កងទ័ពបារាំងចំនួន ១៥នាក់ បានធ្វើដំណើរទៅដល់ទីក្រុង Nuuk ដែលជារដ្ឋធានីនៃកោះហ្គ្រីនឡែន (Greenland) ខណៈដែលរដ្ឋមួយចំនួននៅអឺរ៉ុប បានបញ្ជូនទាហានទៅទីនោះ ដែលជាផ្នែកមួយនៃបេសកកម្មសមយុទ្ធដែលគេហៅថាជាការរុករក។
ការដាក់ពង្រាយនេះ ដែលនឹងរួមបញ្ចូលផងដែរនូវបុគ្គលិកមកពីប្រទេសអាល្លឺម៉ង់ ស៊ុយអែត ន័រវែស ហូឡង់ និងចក្រភពអង់គ្លេស បានកើតឡើងខណៈដែលប្រធានាធិបតីអាមេរិក លោក ដូណាល់ ត្រាំ បន្តជំរុញការទាមទាររបស់លោកលើកោះអាកទិកមួយនេះ ដែលជាផ្នែកស្វយ័តនៃប្រទេសដាណឺម៉ាក។
ប្រធានាធិបតីបារាំង លោក Emmanuel Macron បានមានប្រសាសន៍ថា កងទ័ពដំបូងនេះ នឹងត្រូវបានពង្រឹងបន្ថែមទៀតក្នុងពេលឆាប់ៗនេះ ជាមួយនឹង “កងទ័ពជើងគោក ជើងអាកាស និងជើងទឹក”។
អ្នកការទូតជាន់ខ្ពស់ លោក Olivier Poivre d’Arvor បានចាត់ទុកបេសកកម្មនេះ ថាជាការផ្ញើសារនយោបាយដ៏ខ្លាំងក្លាមួយថា៖ «នេះគឺជាសមយុទ្ធលើកដំបូង យើងនឹងបង្ហាញដល់សហរដ្ឋអាមេរិកថា អង្គការណាតូ (NATO) ក៏មានវត្តមាននៅទីនេះដែរ»។
ការផ្លាស់ទីលំនៅរបស់បុគ្គលិកយោធានេះ បានកើតឡើងបន្ទាប់ពីរដ្ឋមន្ត្រីការបរទេសដាណឺម៉ាក និងហ្គ្រីនឡែន បានធ្វើដំណើរទៅកាន់ទីក្រុងវ៉ាស៊ីនតោន ដើម្បីជួបប្រជុំជាមួយអនុប្រធានាធិបតីអាមេរិក លោក JD Vance កាលពីថ្ងៃទី១៤ខែមករា។
បន្ទាប់ពីកិច្ចប្រជុំ រដ្ឋមន្ត្រីការបរទេសដាណឺម៉ាក លោក Lars Lokke Rasmussen មានប្រសាសន៍ថា ទោះបីជាការចរចាមានលក្ខណៈស្ថាបនាក៏ដោយ ក៏នៅតែមាន “ការមិនចុះសម្រុងគ្នាជាមូលដ្ឋាន” រវាងភាគីទាំងពីរ ហើយក្រោយមកលោកបានរិះគន់ការប៉ុនប៉ងរបស់លោក Trump ក្នុងការទិញកោះហ្គ្រីនឡែន។
ចំណែកឯលោក Trump វិញ បានបង្កើនការប្តេជ្ញាចិត្តរបស់លោក ក្នុងការនាំយកកោះហ្គ្រីនឡែន មកស្ថិតក្រោមការគ្រប់គ្រងរបស់សហរដ្ឋអាមេរិក ដោយបានប្រាប់អ្នកយកព័ត៌មាននៅក្នុងការិយាល័យ Oval ថា “យើងត្រូវការកោះហ្គ្រីនឡែនសម្រាប់សន្តិសុខជាតិ”។ ទោះបីជាលោកមិនបានច្រានចោលការប្រើប្រាស់កម្លាំងបាយក៏ដោយ ក៏លោកបាននិយាយកាលពីយប់ថ្ងៃទី១៤ខែមករាថា លោកគិតថាអ្វីៗអាចដោះស្រាយបានជាមួយប្រទេសដាណឺម៉ាក។
“បញ្ហាគឺថា ប្រទេសដាណឺម៉ាកមិនអាចធ្វើអ្វីបានឡើយ ប្រសិនបើ រុស្ស៊ី ឬចិន ចង់ចូលកាន់កាប់កោះហ្គ្រីនឡែន ប៉ុន្តែយើងមានសមត្ថភាពធ្វើបានគ្រប់យ៉ាង។ អ្នកបានឃើញរួចមកហើយកាលពីសប្តាហ៍មុន ជាមួយប្រទេសវ៉េណេស៊ុយអេឡា”។
នាយករដ្ឋមន្ត្រីប៉ូឡូញ លោក Donald Tusk បាននិយាយថា ប៉ូឡូញមិនមានគម្រោងចូលរួមក្នុងការដាក់ពង្រាយយោធាអឺរ៉ុបទៅកាន់កោះហ្គ្រីនឡែននោះទេ ប៉ុន្តែបានព្រមានថា រាល់អន្តរាគមន៍យោធារបស់អាមេរិកនៅទីនោះ “នឹងក្លាយជាមហន្តរាយនយោបាយ”។
លោកបានប្រាប់សន្និសីទសារព័ត៌មានថា៖ «ជម្លោះ ឬការប៉ុនប៉ងបញ្ចូលទឹកដីរបស់សមាជិកណាតូ (Nato) មួយ ដោយសមាជិកណាតូមួយទៀត នឹងក្លាយជាទីបញ្ចប់នៃពិភពលោកដែលយើងធ្លាប់ស្គាល់ — ហើយដែលជាពិភពលោកបានធានាសន្តិសុខរបស់យើងជាច្រើនឆ្នាំមកហើយ»។
ទន្ទឹមនឹងនោះ ស្ថានទូតរុស្ស៊ីប្រចាំប្រទេសប៊ែលហ្សិក បានសម្តែង “ការព្រួយបារម្ភយ៉ាងខ្លាំង” ចំពោះអ្វីដែលកំពុងកើតឡើងនៅតំបន់អាកទិក ដោយបានចោទប្រកាន់អង្គការណាតូថា បានពង្រឹងវត្តមានយោធានៅទីនោះ “ក្រោមលេសក្លែងក្លាយអំពីការកើនឡើងការគំរាមកំហែងពីទីក្រុងម៉ូស្គូ និងទីក្រុងប៉េកាំង”។
ប្រទេសអាល្លឺម៉ង់ កំពុងបញ្ជូនយន្តហោះដឹកជញ្ជូន A400M មួយគ្រឿងទៅកាន់ទីក្រុង Nuuk នៅថ្ងៃទី១៥ខែមករា ជាមួយកងទ័ពចំនួន ១៣នាក់ ទោះបីជាមន្ត្រីបាននិយាយថា ពួកគេនឹងស្នាក់នៅក្នុងកោះហ្គ្រីនឡែនត្រឹមតែដល់ថ្ងៃទី១៧ខែមករាក៏ដោយ។
មន្ត្រីការពារជាតិដាណឺម៉ាក បាននិយាយថា ពួកគេបានសម្រេចចិត្តជាមួយរដ្ឋាភិបាលហ្គ្រីនឡែនថា នឹងមានការបង្កើនវត្តមានយោធានៅជុំវិញកោះហ្គ្រីនឡែននាពេលខាងមុខ ដើម្បីពង្រឹង “ដានជើង” របស់អង្គការណាតូនៅក្នុងតំបន់អាកទិក សម្រាប់ជាប្រយោជន៍ដល់សន្តិសុខទាំងនៅអឺរ៉ុប និងឆ្លងកាត់មហាសមុទ្រអាត្លង់ទិក។
នៅក្នុងសុន្ទរកថាឆ្នាំថ្មីរបស់លោកទៅកាន់កងកម្លាំងប្រដាប់អាវុធបារាំង លោក Macron បានមានប្រសាសន៍ថា ជនជាតិអឺរ៉ុបមានការទទួលខុសត្រូវពិសេសចំពោះកោះហ្គ្រីនឡែន “ពីព្រោះទឹកដីនេះ ជាកម្មសិទ្ធិរបស់សហភាពអឺរ៉ុប ហើយវាក៏ជាសម្ព័ន្ធមិត្តណាតូមួយរបស់យើងផងដែរ”។
សហរដ្ឋអាមេរិក មានមូលដ្ឋានទ័ពរួចហើយនៅក្នុងកោះហ្គ្រីនឡែន ដែលបច្ចុប្បន្នមានបុគ្គលិកសរុបរហូតដល់ ១៥០នាក់ ហើយមានជម្រើសក្នុងការនាំយកកម្លាំងបន្ថែមក្នុងចំនួនដ៏ច្រើនលើសលប់ នៅក្រោមស្មារតីនៃកិច្ចព្រមព្រៀងដែលមានស្រាប់ជាមួយទីក្រុងកូពែនហាក (Copenhagen)។ ប៉ុន្តែ គំនិតផ្ដួចផ្ដើមដែលដឹកនាំដោយដាណឺម៉ាកនេះ ត្រូវបានគេមើលឃើញថាជាការផ្ញើសារទៅកាន់រដ្ឋបាល លោក Trump ថា សម្ព័ន្ធមិត្តអឺរ៉ុបក៏មានចំណែកក្នុងសន្តិសុខនៅតំបន់អាកទិក និងមហាសមុទ្រអាត្លង់ទិកខាងជើងផងដែរ៕
