ធនាគារជាតិនៃកម្ពុជា បានប្រកាសជាសាធារណៈនូវការផ្អាកប្រតិបត្តិការថ្មីរបស់ធនាគារព្រីនស៍ ដោយប្រគល់តួនាទីគ្រប់គ្រង និងចាត់ចែងប្រតិបត្តិការទៅឲ្យក្រុមហ៊ុនសវនកម្ម ដើម្បីជម្រះបញ្ជី និងចាត់ចែងទ្រព្យសម្បត្តិរបស់ធនាគារនេះ។
ការសម្រេចនេះ ធ្វើឡើងក្រោយម្ចាស់ភាគហ៊ុនធំរបស់ធនាគារព្រីនស៍ គឺលោក ចេន ហ្ស៊ី ត្រូវបានសមត្ថកិច្ចចាប់ខ្លួនបាន និងបញ្ជូនទៅប្រទេសចិន។
ក្រោយដំណឹងនៃការចាប់ខ្លួនរបស់មេបណ្ដាញឧក្រិដ្ឋកម្មឆបោកតាមអនឡាញ គឺលោក ចេន ហ្ស៊ី បានខ្ចរខ្ចារពាសពេញពិភពលោក ពេលនេះធនាគារព្រីនស៍របស់លោក ត្រូវបានធនាគារជាតិនៃកម្ពុជាដាក់ឱ្យនៅក្រោមការគ្រប់គ្រងរបស់ក្រុមហ៊ុនសវនកម្ម។
យោងតាមលិខិតរបស់ធនាគារជាតិនៃកម្ពុជា (NBC) ចុះផ្សាយថ្ងៃទី៨ ខែមករា ឆ្នាំ២០២៦ ប្រកាសឱ្យដឹងថា ធនាគារព្រីនស៍ ត្រូវផ្អាកការផ្តល់សេវាធនាគារថ្មីៗទាំងអស់ រួមទាំងការទទួលប្រាក់បញ្ញើ និងការផ្តល់ឥណទាន។
ដោយឡែក សម្រាប់អតិថិជនដែលមានប្រាក់បញ្ញើអាចទៅដកប្រាក់បានជាធម្មតា ដោយផ្អែកតាមលំដាប់អាទិភាពនៃច្បាប់ស្តីពីគ្រឹះស្ថានធនាគារនិងហិរញ្ញវត្ថុ។ ចំណែកអ្នកខ្ចីប្រាក់ ត្រូវបន្តបំពេញកាតព្វកិច្ចសងត្រឡប់មកវិញជាប្រក្រតី ដោយធនាគារជាតិ បានតែងតាំងក្រុមហ៊ុន ម៉ូរីស៊ុនកាក់ អ៊ឹម.ខេ.អេ អូឌីត-អាខោនធីង (Morisonkak MKA audit-accounting Co., Ltd) ជាអ្នកជម្រះបញ្ជី ដើម្បីគ្រប់គ្រង និងចាត់ចែងលើរាល់ប្រតិបត្តិការ និងទ្រព្យសម្បត្តិរបស់ធនាគារចាប់ពីពេលនេះតទៅ ស្របតាមច្បាប់ព្រះរាជាណាចក្រកម្ពុជា។
ការសម្រេចនេះ ធ្វើឡើងបន្ទាប់ពីម្ចាស់ភាគហ៊ុនធំរបស់ធនាគារព្រីសន៍ គឺលោក ចេន ហ្ស៊ី ត្រូវបានសមត្ថកិច្ចកម្ពុជា សហការជាមួយសមត្ថកិច្ចចិន ចាប់ខ្លួន និងបញ្ជូនទៅកាន់ប្រទេសចិនវិញ កាលពីថ្ងៃទី៦ ខែមករា ឆ្នាំ២០២៦។
នៅថ្ងៃទី៨ ខែមករា ដដែលនេះ ទិដ្ឋភាពនៅតាមសាខាមួយចំនួនរបស់ធនាគារព្រីនស៍ក្នុងរាជធានីភ្នំពេញ មានសភាពស្ងប់ស្ងាត់ ខណៈសន្តិសុខដែលយាមនៅមុខធនាគារមានទឹកមុខស្រពាប់ស្រពោន។
វីអូឌី បានព្យាយាមទាក់ទងបុគ្គលិកធនាគារព្រីនស៍ ដើម្បីសុំការអត្ថាធិប្បាយថាតើពួកគេនឹងត្រូវបាត់បង់ការងារឬយ៉ាងណា ប៉ុន្តែពួកគេបដិសេធ ក្រោមហេតុផលរក្សាការសម្ងាត់ផ្ទៃក្នុងរបស់ក្រុមហ៊ុន។
ប៉ុន្តែកាលពីខែវិច្ឆិកា ឆ្នាំ២០២៥ ពាក្យចចាមអារ៉ាម បានផ្សព្វផ្សាយថា បុគ្គលិកធនាគារព្រីនស៍ ត្រូវបានរំសាយ ដោយទុកតែបុគ្គលិកមួយចំនួនតូច ដើម្បីបម្រើសេវាកម្មចុងក្រោយតែប៉ុណ្ណោះ។
មុនការប្រកាសជាសាធារណៈរបស់ធនាគារជាតិនៃកម្ពុជា ធនាគារព្រីនស៍ កាលពីពាក់កណ្ដាលខែធ្នូ ឆ្នាំ២០២៥ បានទាក់ទងហៅអតិថិជនតាមរយៈទូរស័ព្ទឱ្យទៅបិទគណនីធនាគារ និងបានបង្វែរសាច់ប្រាក់ដែលសេសសល់ ក្នុងគណនីឱ្យទៅអតិថិជនផងដែរ។ បុគ្គលិកព្រីនស៍ បានបញ្ជាក់ថា ប្រតិបត្តិការនេះ ធ្វើឡើងដើម្បីចៀសវាងហានិភ័យណាមួយដែលកើតឡើងជាយថាហេតុ។
អ្នកឃ្លាំមើលកម្ពុជា លោក ម៉ែន ណាត អបអរចំពោះការសម្រេចចិត្តរបស់កម្ពុជា ដែលចូលរួមប្រតិបត្តិការចាប់ លោក ចេន ហ្ស៊ី។ យ៉ាងណា លោកបន្តជំរុញឱ្យរដ្ឋាភិបាលលោក ហ៊ុន ម៉ាណែត បន្តចាប់ខ្លួនមេក្លោង និងបោសសម្អាតបណ្ដាញឧក្រិដ្ឋកម្មផ្សេងទៀត ដែលកំពុងបន្តរីករាលដាលពាសពេញប្រទេស ដើម្បីស្ដារមុខមាត់កម្ពុជាឡើងវិញ។
លោក ម៉ែន ណាត ថ្លែងថា៖ «ការចាប់ខ្លួននេះ កម្ពុជាធ្វើត្រូវហើយ! ហើយមិនត្រូវបញ្ឈប់ត្រឹម ចេន ហ្ស៊ី ទេ។ កម្ពុជាត្រូវតែបន្តចាប់ខ្លួន និងស៊ើបអង្កេតករណីលោក ហ៊ុន តូ លោក លី យ៉ុងផាត់ លោក កុក អាន លោក ទ្រី ភាព ជាដើម អ្នកទាំងអស់ហ្នឹង ដែលត្រូវបានសហរដ្ឋអាមេរិកដាក់នៅក្នុងបញ្ជីខ្មៅ។ គួរតែមានការស៊ើបអង្កេត គួរតែត្រូវបានចាប់ខ្លួនផ្ដន្ទាទោស ដូចករណីចាប់ខ្លួនលោក ចេន ហ្ស៊ី អញ្ចឹងដែរ»។
ភាពរង្គោះរង្គើនៃយីហោធនាគារព្រីនស៍ បានចាប់ផ្ដើមឡើងតាំងពីខែតុលា ឆ្នាំ២០២៥ គ្រាដែលសហរដ្ឋអាមេរិក និងចក្រភពអង់គ្លេស បានចេញចំណាត់ការព្រមគ្នាក្នុងថ្ងៃតែមួយ រឹបអូសទ្រព្យសម្បត្តិ លោក ចេន ហ្ស៊ី និងបានចោទប្រកាន់ថាអ្នកជំនួញជនជាតិចិន វ័យ៣៨ឆ្នាំរូបនេះ ជាមេគំនិតនៅពីក្រោយឧក្រិដ្ឋកម្មអនឡាញ ការជួញដូរមនុស្ស និងការលាងលុយកខ្វក់ តាមរយៈបណ្ដាញពាណិជ្ជកម្ម និងក្រុមហ៊ុនបុត្រសម្ព័ន្ធ ព្រីនស៍ ហោលឌីង គ្រុប (Prince Holding Group) ដែលមានវត្តមានជាង៣០ប្រទេសក្នុងពិភពលោក៕
