ហោចណាស់មានគម្រោងអភិវឌ្ឍន៍លំនៅឋាននិងអគារសហកម្មសិទ្ធិ ឬខុនដូ ចំនួន៥គម្រោង ដែលជាប់ពាក់ព័ន្ធនឹងក្រុមហ៊ុនព្រីនស៍ ត្រូវបានរដ្ឋាភិបាលកម្ពុជាផ្អាកមិនឱ្យធ្វើប្រតិបត្តិការអាជីវកម្មតទៅទៀត។
តាមរយៈលិខិតរបស់និយ័តករអាជីវកម្មអចលនវត្ថុ និងបញ្ចាំ នៅថ្ងៃទី១២ ខែមករាបានឱ្យដឹងថា គម្រោងទាំង៥នោះ រួមមាន ទីមួយ គម្រោងអគារសហកម្មសិទ្ធិ ឬខុនដូ ព្រីនស៍ ហាភីណេស ផ្លាហ្សា ឬ ដឹ ភីនណាខល រេស៊ីដិន (PRINCE HAPPINESS PLAZA ឬ The Pinnacle RESIDENCE) ទីពីរ គម្រោងខុនដូ ព្រីនស៍ ហ្គោលដិន បេយ៍ (PRINCE GOLDEN BAY) ទីបី គម្រោងខុនដូ នៃមជ្ឈមណ្ឌល ព្រីនស៍ ហ័ន អ៊ី (Prince Huan Yu) ទីបួន គម្រោងលំនៅឋាន បុរី ព្រីនស៍ វ័ន ត្រូពិកា (Prince One Tropica) និង ទីប្រាំ គម្រោងលំនៅឋាន បុរី ភូមិសំរោង។
ចំណាត់ការនេះ ធ្វើឡើងក្រោយធនាគារជាតិនៃកម្ពុជា ទើបដាក់ប្រតិបត្តិការធនាគារព្រីនស៍ (Prince Bank) ឱ្យស្ថិតក្រោមការគ្រប់គ្រងរបស់ក្រុមហ៊ុនសវនកម្ម កាលពីសប្ដាហ៍មុន។
លិខិតដដែល បានបញ្ជាក់ដែរថា អតិថិជនដែលបានចុះកិច្ចសន្យាលក់ទិញផ្ទះ ឬបន្ទប់ខុនដូ ជាមួយគម្រោងខាងលើ ពួកគេត្រូវបន្តអនុវត្តកាតព្វកិច្ច ឬបង់ប្រាក់ឱ្យគម្រោង រហូតដល់បញ្ចប់កិច្ចសន្យាលក់ទិញជាស្ថាពរ។ ដោយឡែក ចំពោះអតិថិជនដែលបានបញ្ចប់កាតព្វកិច្ច ត្រូវបន្តស្នើសុំការរៀបចំផ្ទេរកម្មសិទ្ធិផ្ទះ ឬបន្ទប់ខុនដូតាមគម្រោងនីមួយៗ ក្រោមការជួយសម្របសម្រួល រវាងនិយ័តករអាជីវកម្មអចលនវត្ថុ និងបញ្ចាំ និងក្រសួងរៀបចំដែនដី នគរូបនីយកម្ម និងសំណង់។
ក្នុងចំណោមគម្រោងទាំង៥ខាងលើ គម្រោងខុនដូឈ្មោះ ព្រីនស៍ ហាភីណេស ផ្លាហ្សា ឬ ដឹ ភីនណាខល រេស៊ីដិន (PRINCE HAPPINESS PLAZA ឬ The Pinnacle RESIDENCE) មានទីតាំងស្ថិតនៅក្បែរស្នងការដ្ឋាននគរបាលរាជធានីភ្នំពេញ ដែលជាបណ្ដុំសហគមន៍ជនជាតិចិនរស់នៅយ៉ាងច្រើនកកកុញ។
នៅពីក្រោយខុនដូនេះ នៅមានមជ្ឈមណ្ឌលពាណិជ្ជកម្ម ព្រីនស៍ ថាមស៍ សឃ្វែរ (Prince Times Square) និងមានគម្រោងខុនដូរបស់ក្រុមហ៊ុនព្រីនស៍ជាច្រើនទៀត ដែលមានឈ្មោះផ្សេងៗគ្នា។
ប្រធានអ្នកឃ្លាំមើលកម្ពុជា លោក ម៉ែន ណាត ជំរុញឱ្យរដ្ឋាភិបាលកម្ពុជា ក៏ត្រូវបន្តចាត់វិធានលើក្រុមហ៊ុន លោក ចេន ហ្ស៊ី ផ្សេងទៀត ដើម្បីបង្ហាញភាពស្អាតស្អំ និងឆន្ទៈក្នុងការបោសសម្អាតឧក្រិដ្ឋកម្មអនឡាញ។ លោកបន្តថា រដ្ឋាភិបាលក៏ត្រូវពិចារណាក្នុងការរឹបអូសទ្រព្យសម្បត្តិលោក ចេន ហ្ស៊ី ដែលមាននៅកម្ពុជា ដោយមួយផ្នែកទូទាត់សំណងអតិថិជន មួយផ្នែកបើកប្រាក់ខែបុគ្គលិក និងនៅសេសសល់ត្រូវដាក់ចូលជាទ្រព្យសម្បត្តិរដ្ឋ។
លោក ម៉ែន ណាត និយាយថា៖ «អ៊ីចឹងគ្រប់គម្រោងទាំងអស់របស់លោក ចេន ហ្ស៊ី ដែលនៅក្រោមឈ្មោះ ចេន ហ្ស៊ី ផ្ទាល់ ឬក៏ក្រោមឈ្មោះអ្នកណាក៏ដោយ ត្រូវបង្វិលចូលជាទ្រព្យសម្បត្តិរដ្ឋ។ ហ្នឹងតាមផ្លូវច្បាប់! រឹបអូសជាទ្រព្យសម្បត្តិរដ្ឋ ព្រោះ ចេន ហ្ស៊ី ជាផ្នែកមួយដែរ គាត់ក៏ជាមានសញ្ជាតិខ្មែរ មានសញ្ជាតិខ្មែរចាត់ទុកជាពលរដ្ឋខ្មែរ […] បើភាគីរដ្ឋាភិបាលចិនទាមទារ អាហ្នឹងរដ្ឋាភិបាលកម្ពុជាត្រូវតែជជែកជាមួយរដ្ឋាភិបាលចិន ត្រូវបែងចែកយ៉ាងម៉េច។ តែបើថារដ្ឋាភិបាលចិនគេមិនទាមទារទេ គឺទ្រព្យសម្បត្តិទាំងអស់របស់លោក ចេន ហ្ស៊ី ហ្នឹងត្រូវបង្វិលចូលជាទ្រព្យសម្បត្តិរដ្ឋរបស់ប្រទេសកម្ពុជា»។
យីហោក្រុមហ៊ុន ព្រីនស៍ ហូលឌីង គ្រុប (Prince Holding group) មានវត្តមានស្ថិតនៅពាសពេញទឹកដីប្រទេសកម្ពុជា ពិសេសនៅតំបន់មានសក្ដានុពល និងមានជនជាតិចិនរស់នៅច្រើន។ ក្រុមហ៊ុនខ្លះប្រើប្រាស់ឈ្មោះ ព្រីនស៍ ដោយផ្ទាល់ ខណៈក្រុមហ៊ុនបុត្រសម្ព័ន្ធ ឬគម្រោងអភិវឌ្ឍន៍ខ្លះ ប្រើឈ្មោះផ្សេងមកជំនួស។
ជាក់ស្ដែង គម្រោងអភិវឌ្ឍ បេយ៍ អហ្វ ឡៃថ៍ (Bay of Lights) នៅឃុំរាម ស្រុកព្រៃនប់ ខេត្តព្រះសីហនុ ដែលប្រើឈ្មោះក្រុមហ៊ុន ខានូពី ស៊ែន ឌីវេឡុបម៉ិន (Canopy Sands Development) ជាផ្លូវការ។ គម្រោងនេះមានតម្លៃ ១៦ពាន់លានដុល្លារ អភិវឌ្ឍន៍ក្នុងទំហំដីជាង៩០០ហិកតា ចាប់ផ្ដើមឡើងកាលពីឆ្នាំ២០២០ ក្នុងគោលបំណងចាក់ខ្សាច់ពង្រីកឆ្នេរ កសាងទីក្រុងបៃតងជាប់មាត់សមុទ្រ។ គម្រោងនេះ បានធ្វើឱ្យប៉ះពាល់ដល់ពលរដ្ឋប្រមាណ ៦២គ្រួសារ ដោយបង្ខំពួកគេឱ្យចាកចេញពីលំនៅដ្ឋាន។
យោងតាមការចុះផ្សាយរបស់សារព័ត៌មាន CNA កាលពីខែឧសភា ឆ្នាំ២០២៤ បានអះអាងថា ក្រុមហ៊ុនខានូពី ស៊ែន ឌីវេឡុបម៉ិន (Canopy Sands Development) គឺជាកម្មសិទ្ធិ របស់ក្រុមហ៊ុន ព្រីនស៍ ហូលឌីង គ្រុប (Prince Holding Group)៕
