ពលរដ្ឋខ្មែរ ឱ្យដឹងនៅថ្ងៃចន្ទនេះថា យោធាថៃបន្តឈូសកម្ទេចផ្ទះពលរដ្ឋនៅភូមិជោគជ័យ ឃុំអូរបីជាន់ ស្រុកអូរជ្រៅ ក្នុងខេត្តបន្ទាយមានជ័យ អស់ជាង ៤០០ខ្នង និងពង្រីកសកម្មភាពឈ្លានពានរំកិលចូលដីខ្មែរ កាន់តែជ្រៅ ដោយហាមឃាត់ពលរដ្ឋខ្មែរ មិនឱ្យវិលទៅកាន់លំនៅឋានវិញឡើយ បើទោះបីជាក្រសួងការបរទេសកម្ពុជា បាន ចេញសេចក្តីថ្លែងការណ៍ តវ៉ាឱ្យភាគថៃបញ្ឈប់ការរំលោភបំពាននេះក្តី។
បើតាមពលរដ្ឋ គិតត្រឹមថ្ងៃទី៥ ខែមករានេះ យោធាថៃបន្តសម្រុកបញ្ជូនកងទ័ពឈរជើងលើដីខ្មែរ តាមបណ្ដោយព្រំដែនក្នុងខេត្តបន្ទាយមានជ័យ អមដោយគ្រឿងចក្រឈូសឆាយហ៊ុមព័ទ្ធយកដីខ្មែរកាន់តែចូលជ្រៅ។ បន្ថែមពីនេះទៀត យោធាថៃ បានកម្ទេចហេដ្ឋារចនាសម្ព័ន្ធលើដីខ្មែរ ដែលដណ្ដើមបានក្នុងរយៈពេល ២១ថ្ងៃ និងព័ទ្ធបន្លាលួស គំរាមកំហែងពលរដ្ឋខ្មែរមិនឱ្យវិលទៅកាន់លំនៅឋានវិញឡើយ។
ពលរដ្ឋរងគ្រោះរស់នៅភូមិជោគជ័យ ខេត្តបន្ទាយមានជ័យ លោក ចាន់ បូនី ប្រាប់វីអូឌីនៅថ្ងៃទី០៥ ខែមករាថា ផ្ទះរបស់លោកទើបសាងសង់ថ្មីថ្មោង ចំណាយអស់ជាង ៤ម៉ឺនដុល្លារ ត្រូវយោធាថៃឈូសកម្ទេចចោល ហើយទ្រព្យសម្បត្តិក៏បាត់បង់អស់ដែរ កាលពីចុងខែធ្នូ ឆ្នាំ២០២៥។
លោកថា ពេលនេះពលរដ្ឋរស់នៅភូមិជោគជ័យជាង ៧០០គ្រួសារ និងភូមិព្រែចាន់ ជាង ២៧០គ្រួសារ មិនទាន់ហ៊ានវិលត្រឡប់ ទៅលំនៅឋានវិញឡើយបានត្រឹមឈរសម្រក់ទឹកភ្នែកស្តាយស្រណោះផ្ទះសម្បែង និងភូមិកំណើតពីចម្ងាយ។
លោក ចាន់ បូនី និយាយថា៖ «វាព័ទ្ធភូមិយើងវាយកកុងតឺន័រដាក់ វាប្រុងតែវាទទីដូចថា ថ្ងៃនេះវាព័ទ្ធត្រឹមនេះអីចឹងស្អែកឡើងវាលាតកុងតឺន័របន្ថែមទៀត។ សកម្មភាពវាអត់ឈប់ទេ វាបង្ខិតរាល់ថ្ងៃ គ្រឿងចក្រប្រដាប់អាវុធ ត្រៀមរហូត វាអត់ស្ងាត់ទេ»។
អ្នកភូមិព្រៃចាន់ថា មកទល់ពេលនេះ ផ្ទះរបស់អ្នកភូមិជោគជ័យជាង ៤០០ខ្នង ត្រូវយោធាថៃឈូសកម្ទេចអស់ក្លាយជាវាល ហើយបញ្ជូនទូកុងតឺន័រហ៊ុមព័ទ្ធយក ព្រមទាំងគំរាមមិនឱ្យពលរដ្ឋខ្មែរចេញចូលតំបន់ឡើយ។
បន្ថែមពីនេះទៀត រយៈពេលជិត ១សប្តាហ៍ចុងក្រោយនេះ យោធាថៃបានរំកិលទូកុងតឺន័រ ចូលដីខ្មែរហួសវត្តព្រៃចាន់ និងបានដោតទង់ជាតិថៃ នៅតំបន់ដែលពួកគេកំពុងកាន់កាប់ជាក់ស្តែង។
ថ្មីៗនេះ រដ្ឋាភិបាលកម្ពុជា បានផ្ញើ«កំណត់ទូត»តវ៉ាយ៉ាងខ្លាំងទៅកាន់ភាគីថៃ ដើម្បីប្រឆាំងសកម្មភាពបំពានដោយដាក់ទូកុងតឺន័ររាយបន្លាលួស និងដោតទង់ជាតិថៃ។
អ្នកនាំពាក្យរដ្ឋាភិបាលកម្ពុជា លោក ប៉ែន បូណា បានថ្លែងក្នុងសន្និសីទសារព័ត៌មានចេញផ្សាយនៅថ្ងៃទី០៥ ខែមករាថា រាជរដ្ឋាភិបាលកម្ពុជា បន្តតវ៉ាយ៉ាងខ្លាំងប្រឆាំងការឈរជើង និងកាន់កាប់ជាក់ស្តែងដោយកងកម្លាំងយោធាថៃលើទឹកដីកម្ពុជា ក្នុងតំបន់មួយចំនួនតាមបណ្ដោយព្រំដែន ថាជាអំពើខុសច្បាប់អន្តរជាតិ។
លោកថា កម្ពុជាមិនទទួលស្គាល់ការកែប្រែខ្សែព្រំដែនណាមួយ ដែលកើតចេញពីការប្រើប្រាស់កម្លាំងនោះឡើយ ហើយកម្ពុជាប្រកាន់ជំហរការពារខ្សែព្រំដែនអន្តរជាតិបន្សល់ទុក ដោយគណៈកម្មការព្រំដែនឥណ្ឌូចិន-សៀម ហើយគោរពអនុសញ្ញា សន្ធិសញ្ញាបារាំង-សៀម។
លោក ប៉ែន បូណា ថ្លែងថា៖ «កម្ពុជាប្រកាន់ជំហរម៉ឹងម៉ាត់ ក្នុងការការពារខ្សែបន្ទាត់ព្រំដែនអន្តរជាតិកម្ពុជា-ថៃ បន្សល់ទុកគណៈកម្មាធិការព្រំដែនឥណ្ឌូចិន-សៀម ដោយគោរពច្បាប់អន្តរជាតិ គោលការណ៍ខ្សែព្រំដែនមិនកែប្រែ គោរពអនុសញ្ញា សន្ធិសញ្ញា និងគណៈកម្មាធិការបោះបង្គោលព្រំដែនឥណ្ឌូចិន-សៀម»។
ជុំវិញរឿងនេះ អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន យល់ថា រដ្ឋាភិបាលគួរពន្លឿនប្តឹងថៃទៅកាន់តុលាការយុត្តិធម៌អន្តរជាតិ ICJ និងសហប្រធានកិច្ចព្រមព្រៀងសន្តិភាពក្រុងប៉ារីសឆ្នាំ១៩៩១ ដើម្បីទាមទារដីដែលថៃកំពុងគ្រប់គ្រងខុសច្បាប់ ជាពិសេសទាមទារសំណងខូចខាត ពីភាគីថៃដោយសារសង្គ្រាមកន្លងទៅនេះ។
លោកថា៖ «នៅពេលមិនប្តឹងទៅកាន់តុលាការយុត្តិធម៌អន្តរជាតិ ICJ និងសហប្រធានកិច្ចព្រមព្រៀងសន្តិភាពឆ្នាំ ១៩៩១។ ខ្ញុំយល់ថា ដីដែលថៃគ្រប់គ្រងប្រាកដជាមិនអាចទាមទារបានវិញទេ នឹងបាត់ទៅភាគីថៃ»។
អ្នកគ្រប់គ្រងការិយាល័យអង្គការលីកាដូ (Licadho) ប្រចាំខេត្តបន្ទាយមានជ័យ និងខេត្តសៀមរាប លោក អ៊ិន គង់ជិត សង្កេតឃើញថា យោធាថៃបំពានកិច្ចព្រមព្រៀងបទឈប់បាញ់ ដោយបន្តរាយបន្លាលួសព័ទ្ធយកដីខ្មែរ និងទូកុងតឺន័ររំកិលចូលដីខ្មែរជាបន្តបន្ទាប់។
លោកថា ពលរដ្ឋរស់នៅភូមិព្រៃចាន់ ភូមិជោគជ័យ និងតំបន់បឹងត្រកួន នៅតែមិនអាចវិលទៅលំនៅឋានវិញ ហើយកំពុងរស់នៅយ៉ាងលំបាកលំបិនក្នុងជំរំ។
លោក អ៊ិន គង់ជិត និយាយថា៖ «ប្រជាជននៅតំបន់ខ្លះគាត់វិលត្រឡប់ទៅវិញ កន្លែងមានសុវត្ថិភាពខ្លះ តែគាត់នៅគិតព្រួយបារម្ភរឿងការស្តារជីវភាពរស់នៅឡើយវិញ »។
ក្នុងតំបន់បឹងត្រកូនដែលយោថៃព័ទ្ធយកផ្ទះពលរដ្ឋខ្មែរចំនួន៤ភូមិ រួមមាន ភូមិបន្ទាយមានឫទ្ធិ ភូមិផ្លូវបំបែក ភូមិត្រពាំងសំរោង និងភូមិសាមគ្គី ក្នុងឃុំគោករមៀត ស្រុកថ្មពួក ខេត្តបន្ទាយមានជ័យ។ រីឯភូមិព្រៃចាន់ និងភូមិជោគជ័យដែលមានផ្ទះពលរដ្ឋជិត ១ពាន់ខ្នង ស្ថិតក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ក៏យោធាថៃព័ទ្ធយកទាំងមូលដែរ ដោយបានពង្រាយទូ កុងតឺន័ររាំងខ្ទប់ផ្លូវ និងរាយបន្លាលួសមិនឱ្យពលរដ្ឋចេញចូលឡើយ។
របាយការណ៍ក្រសួងការពារជាតិ បង្ហាញថា គិតត្រឹមល្ងាចថ្ងៃទី៤ ខែមករា ឆ្នាំ២០២៦ មានជនភៀសសឹកជាង ២ម៉ឺន ៥ ពាន់នាក់ (២៥ ៤០៧នាក់) បន្តវិលទៅលំនៅឋានវិញ ក្នុងចំណោមជនភៀសសឹកសរុបជាង ៦សែន៤ម៉ឺននាក់ បន្តស្នាក់នៅជំរំសុវត្ថិភាព៕
