ជនរងគ្រោះចាញ់បោកអតីតឧកញ៉ា ឡេង ចាន់ណា បានឡើងមកតវ៉ានៅមុខក្រសួងយុត្តិធម៌ជាថ្មីទៀត ដើម្បីទាមទារសំណងដោះស្រាយវិបត្តិជីវភាព ពួកគេ៥ពាន់គ្រួសារ ដោយថា វិបត្តិនេះកំពុងគំរាមជីវិតពួកគេ មានខ្លះគ្មានលុយព្យាបាលជំងឺ និងខ្លះទៀតប្រឈមដាច់បាយ ខណៈយុត្តិធម៌ត្រូវគេកប់ចោលជាង២ឆ្នាំទៅនេះ។
ពលរដ្ឋម្នាក់អ្នកស្រី ឡយ ប៉ាក់ មកពីខេត្តសៀមរាប រៀបរាប់ក្នុងពេលតវ៉ានៅថ្ងៃទី១៣ ខែមករានេះថា អ្នកស្រីកំពុងជួបវិបត្តិជីវភាពធ្ងន់ធ្ងរ ក្រោយខ្ចីលុយធនាគារយកទៅវិនិយោគបានការប្រាក់នៅក្រុមហ៊ុន ឡេង ចាន់ណា ដោយចាញ់បោកទាំងគ្រួសារជាង១០ម៉ឺនដុល្លារ។
អ្នកស្រីថា កាលពីប៉ុន្មានខែដំបូងគាត់បានការប្រាក់មែន តែក្រោយមកក៏លែងទទួលបានទៀត ដែលធ្វើឱ្យគ្មានលុយបង់សងទៅធនាគារ ខណៈបច្ចុប្បន្នអ្នកស្រីក៏មានជំងឺប្រចាំកាយ និងប្រឈមដាច់បាយផងដែរ។
លោកថា៖ «ខ្ញុំអស់ឡើងជិត៤ម៉ឺនដុល្លារ! តែម៉ែឪបងប្អូនទាំងអស់សរុបទៅជាង១០ម៉ឺនជាង។ សុំក្រសួងយុត្តិធម៌ជួយមេត្តាជួយដោះស្រាយឱ្យខ្ញុំផង! ព្រោះអីខ្ញុំវេទនាណាស់សព្វថ្ងៃខ្ញុំឈឺផង រកលុយមើលជំងឺខ្លួននេះ មិនបានទេ សូមក្រសួងយុត្តិធម៌ជួយខ្ញុំផង! មេត្តាដោះស្រាយឱ្យខ្ញុំផង។ ខ្ញុំមិនមានលុយទិញថ្នាំ មកហូបទេ! មានតែលុយបង់ធនាគារតក់ៗ ខែណាក៏បាន ខែណាក៏អត់ គេមកស្តី មកថា មកបន្ទោសដល់ផ្ទះសំបែងរាល់ថ្ងៃ រាល់ខែ ព្រោះអីយើងមិនមានបានបង់ឱ្យគេ»។
ជាមួយគ្នានេះ ពលរដ្ឋម្នាក់ទៀតមកពីខេត្តកំពង់ចាម លោក ចាប ប៊ុនហៀង រៀបរាប់មុខក្រសួងយុត្តិធម៌ថា លោកចាញ់បោក ឡេង ចាន់ណា ជិត១ម៉ឺន៥ពាន់ដុល្លារ ដែលជាលុយខ្ចីធនាគារ ធ្វើឱ្យលោកជួបវិបត្តិបំណុលវ័ណ្ឌក។
លោកថា មានពលរដ្ឋជាង៥ពាន់គ្រួសារ បានដាក់ពាក្យបណ្តឹងទៅមេធាវីរដ្ឋាភិបាល លោក គីតិច ដែរ តែជាង២ឆ្នាំហើយមកមិនបានយុត្តិធម៌នោះទេ។ បើតាមពលរដ្ឋរូបនេះ បានរំលេចឈ្មោះអ្នកមានអំណាច២រូបនៅពីក្រោយក្រុមហ៊ុន ឡេង ចាន់ណា ផងដែរ។
លោកថា៖ «ខ្ញុំមកអត់ដែលបានស្គាល់ច្បាស់ទេ តែខ្ញុំដឹងទៅតាមឃ្លីបវីដេអូ។ ផ្ទុះរឿងហ្នឹង! រឿងហ្នឹងគឺ ស៊ាន បូរ៉ាត់ ស ថាវី ហ្នឹងគឺគាត់អ្នកក្រោយខ្នង ឡេង ចាន់ណា ក្រុមហ៊ុនហ្នឹង។ ជឿជាក់ហ្នឹង ដោយសារមានខ្នងបង្អែកអ្នកធំ ដូចជា ស៊ាន បូរ៉ាត់ ស ថាវី ។ បើសិនគាត់រកដំណោះស្រាយសងបំណុលមកប្រាក់ដើមមក ប្រជាពលរដ្ឋរងគ្រោះហ្នឹងវិញបាន គ្រប់គ្នាទៅ អត់យកផ្តន្ទាទោសទេ ហ្នឹងសម្រាប់ប្រជាពលរដ្ឋ ប្រាក់យកមកសងធនាគារ»។
ជាមួយគ្នានេះ ពលរដ្ឋម្នាក់ទៀត លោក ទីង សុហៀង មកពីខេត្តកំពង់ចាម ប្រាប់ថា ចាញ់បោកឡេង ចាន់ណា ចំនួន២ម៉ឺនដុល្លារ ដែលជាលុយខ្ចីធនាគារ ធ្វើឱ្យជួបបញ្ហាជីវភាពក្នុងគ្រួសារ ហើយលោកកំពុងមានជំងឺប្រចាំកាយផងដែរ។ លោកទាមទារឱ្យក្រសួងយុត្តិធម៌ និងរដ្ឋាភិបាលជួយពន្លឿនដំណោះស្រាយ ដើម្បីបានសំណងដោះស្រាយវិបត្តិជីវភាព។
លោកថា៖ «ខ្ញុំទឹកនោមផ្អែមផង! លើសឈាមផង! ទាំងប្តីទាំងប្រពន្ធ ៥ឆ្នាំហ្នឹងដោះអត់រកស៊ីអីបានទេ ចេញលុយរហូត ជំពាក់ធនាគារវ័ណ្ឌកហើយ។ សុំឲ្យរដ្ឋាភិបាលនិងសម្តេចទាំងពីរជួយពន្លឿនការដោះស្រាយលុយខ្ញុំ ព្រោះឥឡូវហ្នឹងខ្ញុំវេទនាខ្លាំងណាស់ ខ្ញុំឈឺទាំងប្តី ទាំងប្រពន្ធ ទឹកនោមផ្អែម។ ធនាគារតែដល់ខែគេមកយកលុយការប្រាក់វិញ បើយើងអត់បានបង់ឲ្យគេ! គេមកដល់ផ្ទះយើង»។
VOD មិនអាចសុំការឆ្លើយតបពីអ្នកនាំពាក្យក្រសួងយុត្តិធម៌ លោក សេង ឌីណា បានទេ គិតត្រឹមម៉ោងផ្សាយនេះ។
អ្នកនាំពាក្យគណបក្សប្រជាធិបតេយ្យជឿនលឿន លោក ប៉ោ មករា សង្កេតឃើញថា ភាពអយុត្តិធម៌ក្នុងសង្គមមានច្រើន តែរឿងជួបវិបត្តិជីវភាពដែលជាឆ្នាំងបាយពលរដ្ឋនេះ ក្រុមប្រជាពលរដ្ឋហាក់មានភាពក្លាហានងើបតវ៉ាយ៉ាងសកម្ម ជាងរឿងនយោបាយ។
លោកជំរុញឱ្យរដ្ឋាភិបាលពន្លឿនដំណោះស្រាយឱ្យក្រុមជនរងគ្រោះឱ្យបានឆាប់ ដើម្បីកុំឱ្យវិបត្តិនេះ រាលដាលកាន់តែធំក្នុងសង្គម។
លោកថា៖ «ការពន្លឿនការដោះស្រាយការអនុវត្តច្បាប់ថ្លឺងថ្លែង យកមកពិនិត្យដើម្បីថាតើនរណាខុសនរណាត្រូវ ហើយអ្នកណាទៅដែលទទួលខុសត្រូវ ទំហំប៉ុន្មាន វាជារឿងសំខាន់សម្រាប់ដំណោះស្រាយសង្គម។ ពីព្រោះបញ្ហាសេដ្ឋកិច្ច បញ្ហាពាក់ព័ន្ធនឹងជីវភាពរស់នៅរបស់ពួកគាត់ វាជាបញ្ហាធំ ដូច្នេះវាអាចនឹងកើតមានរឿងអីដែលយើងមិនអាចគិតទុកបាន។ ពីព្រោះយើងដឹងហើយថា បញ្ហាជីវភាពរស់នៅប្រចាំថ្ងៃ វាជាបញ្ហាសម្រាប់ពួកគាត់ក៏ត្រូវការថវិកាត្រូវការចំណូលដើម្បីផ្គត់ផ្គង់កូន ផ្គត់ផ្គង់ការសិក្សារបស់កូន! ផ្គត់ផ្គង់សុខភាពរបស់គាត់អ៊ីចឹងពេលដែលបាត់ចំណូល ហើយគាត់មានបញ្ហាពាក់ព័ន្ធទៅនឹងរឿងការដោះស្រាយហ្នឹងទៀត អាហ្នឹងគឺជារឿងដែលគាត់រឹតតែលំបាកថែម»។
ក្រុមហ៊ុនប្រ៊ីលាន ស៊ីធី របស់អតីតឧកញ៉ា ឡេង ចាន់ណា បានបង្កើតល្បិចបោកពលរដ្ឋ តាមយុទ្ធសាស្រ្តប្រមូលលុយ ដោយសន្យាឱ្យការប្រាក់ ៤% ក្នុងមួយខែនៃប្រាក់ដើម តែពលរដ្ឋបើកបានតែប៉ុន្មានខែដំបូង ក៏លែងទទួលបានទាំងប្រាក់ដើម និងការប្រាក់។
អតីតឧកញ៉ា ឡេង ចាន់ណា ត្រូវបានចាប់ខ្លួននៅថ្ងៃទី១៣ ខែមីនា ឆ្នាំ២០២៤ ក្រោយពីជនរងគ្រោះផ្ទុះការតវ៉ាជាបន្តបន្ទាប់រយៈពេលប្រមាណ ១ខែ ដែលមានអ្នកចាញ់បោកប្រមាណ ៧០០០គ្រួសារ គិតទឹកប្រាក់ជាង ៣០០លានដុល្លារអាមេរិក។
យ៉ាងណា បើគេគិតពីថ្ងៃដែលលោក ហ៊ុន ម៉ាណែត ឡើងកាន់អំណាចតាំងពីខែសីហា ឆ្នាំ២០២៣ ដល់ខែមករា ឆ្នាំ២០២៦នេះ មានរយៈពេលជាង២ឆ្នាំហើយ ខណៈក្រោមការដឹកនាំនេះបានលេចឡើងជាបន្តបន្ទាប់ នូវរលកតវ៉ារបស់ជនរងគ្រោះពីអំពើឆបោក ជាបន្តបន្ទាប់។
ជុំវិញអំពើឆបោកធំៗក្រោមការដឹកនាំរបស់រដ្ឋាភិបាលអាណត្តិទី៧នេះ រួមមានដូចជា ពលរដ្ឋ ចាញ់បោកអតីតឧកញ៉ា ឡេង ចាន់ណា ជា សារ៉ន ហ៊ី គឹមហុង ក្រុមហ៊ុនCIC ក្រុមហ៊ុនភូមិខ្មែរគ្រុប ឧកញ៉ា ឡេង ណាវ៉ាត្រា និងក្រុមហ៊ុនមួយចំនួនទៀត តែយុត្តិធម៌ពួកគេត្រូវបានកប់ចោលច្រើនឆ្នាំទៅនេះ៕
