ពលរដ្ឋរងគ្រោះពីការឈ្លានពានរបស់ថៃ កំពុងរស់នៅក្នុងជំរំភៀសសឹកជាង ១ពាន់គ្រួសារ ក្នុងខេត្តបន្ទាយមានជ័យ កំពុងអន្ទះសារក្នុងចិត្តរង់ចាំដំណោះស្រាយពីរដ្ឋាភិបាល ស្របពេលដែលលំនៅឋានពួកគាត់ត្រូវយោធាថៃព័ទ្ធយក និងដាក់ទូកុងតឺន័ររាំងខ្ទប់មិនឱ្យពួកគាត់វិលទៅវិញឡើយ។
អ្នកភូមិខ្លះមានអារម្មណ៍តានតឹងក្នុងចិត្ត ដោយសារស្តាយស្រណោះភូមិកំណើត និងផ្ទះសម្បែង ដែលខិតខំសន្សំប្រាក់សាងសង់ ត្រូវយោធាសៀមឈូសកម្ទេចចោល។
ពលរដ្ឋរងគ្រោះដោយសារថៃឈ្លានពានរស់នៅភូមិជោគជ័យ លោក សួន សុផុន អាយុ ៤៣ឆ្នាំ ប្រាប់វីអូឌីនៅថ្ងៃទី០៦ ខែមករាថា ផ្ទះ និងដីធ្លីរបស់លោក ក្នុងភូមិជោគជ័យត្រូវយោធាថៃព័ទ្ធយកទាំងមូល ហើយពួកលោកបន្តរស់នៅក្នុងជំរំភៀសសឹកជាង ២០ថ្ងៃកន្លងទៅនេះ បានត្រឹមតែមួយរស់ៗ គ្មានឱកាសរកប្រាក់ដោះស្រាយជីវភាព និងដោះបំណុលឡើយ។
លោកថា ថ្វីត្បិតអាជ្ញាធរ និងសប្បុសជនឧបត្ថម្ភសម្ភារប្រើប្រាស់ និងថវិកាតិចតូចក្តី តែអ្នកភូមិមានទុក្ខកង្វល់ធំធេងពីជោគវាសនាគ្រួសារ ប្រៀបដូចចករសាត់គ្មានកោះត្រើយ។ រីឯដំណឹងនៃការដោះស្រាយបញ្ហារបស់ពួកគាត់ពីសំណាក់ អាជ្ញាធរនៅមិនទាន់ច្បាស់លាស់នៅឡើយទេ។
លោកថា៖ «ពេលគេព័ទ្ធអ៊ីចឹង យើងមានអារម្មណ៍សោកស្តាយតែមិនដឹងធ្វើម៉េច កម្លាំងឈើឈាមយើង ខំរកតាំងពីណាពីណី ពាក់កណ្ដាលជីវិតហើយ ឥលូវគេបំផ្លាញចោលអស់»។
ពលរដ្ឋរងគ្រោះម្នាក់ទៀតរស់នៅឃុំជោគជ័យ លោក ចាន់ បូនី ប្រាប់វីអូឌីថា យោធានៅបន្តវាតទីរំកិលចូលដីខ្មែរជាបន្តបន្ទាប់នៅដើមឆ្នាំ២០២៦នេះ ដោយព័ទ្ធបន្លាលួស និងរាយទូកុងតឺន័រស្ទើរជារៀងរាល់ថ្ងៃ។
លោកថា ថៃបញ្ជូនគ្រឿងចក្រឈូសឆាយហេដ្ឋារចនាសម្ព័ន្ធក្នុងដីខ្មែរ ដែលពួកគេព័ទ្ធយកក្នុងតំបន់នោះ។
លោកថា៖ «វាប្រុងវាតយកផែនដីយើងទៀត ពង្រីករហូត វាអត់ប្រុងធ្វើសកម្មភាព ពង្រីករហូតវាអត់ឈប់ធ្វើសកម្មភាព។ បានប៉ុណ្ណឹងវាអត់យកប៉ុណ្ណឹង វាចេះតែពង្រីក»។
គិតត្រឹមថ្ងៃទី០៦ ខែមករា ភូមិព្រៃចាន់ និងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ត្រូវយោធាថៃរាយបន្លាលួសដាក់ឃាំងកុងតឺន័រ និងដោតទង់ជាតិថៃ ហាមមិនឱ្យពលរដ្ឋខ្មែរម្ចាស់ស្រុកចូលទៅតំបន់នោះជាច្រើនថ្ងៃមកហើយ។
ពលរដ្ឋរស់នៅភូមិព្រៃចាន់ ២៧០ គ្រួសារ និងភូមិជោគជ័យជាង ៧០០គ្រួសារ សរុបជាង ១ពាន់គ្រួសារ ស្មើនឹងមនុស្សជាង ៥ពាន់នាក់ បន្តរស់នៅក្នុងជំរំភៀសសឹកដែលអាជ្ញាធររៀបចំ ក្នុងវត្តចាន់ស៊ី ស្រុកអូរច្រៅ ខេត្តបន្ទាយមានជ័យ។ រីឯផ្ទះពលរដ្ឋជាង ៤០០ខ្នង ត្រូវអាជ្ញាធរថៃឈូសកម្ទេចឱ្យរាបដល់ដី ហើយទ្រព្យសម្បត្តិរបស់ពួកគាត់ក៏យោធាថៃយកទៅអស់ដែរ។
ចំណែកឯកុមារភៀសសឹករាប់រយនាក់ កំពុងរស់នៅក្នុងជំរំ អាជ្ញាធរបានរៀបចំសាលារៀនបណ្ដោះអាសន្ននៅទីនោះ។
ក្រសួងការពារជាតិកម្ពុជា នៅថ្ងៃទី០៦ ខែមករា បានចេញសេចក្តីប្រកាសព័ត៌មានមួយ តាមរយៈកំណត់ទូតដោយស្នើជាថ្មីទៅកាន់ភាគីថៃ ដោយគ្រោងនឹងរៀបចំកិច្ចប្រជុំពិសេសរបស់គណៈកម្មការចម្រុះខណ្ឌសីមាព្រំដែនគោក កម្ពុជា-ថៃ នៅសប្តាហ៍ទី២ ឬសបា្តហ៍ទី៣ ក្នុងមករានេះធ្វើឡើងនៅខេត្តសៀមរាប ក្នុងគោលបំណងដោះស្រាយការងារវាស់វែងព្រំដែន និងបញ្ហាយោធាថៃកំពុងធ្វើសកម្មភាពរំលោភបំពានបូរណភាពទឹកដី។
ប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា នៅថ្ងៃទី០៦ ខែមករា បានបង្ហោះសារបញ្ជាក់ពីខ្លឹមសារសន្និសីទសារព័ត៌មានថា កិច្ចពិភាក្សាអំពីការងារវាស់វែងខណ្ឌសីមាកម្ពុជា-ថៃ នឹងបន្តចុះអនុវត្តការងារវាស់វែង និងបោះបង្គោលបណ្ដោះអាសន្នលើដីជាក់ស្តែង នៅចន្លោះបង្គោលព្រំដែនលេខ ៤២-៤៧ ក្នុងភូមិសាស្ត្រភូមិជោគជ័យ និងភូមិព្រៃចាន់ ខេត្តបន្ទាយមានជ័យ។
លោកថា៖ «កម្ពុជាបានដាក់សំណើទៅកាន់ភាគីថៃ កាលពីថ្ងៃទី២៨ធ្នូ ដើម្បីសុំបើកកិច្ចប្រជុំពិសេស ក្នុងសប្ដាហ៍ទី០១នៃខែមករានេះ តែសំណើនេះត្រូវបានភាគីថៃសុំលើកពេល ក្រោមមូលហេតុរង់ចាំនីតិវិធីផ្ទៃ។ រដ្ឋលេខាធិការដ្ឋានកិច្ចការព្រំដែនបានដាក់សំណើលើកទី២ ដើម្បីសុំបើកកិច្ចប្រជុំពិសេស ពិភាក្សាពីការវាស់វែងខណ្ឌសីមា ព្រមទាំងដោះស្រាយបញ្ហាដែលយោធាថៃកំពុងធ្វើសកម្មភាពរំលោភបូរណភាពទឹកដីកម្ពុជា ឈូសឆាយផ្ទះសម្បែងទ្រព្យសម្បត្តិកម្ពុជា»។
ជុំវិញរឿងនេះ អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន យល់ថា រដ្ឋាភិបាលកម្ពុជាគួរតែស្វែងរកដីនៅកន្លែងផ្សេង ដើម្បីសាងសង់ផ្ទះជូនពលរដ្ឋរងគ្រោះ ដែលមិនអាចវិលទៅផ្ទះវិញ ដោយធ្វើយ៉ាងណាឱ្យពួកគាត់មានជម្រករស់នៅចិញ្ចឹមជីវិត។
លោកថា បញ្ហានេះ ជាការទទួលខុសត្រូវរបស់រដ្ឋាភិបាលត្រូវដោះស្រាយជាបន្ទាន់ ប្រសិនបើទុកយូរនឹងប៉ះពាល់ពលរដ្ឋធ្ងន់ធ្ងរ ។
លោកថា៖ «បើគាត់អត់ធ្វើការងារ បានលុយណាសងធនាគារគួរតែដោះស្រាយបំណុល ឬលុបចោលបំណុល។ នេះជារឿងសំខាន់ ផ្តល់ការងារមុខរបរដែលពួកគាត់អាចធ្វើបានដើម្បីចិញ្ចឹមជីវិត»។
របាយការណ៍របស់អង្គភាពអ្នកនាំពាក្យរដ្ឋាភិបាល ឱ្យដឹងថា គិតត្រឹមម៉ោង៦ល្ងាច ថ្ងៃទី៥ ខែមករា ឆ្នាំ២០២៦ មានពលរដ្ឋភៀសសឹកជាង ៤០ម៉ឺននាក់ ហើយដែលបានវិលត្រឡប់ទៅលំនៅឋានវិញ ក្នុងចំណោមពលរដ្ឋភៀសសឹកសរុបជាង ៦៤ម៉ឺននាក់ បើតាមរបាយការណ៍នៅមានពលរដ្ឋខ្មែរជាង២០ម៉ឺននាក់ទៀត កំពុងរស់នៅស្ថិតក្នុងអនាគតមិនច្បាស់លាស់នៅឡើយ ទោះមានបទឈប់បាញ់៕
