន តុងធឿន ឱ្យដឹងថា គ្រួសារអ្នកស្រីបានចាកចេញពីផ្ទះច្រើនថ្ងៃហើយ កំពុងស្នាក់នៅផ្ទះសាច់ញាតិ មិនទាន់ហ៊ានវិលត្រឡប់ទៅវិញនៅឡើយទេ។
លោកស្រីបារម្ភខ្លាចមានជនឆ្លៀតឱកាសលួចស្រូវ និងទ្រព្យសម្បត្តិ ហើយអំពាវនាវឱ្យអាជ្ញាធរការពារសុវត្ថិភាពផ្ទះសម្បែងរបស់ពួកគាត់។
អ្នកស្រីថា៖ «នៅស្ទាក់ស្ទើរខ្លាចទៅផ្ទុះទៀត សម្រេចមិនទាន់ចង់ទៅទេ ខ្លាចទៅផ្ទុះទៀត មួយគ្រាប់ផាំងចំផ្ទះចាស់ៗខ្ញុំអត់ភ័យទេ ខ្លាចកូនៗខ្ញុំតូចៗ វាដឹងអីវា»។
វីអូឌីមិនទាន់អាចទាក់ទង សុំការបំភ្លឺជុំវិញរឿងនេះ ពីអ្នកនាំពាក្យសាលាខេត្តសៀមរាប លោក លី វណ្ណៈ បាននៅឡើយទេនៅថ្ងៃទី០២ ខែមករា។
តែយ៉ាងណា លោក លី វណ្ណៈ ប្រាប់សារព័ត៌មានថ្មីៗកាលពីថ្ងៃទី១៥ ខែធ្នូ ឆ្នាំ២០២៥ថា ចំនួនជនភៀសសឹកក្នុងខេត្តសៀមរាបមានជាង ៣ម៉ឺន ៦ពាន់គ្រួសារ (៣៦ ៦០៨គ្រួសារ) ស្មើនឹងជាង ១សែន ១ម៉ឺននាក់ (១១៧ ៨៤៥នាក់)។
របាយការណ៍រដ្ឋបាលខេត្តសៀមរាប ឱ្យដឹងថា ជំរំសុវត្ថិភាពដែលពលរដ្ឋភៀសសឹកច្រើនជាងគេ ឋិតក្នុងស្រុកក្រឡាញ់ មាន ១២ទីតាំង ដែលមានពលរដ្ឋស្នាក់នៅជាង ៦ពាន់គ្រួសារ ស្មើនឹងជិត ១៦ ០០០នាក់។ ស្រុកស្រីស្នំ មានជនភៀសសឹកជិត៦ពាន់គ្រួសារ ក្រុងសៀមរាប ជាង៤ពាន់គ្រួសារ ស្រុកពួក ជិត៤ពាន់គ្រួសារ ស្រុកបន្ទាយស្រី ជាង៣ពាន់គ្រួសារ និងស្រុកស្វាយលើ ជាង២ពាន់គ្រួសារ។
អ្នកគ្រប់គ្រងការិយាល័យអង្គការលីកាដូ (Licadho) ប្រចាំខេត្តបន្ទាយមានជ័យ និងខេត្តសៀមរាប លោក អ៉ិន គង់ជិត សង្កេតឃើញថា ក្នុងពេលពលរដ្ឋភៀសសឹកសម្រុកចាកចេញពីផ្ទះ ទ្រព្យសម្បត្តិរបស់ពួកគាត់មួយចំនួន បានបាត់បង់ដោយសារមានជនឆ្លៀតឱកាសគាស់ផ្ទះ។
លោកថា អាជ្ញាធរគួរតែចាត់វិធានការករណីនេះ ដើម្បីឱ្យពលរដ្ឋភៀសសឹកកក់ក្ដៅផ្លូវចិត្ត។
លោកថា៖ «កន្លែងខ្លះនៅពេលពួកគាត់ចេញអស់ ទ្រព្យសម្បត្តិបាត់បង់ទាំងស្រុងហ្មង មានស្រូវ និងអីវ៉ាន់ក្នុងផ្ទះគេលួចទ្រព្យអស់។ នៅពេលនេះ គាត់អំពាវនាវឱ្យអាជ្ញាធរមូលដ្ឋាន និងប្រជាការពារជួយបន្តជួយមើលថែទាំទ្រព្យសម្បត្តិរបស់ពួកគាត់ មិនទាន់បាត់បង់ ទី១ ទី២គាត់នៅអំពាវនាវឱ្យមានការជួយឧបត្ថម្ភ»។
ក្រសួងមហាផ្ទៃ បានឱ្យដឹងថា បើគិតពីម៉ោង ៦ល្ងាច ថ្ងៃទី៣១ ខែធ្នូ ឆ្នាំ២០២៥ មានជនភៀសសឹក ជាង ៥ ពាន់នាក់ (៥ ១៩២នាក់) ក្នុងចំណោមជនភៀសសឹកសរុបជាង ៥ សែននាក់ (៥១២ ២៦៣នាក់)។
ក្រសួងមហាផ្ទៃ គាំទ្រជំហរដ៏មោះមុតចំពោះការអនុវត្តបទឈប់បាញ់ ដែលមិនមែនជាការចុះចាញ់ ឬយកបូរណភាពទឹកដី និងអធិបតេយ្យជាតិទៅដោះដូរយកសន្តិភាពឡើយ៕
