កម្មករ-កម្មការិនីប្រមាណ ២០០០នាក់ ធ្វើការនៅរោងចក្រផលិតស្បែកជើង យូ ជា ឆេង (YJC) នៅស្រុកគងពិសី ខេត្តកំពង់ស្ពឺ បានផ្ទុះការតវ៉ាបិទកំណាត់ផ្លូវជាតិលេខ៣ នាព្រឹកថ្ងៃទី០៧ ខែមករានេះ ដោយទាមទារឱ្យថៅកែរោងចក្រ បញ្ឈប់អ្នកគ្រប់គ្រងជនជាតិចិនម្នាក់ពីការងារ ដែលពួកគាត់ថាបានប្រើពាក្យម៉ាក់ងាយដល់ជនជាតិខ្មែរ និងថ្នាក់ដឹកនាំខ្មែរថាទន់ខ្សោយ ទើបសៀមឈ្លានពានទឹកដី ព្រមទាំងទាមទារនូវលក្ខខណ្ឌការងារមួយចំនួនផងដែរ។
កម្មការិនី ម៉ៅ សុផល អះអាងថាធ្វើការនៅរោងចក្រ យូ ជា ឆេង អ៊ិនធើណាសិនណល ឯ.ក បានឱ្យដឹងថា ការដែលពួកគាត់នាំគ្នាតវ៉ាដោយបិទកំណាត់ផ្លូវជាតិលេខ៣នេះ ដោយសារតែខាងរោងចក្របានកាត់លុយបំណាច់ឆ្នាំកម្មករ និងបានកាត់លុយពេលកម្មករជិះឡានស្ទះផ្លូវមកយឺត។ ហើយចំណុចសំខាន់ដែលកម្មករទទួលយកមិនបាននោះ គឺអ្នកគ្រប់គ្រងជាជនជាតិចិនម្នាក់ បានប្រើពាក្យពេជចន៍ម៉ាក់ងាយដល់កម្មករ និងថ្នាក់ដឹកនាំប្រទេសកម្ពុជា ស្របពេលដែលសៀមឈ្លានពានទឹកដីកម្ពុជា។
អ្នកស្រីបន្តថា៖ «ពាក្យធ្ងន់ធ្ងរនោះ ទី១គាត់ថាអញ្ចេក ខ្មែរអន់ ខ្មែរខ្ជិល ចឹងហើយបានពួកសៀមចង់បានទឹកដីនោះ មកពីខ្មែរយើងខ្ជិលហើយអន់ទៀត អាហ្នឹងពាក្យគាត់មើលងាយ ខ្ញុំទទួលយកអត់បានទេ ពួកខ្ញុំជាកម្មករទាំងអស់គឺទទួលយកពាក្យហ្នឹងអត់បានទេ ពួកខ្ញុំឈឺចាប់ណាស់ ចឹងបងប្អូនទាំងអស់គ្នាគួរគិតមើលពិចារណាត្រង់កន្លែងហ្នឹង វាមិនត្រឹមមើលងាយដល់តែបុគ្គលម្នាក់ទេ វាមើលងាយដល់ប្រទេសជាតិទាំងមូល[…] សូមជួយមើលជួយដោះស្រាយឱ្យពួកខ្ញុំផង ពួកខ្ញុំអត់ចង់បានអីក្រៅពីថាខ្មែរចង់មានសុវត្ថិភាពទេ អត់មានចង់ឱ្យមានជនជាតិណាមកនិយាយមើលងាយចឹងទេ»។
កម្មករធ្វើការនៅរោងចក្រ YJC ម្នាក់ទៀត លោក សុខ រិន បានលើកឡើងស្រដៀងគ្នាដែរថា បើទោះជាថ្ងៃនេះជាថ្ងៃបុណ្យជាតិ ដែលកម្មករត្រូវឈប់សម្រាកតាមច្បាប់ការងារ ប៉ុន្តែខាងរោងចក្របានឱ្យកម្មករមកធ្វើការជាធម្មតា។ យ៉ាងណា លោកថា កម្មករមិនបានខឹងសម្បារនឹងការធ្វើការថ្ងៃបុណ្យជាតិនោះទេ គឺពួកគាត់នៅតែមកធ្វើការធម្មតា ប៉ុន្តែអ្វីដែលកម្មករឈឺចាប់ និងផ្ទុះកំហឹងឈានដល់ការតវ៉ានេះ ដោយសារតែអ្នកគ្រប់គ្រងដែលជាជនជាតិចិនម្នាក់ បានប្រើប្រាស់ពាក្យសម្តីមើលងាយដល់កម្មករខ្មែរ និងប្រទេសកម្ពុជា។
លោកថា៖ «ចឹងខឹងរឿងដែលអ្នកគ្រប់គ្រងចិនគាត់មើលងាយប្រទេសកម្ពុជា ក្រ អន់ខ្សោយ បានប្រទេសគេឈ្លានពាន ចឹងបានបងប្អូនយើងផ្ទុះការតវ៉ា។ ពេលវេលានេះ ខ្ញុំជាបេះដូងខ្មែរ កូនខ្មែរមួយរូបដែរ ដែលកំពុងតែឈឺចាប់ ដែលគេកំពុងជាន់ហើយ ហេតុអីបានបុគ្គលម្នាក់នេះមកជាន់ពួកខ្ញុំថែមពីលើទៀត។ ហើយមួយដែលខ្ញុំទាមទារបន្ថែមទៀតបងប្អូន គ្រាន់តែចង់បានថា រោងចក្រផ្តល់លុយបំណាច់ឆ្នាំឱ្យបងប្អូនកម្មករកម្មការិនីយើងទាំងអស់គ្នា ហើយនិងលុយម៉ាស៊ីន លុយផ្សេងៗមិនថាគាត់ធ្វើដៃ ឬម៉ាស៊ីនទេ ត្រូវតែមានលុយជំនាញឱ្យពួកគាត់»។
បើតាមកម្មកររោងចក្រ YJC មួយរូបទៀត ឈ្មោះ សឿន សុវឿត ក្នុងការចរចារកដំណោះស្រាយនៅព្រឹកមិញនេះ គឺអ្នកគ្រប់គ្រងជនជាតិចិនម្នាក់ដែលប្រមាថជនជាតិខ្មែរ រឿងសៀមឈ្លានពានទឹកដី បានយល់ព្រមសុំទោសជាសាធារណៈ ខណៈការឈប់សម្រាកថ្ងៃបុណ្យជាតិ ៧មករានេះ ខាងក្រុមហ៊ុនបានយល់ព្រមឱ្យកម្មករឈប់សម្រាកនៅថ្ងៃទី១៧ខែមករាជំនួសវិញ។
អំឡុងពេលកម្មករតវ៉ាបិទកំណាត់ផ្លូវជាតិលេខ៣ នៅមុខរោងចក្រនោះ គេសង្កេតឃើញប្រធានមន្ទីរការងារខេត្តកំពង់ស្ពឺ និងអាជ្ញាធរពាក់ព័ន្ធ បានចុះទៅសម្របសម្រួល និងរកដំណោះស្រាយ ដោយបានស្នើឱ្យកម្មករ-កម្មការិនីទាំងនោះរំសាយការតវ៉ាបិទផ្លូវ និងទៅប្រមូលផ្តុំក្នុងរោងចក្រវិញ។
វីអូឌី មិនអាចសុំការបញ្ជាក់ជុំវិញករណីនេះ ពីប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តកំពង់ស្ពឺ លោក ចឹក បូរិន និងតំណាងភាគីរោងចក្រ យូ ជា ឆេង អ៊ិនធើណាសិនណល់ បានទេនៅរសៀលថ្ងៃពុធនេះ។យ៉ាងណា បើតាមកម្មករ ពួកគេព្រមចូលធ្វើវិញនៅថ្ងៃស្អែក ក្រោយពីតម្រូវឱ្យមេការចិន ដែលថា បានប្រមាថខ្មែរជុំវិញការឈ្លានពានរបស់ថៃនេះ ធ្វើការសុំទោស កម្មករជាសាធារណៈ។
ចំណែក អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ស៊ុន មេសា បានឱ្យដឹងក្នុងបណ្តាញសង្គមហ្វេសប៊ុករបស់លោកថា ករណីតវ៉ារបស់កម្មករកម្មការិនីរោងចក្រ យូ ជា ឆេង នេះបានដោះស្រាយចប់សព្វគ្រប់ហើយ នៅរសៀលថ្ងៃទី០៧ ខែមករានេះ។
លោកបន្តថា ក្រោយការពិភាក្សា និងសម្របសម្រួលរបស់មន្ត្រីក្រសួងការងារ និងអ្នកពាក់ព័ន្ធ គឺភាគីទាំងពីរ បានឯកភាពគ្នាស្រុះស្រួលចំនួន ១០ចំណុច ក្នុងនោះរួមមាន ការបញ្ឈប់ការប្រើប្រាស់ពាក្យមិនសមរម្យ និងជេរប្រមាថលើកម្មករ ការអនុញ្ញាតឱ្យកម្មករដែលមានជំងឺដែលមានវេជ្ជបញ្ជាអាចឈប់សម្រាក អនុវត្តការឈប់សម្រាកប្រចាំឆ្នាំដែលធ្វើឡើងទៅតាមវេនដើម្បីធានាខ្សែច្រវាក់ផលិតកម្ម និងការមិនគុំគួននឹងគ្នាជាដើម។
អ្នកនាំពាក្យរូបនេះបានអះអាងក្នុងសំណេរដើមថា៖ «ក្រោមការសម្របសម្រួល និងយកចិត្តទុកដាក់ដោះស្រាយភ្លាមៗ កង្វល់របស់បងប្អូនកម្មករត្រូវបានដោះស្រាយចប់សព្វគ្រប់ ហើយកម្មករក៏នឹងវិលចូលបម្រើការងារវិញជាធម្មតា នៅថ្ងៃទី៨ ខែមករា ឆ្នាំ២០២៦ ជាធម្មតាឡើងវិញ»។
បើតាមក្រុមកម្មករ រោងចក្រយូជាឆេងជារោងចក្រផលិតស្បែកជើងគ្រប់ប្រភេទ និងបានបើកដំណើរការរយៈពេលប្រមាណ ២ឆ្នាំមកហើយ បន្ទាប់ពីមានការដូរថៅកែរោងចក្រ៕
