ក្រោយម្ចាស់ភាគហ៊ុនធំ គឺលោក ចេន ហ្ស៊ី ត្រូវសមត្ថកិច្ចចាប់ខ្លួន បច្ចុប្បន្នធនាគារព្រីនស៍ ត្រូវបានធនាគារជាតិនៃកម្ពុជា ប្រកាសឱ្យផ្អាកការផ្តល់សេវាធនាគារថ្មីៗទាំងអស់ រួមទាំងការទទួលប្រាក់បញ្ញើ និងការផ្តល់ឥណទាន។ ធនាគារជាតិបានប្រគល់ភារកិច្ចជម្រះបញ្ជី និងគ្រប់គ្រងប្រតិបត្តិការឱ្យទៅក្រុមហ៊ុនសវនកម្មមួយផ្សេងទៀតផងដែរ។
ផ្ទុយពីធនាគារព្រីនស៍ ដែលរងចំណាត់ការរង់ចាំតែថ្ងៃបិទដំណើរការទាំងស្រុង ងាកមកក្រុមហ៊ុន ហួយវ័ន ផេ ឯណេះវិញ នៅតែបន្តដំណើរការ ទោះបីមានការស៊ើបអង្កេតរកឃើញថាក្រុមហ៊ុននេះ ជាប់ពាក់ព័ន្ធនឹងឧក្រិដ្ឋកម្មលាងលុយកខ្វក់។
ក្រុមហ៊ុន ហួយវ័ន ផេ ដែលបានប្ដូរឈ្មោះ យីហោ មកជាឈ្មោះ អេច-ផេ វិញកាលពីខែធ្នូ ឆ្នាំ២០២៥ គឺជាកម្មសិទ្ធិរបស់លោក ហ៊ុន តូ ដែលត្រូវជាក្មួយប្រុសលោក ហ៊ុន សែន និងត្រូវជាបងប្អូនជីដូនមួយជាមួយលោកនាយករដ្ឋមន្ត្រី ហ៊ុន ម៉ាណែត។
ការប្ដូរឈ្មោះក្រុមហ៊ុននេះ គឺក្រោយពេលអាមេរិកដាក់ទណ្ឌកម្ម មិនឱ្យមានប្រតិបត្តិការសាច់ប្រាក់ចូលក្នុងប្រព័ន្ធហិរញ្ញវត្ថុអាមេរិក ដោយសារតែរកឃើញថា ក្រុមហ៊ុននេះជាប់ពាក់ព័ន្ធនឹងការលាងលុយកខ្វក់ដ៏ធំសម្បើម ឱ្យក្រុមអ្នករកស៊ីឆបោកតាមអនឡាញ (Online Scam)។
ទន្ទឹមនឹងការបន្តធ្វើអាជីវកម្មដោយខុសច្បាប់ ក្រុមហ៊ុននេះ កំពុងបន្តបង្កកលុយអតិថិជនជាច្រើននាក់ផងដែរ ខុសពីធនាគារព្រីនស៍ដែលប្រាប់ឱ្យអតិថិជនបិទគណនី និងបង្វែរសាច់ប្រាក់ឱ្យពួកគេវិញ។
អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន យល់ឃើញថា រដ្ឋាភិបាលបក្សកាន់អំណាចនឹងមិនអាចចាត់វិធានការលើលោក ហ៊ុន តូ ដូចលោក ចេន ហ្ស៊ី ឡើយ ដោយសារលោក ហ៊ុន តូ គឺជាសាច់ញាតិរបស់ថ្នាក់ដឹកនាំ។ លោកបន្តថា ជារឿងធម្មតាទៅហើយដែលច្បាប់ស្រុកខ្មែរមានស្តង់ដារពីរ ពិសេសពេលបញ្ហានោះពាក់ព័ន្ធនឹងគ្រួសារឬបក្សពួកថ្នាក់ដឹកនាំ។
លោក អ៊ុំ សំអាន ថ្លែងថា៖ «ជាការពិតគឺ ច្បាប់នៅស្រុកខ្មែរមានស្តង់ដារពីរ។ លោក ចេន ហ្ស៊ី មិនមែនសាច់ញាតិរបស់លោក ហ៊ុន សែន អញ្ចឹងគាត់ចាត់ការ រឹបអូសលុយមកសងរដ្ឋវិញ កុំឱ្យខូចឈ្មោះគាត់ ប៉ុន្តែលោក ហ៊ុន តូ មិនហ៊ានជាមួយគាត់ ព្រោះគាត់ត្រកូល ហ៊ុន ដែរអញ្ចឹងគ្មាននរណាហ៊ានទៅចាត់ការ លោក ហ៊ុន តូ ដែលជាក្មួយរបស់ ហ៊ុន សែន ហើយជាជីដូនមួយរបស់លោក ហ៊ុន ម៉ាណែត ទៀត។ អញ្ចឹងយើងដឹងហើយនៅស្រុកខ្មែរ គឺច្បាប់មានស្តង់ដារពីរអញ្ចឹងឯង»។
ក្រុមហ៊ុន ហួយវ័ន ផេ ជាគ្រឹះស្ថានធនាគារអនឡាញ និងជាក្រុមហ៊ុនមួយរបស់ហួយវ័នគ្រុប។ ម្ចាស់ក្រុមហ៊ុននេះ គឺលោក ហ៊ុន តូ ត្រូវបានសហរដ្ឋអាមេរិកចោទថា ជាប់ពាក់ព័ន្ធនឹងបទល្មើសលាងសម្អាតប្រាក់រាប់ពាន់លានដុល្លារ ដោយមានជាប់ពាក់ព័ន្ធនឹងប្រាក់គ្រីបតូ និងក្រុមចោរបច្ចេកវិទ្យារបស់កូរ៉េខាងជើងផង។
ក្រុមហ៊ុនវិភាគប្រាក់គ្រីបតូមួយ បានវាយតម្លៃ និងបានចាត់ទុកថាប្រតិបត្តិការរបស់ក្រុមហ៊ុនហួយវ័ន កាលពីឆ្នាំ២០២៤ គឺជាទីផ្សារដ៏ធំមួយក្នុងការប្រព្រឹត្តអំពើឆបោកតាមអនឡាញ៕
