ខួបមួយឆ្នាំគត់នៃមរណភាពអ្នកនយោបាយ និងជាសកម្មជនតស៊ូមតិ លោក លិម គិមយ៉ា បានឈានចូលមកដល់នៅថ្ងៃទី៧ ខែមករា ឆ្នាំ២០២៦នេះ ក្រោយលោកបានបាត់បង់ជីវិតដោយសារការលបបាញ់ប្រហារនៅកណ្ដាលទីក្រុងបាងកក ប្រទេសថៃ កាលពីឆ្នាំមុន។
បើតាមកូនប្រុសលោក លិម គិមយ៉ា គឺលោក លិម ថូម៉ាស់ សំណាង បានបង្ហោះលើគណនីហ្វេសប៊ុកលោកថា កម្មវិធីបុណ្យខួបមួយឆ្នាំឪពុករបស់លោក នឹងប្រព្រឹត្តទៅនៅថ្ងៃទី១១ ខែមករា នៅប្រទេសបារាំង។
លោក លិម គិមយ៉ា គឺជាអតីតតំណាងរាស្ត្រគណបក្សសង្គ្រោះជាតិ និងត្រូវបានគេស្គាល់ថាជាអ្នកតស៊ូមតិឥតរួញរាម្នាក់ ទាំងនៅក្នុងសភា និងក្នុងអំឡុងពេលដែលលោកនិរទេសខ្លួន។
ប៉ុន្តែជីវិតរបស់លោកត្រូវបានខ្មាន់កាំភ្លើងឆក់យកទៅនៅកណ្ដាលទីក្រុងបាងកក ប្រទេសថៃ ក្នុងពេលលោកត្រឡប់មកពីធ្វើដំណើរកម្សាន្តជាមួយភរិយា នៅថ្ងៃទី៧ ខែមករា ឆ្នាំ២០២៥។ មុនមានឃាតកម្ម លោក លិម គិមយ៉ា បានបង្ហោះសាររិះគន់ជាច្រើន ទាក់ទិននឹងការរៀបចំព្រឹត្តិការណ៍សាទរកម្ពុជា ដែលដឹកនាំធ្វើឡើងដោយកូនប្រុសពៅរបស់លោក ហ៊ុន សែន គឺលោក ហ៊ុន ម៉ានី ថាជាព្រឹត្តិការណ៍មួយពេលខ្លី គ្មានស្ថិរភាព និងមិនបានផ្តល់ប្រយោជន៍អ្វីដល់ប្រជាពលរដ្ឋ។
ក្រោយឃាតកម្មមួយថ្ងៃ ឃាតករដែលត្រូវបានស្គាល់ថាជាអតីតទាហានជើងទឹក ជនជាតិថៃ ឈ្មោះ អេកាឡាក់ ផែណយ (Ekkalak Phaenoi) ត្រូវបានអាជ្ញាធរចាប់ខ្លួន ក្រោយរូបគេបានរត់គេចចូលមកទឹកដីកម្ពុជា ត្រង់ស្រុកមោងឫស្សី ខេត្តបាត់ដំបង។ បន្ទាប់ពីផ្អឹបសំណុំរឿងអស់រយៈពេល៩ខែ តុលាការប្រទេសថៃបានបើកការជំនុំជម្រះ និងបានកាត់ទោសជនល្មើសរូបនេះ ឱ្យជាប់ពន្ធនាគារអស់មួយជីវិត ដោយបន្ធូរបន្ថយពីទោសប្រហារជីវិត ដោយសាររូបគេបានសារភាព។ លើសពីនេះ តុលាការបានបង្គាប់ឱ្យសងសំណង៥ម៉ឺន ៤ពាន់ដុល្លារទៅកាន់គ្រួសារលោក លិម គិមយ៉ា ផងដែរ។
ក្រោយការប្រកាសសាលក្រមនៅថ្ងៃទី៣ ខែតុលា បណ្ដាញសារព័ត៌មានអន្តរជាតិបានចុះផ្សាយថា ភរិយាលោក លិម គិមយ៉ា គឺអ្នកស្រី លិម អានី ម៉ារី ប្រហែលជាពេញចិត្តនឹងការសម្រេចរបស់តុលាការថៃ ប៉ុន្តែអ្នកស្រីបន្តចោទសួរថា តើនរណាជាអ្នកបញ្ជាឲ្យបាញ់សម្លាប់ស្វាមីអ្នកស្រី និងចង់ឲ្យរដ្ឋអំណាចថៃបំភ្លឺជុំវិញឃាតកម្មនោះបន្ថែមទៀត។
ការទាមទារនេះ ក៏ព្រោះតែជនជាតិខ្មែរពីររូប ដែលត្រូវបានអាជ្ញាធរប្រទេសថៃ កំណត់មុខសញ្ញា ថាមានការជាប់ពាក់ព័ន្ធនឹងឃាតកម្មនេះ មិនត្រូវបានតុលាការលើកយកមកនិយាយឡើយ។
ជនជាតិខ្មែរទាំងពីររូប គឺលោក ពេជ្រ គឹមស៊្រិន ជាមនុស្សជំនិតអភិបាលរាជធានីភ្នំពេញ លោក ឃួង ស្រេង និងម្នាក់ទៀតឈ្មោះ លី រតនរស្មី ដែលមានឈ្មោះភាសាថៃថា ស៊ុមវ៉ាំង បាំរុងគីត ដែលជាអតីតសកម្មជនគណបក្សសង្គ្រោះជាតិ និងចុះចូលជាមួយគណបក្សកាន់អំណាច ហើយក្លាយជាទីប្រឹក្សារបស់លោក ហ៊ុន សែន ប្រធានព្រឹទ្ធសភាកម្ពុជា។
បើទោះបី លោក លិម គិមយ៉ា បានបាត់បង់ជីវិតទៅហើយក្ដី តែអង្គការប្រជាធិបតេយ្យខ្មែរ (KDO) បានលើកឡើងថា ស្មារតីរបស់លោកនៅតែបន្តរស់រានជានិច្ច។ តាមរយៈលិខិតរំឭកការកាន់ទុក្ខ អង្គការនេះ បានបញ្ជាក់ពីជំហរឈរនៅជាមួយក្រុមគ្រួសារ មិត្តភ័ក្ត និងប្រជាពលរដ្ឋខ្មែរគ្រប់រូប បន្តថ្កោលទោសជនណាដែលនៅពីក្រោយឃាតកម្មនេះ ដោយពួកគេចង់ឃើញប្រទេសកម្ពុជា គ្រប់គ្រងដោយការគោរពសិទ្ធិមនុស្ស មានយុត្តិធម៌សង្គម និងមេត្តាធម៌ ជាជាងការគ្រប់គ្រងដោយប្រើអំពើហិង្សាក្នុងឲ្យមានភាពភ័យខ្លាច។
នាយកកម្មវិធីតស៊ូមតិអង្គការប្រជាធិបតេយ្យខ្មែរ (KDO) លោក សេង វណ្ណលី ចាត់ទុកមរណភាព លោក លិម គិមយ៉ា ជាភស្តុតាងបញ្ជាក់ពីការគាបសង្កត់ឆ្លងដែន ដែលរបបផ្ដាច់ការប្រើប្រាស់តាមកម្ចាត់សំឡេងប្រឆាំង។ លោកបន្តថា រដ្ឋាភិបាលកម្ពុជាត្រូវបង្ហាញភាពស្អាតស្អំរបស់ខ្លួន ដោយបញ្ជូនជនសង្ស័យទាំងពីរនាក់ ទៅឱ្យអាជ្ញាធរថៃ និងបារាំងកាត់ទោសតាមច្បាប់។
លោក សេង វណ្ណលី ថ្លែងថា៖ «យើងមិនអាចបណ្តោយឱ្យឃាតកម្មនយោបាយក្លាយជារឿងធម្មតា ហើយឃាតករនៅតែបន្តមានសេរីភាព ក្រៅសំណាញ់ច្បាប់នោះទេ។ ការបញ្ចប់ភាពគ្មានទោសពៃរ៍ចំពោះអ្នកដៃដល់ និងអ្នកបញ្ជានៅពីក្រោយខ្នង គឺជាគន្លឹះតែមួយគត់ដើម្បីការពារជីវិតសកម្មជនដទៃទៀត»។
បើតាមអង្គការប្រជាធិបតេយ្យខ្មែរ ការតស៊ូ និងការបញ្ចេញមតិរបស់ លោក លិម គិមយ៉ា កាលដែលលោកនៅមានជីវិត បានបង្ហាញឱ្យឃើញនូវបីចំណុចធំៗនោះ គឺការមានមតិផ្ទុយ មិនមែនជាអំពើក្បត់ជាតិ ការបញ្ចេញមតិខុសគ្នា គឺជាកាតព្វកិច្ចស្នេហាជាតិ និងអាណត្តិពិតប្រាកដរបស់រដ្ឋាភិបាល ត្រូវតែកើតចេញពីឆន្ទៈសេរីរបស់ប្រជាពលរដ្ឋតែប៉ុណ្ណោះ៕
