ប្រទេសចិន បានថ្កោលទោសសហរដ្ឋអាមេរិកចំពោះ “ការជ្រៀតជ្រែកយ៉ាងគឃ្លើន” ក្នុងប្រទេសវេណេស៊ុយអេឡា ដោយចោទប្រកាន់ថាបានរំលោភច្បាប់អន្តរជាតិ និងរំលោភលើអធិបតេយ្យភាពរបស់ប្រទេសនេះ បន្ទាប់ពីសេចក្តីថ្លែងការណ៍របស់លោក ដូណាល់ ត្រាំ ថាអាមេរិកនឹងយកប្រេងរបស់ប្រទេសវេណេស៊ុយអេឡា។
តាម South China Morning Post កាលពីថ្ងៃ៧មករា អ្នកនាំពាក្យក្រសួងការបរទេសចិន លោកស្រី Mao Ning បានពណ៌នាអំពីសកម្មភាពរបស់សហរដ្ឋអាមេរិក នៅក្នុងប្រទេសអាមេរិកខាងត្បូងមួយនេះថា ជាការបំពានលើបទដ្ឋានអន្តរជាតិ។
លោកស្រី Mao មានប្រសាសន៍ថា៖ «វេណេស៊ុយអេឡា គឺជាប្រទេសមានអធិបតេយ្យភាព ហើយមានអធិបតេយ្យភាពអចិន្ត្រៃយ៍ពេញលេញលើធនធានធម្មជាតិ និងសកម្មភាពសេដ្ឋកិច្ចទាំងអស់របស់ខ្លួន»។
កាលពីថ្ងៃ៦ខែមករា ប្រធានាធិបតីអាមេរិក បានប្រកាសថា វេណេស៊ុយអេឡានឹងប្រគល់ប្រេងរហូតដល់ ៥០លានបារ៉ែលទៅឱ្យអាមេរិក ដោយលើកឡើងថា ប្រាក់ចំណូលដែលទទួលបាននឹងត្រូវប្រើប្រាស់ ដើម្បីផ្តល់ប្រយោជន៍ដល់ប្រទេសទាំងពីរ។
សកម្មភាពនេះ បានបង្ហាញពីការកើនឡើងនូវកិច្ចខិតខំប្រឹងប្រែង ដើម្បីពង្រីកឥទ្ធិពលសេដ្ឋកិច្ចរបស់អាមេរិកនៅទូទាំងតំបន់អាមេរិកឡាទីន បន្ទាប់ពីការវាយឆ្មក់យោធាកាលពីថ្ងៃ៣ខែមករា ដើម្បីទម្លាក់មេដឹកនាំវេណេស៊ុយអេឡា លោក នីកូឡាស ម៉ាឌូរ៉ូ និងការអះអាងជាបន្តបន្ទាប់របស់ លោក ត្រាំ ថា សហរដ្ឋអាមេរិកនឹង “គ្រប់គ្រង” វេណេស៊ុយអេឡាជាបណ្តោះអាសន្ន។
នៅក្នុងការបង្ហោះលើបណ្តាញសង្គម កាលពីថ្ងៃ៧ខែមករា លោក ត្រាំ បានសរសេរថា៖ «ខ្ញុំមានសេចក្តីសោមនស្សរីករាយ សូមជម្រាបជូនថា អាជ្ញាធរបណ្តោះអាសន្ននៅក្នុងប្រទេសវេណេស៊ុយអេឡា នឹងប្រគល់ប្រេងដែលមានគុណភាពខ្ពស់ និងជាប់ទណ្ឌកម្ម ចន្លោះពី ៣០ ទៅ ៥០លានបារ៉ែល មកឱ្យសហរដ្ឋអាមេរិក»។
លោក ត្រាំ បានមានប្រសាសន៍ថា ប្រេងនោះនឹងត្រូវលក់ក្នុងតម្លៃទីផ្សារ ដោយប្រាក់ដែលទទួលបាននឹងត្រូវ “គ្រប់គ្រង” ដោយរូបលោកផ្ទាល់ ក្នុងនាមជាប្រធានាធិបតីអាមេរិក។ លោកបានបន្ថែមថា ទាំងប្រជាជនវេណេស៊ុយអេឡា និងប្រជាជនអាមេរិកនឹងទទួលបានផលប្រយោជន៍។
កាលពីថ្ងៃ៧ខែមករា លោកស្រី ម៉ៅ នៃក្រសួងការបរទេសចិន បានរិះគន់សហរដ្ឋអាមេរិកយ៉ាងខ្លាំងចំពោះ “ការរំលោភច្បាប់អន្តរជាតិ ការរំលោភលើអធិបតេយ្យភាពរបស់វេណេស៊ុយអេឡា និងការធ្វើឱ្យប៉ះពាល់ដល់សិទ្ធិរបស់ប្រជាជនវេណេស៊ុយអេឡា”។
លោកស្រីបានបន្តថា កិច្ចសហប្រតិបត្តិការរបស់ចិនជាមួយវេណេស៊ុយអេឡា គឺផ្អែកលើការគោរពគ្នាទៅវិញទៅមករវាង “រដ្ឋដែលមានអធិបតេយ្យភាព” ទាំងពីរ ហើយ “សិទ្ធិ និងផលប្រយោជន៍ស្របច្បាប់របស់ចិននៅក្នុងប្រទេសវេណេស៊ុយអេឡា ត្រូវតែត្រូវបានការពារ”។
លោក ត្រាំ បានកត់សម្គាល់ថា សហរដ្ឋអាមេរិកនឹងបន្តលក់ប្រេងទៅឱ្យប្រទេសចិន និងអ្នកនាំចូលធំៗផ្សេងទៀត នៅពេលដែលផលិតកម្មត្រឡប់ទៅរកភាពប្រក្រតីវិញ។
ទោះជាយ៉ាងណាក៏ដោយ យោងតាមសារព័ត៌មាន ABC News សហរដ្ឋអាមេរិកបានទទូចឱ្យវេណេស៊ុយអេឡា កាត់បន្ថយការចូលរួមផ្នែកសេដ្ឋកិច្ចជាមួយប្រទេសចិន រុស្ស៊ី អ៊ីរ៉ង់ និងគុយបា។
ក្នុងការឆ្លើយតបទៅនឹងសំណួរអំពីរបាយការណ៍របស់ ABC News លោកស្រី ម៉ៅ បានចោទប្រកាន់សហរដ្ឋអាមេរិកអំពី “ការជ្រៀតជ្រែកយ៉ាងគឃ្លើន” នៅក្នុងប្រទេសវេណេស៊ុយអេឡា ហើយបានហៅការទាមទាររបស់អាមេរិក ដែលឱ្យប្រទេសនេះផ្តល់អាទិភាពដល់អាមេរិក ក្នុងការគ្រប់គ្រងធនធានប្រេងរបស់ខ្លួនថាជា “សកម្មភាពគឃ្លើនបែបបងធំ”៕
