ប្រធានាធិបតីសហរដ្ឋអាមេរិក លោក ដូណាល់ ត្រាំ បានមានប្រសាសន៍កាលពីថ្ងៃទី១៤ខែមករាថា ការទទួលបានលទ្ធផលណាមួយដែលតិចជាងការគ្រប់គ្រងរបស់សហរដ្ឋអាមេរិកលើកោះ Greenland គឺជាអ្វីដែល «មិនអាចទទួលយកបាន»។ លោកនិយាយបែបនេះ ប៉ុន្មានម៉ោងមុនពេលអនុប្រធានាធិបតី J.D. Vance ធ្វើជាម្ចាស់ផ្ទះទទួលជួបមន្ត្រីដាណឺម៉ាក និង Greenland ក្នុងកិច្ចពិភាក្សា។
នៅក្នុងការបង្ហោះលើបណ្តាញសង្គម លោក ត្រាំ បានសង្កត់ធ្ងន់ជាថ្មីលើអំណះអំណាងរបស់លោកថា សហរដ្ឋអាមេរិក «ត្រូវការ Greenland សម្រាប់គោលបំណងសន្តិសុខជាតិ»។ លោកបានបន្ថែមថា «NATO គួរតែជាអ្នកនាំមុខសម្រាប់យើងក្នុងការទទួលបានវា» បើមិនដូច្នេះទេ រុស្ស៊ី ឬចិន នឹងយកបាន។
លោក ត្រាំសរសេរថា៖ «NATO នឹងក្លាយទៅជាគួរឱ្យខ្លាចខ្លាំង និងមានប្រសិទ្ធភាពជាងមុន ប្រសិនបើ Greenland ស្ថិតនៅក្នុងកណ្តាប់ដៃរបស់សហរដ្ឋអាមេរិក។ អ្វីដែលតិចជាងនេះ គឺមិនអាចទទួលយកបានឡើយ»។
Greenland កំពុងស្ថិតនៅចំកណ្តាលនៃព្យុះភូមិសាស្ត្រនយោបាយ ខណៈដែលលោក ត្រាំ នៅតែប្រកាន់ជំហរថា លោកចង់បានកោះនេះជាកម្មសិទ្ធិ ចំណែកឯប្រជាជននៃទីក្រុង Nuuk ដែលជារដ្ឋធានីរបស់កោះនេះ និយាយថា វាមិនមែនសម្រាប់លក់នោះទេ។ សេតវិមានមិនបានច្រានចោលលទ្ធភាពនៃការប្រើកម្លាំងបាយ ដើម្បីដណ្តើមយកកោះនៅតំបន់អាកទិកនេះឡើយ។
លោក Vance ត្រូវជួបរដ្ឋមន្ត្រីការបរទេសដាណឺម៉ាក លោក Lars Løkke Rasmussen និងសមភាគី Greenland លោកស្រី Vivian Motzfeldt នៅទីក្រុងវ៉ាស៊ីនតោន កាលពីថ្ងៃទី១៤ខែមករា ដើម្បីពិភាក្សាអំពីបញ្ហាកោះនេះ ដែលជាដែនដីស្វ័យភាពពាក់កណ្តាលរបស់ប្រទេសដាណឺម៉ាក ដែលជាសម្ព័ន្ធមិត្តរបស់សហរដ្ឋអាមេរិកក្នុងអង្គការ NATO។
មុនកិច្ចប្រជុំនេះ រដ្ឋមន្ត្រីការបរទេសបារាំង បានថ្កោលទោសចំពោះអ្វីដែលលោកបានពណ៌នាថាជា «ការគំរាមកំហែង» របស់សហរដ្ឋអាមេរិក ជុំវិញបញ្ហាកោះ Greenland ដែលជាសញ្ញាចុងក្រោយនៃភាពមិនពេញចិត្តក្នុងចំណោមសម្ព័ន្ធមិត្តរបស់អាមេរិក។
នៅតាមដងផ្លូវសំខាន់ៗដែលគ្របដណ្តប់ដោយព្រិលក្នុងទីក្រុង Nuuk អ្នកសារព័ត៌មានអន្តរជាតិ និងក្រុមការងារថតរូប បានឈប់សួរអ្នកដំណើរឆ្លងកាត់រៀងរាល់ពីរបីម៉ែត្រម្តង ដើម្បីសួរពីចំណាប់អារម្មណ៍របស់ពួកគេចំពោះវិបត្តិមួយនេះ ដែលនាយករដ្ឋមន្ត្រីដាណឺម៉ាកបានព្រមានថា អាចនឹងបង្កឱ្យមានការបញ្ចប់នៃសម្ព័ន្ធភាពសន្តិសុខឆ្លងមហាសមុទ្រអាត្លង់ទិក។
កញ្ញា Tuuta Mikaelsen និស្សិតអាយុ ២២ ឆ្នាំម្នាក់ នៅទីក្រុង Nuuk បាននិយាយថា នាងសង្ឃឹមថា មន្ត្រីអាមេរិកនឹងទទួលបានសារ «ឱ្យដកថយទៅវិញ»។
នាយករដ្ឋមន្ត្រីកោះ Greenland លោក Jens-Frederik Nielsen បានប្រាប់សន្និសីទសារព័ត៌មានមួយនៅក្នុងទីក្រុងកូពែនហាក ប្រទេសដាណឺម៉ាក កាលពីថ្ងៃទី១៣ខែមករាថា៖ «ប្រសិនបើយើងត្រូវជ្រើសរើសរវាងសហរដ្ឋអាមេរិក និងដាណឺម៉ាក នៅពេលនេះ យើងជ្រើសរើសយកដាណឺម៉ាក។ យើងជ្រើសរើសយក Nato។ យើងជ្រើសរើសយកព្រះរាជាណាចក្រដាណឺម៉ាក។ យើងជ្រើសរើសយកសហភាពអឺរ៉ុប (EU)»។
នៅពេលត្រូវបានសួរកាលពីថ្ងៃទី១៣ខែមករា អំពីមតិយោបល់របស់ លោក Nielsen លោក ត្រាំ បានឆ្លើយតបថា៖ «ខ្ញុំមិនយល់ស្របជាមួយគាត់ទេ។ ខ្ញុំមិនដឹងថាគាត់ជាអ្នកណាទេ។ ខ្ញុំមិនដឹងអ្វីទាំងអស់អំពីគាត់។ ប៉ុន្តែ វានឹងក្លាយជាបញ្ហាធំសម្រាប់គាត់»។
Greenland មានសារៈសំខាន់ជាយុទ្ធសាស្ត្រ ពីព្រោះនៅពេលដែលការប្រែប្រួលអាកាសធាតុ បណ្តាលឱ្យទឹកកករលាយ វានឹងបើកលទ្ធភាពសម្រាប់ផ្លូវពាណិជ្ជកម្មខ្លីជាងមុនទៅកាន់អាស៊ី។ វាក៏អាចធ្វើឱ្យមានភាពងាយស្រួលក្នុងការទាញយក និងដឹកជញ្ជូនប្រភពរ៉ែសំខាន់ៗដែលមិនទាន់បានប្រើប្រាស់ ដែលចាំបាច់សម្រាប់ផលិតកុំព្យូទ័រ និងទូរស័ព្ទ។
លោក ត្រាំ បាននិយាយនៅក្នុងការបង្ហោះកាលពីថ្ងៃទី១៤ខែមករាថា Greenland គឺ «មានសារៈសំខាន់ខ្លាំង» សម្រាប់កម្មវិធីការពារមីស៊ីល Golden Dome របស់សហរដ្ឋអាមេរិក។ លោកក៏បាននិយាយផងដែរថា លោកចង់បានកោះនេះ ដើម្បីពង្រីកសន្តិសុខរបស់អាមេរិក ហើយបានលើកឡើងនូវអ្វីដែលលោកហៅថា ជាការគំរាមកំហែងពីនាវា រុស្ស៊ី និងចិន ជាហេតុផលដើម្បីគ្រប់គ្រងវា៕
