ប្រទេសអ៊ីរ៉ង់ បាននិយាយកាលពីថ្ងៃទី១២ខែមករាថា ខ្លួនកំពុងរក្សាបណ្តាញទំនាក់ទំនងឱ្យនៅបើកចំហជាមួយសហរដ្ឋអាមេរិក ខណៈដែលប្រធានាធិបតី លោក Donald Trump កំពុងពិចារណាលើការឆ្លើយតបចំពោះការបង្ក្រាបទៅលើការតវ៉ាដ៏សាហាវនៅទូទាំងប្រទេស ដែលកំពុងក្លាយជាបញ្ហាប្រឈមដ៏ខ្លាំងក្លាបំផុតមួយ ចំពោះការដឹកនាំរបស់បព្វជិតកាន់សាសនាមូល្លីមនិយមជ្រុល ចាប់តាំងពីបដិវត្តន៍ឥស្លាមឆ្នាំ ១៩៧៩ មក។
បើយោងតាមសារព័ត៌មាន Reuters លោក Trump បានមានប្រសាសន៍កាលពីថ្ងៃទី១១ខែមករាថា សហរដ្ឋអាមេរិក អាចនឹងជួបពិភាក្សាជាមួយមន្ត្រីអ៊ីរ៉ង់ ហើយលោកកំពុងមានទំនាក់ទំនងជាមួយក្រុមប្រឆាំងរបស់អ៊ីរ៉ង់ ក្នុងពេលដែលលោកកំពុងបង្កើនសម្ពាធលើមេដឹកនាំនៃប្រទេសនេះ រួមទាំងការគំរាមកំហែងអំពីលទ្ធភាពនៃវិធានការយោធា ចំពោះអំពើហិង្សាដ៏កាចសាហាវប្រឆាំងនឹងក្រុមបាតុករ។
ក្រុមសិទ្ធិមនុស្ស HRANA ដែលមានមូលដ្ឋាននៅសហរដ្ឋអាមេរិក បាននិយាយថា ខ្លួនបានបញ្ជាក់ពីតួលេខអ្នកស្លាប់ចំនួន ៥៤៤ នាក់ ក្នុងនោះមានបាតុករ ៤៩៦ នាក់ និងបុគ្គលិកសន្តិសុខ ៤៨ នាក់ ព្រមទាំងមានមនុស្ស ១០ ៦៨១ នាក់ ត្រូវបានចាប់ខ្លួន ចាប់តាំងពីការតវ៉ាបានចាប់ផ្តើមកាលពីថ្ងៃទី២៨ ខែធ្នូ ហើយបានរីករាលដាលពេញផ្ទៃប្រទេស។
ភ្នាក់ងារសារព័ត៌មាន Reuters មិនអាចបញ្ជាក់ពីតួលេខទាំងនេះ ដោយឯករាជ្យបានឡើយ។ លំហូរនៃព័ត៌មានចេញពីសាធារណរដ្ឋឥស្លាមត្រូវបានរំខាន ដោយសារការកាត់ផ្តាច់ប្រព័ន្ធអ៊ីនធឺណិត ចាប់តាំងពីថ្ងៃទី៨ខែមករាមក។
មេដឹកនាំអ៊ីរ៉ង់ កំពុងប្រឈមមុខនឹងបាតុកម្មយ៉ាងខ្លាំងក្លា ដែលបានវិវត្តចេញពីការត្អូញត្អែរអំពីការលំបាកខ្លាំងផ្នែកសេដ្ឋកិច្ច ទៅជាការអំពាវនាវដោយមិនរុញរា ឱ្យមានការដួលរំលំនៃរបបបព្វជិតដែលចាក់គ្រឹះយ៉ាងជ្រៅ ហើយស្របពេលដែលឥទ្ធិពលក្នុងតំបន់របស់ប្រទេសនេះ ក៏ត្រូវបានកាត់បន្ថយយ៉ាងខ្លាំងផងដែរ។
ប៉ុន្តែ ទោះបីជាមានការតវ៉ាក្នុងទ្រង់ទ្រាយធំយ៉ាងណាក៏ដោយ ក៏គ្មានសញ្ញាណាមួយនៃការបែកបាក់គ្នានៅក្នុងជួរថ្នាក់ដឹកនាំបព្វជិតនិកាយស៊ីអ៊ីត (Shi’ite) យោធា ឬកងកម្លាំងសន្តិសុខឡើយ ហើយក្រុមបាតុករក៏គ្មានមេដឹកនាំកណ្តាលច្បាស់លាស់ដែរ។ ក្រុមប្រឆាំងមានសភាពបែកខ្ញែកគ្នា។
នៅក្នុងវីដេអូដែលត្រូវបានបញ្ជាក់ភាពត្រឹមត្រូវ ជនជាតិអ៊ីរ៉ង់បានជួបជុំគ្នានៅមជ្ឈមណ្ឌលកោសល្យវិច័យ Kahrizak ក្នុងទីក្រុងតេហេរ៉ង់ កាលពីថ្ងៃទី១១ខែមករា ដោយឈរនៅពីលើជួរនៃស្បោងដាក់សាកសពពណ៌ខ្មៅ។
ប្រទេសអ៊ីរ៉ង់មិនទាន់បានផ្តល់តួលេខអ្នកស្លាប់ជាផ្លូវការនៅឡើយទេ ប៉ុន្តែបានទម្លាក់កំហុសនៃការបង្ហូរឈាមនេះ ទៅលើការជ្រៀតជ្រែករបស់សហរដ្ឋអាមេរិក និងអ្វីដែលខ្លួនហៅថាជាក្រុមភេរវករគាំទ្រដោយអ៊ីស្រាអែល និងសហរដ្ឋអាមេរិក។ ប្រព័ន្ធផ្សព្វផ្សាយដែលគ្រប់គ្រងដោយរដ្ឋ បានផ្ដោតការយកចិត្តទុកដាក់ទៅលើការស្លាប់របស់កងកម្លាំងសន្តិសុខវិញ។
អ្នកនាំពាក្យក្រសួងការបរទេស លោក Esmaeil Baghaei បានមានប្រសាសន៍កាលពីថ្ងៃទី១២ខែមករាថា៖ «បណ្តាញទំនាក់ទំនងរវាងរដ្ឋមន្ត្រីការបរទេសរបស់យើង លោក Abbas Araqchi និងបេសកជនពិសេសរបស់សហរដ្ឋអាមេរិក (លោក Steve Witkoff) គឺនៅតែបើកចំហ ហើយសារនានាត្រូវបានផ្លាស់ប្តូរគ្នាទៅវិញទៅមក នៅពេលណាដែលចាំបាច់»។
លោក Baghaei បន្តថា៖ «សហរដ្ឋអាមេរិកបានលើកឡើងអំពីករណីមួយចំនួន គំនិតផ្សេងៗត្រូវបានលើកយកមកពិភាក្សា ហើយជារួមសាធារណរដ្ឋឥស្លាម គឺជាប្រទេសដែលមិនដែលបោះបង់ចោលតុចរចានោះឡើយ»។
ប៉ុន្តែលោកបានបន្ថែមថា «សារដែលផ្ទុយគ្នា» ពីសហរដ្ឋអាមេរិក បានបង្ហាញពីកង្វះភាពហ្មត់ចត់ ហើយមិនមានភាពគួរឱ្យជឿជាក់នោះទេ។
នៅក្នុងសន្និសីទសង្ខេបជូនដល់ឯកអគ្គរដ្ឋទូតបរទេសប្រចាំទីក្រុងតេហេរ៉ង់ លោក Araqchi បានបញ្ជាក់សារជាថ្មីថា សាធារណរដ្ឋឥស្លាមគឺត្រៀមខ្លួនជាស្រេចសម្រាប់សង្គ្រាម ប៉ុន្តែក៏បើកចំហសម្រាប់កិច្ចសន្ទនាផងដែរ៕
