បន្ទាប់ពីកម្ពុជាបានបញ្ជូនខ្លួនមហាសេដ្ឋីបោកប្រាស់ Chen Zhi និងជនជាតិចិន២នាក់ផ្សេងទៀត ទៅកាន់ចិនដីគោកវិញ ទីក្រុងប៉េកាំងបានចោទប្រកាន់មហាសេដ្ឋីមានឈ្មោះអាស្រូវរូបនេះ ពីបទ បានប្រតិបត្តិការបណ្តាញឧក្រិដ្ឋកម្មឆ្លងដែន រួមទាំងការសង្ស័យថាមានការពាក់ព័ន្ធនឹងល្បែងស៊ីសងតាមកាស៊ីណូ និងការឆបោក។
យោងតាមសំណើរបស់អាជ្ញាធរចិន កម្ពុជាបានចាប់ខ្លួនជនជាតិចិនចំនួន ៣ នាក់ រួមទាំងលោក Chen Zhi ដែលជាស្ថាបនិកក្រុមហ៊ុន Prince Holding Group ហើយបានបញ្ជូនពួកគេទៅកាន់ប្រទេសចិនវិញ កាលពីថ្ងៃ៦ខែមករា នេះបើយោងតាមការចុះផ្សាយរបស់សារព័ត៌មាន Cambodia China Times កាលពីយប់ថ្ងៃទី៧ខែមករា។
បើតាមSouth China Morning Post ក្រសួងមហាផ្ទៃកម្ពុជា បានឱ្យដឹងថា ស្ថាប័នអនុវត្តច្បាប់នៃប្រទេសទាំងពីរបានសហការគ្នាលើករណីនេះអស់រយៈពេលជាច្រើនខែមកហើយ។
ក្រសួងមិនបានផ្តល់ព័ត៌មានលម្អិតអំពីលោក Chen ឬបទល្មើសដែលត្រូវបានចោទប្រកាន់របស់លោកនោះទេ ប៉ុន្តែបានបញ្ជាក់ថា លោកត្រូវបានដកសញ្ជាតិខ្មែរជាផ្លូវការ កាលពីខែធ្នូ ស្របតាមច្បាប់ក្នុងស្រុក។
ការដកសញ្ជាតិខ្មែរនេះ អាចជាការបើកផ្លូវសម្រាប់ការបង្កើតយុត្តាធិការរបស់ប្រទេសចិន នៅក្នុងករណីរបស់លោក Chen។ ប្រទេសចិនមិនអនុញ្ញាតឱ្យមានសញ្ជាតិ២នោះទេ។ នៅក្នុងសេចក្តីថ្លែងការណ៍របស់ចិន ទីក្រុងប៉េកាំងបានសង្កត់ធ្ងន់ថា បច្ចុប្បន្ន លោក Chen គឺជាជនជាតិចិន។
លោក Chen ដែលកើតនៅខេត្តហ្វូជាន (Fujian) ក្នុងឆ្នាំ១៩៨៧ បានចូលសញ្ជាតិខ្មែរក្នុងឆ្នាំ២០១៤។
ក្រសួងសន្តិសុខសាធារណៈរបស់ចិន បានពណ៌នាកាលពីថ្ងៃទី៨ខែមករា អំពីការចាប់ខ្លួនលោក Chen ថាជា «សមិទ្ធផលដ៏អស្ចារ្យមួយទៀត ក្រោមកិច្ចសហប្រតិបត្តិការអនុវត្តច្បាប់រវាងចិន និងកម្ពុជា»។
ក្រសួងសន្តិសុខសាធារណៈ បាននិយាយថា លោក Chen ត្រូវបានចោទប្រកាន់ពីបទល្មើសផ្សេងៗ រួមមាន ការបើកកាស៊ីណូ ការឆបោក ប្រតិបត្តិការខុសច្បាប់ និងការលាក់បំបាំងផលនៃបទល្មើស។
ក្រសួង បានបន្ថែមថា លោក Chen ត្រូវបានឃាត់ខ្លួនស្របតាមច្បាប់ ហើយសំណុំរឿងនេះ កំពុងស្ថិតក្នុងដំណើរការចាត់ការ ដោយបានកត់សម្គាល់ថា ប៉ូលីសចិននឹងដាក់សមាជិកសំខាន់ៗនៃបណ្តាញឧក្រិដ្ឋកម្មរបស់ លោក Chen ទៅក្នុងបញ្ជីតាមចាប់ខ្លួនក្នុងពេលឆាប់ៗនេះ។ ក្រសួងក៏បានជំរុញឱ្យសមាជិកដែលកំពុងរត់គេចខ្លួនទាំងអស់ឱ្យ «ចូលខ្លួនសារភាព» ផងដែរ។
ក្រុមហ៊ុន ព្រីនស៍ ហូលឌីង គ្រុប (Prince Holding Group) និងក្រុមហ៊ុនមេធាវីអាមេរិករបស់ខ្លួន គឺ Boies Schiller Flexner LLP មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ។
នៅក្នុងការអត្ថាធិប្បាយលើករណីនេះ អ្នកនាំពាក្យក្រសួងការបរទេសចិន លោកស្រី Mao Ning បាននិយាយកាលពីថ្ងៃទី៨ខែមករាថា ការប្រយុទ្ធប្រឆាំងនឹងល្បែងស៊ីសងតាមប្រព័ន្ធអ៊ីនធឺណិត និងការឆបោកតាមទូរគមនាគមន៍ គឺជា «ការទទួលខុសត្រូវរួមគ្នានៃសហគមន៍អន្តរជាតិ»។
លោកស្រី Mao បានមានប្រសាសន៍ថា៖ «ប្រទេសចិនបាននិងកំពុងសហការយ៉ាងសកម្មជាមួយកម្ពុជា និងប្រទេសដទៃទៀតអស់មួយរយៈមកហើយ ដើម្បីប្រយុទ្ធប្រឆាំងនឹងការឆបោកតាមទូរគមនាគមន៍ និងប្រព័ន្ធអ៊ីនធឺណិតឆ្លងដែន ដែលទទួលបានសមិទ្ធផលគួរឱ្យកត់សម្គាល់។ ប្រទេសចិនមានឆន្ទៈក្នុងការបង្កើនកិច្ចសហប្រតិបត្តិការ ក្នុងការអនុវត្តច្បាប់ជាមួយប្រទេសជិតខាង រួមទាំងកម្ពុជាផងដែរ ដើម្បីការពារអាយុជីវិត និងទ្រព្យសម្បត្តិ»។
ការចាប់ខ្លួន និងការបញ្ជូនខ្លួននេះ កើតឡើងចំពេលដែលទីក្រុងប៉េកាំង កំពុងខិតខំប្រឹងប្រែងយ៉ាងខ្លាំង ក្នុងការប្រយុទ្ធប្រឆាំងនឹងការឆបោកតាមទូរគមនាគមន៍នៅក្រៅព្រំដែនរបស់ខ្លួន និងចំពេលដែលមានការបង្ក្រាបលើគ្រីបតូឃឺរែនស៊ី (cryptocurrency) នៅក្នុងប្រទេសចិន៕
