អស់រយៈពេលជាច្រើនខែ ប្រជាជនកាណាដាជាច្រើនបានសង្ឃឹមថា លោក Donald Trump លែងចាប់អារម្មណ៍នឹងការចង់ធ្វើឱ្យប្រទេសរបស់ពួកគេក្លាយជា “រដ្ឋទី៥១ របស់សហរដ្ឋអាមេរិក” ទៀតហើយ ខណៈ លោក ត្រាំ កំពុងជាប់រវល់នឹងការធ្វើឱ្យទីក្រុងវ៉ាស៊ីនតោន និងប្រព័ន្ធពាណិជ្ជកម្មពិភពលោកមានភាពច្របូកច្របល់។ ប៉ុន្តែក្តីសង្ឃឹមទាំងនោះកំពុងតែរលាយបាត់ទៅវិញ។
ការឆ្មក់ចូលចាប់ខ្លួនប្រធានាធិបតីវេណេស៊ុយអេឡា លោក Nicolas Maduro យ៉ាងគួរឱ្យភ្ញាក់ផ្អើល និងការបង្កើនសម្តីរបស់លោក Trump អំពីការដណ្តើមយកកោះហ្គ្រីនឡែន (Greenland) បានធ្វើឱ្យកាណាដាមានការរង្គោះរង្គើ និងបង្ខំឱ្យប្រជាពលរដ្ឋយកចិត្តទុកដាក់ខ្លាំងលើការគំរាមកំហែង កាលពីមុនរបស់ប្រធានាធិបតីអាមេរិករូបនេះ ចំពោះអធិបតេយ្យភាពរបស់កាណាដា។ ការប្រកាសរបស់រដ្ឋបាលលោកថា “នេះគឺជាអឌ្ឍគោលរបស់យើង” បានធ្វើឱ្យសម្តីពីមុនៗរបស់លោក Trump អំពីការបញ្ចូលកាណាដាជាទឹកដីអាមេរិក ហាក់បីដូចជាមិនមែនគ្រាន់តែជាការជេរប្រមាថសំដៅលើអតីតនាយករដ្ឋមន្ត្រី Justin Trudeau ឬជាយុទ្ធសាស្ត្រចរចាក្នុងសង្គ្រាមពាណិជ្ជកម្មជាមួយមេដឹកនាំបច្ចុប្បន្ន លោក Mark Carney នោះឡើយ។
អត្ថបទមួយនៅក្នុងកាសែតជាតិដ៏ធំបំផុតរបស់កាណាដា បានល្បីរន្ទឺយ៉ាងខ្លាំងកាលពីសប្តាហ៍មុន ដោយបានព្រមានអំពីលទ្ធភាពដែល លោក Trump អាចនឹងប្រើ “ការបង្ខិតបង្ខំផ្នែកយោធា” ប្រឆាំងនឹងប្រទេសនេះ។ ដំបូន្មានរបស់អ្នកនិពន្ធគឺ៖ រៀនសូត្រពីការការពារខ្លួនរបស់ហ្វាំងឡង់ប្រឆាំងនឹងរុស្ស៊ី។ ពង្រីកកងកម្លាំងការពារជនស៊ីវិល។ បង្កើតយុទ្ធសាស្ត្រដ្រូនជាតិ ដោយយកគំរូតាមអ៊ុយក្រែន ហើយត្រូវគិតពីអ្វីដែលមិនគួរឱ្យជឿថាអាចកើតឡើងបាន។
លោក Thomas Homer-Dixon ដែលជាអ្នកសិក្សាស្រាវជ្រាវជនជាតិកាណាដាលើផ្នែកសន្តិសុខសកល បាននិយាយថា៖ «វាគឺជាការផ្លាស់ប្តូរការគណនា។ ប្រសិនបើមានការប៉ុនប៉ងប្រើកម្លាំងយោធាមកលើពួកយើង វាត្រូវតែបង្ហាញឱ្យច្បាស់ថា ពួកគេនឹងត្រូវចំណាយសងវិញយ៉ាងធ្ងន់ធ្ងរ»។
ក្តីបារម្ភនេះ ថែមទាំងបានបង្កើតឱ្យមានរឿងកំប្លែងបែបឌឺដងទៀតផង។ សាច់រឿងមួយដែលត្រូវបានគេចែករំលែកយ៉ាងច្រើនលើគេហទំព័រ Beaverton បានដាក់ចំណងជើងថា “លោក Mark Carney បានបិទប្រព័ន្ធកំណត់ទីតាំង (GPS) លើទូរស័ព្ទរបស់លោក ដើម្បីបង្ការជាមុន”។
ខណៈដែលសកម្មភាពរបស់លោក Trump បានធ្វើឱ្យមេដឹកនាំជុំវិញពិភពលោកមានការព្រួយបារម្ភ ប្រជាជនកាណាដា មានហេតុផលពិសេសដែលត្រូវបារម្ភជាងគេ។ ជាក់ស្តែង ចំពោះករណីកោះហ្គ្រីនឡែន លោក Trump និងក្រុមទីប្រឹក្សាកំពុងស្វែងរកការគ្រប់គ្រងលើទឹកដីមួយដែលជារបបប្រជាធិបតេយ្យ ស្ថិតក្នុងទីតាំងយុទ្ធសាស្ត្រនៅតំបន់អាកទិក និងជាសមាជិកអង្គការ NATO ដែលលក្ខណៈទាំងអស់នេះគឺសុទ្ធតែដូចគ្នាទៅនឹងកាណាដាដែរ។
លោក Wesley Wark អតីតទីប្រឹក្សារដ្ឋាភិបាលកាណាដាលើផ្នែកសន្តិសុខ បានហៅសកម្មភាពរបស់លោក Trump លើវេណេស៊ុយអេឡា និងហ្គ្រីនឡែនថាជា “ការដាស់តឿនចុងក្រោយសម្រាប់កាណាដា ដែលនឹងសង្កត់ធ្ងន់លើការពិតថា សហរដ្ឋអាមេរិកលែងជាប្រទេសដូចកាលពីមុនទៀតហើយ”។ ប៉ុន្តែអ្វីដែលមិនច្បាស់លាស់នោះគឺ តើកាណាដាអាចធ្វើអ្វីបានខ្លះដើម្បីបញ្ចុះបញ្ចូលលោក Trump ឱ្យបោះបង់បំណងនេះ។
លោក Carney បានឈ្នះឆ្នោតកាលពីឆ្នាំមុន តាមរយៈការសន្យាថានឹងតតាំងជាមួយលោក Trump ដោយលោកបានលើកឡើងថា ប្រធានាធិបតីរូបនេះ “ចង់បំបែកបំបាក់យើង ដើម្បីឱ្យអាមេរិកអាចគ្រប់គ្រងយើងបាន”។ ទោះជាយ៉ាងណាក៏ដោយ ចាប់តាំងពីការបោះឆ្នោតមក លោកបានព្យាយាមជៀសវាងការធ្វើឱ្យសមភាគីអាមេរិករបស់លោកខឹងសម្បារ សូម្បីតែក្នុងពេលដែលលោកកំពុងព្យាយាមបង្កើនពាណិជ្ជកម្មជាមួយប្រទេសចិន និងប្រទេសដទៃទៀត ដើម្បីកាត់បន្ថយការពឹងផ្អែករបស់កាណាដាលើប្រទេសជិតខាងភាគខាងត្បូងក៏ដោយ។
កាលពីសប្តាហ៍មុន លោក Carney បានអំពាវនាវឱ្យសហរដ្ឋអាមេរិក គោរពអធិបតេយ្យភាពរបស់កោះហ្គ្រីនឡែន និងប្រទេសដាណឺម៉ាក ប៉ុន្តែលោកមិនបានលើកឡើងអំពីការគំរាមកំហែងកាលពីមុនរបស់លោក Trump ចំពោះកាណាដានោះទេ៕
