ជនជាតិចិន និងជនបរទេសចម្រុះជាតិសាសន៍រាប់រយនាក់ទៀត ត្រូវបានគេប្រទះឃើញថាកំពុងនាំគ្នារត់ចេញពីបណ្ដុំអគារមួយកន្លែង ស្ថិតក្នុងស្រុកភ្នំព្រឹក ខេត្តបាត់ដំបង។ អាជ្ញាធរក្នុងតំបន់អះអាងថាកំពុងស៊ើបអង្កេតករណីនេះ។
តាមរយៈការរាយការណ៍ពីអ្នកសារព័ត៌មានក្នុងតំបន់ បានឱ្យដឹងថា មានពលរដ្ឋជនជាតិចិន ជនជាតិវៀតណាម និងជនជាតិផ្សេងទៀត មិនតិចជាងរយនាក់នោះឡើយ ដែលកំពុងនាំគ្នាសម្រុកចេញពីបណ្ដុំអគារមួយកន្លែងនៅក្បែរព្រំដែនកម្ពុជា-ថៃ ដែលអ្នកសារព័ត៌មានរូបនោះអះអាងថា ស្ថិតក្នុងស្រុកកំរៀង ខេត្តបាត់ដំបង។
វីដេអូឃ្លីបផ្សព្វផ្សាយនៅថ្ងៃទី១៤ ខែមករា បង្ហាញទិដ្ឋភាពក្រុមជនជាតិចម្រុះជាតិសាសន៍ទាំងនោះ នាំគ្នាចាកចេញពីទីតាំងអគារទាំងយប់ ដោយមានរថយន្តក្រុងនៅចាំទទួល។
ចំណែកវីដេអូផ្សេងទៀត ផ្សព្វផ្សាយនៅថ្ងៃទី១៥ ខែមករា បានបង្ហាញឱ្យឃើញនូវរថយន្ត Pick-up ពណ៌សមួយគ្រឿង ដែលអ្នកសារព័ត៌មានរូបនោះអះអាងថា ជារថយន្តដែលជនជាតិចិនបើកទម្លុះរបងថ្ម ដើម្បីរត់គេចខ្លួនចូលទៅក្នុងចម្ការដំឡូងរបស់ពលរដ្ឋដែលនៅក្បែរនោះ។
វីអូឌី បានទាក់ទងទៅអធិការនៃអធិការដ្ឋានស្រុកកំរៀង លោក វេ គឹមចត់ ប៉ុន្តែលោកអះអាងថា ហេតុការណ៍នេះកើតឡើងនៅក្នុងស្រុកភ្នំព្រឹក។
វីអូឌី បានបន្តទាក់ទងទៅអធិការនៃអធិការដ្ឋានស្រុកភ្នំព្រឹក គឺលោក សំ វីរៈ ដោយលោកបញ្ជាក់ថាពិតជាមានហេតុការណ៍នេះកើតឡើងពិតប្រាកដមែន គឺស្ថិតនៅក្នុងភូមិសាស្ត្រភូមិភ្នំតូច ឃុំពេជ្រចិន្តា។
លោកបន្តថា ក្រុមជនជាតិទាំងនោះ បានរត់ចេញតាំងពីយប់ថ្ងៃទី១៤ ដោយមកទល់ពេលនេះ អាជ្ញាធរកំពុងព័ទ្ធទីតាំងខាងលើ ដើម្បីស្រាវជ្រាវរកមូលហេតុ។
យ៉ាងណា លោកមិនទាន់អាចសន្និដ្ឋានថាទីតាំងនោះ មានជនបរទេសជាជនជាតិអ្វីខ្លះ និងមានចំនួនប៉ុន្មាននាក់បាននៅឡើយទេ។
លោក សំ វីរៈ និយាយថា៖ «ឥឡូវយើងកំពុងតែហ៊ុំព័ទ្ធសិន យើងកំពុងស្រាវជ្រាវបន្ត។ យើងអត់ទាន់សន្និដ្ឋានទេ ឥឡូវយើងកំពុងតែស្រាវជ្រាវ យើងកំពុងតែនៅកន្លែងកើតហេតុ»។
ហេតុការណ៍សម្រុកចាកចេញពីទីតាំងរបស់ក្រុមជនបរទេសចម្រុះជាតិសាសន៍ ជាពិសេសជនជាតិចិនទាំងនេះ មិនមែនមានតែនៅក្នុងភូមិសាស្ត្រព្រំដែន នៅខេត្តបាត់ដំបងនេះទេ ដោយប៉ុន្មានថ្ងៃមកនេះ នៅព្រំប្រទល់ប្រទេសវៀតណាម ក្នុងតំបន់ជ្រៃធំ ខេត្តកណ្ដាល ក៏គេឃើញមានក្រុមជនបរទសសម្រុកចាកចេញដូចគ្នា។
ការចល័តខ្លួន ចល័តទីតាំងនេះ កើតឡើងក្រោយពេលមេបណ្ដាញឧក្រិដ្ឋជនអនឡាញ គឺលោក ចេន ហ្ស៊ី ត្រូវបានអាជ្ញាធរចាប់ខ្លួន និងក្រោយពេលលោកនាយករដ្ឋមន្ត្រី ហ៊ុន ម៉ាណែត បានចេញសារកាលពីថ្ងៃទី១៣ ខែមករា ថារដ្ឋាភិបាលនឹងប្ដេជ្ញាចាត់វិធានការលើឧក្រិដ្ឋកម្មអនឡាញ ក្រោយមើលឃើញគ្រោះថ្នាក់ធ្ងន់ធ្ងរ ចំពោះសង្គមជាតិ ដែលបង្កឡើងដោយឧក្រិដ្ឋកម្មឆបោកតាមប្រព័ន្ធបច្ចេកវិទ្យា និងភាពស្មុគស្មាញនៃឧក្រិដ្ឋកម្មសម័យទំនើបមួយនេះ៕
