លោក Chen Zhi ដែលជាស្ថាបនិកក្រុមហ៊ុន Prince Group និងជាបុគ្គលដែលរងទណ្ឌកម្មពីសហរដ្ឋអាមេរិក ចំពោះការដឹកនាំប្រតិបត្តិការបោកប្រាស់ និងការគ្រប់គ្រងលើរូបិយប័ណ្ណគ្រីបតូ(cryptocurrency) ចំនួន ១៥ពាន់លានដុល្លារដែលត្រូវបានរឹបអូសនោះ ត្រូវបានចាប់ខ្លួននៅក្នុងប្រទេសកម្ពុជា និងត្រូវបានបញ្ជូនខ្លួនទៅកាន់ប្រទេសចិន កាលពីព្រឹកថ្ងៃទី៦ខែមករា ដើម្បីធ្វើការស៊ើបអង្កេត។
ក្រសួងយុត្តិធម៌សហរដ្ឋអាមេរិក បានចោទប្រកាន់លោកពីបទបោកប្រាស់តាមប្រព័ន្ធបច្ចេកវិទ្យា ការលាងលុយកខ្វក់ និងការត្រួតពិនិត្យលើការបង្ខំកម្លាំងពលកម្ម នៅក្នុងទីតាំងបោកប្រាស់ (scam compounds) ក្នុងប្រទេសកម្ពុជា។ ការរឹបអូសទ្រព្យសម្បត្តិដែលមានតម្លៃជាង ១៥ ពាន់លានដុល្លារ ជាប្រភេទគ្រីបតូ និងអចលនទ្រព្យ ត្រូវបានធ្វើឡើងនៅទូទាំងពិភពលោក ហើយក្រុមនេះត្រូវបានពិពណ៌នាថា ជាអង្គការឧក្រិដ្ឋកម្មដ៏ធំបំផុតមួយនៅអាស៊ី។ លោក Chen ក៏ត្រូវបានគេចោទប្រកាន់ផងដែរថា មានទំនាក់ទំនងជាមួយភ្នាក់ងារសម្ងាត់ចិន និងក្រុមបងធំ។
យោងតាមគេហទំព័រព័ត៌មានក្នុងស្រុកមួយ បានឱ្យដឹងថា លោក Chen Zhi ដែលជាមហាសេដ្ឋីរងការចោទប្រកាន់ថាជាម្ចាស់មជ្ឈមណ្ឌលបោកប្រាស់ និងដែលរងទណ្ឌកម្មពីសហរដ្ឋអាមេរិក រួមទាំងការរឹបអូសយកកាក់ Bitcoin ដ៏ច្រើនសន្ធឹកសន្ធាប់ដែលមានតម្លៃ ១៥ ពាន់លានដុល្លារ កាលពីខែតុលា ឆ្នាំ២០២៥ ត្រូវបានចាប់ខ្លួននៅក្នុងប្រទេសកម្ពុជា និងត្រូវបានបញ្ជូនខ្លួនទៅកាន់ប្រទេសចិន។
មហាសេដ្ឋីវ័យ ៣៧ ឆ្នាំរូបនេះ ត្រូវបានចោទប្រកាន់ពីបទដឹកនាំទីតាំងបោកប្រាស់ខ្នាតធំដ៏ល្បីល្បាញនៅក្នុងប្រទេសកម្ពុជា ហើយត្រូវបានគេចោទថាបានសន្សំទ្រព្យសម្បត្តិយ៉ាងច្រើនមហាសាល ក្នុងរយៈពេលមួយទសវត្សរ៍ចុងក្រោយនេះ។
សារព័ត៌មានភាសាអង់គ្លេសរបស់កម្ពុជា KiriPost បាននិយាយថា សារព័ត៌មាន Cambodia-China Times បានចុះផ្សាយព័ត៌មានអំពីការចាប់ខ្លួនChen Zhi ។
KiriPost បានដកស្រង់សម្តីថា៖ «អ្នករាយការណ៍ព័ត៌មានម្នាក់មកពី Cambodia-China Times បានទទួលព័ត៌មានថា លោក Chen Zhi ស្ថាបនិក និងជាប្រធានក្រុមហ៊ុន Prince Group ត្រូវបានចាប់ខ្លួននៅក្នុងប្រទេសកម្ពុជា និងត្រូវបានបញ្ជូនត្រឡប់ទៅប្រទេសចិនវិញ ដើម្បីទទួលការស៊ើបអង្កេតពីសំណាក់អាជ្ញាធរពាក់ព័ន្ធ»។
បើតាមAsia Financial ការបញ្ជូនខ្លួនមហាសេដ្ឋីដ៏ល្បីល្បាញរូបនេះ ទៅកាន់ប្រទេសចិន យ៉ាងឆាប់រហ័ស និងជាសម្ងាត់ ប្រហែលជាមិនមែនជារឿងគួរឱ្យភ្ញាក់ផ្អើលនោះទេ ដោយសារលោក Chen មានទំនាក់ទំនងយ៉ាងទូលំទូលាយជាមួយថ្នាក់ដឹកនាំជាន់ខ្ពស់នៃរដ្ឋាភិបាលកម្ពុជា ហើយការពិតនោះគឺថា ទីក្រុងប៉េកាំង ក៏ប្រហែលជាចង់ធានាឱ្យបានថា រូបលោកនឹងមិនមានទំនាក់ទំនងជាមួយមន្ត្រីអាមេរិក ឬមន្ត្រីបស្ចិមប្រទេសឡើយ។
លោក Chen Zhi ត្រូវបានគេសង្ស័យថា មានទំនាក់ទំនងជាមួយមន្ត្រីភ្នាក់ងារសម្ងាត់ចិន ទាំងនៅក្នុងប្រទេសកម្ពុជា និងនៅតាមទីតាំងជាច្រើនជុំវិញពិភពលោក រួមទាំងនៅទីក្រុងឡុងដ៍ ដែលមានសេចក្តីរាយការណ៍ថា លោកបានទិញយូនីត (ខុនដូ) ជាច្រើន រួមទាំងយូនីតមួយចំនួនដែលមានទីតាំងនៅជិតស្ថានទូតសហរដ្ឋអាមេរិកខ្លាំងតែម្តង។
ក្រសួងរតនាគារសហរដ្ឋអាមេរិក និងរដ្ឋាភិបាលអង់គ្លេស បានចាត់វិធានការបិទក្រុមហ៊ុន Prince Group កាលពីពាក់កណ្តាលខែតុលា។
ក្រសួងយុត្តិធម៌សហរដ្ឋអាមេរិក (DoJ) បាននិយាយថា ខ្លួនបានដាក់ពាក្យបណ្តឹងរឹបអូសទ្រព្យសម្បត្តិដ៏ធំបំផុតមិនធ្លាប់មាន ដើម្បីរឹបអូសយកកាក់ Bitcoin ដែលមានតម្លៃប្រហែល ១៥ ពាន់លានដុល្លារ ដែលបច្ចុប្បន្នកំពុងស្ថិតក្រោមការគ្រប់គ្រងរបស់សហរដ្ឋអាមេរិក។ អចលនទ្រព្យដែលមានតម្លៃ ១៧២ លានដុល្លារ ក៏ត្រូវបានរឹបអូសផងដែរនៅក្នុងប្រទេសអង់គ្លេស។
ក្រសួងបានបន្តថា វិវាទកម្មដែលត្រូវបានបើកចំហនៅក្នុងតុលាការសហព័ន្ធក្នុងទីក្រុងញូវយ៉ក បានចោទប្រកាន់លោក Chen Zhi ដែលជាអ្នកជំនួញខ្មែរ-ចិន ដែលបានបង្កើត និងធ្វើជាប្រធានក្រុមហ៊ុន Prince Group ថាបានជាប់ពាក់ព័ន្ធក្នុងការបោកប្រាស់តាមប្រព័ន្ធបច្ចេកវិទ្យា ការលាងលុយកខ្វក់ និងការដឹកនាំ “ប្រតិបត្តិការទីតាំងបោកប្រាស់ដោយបង្ខំកម្លាំងពលកម្មនៅទូទាំងប្រទេសកម្ពុជា” របស់ក្រុមនេះ៕
