អស់រយៈជាង ៥ឆ្នាំមកហើយ ដែលអតិថិជនបុរី MCL villa នៅតំបន់ភ្នំបាសិត ក្នុងស្រុកពញាឮ ខេត្តកណ្ដាល រង់ចាំចូលទៅរស់នៅក្នុងផ្ទះរបស់ពួកគាត់ដែលបានទិញពីគម្រោង។
បើទោះអ្នកខ្លះបង់លុយបានជាងពាក់កណ្ដាល ខ្លះបង់ស្ទើរដាច់ទៅហើយក្ដី ប៉ុន្តែផ្ទះពួកគាត់សាងសង់បានត្រឹមបង្គោលគ្រឹះ ខណៈដីក៏មិនទាន់ទទួលបានប្លង់កម្មសិទ្ធិ។
ពលរដ្ឋរងគ្រោះ គឺលោក ចាន់ ដារ៉ា ប្រាប់វីអូឌីនៅថ្ងៃទី១២ ខែមករាថា បុគ្គលិកបុរីបានផ្ដាច់ការទាក់ទងជាមួយអតិថិជន និងបិទស្នាក់ការចោលអស់រយៈពេលជាច្រើនខែមកហើយ។ បុរសមានពិការភាពរូបនេះ បានឱ្យដឹងថា លោកបានបង់រំលស់ដីនិងផ្ទះពីបុរីនេះ តម្លៃ២ម៉ឺន ១ពាន់ដុល្លារ ក្នុងទំហំដី ក្បាល៦ម៉ែត្រ បណ្ដោយ២០ម៉ែត្រ កាលពីឆ្នាំ២០២០ ដោយលោកបានបង់ប្រាក់ឱ្យបុរីបាន១ម៉ឺនដុល្លារហើយ។ លោកបន្តថា ប្រាក់ទាំងនោះគឺបានមកពីកម្លាំងញើសឈាមផង ខ្ចីធនាគារ និងសាច់ញាតិផង ដោយសង្ឃឹមថានឹងបានផ្ទះមួយរស់នៅដោយសមរម្យ។
លោក ចាន់ ដារ៉ា និយាយថា៖ «ហើយយកដីខ្យល់មកលក់ឱ្យប្រជាជន លក់ឱ្យអតិថិជន ហើយអតិថិជនទិញមើលតាមគម្រោង មើលតាមប្លង់ហ្នឹងទៅ ឃើញល្អនាំគ្នាទិញយកទៅ។ ហើយបុរីចេះតែចង្អុលថាដីនេះៗៗ ដល់ចុងបញ្ចប់ដីហ្នឹង ក៏អត់ទាន់ទិញពីប្រជាជននៅទាន់បានផង ហើយយកដីខ្យល់មកលក់ឱ្យប្រជាជន»។
បើតាមលោក ចាន់ ដារ៉ា កន្លងមក ពលរដ្ឋធ្លាប់បានតវ៉ាជាច្រើនលើកមកហើយ ដោយបញ្ហានេះបានដឹងឮទៅដល់រដ្ឋបាលស្រុកពញាឮ រហូតដល់រដ្ឋបាលខេត្តកណ្ដាល និងចុងក្រោយឡើងដល់ក្រសួងដែនដី នគរូបនីយកម្ម និងសំណង់ តែនៅគ្មានដំណោះស្រាយ។
ដោយឡែក នៅថ្ងៃអាទិត្យ ទី១១ ខែមករា ឆ្នាំ២០២៦នេះ អតិថិជនជាច្រើននាក់បានលើកបដាទាមទារដំណោះស្រាយជាថ្មីម្ដងទៀត ទៅកាន់ថ្នាក់ដឹកនាំរដ្ឋាភិបាល ក្រោយមិនអាចទ្រាំទ្រនឹងការខកចិត្ត និងស្ថានភាពបំណុលដែលខ្ចីបុលយកមកទិញគម្រោងលំនៅដ្ឋានបុរី MCL នេះ។ ក្នុងពេលតវ៉ា ពលរដ្ឋខ្លះបានឱ្យដឹងថា គាត់បង់ប្រាក់ឱ្យបុរីជាង៧ម៉ឺនដុល្លារក៏មាន។
លោក ចាន់ ដារ៉ា បន្តថា៖ «បើសិនជាក្រសួងគាត់ដោះស្រាយឱ្យ មិនបាច់បានផ្ទះក៏បានដែរ ឱ្យតែបានដីមកក៏បានដែរ ដីហើយចេញប្លង់ចេញអីឱ្យពួកខ្ញុំមកក៏បានដែរ។ បើសិនជាក្រសួងមានលទ្ធភាពឱ្យលុយវិញក៏បាន ក៏ព្រមយក ឱ្យដីក៏ព្រមយក និយាយរួមទៅឱ្យតែដំណោះស្រាយស្រួល»។
ទាក់ទងបញ្ហាក្នុងវិស័យអចលទ្រព្យនេះដែរ អ្នកជំនាញ ធ្លាប់លើកឡើងថា វិបត្តិអចលនទ្រព្យកម្ពុជា បានកើតឡើង តាំងពីផ្ទុះកូវីដ-១៩ សង្គ្រាមរុស្ស៊ី-អ៊ុយក្រែន ខណៈនៅដើមឆ្នាំ ២០២៥ ឃើញឡើងវិញបន្តិចក្នុងកំណើន ០,៨ភាគរយនៅឆមាសទីមួយ។ ប៉ុន្តែចាប់ពីពាក់កណ្ដាលឆ្នាំ២០២៥មក វិស័យអចលនទ្រព្យក៏ចាប់ផ្ដើមត្រឡប់ទៅដូចឆ្នាំ២០២៣ ឬឆ្នាំ២០២៤ ដោយការទិញលក់មានភាពតឹងតែង។
យ៉ាងណា វិស័យអចលទ្រព្យនៅមានបញ្ហាផ្សេងទៀត ពាក់ព័ន្ធនឹងការទិញលក់គម្រោងខ្យល់ ឬមិនបានដីមិនបានផ្ទះ និងការបំពានលើកិច្ចសន្យាទិញលក់ កំពុងកើតមានកាន់តែច្រើនក្នុងសង្គមកម្ពុជា ដោយបញ្ហាខ្លះមិនទាន់មានដំណោះស្រាយជាច្រើនឆ្នាំមកហើយ។
ជាក់ស្ដែង ករណីគម្រោងបុរីរបស់ឧកញ៉ា ឡេង ណាវ៉ាត្រា គម្រោងបុរី ម៉ន ដានី និងគម្រោងបុរីភូមិខ្មែរ នៅខេត្តស្វាយរៀង បានធ្វើឱ្យអតិថិជនជាច្រើននាក់ ធ្លាក់ក្នុងស្ថានភាពបំណុល និងបាត់បង់ជំនឿចិត្ត ដោយសារមិនទាន់ទទួលបានសំណងសមរម្យនៅឡើយ។
ការណ៍នេះ បានបង្កើតចម្ងល់ទៅកាន់អតិថិជន និងសាធារណជន ពីការគ្រប់គ្រងរបស់ក្រសួងរៀបចំដែនដី និងក្រសួងពាណិជ្ជកម្ម ជុំវិញការផ្ដល់ច្បាប់ឱ្យក្រុមហ៊ុនទាំងនោះរកស៊ី ជាពិសេសគឺចំណាត់ការនៅពេលក្រុមហ៊ុនទាំងនេះមិនបានបំពេញតាមការសន្យារបស់ខ្លួនជាមួយអតិថិជន៕
