ព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី ព្រះអង្គបានយាងសួរសុខទុក្ខកងទ័ព រងរបួសដែលកំពុងសម្រាកព្យាបាលនៅមន្ទីរពេទ្យមួយក្នុងក្រុងភ្នំពេញ ដោយសារតែការប្រយុទ្ធតតាំងទៅការឈ្លានពានរបស់ថៃចំនួន២១ថ្ងៃ នាសម័យទំនើបនេះ។
ក្រសួងការពារជាតិកម្ពុជា បាននិយាយថា ការយាងសួរសុខទុក្ខរបស់ព្រះអង្គនេះ នៅមន្ទីរពេទ្យព្រះកេតុមាលា ក្នុងរាជធានីភ្នំពេញ កាលពីថ្ងៃសៅរ៍ ត្រូវនឹងថ្ងៃទី១០ ខែមករា ឆ្នាំ២០២៦។
យ៉ាងណា ក្រសួងមិនទាន់ប្រកាសជាសាធារណៈ ឱ្យដឹងថា មានចំនួនកងកម្លាំងប៉ុន្មាននាក់ បានពលីជីវិត នៅលើសមរភូមិ និងប៉ុន្មាននាក់បានរងរបួស អំឡុងពេលប្រយុទ្ធតតាំងទៅនឹងការឈ្លានពានរបស់ថៃនេះ នៅឡើយទេ គិតត្រឹមថ្ងៃទី១២ ខែមករានេះ។
ប៉ុន្តែក្រសួងធ្លាប់អះអាងថា ការឈ្លានពានរបស់យោធាថៃ ក្នុងរយៈពេល២១ថ្ងៃ ចាប់ពីថ្ងៃទី៧ ខែធ្នូ រហូតដល់មានបទឈប់បាញ់ នៅថ្ងៃទី២៧ ខែធ្នូ ឆ្នាំ២០២៥ សង្គ្រាមឈ្លានពានរបស់ថៃនេះ បានសម្លាប់ពលរដ្ឋខ្មែរស្លូតត្រង់ អស់ចំនួន៣៣នាក់ និងបង្កឱ្យរងរបួសជិត១០០នាក់។
រីឯជនស៊ីវិលខ្មែរ ភៀសសឹកជិត ៧០ម៉ឺននាក់ ហើយថាសង្គ្រាមឈ្លានពាននេះ បានបំផ្លាញហេដ្ឋារចនាសម្ព័ន្ធស៊ីវិលជាច្រើន មានផ្ទះ វត្តអារាម សាលារៀន ស្ពានថ្នល់ និងប្រាសាទបុរាណជាដើម។
បច្ចុប្បន្ន ថៃកំពុងពង្រីកព្រំដែនថ្មី ឈូសកម្ទេចផ្ទះពលរដ្ឋខ្មែររាប់រយខ្នង និងសម្រុកធ្វើហេដ្ឋារចនាសមព័ន្ធសំណង់រឹង លើទីតាំងដែលថៃដណ្តើមបាន។
បើតាមតំណាងរាស្ត្រគណបក្សប្រឆាំង លោក អ៊ុំ សំអាន សង្គ្រាមឈ្លានពាន២១ថ្ងៃមកនេះ ថៃដណ្តើមកាន់កាប់ដីខ្មែរតាមព្រំដែនចំនួន៣៥កន្លែង មានភូមិជោគជ័យ ភូមិព្រៃចាន់ បឹងត្រកួន ខេត្តបន្ទាយមានជ័យ តំបន់អានសេះ ប្រាសាទតាក្របី ប្រាសាទខ្នារ ប្រាសាទតាមាន់ធំ ថ្មដា ខេត្តពោធិ៍សាត់ និងតំបន់អូរស្មាច់ជាដើម។ ប៉ុន្តែរដ្ឋាភិបាលកម្ពុជា ប្រកាសឱ្យដឹងថា ថៃដណ្តើមគ្រប់គ្រងដីខ្មែរបានត្រឹម១៤តំបន់ និងទីតាំងប៉ុណ្ណោះ។
បើតាម មាត្រា៥២នៃរដ្ឋធម្មនុញ្ញ ចែងថា រាជរដ្ឋាភិបាលកម្ពុជា ប្តេជ្ញារក្សាការពារឯករាជ្យ អធិបតេយ្យ បូរណភាពទឹកដី អនុវត្តនយោបាយបង្រួបបង្រួមជាតិ ដើម្បីការឯកភាពជាតិ។
ប៉ុន្តែអ្នកឃ្លាំមើលថា ការក្តោបអំណាចជិត៥០ឆ្នាំរបស់ក្រុមគ្រួសារ លោក ហ៊ុន សែន ឱ្យបាត់បង់ដីខ្មែរជាច្រើនទៅប្រទេសវៀតណាម និងប្រទេសថៃ ដែលឆ្លុះបញ្ចាំងបន្ទាត់នយោបាយនេះ អសមត្ថភាពការពារបូរណភាពទឹកដី។ ចំណែកអ្នកជំរុញឱ្យការពារទឹកដី ត្រូវបានរបបដឹកនាំនេះ គំរាមបំបិទមាត់ និងខ្លះត្រូវបានចាប់ដាក់គុក ធ្វើឱ្យខ្មែរបែកបាក់ជាតិ ប្រទេសរួមរឹតដោយអំពើពុករលួយ បក្ខពួកនិយម មិនអាចធ្វើទំនើបកម្ម វិស័យការពារជាតិបាន ធ្វើឱ្យថៃលើកទ័ពមកឈ្លានពាន យ៉ាងកំរោល នៅសម័យទំនើប នាសតវត្សរ៍ទី២១នេះ៕
