ក្រុមអតិថិជនទិញផ្ទះនៅក្រុមហ៊ុន ឡេង ណាវ៉ាត្រា ប្រកាសចេញតវ៉ាទ្រង់ទ្រាយធំជាថ្មីទៀតនៅរាជធានីភ្នំពេញ ឱ្យឧកញ៉ាស្និទ្ធមេដឹកនាំរូបនេះ ទទួលខុសត្រូវចំពោះមុខច្បាប់លើកិច្ចសន្យាទិញ លក់ ខណៈអតិថិជនខ្លះខ្ចីលុយធនាគារទិញផ្ទះបង់លុយគ្រប់៥ឆ្នាំ តែក្រុមហ៊ុនគ្មានផ្ទះឱ្យធ្វើឱ្យញាំញីដោយវិបត្តិបំណុលធ្ងន់ធ្ងរច្រើនឆ្នាំទៅនេះ។
អតិថិជនម្នាក់ លោក រ៉ា វុធ ប្រាប់VOD នៅថ្ងៃទី១២ ខែមករា នេះថា ក្រុមអតិថិជននឹងតវ៉ាទ្រង់ទ្រាយធំជាថ្មីនៅមុខក្រសួងរៀបចំដែនដី នៅថ្ងៃទី១៥ ខែមករា ដែលមានអ្នកចូលរួមប្រមាណ១០០នាក់ និងឈានទៅបិទផ្លូវនៅមុខក្រសួងដែនដីផងដែរ បើនៅតែគ្មានដំណោះស្រាយ។
លោកថា បច្ចុប្បន្នក្រុមហ៊ុននៅតែគេចវេសមិនសងលុយ និងប្រើល្បិចដោះដូរដី និងផ្ទះឱ្យអតិថិជនដដែលទោះជនរងគ្រោះតវ៉ាច្រើនដងក្តី។
លោកថា៖ «ដំណោះស្រាយគាត់នៅតែ ប្រើវិធីសាស្រ្តមួយ គឺឲ្យអតិថិជនណាគាត់ចង់បានផ្ទះលឿន! ឲ្យគាត់ត្រូវធ្វើដោយខ្លួនឯង ហើយនឹងការដូរយកដី។ អ៊ីចឹងអតិថិជនមួយចំនួនធំគាត់អត់មានលទ្ធភាពក្នុងការធ្វើផ្ទះ ដោយខ្លួនឯង! ករណីបើសិនជាយើងដូរទៅខាងមុខផ្ទះផ្សេង! អាហ្នឹង ត្រូវថែមលុយចន្លោះពី៧ពាន់ ទៅដល់ ១ម៉ឹន។ តែបើសិនជាគាត់ថាយកផ្ទះធ្វើខ្លួនឯងអាហ្នឹងអត់ថែមលុយទេ តែយើងកាត់សំណង កិច្ចសន្យាហើយធ្វើដោយខ្លួនឯង ហើយគាត់ឲ្យកាត់យកដី។ ដីនោះមាន២ទីតាំង គឺទីតាំងនៅ៦អាមួយ! ហើយនឹងទីតាំងនៅខាងព្រែកប្រាសព្វមួយ។ ទីតាំងព្រែកប្រសព្វគឺវានឹងបាតបឹងនៅឡើយ ! ហើយ៦អា ទីតាំងខ្លះវានៅជាដី ហើយទីតាំងខ្លះវាជាដីគោក»។
បើតាម លោក រ៉ា វុធ ការតវ៉ានេះទាមទារឱ្យក្រុមហ៊ុន ឡេង ណាវ៉ាត្រា ចាក់ដីឱ្យពេញនៅខែមករា ឆ្នាំ២០២៦ ជាកំហិត នៅប្លុក C E1 & E0 (RA)។
មួយវិញទៀត ការរំកិលអតិថិជនប្លុកខាងលើមកជុំគ្នា មិនត្រូវថែមលុយទេ និងរក្សាកិច្ចសន្យាចាស់នៅដដែល ហើយនៅខែកុម្ភៈ ឆ្នាំ២០២៦ ក្រុមហ៊ុនត្រូវបុកគ្រឹះ និងសង់ផ្ទះគ្រប់ប្លុកទាំងអស់ រួមទាំងចាក់ដីនៅគម្រោងជ្រែ១០០ ជាកំហិតផងដែរ។
លោកបានស្នើឱ្យរដ្ឋាភិបាលជួយអន្តរាគមន៍បន្ទាន់ចំពោះករណីនេះ ដោយថា អតិថិជនជាច្រើនកំពុងជាប់វិបត្តិបំណុលវ័ណ្ឌក ក្រោយខ្ចីលុយធនាគារទៅទិញអចលនទ្រព្យនៅក្រុមហ៊ុនឡេង ណាវ៉ាត្រា ខ្លះដល់៦ឆ្នាំហើយ តែក្រុមហ៊ុនគ្មានផ្ទះឱ្យនោះទេ។
លោកថា៖ «ក្នុងនាមខ្ញុំជាអតិថិជនរងគ្រោះមួយរូប! ខ្ញុំស្នើសុំទៅដល់ក្រសួងដែនដី នគរូបនីយកម្ម និងសំណង់ ដែលជាសេនាធិការរបស់រដ្ឋាភិបាល ហើយនឹងរាជរដ្ឋាភិបាល សូមសំណូមពរឲ្យជួយដាក់សម្ពាធទៅលើខាងភាគីបុរីដី ឡេង ណាវ៉ាត្រា ឱ្យគាត់បំពេញកាតព្វកិច្ចឲ្យលឿនបំផុត ពីព្រោះអីអតិថិជនមួយៗ ក្នុងការទិញផ្ទះនេះ! ទិញដីនេះវារយៈពេល៤ ទៅ៥ ទៅ៦ឆ្នាំហើយ។ ហើយដូចទីតាំងផ្ទះខ្ញុំឥឡូវនេះឡាន ទើបបានដកចេញតែម្តង។ ពេលប្រជុំខាងភាគីថៃគេសន្យាថាមានឡានចាក់ដីនៅទីតាំងនៅប្លុក C E1 & E0 (RA) ចាក់បន្តិចក៏ដកឡានចាកចេញវិញ! ឥឡូវតាមស្ថានភាពនៅប្លុក C E1 & E0 (RA) របស់ខ្ញុំគឺសូន្យតែ អត់មានសកម្មភាពម៉ង»។
បន្ថែមលើនេះ ថ្មីៗនេះក៏មានការចែកចាយវីឌីអូលើបណ្តាញសង្គមហ្វេសប៊ុក ដែលទាហានម្នាក់និយាយក្នុងកិច្ចប្រជុំមួយស្នើឲ្យបុរី ឡេង ណាវ៉ាត្រា សង់ផ្ទះឱ្យខ្លួនដើម្បីលោកអាចមានផ្ទះរស់នៅសមរម្យ ខណៈបច្ចុប្បន្នលោកកំពុងជួលផ្ទះគេស្នាក់នៅ និងកំពុងជាប់បំណុលធនាគារផងដែរ។
លោកថា៖ «គិតមើលទៅ ខ្ញុំរាល់ថ្ងៃជួលផ្ទះគេមួយខែ ៥០ (ដុល្លារ) ទឹកភ្លើងអីខ្លះ។ ប្រាក់ខែទាហានបើកមកសងធនាគារ អង្គការអេស៊ីលីដា ឯកសារមានជំពាក់ធនាគារប៉ុន្មានៗបង់! ហើយលុយយកបង់ផ្ទះអស់រលីង។ សុំនិយាយបន្តិច! អត់ទាន់បាន៥នាទីទេ! គិតមើលទៅ ខ្ញុំទាហ៊ាន ឥលូវកំពុងមានបញ្ហានៅព្រំដែន ឥលូវខ្ញុំសុខចិត្តឱ្យមេខ្ញុំដាក់ឈ្មោះខ្ញុំទៅព្រំដែន ដើម្បីវាយជាមួយថៃ ខ្ញុំខឹងថៃណាស់»។
ជុំវិញរឿងនេះ VOD មិនទាន់អាចសុំការឆ្លើយតបពីអ្នកនាំពាក្យក្រសួងរៀបចំដែនដី នគររូបនីយកម្ម និងសំណង់ លោក សេង ឡូត។
យ៉ាងណា ឧកញ៉ា ឡេង ណាវ៉ាត្រា បានបង្ហោះសារលើទំព័រហ្វេសប៊ុក នៅថ្ងៃទី១០ ខែមករា ដោយបង្ហាញពីលទ្ធផលដោះស្រាយរឿងដី និងផ្ទះ ឱ្យអតិថិជនបានមួយចំនួន និងបង្ហាញជំហរឈរលើគោលការណ៍សង់បញ្ចប់ជូនអតិថិជនឱ្យបាន១០០ភាគរយ ។
ប្រភពដដែលថា បុរីឡេង ណាវ៉ាត្រា មានផ្ទះសង់ហើយខ្លះសម្រាប់ជជែកដោះស្រាយដោះដូរនិងគណនាថែមថយតាមតម្លៃជាក់ស្ដែង ហើយបុរីឡេង ណាវ៉ាត្រា ក៏មានជាជម្រើសជជែកជូនអតិថិជន ដោយឈរលើគោលការណ៍មិនឲ្យខាតបង់នៅអត្ថប្រយោជន៍ឡើយ។
យ៉ាងណា សម្រាប់ប្រធានអង្គការប្រជាធិតេយ្យខ្មែរប្រចាំប្រទេសអូស្រ្តាលី លោក ស៊ឹង សែនករុណា សង្កេតឃើញថា មិនមែនតែរឿងឧកញ៉ា ឡេង ណាវ៉ាត្រា នេះទេ នៅមានក្រុមហ៊ុនឧកញ៉ាផ្សេងៗទៀតដែរ ក៏អ្នករងគ្រោះនៅមិនទាន់មានដំណោះស្រាយដូចគ្នា ដែលជាជំងឺសង្គមរាំរៃយូរមកហើយ និងធ្វើឱ្យពលរដ្ឋកាន់តែជួបវិបត្តិជីវភាពធ្ងន់ធ្ងរ។
យ៉ាងណា លោកជំរុញឱ្យរដ្ឋាភិបាលពន្លឿនរកយុត្តិធម៌ឱ្យជនរងគ្រោះ ឱ្យបានឆាប់ ដើម្បីបញ្ចៀសវិបត្តិសង្គម និងកុំឱ្យរងការចោទថាឧកញ៉ាឆបោក និងរដ្ឋាភិបាលជាក្រុមតែមួយ។
លោកថា៖ «យើងទទួចទៅដល់ស្ថាប័នពាក់ព័ន្ធ ជាពិសេសមេដឹកនាំដែលមានឥទ្ធិពលមានអំណាចហ្នឹង! ត្រូវធ្វើកិច្ចអន្តរាគមន៍ជាបន្ទាន់ ក្នុងការដោះស្រាយជូនទៅដល់ប្រជាពលរដ្ឋដែលកំពុងរងគ្រោះ កំពុងតែទាមទារតវ៉ាទាំងអស់ហ្នឹង បើមិនអ៊ីចឹងទេអ្វីៗទាំងអស់នេះ ប្រជាពលរដ្ឋអាចនឹងចាត់ទុកថាករណីហ្នឹង នឹងមានអ្នកពាក់ព័ន្ធជាអ្នកមានអំណាចនៅជាខ្នងបង្អែកពីក្រោយ ឬក៏សមគំនិតជាមួយទៅនឹងក្រុមឧកញ៉ាទាំងអស់ហ្នឹង ការពារក្រុមឧកញ៉ាទាំងអស់ហ្នឹង»។
កាលពីខែកុម្ភៈ ឆ្នាំ២០២៤ ប្រធានគណបក្សកាន់អំណាច លោក ហ៊ុន សែន ធ្លាប់បញ្ជាក់លើហ្វេសប៊ុកខ្លួនចង់ឱ្យឧកញ៉ា ឡេង ណាវ៉ាត្រា ឈរឈ្មោះជាបេក្ខភាពប្រធានសមាគមសិល្បករខ្មែរ តែដោយសារឧកញ៉ារូបនេះ មានរឿងអាស្រូវបោកអតិថិជនករណីលក់ដី និងផ្ទះ លោក ហ៊ុន សែន ក៏ប្តូរចិត្តវិញ។
ក្រុមហ៊ុនឧកញ៉ា ឡេង ណាវ៉ាត្រា ធ្លាប់បានទទួលសិទ្ធិអភិវឌ្ឍន៍នៅតំបន់ភ្នំតាម៉ៅ និងបានកាប់បំផ្លាញព្រៃឈើសេសសល់ចុងក្រោយនៅតំបន់នោះ ក្រោយមកប្រជាពលរដ្ឋបានទាមទារឱ្យអតីតនាយករដ្ឋមន្រ្តី លោក ហ៊ុន សែន កាត់ទោសម្ចាស់ក្រុមហ៊ុននោះ ដាក់ពន្ធនាគារតាមផ្លូវច្បាប់។
ប៉ុន្តែលោក ហ៊ុន សែន ពេលនោះថ្លែងការពារថា បើចង់ចាប់ម្ចាស់ក្រុមហ៊ុននោះពន្ធនាគារ គឺមានតែចាប់រូបលោកដាក់គុកដែរ។
លោកថា៖ «ត្រូវកាត់ទោសអ្នកបំផ្លាញព្រៃអភិរក្សភ្នំតាម៉ៅ និងអ្នកស៊ីញេផ្តល់សិទ្ធិ! អើនាងអើយ ទៅកាត់ទោស កាត់ទោសអញម៉ង!»។
ព្រះមហាក្សត្រកម្ពុជា បានចេញព្រះរាជ្យក្រឹត្យស្តីពីគោរម្យងាឧកញ៉ានៅថ្ងៃទី២៣ ខែតុលា ឆ្នាំ២០២៤នេះ តម្រូវឱ្យលោកអ្នកឧកញ៉ា អ្នកឧកញ៉ា និងឧកញ៉ា ត្រូវគោរពរដ្ឋធម្មនុញ្ញ ច្បាប់ និងលិខិតបទដ្ឋានគតិយុត្តនានារបស់ព្រះរាជាណាចក្រកម្ពុជា ប្រកាន់ខ្ជាប់នូវសីលធម៌ល្អប្រកបមុខរបរស្របច្បាប់ និងចៀសវាងសកម្មភាពណា ដែលធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់គោរមងារឧកញ៉ា។
ប៉ុន្តែបើមើលករណីឧកញ៉ា ឡេង ណាវ៉ាត្រា បំពានកិច្ចសន្យាទិញលក់ផ្ទះច្រើនឆ្នាំទៅនេះ គ្មានចំណាត់ការច្បាប់ទេ ដែលជាមន្ទិលថា មានលោក ហ៊ុន សែន ជាខ្នងបង្អែក ទើបធ្វើឱ្យចំណាត់ការផ្លូវច្បាប់ត្រូវជាប់គាំងច្រើនឆ្នាំបែបនេះ៕
