បណ្តាប្រទេសភាគច្រើននៅលើពិភពលោក បានថ្កោលទោសសហរដ្ឋអាមេរិកចំពោះការប្រើយន្តហោះ ចូលទៅទម្លាក់គ្រាប់បែកលើទឹកដីប្រទេសវេណេស៊ុយអេឡា និងចាប់ខ្លួន លោក ម៉ាឌូរ៉ូ មេដឹកនាំផ្តាច់ការរបស់ប្រទេសនេះ កាលពីយប់រំលងអាធ្រាត្រ ឈានចូលថ្ងៃទី៣ខែមករាថា ជាការដើររំលងបន្ទាត់ច្បាប់អន្តរជាតិ ដែលមិនអាចទទួលយកបាន។ មានតែប្រទេសអ៊ីស្រាអែល អេក្វាទ័រ អាហ្សង់ទីនទេ ដែលគាំទ្រចំណាត់ការរបស់លោក ដូណាល់ ត្រាំ ចំណែកបណ្តាប្រទេសផ្សេងទៀត បានបញ្ចេញប្រតិកម្មដោយប្រយ័ត្នប្រយែង និងកំពុងតាមឃ្លាំមើលស្ថានការណ៍ដោយយកចិត្តទុកដាក់។
ក្រសួងការបរទេសចិន បានចេញសេចក្តីថ្លែងការណ៍ថា៖ «ប្រទេសចិន មានការតក់ស្លុតយ៉ាងខ្លាំង និងសូមថ្កោលទោសយ៉ាងដាច់អហង្ការ ចំពោះការប្រើប្រាស់កម្លាំងបាយរបស់សហរដ្ឋអាមេរិក ប្រឆាំងនឹងប្រទេសដែលមានអធិបតេយ្យភាពមួយ និងការប្រើប្រាស់កម្លាំងបាយប្រឆាំងនឹងប្រធានាធិបតីនៃប្រទេសមួយ»។
ជាមួយគ្នានេះ ក្រសួងការបរទេសរុស្ស៊ី ដែលបានលើកទ័ពចូលឈ្លានពានប្រទេសអ៊ុយក្រែន ក៏បានថ្កោលទោសអាមេរិកផងដែរថា សហរដ្ឋអាមេរិក បានប្រព្រឹត្តអំពើឈ្លានពានដោយអាវុធ ប្រឆាំងនឹងប្រទេសវេណេស៊ុយអេឡា។ នេះគឺជារឿងដែលគួរឱ្យព្រួយបារម្ភយ៉ាងខ្លាំង និងគួរឱ្យថ្កោលទោសបំផុត។
វិមានក្រឹមឡាំងបញ្ជាក់ថា៖ «លេសដែលត្រូវបានប្រើ ដើម្បីបង្ហាញហេតុផលសមស្របសម្រាប់សកម្មភាពបែបនេះ គឺគ្មានមូលដ្ឋានច្បាស់លាស់ឡើយ។ គំនុំមនោគមវិជ្ជាបានឈ្នះលើការអនុវត្តជាក់ស្តែងក្នុងអាជីវកម្ម និងឆន្ទៈ ក្នុងការកសាងទំនាក់ទំនងដែលផ្អែកលើទំនុកចិត្ត និងការព្យាករណ៍ទុកជាមុនបាន។ នៅក្នុងស្ថានភាពបច្ចុប្បន្ន អ្វីដែលសំខាន់បំផុតនោះ គឺត្រូវទប់ស្កាត់ការរីករាលដាលនៃជម្លោះបន្ថែមទៀត និងត្រូវផ្តោតលើការស្វែងរកច្រកចេញពីស្ថានភាពនេះ តាមរយៈកិច្ចសន្ទនា»។
អ្នកនាំពាក្យរបស់អគ្គលេខាធិការអង្គការសហប្រជាជាតិ លោក ANTONIO GUTERRES បានលើកឡើងថា ព្រឹត្តិការណ៍ទាំងនេះ បង្កើតឱ្យមានជាគំរូដ៏គ្រោះថ្នាក់មួយ។ អគ្គលេខាធិការនៅតែបន្តសង្កត់ធ្ងន់លើសារៈសំខាន់នៃការគោរពគ្នាឱ្យបានពេញលេញ ពីសំណាក់គ្រប់ភាគីទាំងអស់ ចំពោះច្បាប់អន្តរជាតិ រួមទាំងធម្មនុញ្ញអង្គការសហប្រជាជាតិផងដែរ។ លោកមានការព្រួយបារម្ភយ៉ាងខ្លាំង ដែលវិធាននៃច្បាប់អន្តរជាតិមិនត្រូវបានគេគោរព។
បន្ថែមពីនេះ ប្រធានាធិបតីបារាំង លោក EMMANUEL MACRON បានសរសេរនៅលើបណ្តាញសង្គម X ថា៖ «ការផ្ទេរអំណាចដែលនឹងឈានមកដល់ ត្រូវតែប្រព្រឹត្តទៅដោយសន្តិវិធី ប្រកបដោយលទ្ធិប្រជាធិបតេយ្យ និងគោរពតាមឆន្ទៈរបស់ប្រជាជនវេណេស៊ុយអេឡា។ យើងសង្ឃឹមថា ប្រធានាធិបតី Edmundo Gonzalez Urrutia ដែលត្រូវបានជាប់ឆ្នោតក្នុងឆ្នាំ២០២៤ នឹងអាចធានាការផ្ទេរអំណាចនេះ ឱ្យបានឆាប់តាមដែលអាចធ្វើទៅបាន»។
នាយករដ្ឋមន្ត្រីអង់គ្លេស លោក KEIR STARMER និយាយថា៖ «ខ្ញុំចង់បញ្ជាក់ពីអង្គហេតុជាមុនសិន។ ខ្ញុំចង់ជជែកជាមួយប្រធានាធិបតី Trump។ ខ្ញុំចង់ជជែកជាមួយបណ្តាសម្ព័ន្ធមិត្ត។ ខ្ញុំអាចនិយាយបានយ៉ាងច្បាស់បំផុតថា យើងមិនបានចូលរួមពាក់ព័ន្ធនោះទេ… ហើយខ្ញុំតែងតែនិយាយ និងជឿជាក់ថា យើងទាំងអស់គ្នាគួរតែលើកតម្កើងច្បាប់អន្តរជាតិ»។ នេះបើយោងតាមសារព័ត៌មានReuter ។
ចំណែក អធិការបតីអាល្លឺម៉ង់ លោក FRIEDRICH MERZ បានមានប្រសាសន៍ថា ការវាយតម្លៃផ្លូវច្បាប់នៃប្រតិបត្តិការរបស់សហរដ្ឋអាមេរិក មានលក្ខណៈស្មុគស្មាញ ហើយយើងនឹងចំណាយពេលដើម្បីពិនិត្យវាយតម្លៃវា។ លោកបន្ថែមថា គោលការណ៍នៃច្បាប់អន្តរជាតិ ត្រូវតែយកមកអនុវត្ត។ លោកបានជំរុញថា ការផ្ទេរអំណាចទៅកាន់រដ្ឋាភិបាលមួយដែលស្របច្បាប់តាមរយៈការបោះឆ្នោត ត្រូវតែបានធានា។
ក្រសួងការបរទេសជប៉ុន ក៏បានចេញសេចក្តីថ្លែងការណ៍ដែរថា៖ «ជប៉ុនបានផ្តល់តម្លៃខ្ពស់ជាយូរមកហើយ លើគោលការណ៍គ្រឹះនៃសេរីភាព និងប្រជាធិបតេយ្យ។ យើងក៏បានភ្ជាប់សារៈសំខាន់ជាជាប់លាប់ ដល់ការលើកតម្កើងគោលការណ៍នៃច្បាប់អន្តរជាតិ នៅក្នុងសហគមន៍អន្តរជាតិផងដែរ»។
ចំណែក រដ្ឋមន្ត្រីការបរទេសអ៊ុយក្រែន លោក ANDRII SYBIHA ដែលកំពុងរងគ្រោះដោយសារការឈ្លានពានពីប្រទេសរុស្ស៊ី និយាយថា៖ «”អ៊ុយក្រែនបានការពារជានិច្ចនូវសិទ្ធិរបស់ប្រជាជាតិ ក្នុងការរស់នៅដោយសេរី ផុតពីរបបផ្តាច់ការ ការជិះជាន់ និងការរំលោភសិទ្ធិមនុស្ស។
លោកបន្តថា៖ «របបលោក Maduro បានរំលោភលើគោលការណ៍ទាំងអស់នេះ ក្នុងគ្រប់ទិដ្ឋភាព។ យើងគាំទ្រដល់ការវិវត្តបន្តទៀត ដែលស្របតាមគោលការណ៍នៃច្បាប់អន្តរជាតិ ដោយផ្តល់អាទិភាពដល់ប្រជាធិបតេយ្យ សិទ្ធិមនុស្ស និងផលប្រយោជន៍របស់ប្រជាជនវេណេស៊ុយអេឡា»។
បន្ថែមពីនេះ ក្រសួងការបរទេសម៉ាឡេស៊ី ថ្លែងថា ជាគោលការណ៍ ម៉ាឡេស៊ីប្រឆាំងនឹងរាល់ទម្រង់នៃអន្តរាគមន៍បរទេស នៅក្នុងកិច្ចការផ្ទៃក្នុងរបស់រដ្ឋដទៃ ក៏ដូចជាការគំរាមកំហែង ឬការប្រើប្រាស់កម្លាំងបាយ។ ទាំងនេះ គឺជាគោលការណ៍គ្រឹះដែលមានចែងក្នុងធម្មនុញ្ញអង្គការសហប្រជាជាតិ និងច្បាប់អន្តរជាតិ។ ម៉ាឡេស៊ី ប្រកាន់ខ្ជាប់ជានិច្ចនូវសារៈសំខាន់នៃដំណោះស្រាយវិវាទដោយសន្តិវិធី តាមរយៈការសន្ទនា ការគោរពអធិបតេយ្យភាព និងការអនុលោមតាមបទដ្ឋានអន្តរជាតិ។
ក្រសួងការបរទេសសិង្ហបុរី ប្រកាសថា សិង្ហបុរីមានការព្រួយបារម្ភយ៉ាងខ្លាំងចំពោះអន្តរាគមន៍របស់អាមេរិកនៅក្នុងប្រទេសវេណេស៊ុយអេឡា។ សិង្ហបុរីប្តេជ្ញាយ៉ាងមុតមាំ ចំពោះច្បាប់អន្តរជាតិ និងគោលការណ៍នៃធម្មនុញ្ញអង្គការសហប្រជាជាតិ ដែលការពារឯករាជ្យភាព អធិបតេយ្យភាព និងបូរណភាពទឹកដីនៃរដ្ឋទាំងអស់ ជាពិសេសរដ្ឋតូចៗ។
ក្រៅពីនះ ប្រទេសអាហ្វ្រិកខាងត្បូង ម៉ិកស៊ិក កាណាដា ប៉េរូ ប្រេស៊ីល ដាណឺម៉ាក បេឡារុស អ៊ីរ៉ង់ និងអ៊ុយរ៉ូហ្គាយជាដើម បានថ្កោលទោសយ៉ាងដាច់អហង្ការ ចំពោះការប្រើកម្លាំងប្រដាប់អាវុធរបស់សហរដ្ឋអាមេរិក លើប្រទេសវេណេស៊ុយអេឡាថា ជាការរំលោភធម្មនុញ្ញអង្គការសហប្រជាជាតិ និងជាការដើររំលងបន្ទាត់ច្បាប់ដែលមិនអាចទទួលយកបាន។ សកម្មភាពទាំងនេះ តំណាងឱ្យការប្រមាថយ៉ាងធ្ងន់ធ្ងរដល់អធិបតេយ្យភាពរបស់វេណេស៊ុយអេឡា និងជាគំរូដ៏គ្រោះថ្នាក់បំផុតមួយទៀត សម្រាប់សហគមន៍អន្តរជាតិទាំងមូល។
ពួកគេថា ការវាយប្រហារលើប្រទេសនានា ដោយរំលោភច្បាប់អន្តរជាតិយ៉ាងធ្ងន់ធ្ងរ គឺជាជំហានដំបូងឆ្ពោះទៅរកពិភពលោកនៃអំពើហិង្សា ភាពវឹកវរ និងអស្ថិរភាព ដែលច្បាប់របស់អ្នកខ្លាំងមានអំណាចលើពហុភាគីនិយម។
ជាមួយគ្នានេះ ប្រធានគណៈកម្មការអឺរ៉ុប លោកស្រី URSULA VON DER LEYEN ថ្លែងថា៖ «យើងកំពុងតាមដានយ៉ាងដិតដល់បំផុត នូវស្ថានភាពនៅក្នុងប្រទេសវេណេស៊ុយអេឡា។ យើងឈរនៅជាមួយប្រជាជនវេណេស៊ុយអេឡា និងគាំទ្រការផ្ទេរអំណាចដោយសន្តិវិធី និងប្រជាធិបតេយ្យ។ រាល់ដំណោះស្រាយទាំងអស់ ត្រូវតែគោរពច្បាប់អន្តរជាតិ និងធម្មនុញ្ញអង្គការសហប្រជាជាតិ»។
យ៉ាងណាក្តី នាយករដ្ឋមន្ត្រីអ៊ីស្រាអែល លោក BENJAMIN NETANYAHU បានសរសេរលើបណ្តាញសង្គម X ថា៖ «សូមអបអរសាទរ លោកប្រធានាធិបតី @realDonaldTrump ចំពោះភាពជាអ្នកដឹកនាំដ៏ក្លាហាន និងជាប្រវត្តិសាស្ត្រ តាំងនាមឱ្យសេរីភាព និងយុត្តិធម៌។ ខ្ញុំសូមគោរពចំពោះការប្តេជ្ញាចិត្តដ៏ម៉ឺងម៉ាត់របស់អ្នក និងសកម្មភាពដ៏អស្ចារ្យរបស់កងទ័ពដ៏ក្លាហានរបស់អ្នក»។
ជាមួយគ្នានេះ ប្រធានាធិបតីអេក្វាទ័រ លោក DANIEL NOBOA ប្រធានាធិបតីប៉ាណាម៉ា លោក JOSE RAUL MULINO និងប្រធានាធិបតីអាហ្សង់ទីន លោក JAVIER MILEI ក៏បានចេញសេចក្តីប្រកាសគាំទ្រចំណាត់ការរបស់លោក ដូណាល់ ត្រាំ ផងដែរថា ពេលវេលាបានមកដល់ សម្រាប់មេដឹកនាំផ្តាច់ការ និងថា «អ្វីដែលយើងត្រូវយល់នោះគឺថា នេះគឺជាការដួលរលំនៃរបបមេដឹកនាំផ្តាច់ការ ដែលបានបន្លំការបោះឆ្នោត ដែលនេះគឺជាព័ត៌មានដ៏អស្ចារ្យសម្រាប់ពិភពលោកសេរី»៕
