លោក ដូណាល់ ត្រាំ បានមានប្រសាសន៍ថា លោកត្រូវបានគេប្រាប់ថា “ការសម្លាប់នៅក្នុងប្រទេសអ៊ីរ៉ង់បានបញ្ឈប់ហើយ” ប៉ុន្តែប្រធានាធិបតីសហរដ្ឋអាមេរិករូបនេះ មិនបានច្រានចោលនូវចំណាត់ការយោធាប្រឆាំងនឹងប្រទេសនេះឡើយ ចំពោះការបង្ក្រាបយ៉ាងហិង្សាលើក្រុមអ្នកតវ៉ាប្រឆាំងរដ្ឋាភិបាល។
យោងតាមក្រុមសិទ្ធិមនុស្ស មនុស្សច្រើនជាង ២ ៤០០ នាក់ ត្រូវបានសម្លាប់នៅក្នុងការបង្ក្រាបនាពេលថ្មីៗនេះ ដោយអាជ្ញាធរអ៊ីរ៉ង់ ដើម្បីឆ្លើយតបទៅនឹងការតវ៉ានៅទូទាំងប្រទេស។
ការអត្ថាធិប្បាយរបស់លោក ត្រាំ កាលពីថ្ងៃទី១៤ខែមករា បានកើតឡើងបន្ទាប់ពីសហរដ្ឋអាមេរិក និងចក្រភពអង់គ្លេស បានកាត់បន្ថយចំនួនបុគ្គលិកនៅមូលដ្ឋានទ័ពអាកាស Al-Udeid ក្នុងប្រទេសកាតា។ មន្ត្រីបានប្រាប់សារព័ត៌មាន CBS ដែលជាដៃគូរបស់ BBC ប្រចាំសហរដ្ឋអាមេរិកថា ការដកទ័ពរបស់អាមេរិកមួយផ្នែក គឺជា “វិធានការប្រុងប្រយ័ត្ន”។
លំហអាកាសរបស់ប្រទេសអ៊ីរ៉ង់ ត្រូវបានបិទចំពោះជើងហោះហើរស្ទើរតែទាំងអស់ក្នុងរយៈពេល ៥ ម៉ោងពេញមួយយប់ ខណៈដែលក្រុមហ៊ុនអាកាសចរណ៍មួយចំនួនបានប្រកាសថា ពួកគេនឹងបង្វែរទិសដៅហោះហើរជៀសពីប្រទេសអ៊ីរ៉ង់។
អ្នកនាំពាក្យរដ្ឋាភិបាលម្នាក់ បាននិយាយថា ក្រសួងការបរទេសចក្រភពអង់គ្លេស ក៏បានបិទស្ថានទូតរបស់ខ្លួននៅទីក្រុងតេអេរ៉ង់ជាបណ្ដោះអាសន្នផងដែរ ដែលឥឡូវនេះនឹងដំណើរការពីចម្ងាយវិញ។
កាលពីមុន លោក Trump បានគំរាមកំហែងនឹងចាត់ “វិធានការខ្លាំងក្លាបំផុត” ប្រឆាំងនឹងអ៊ីរ៉ង់ ប្រសិនបើរដ្ឋាភិបាលប្រហារជីវិតក្រុមអ្នកតវ៉ា បន្ទាប់ពីមានសេចក្តីរាយការណ៍ថា បុរសអាយុ ២៦ឆ្នាំម្នាក់ ដែលត្រូវបានចាប់ខ្លួនក្នុងអំឡុងពេលនៃការធ្វើបាតុកម្ម ត្រូវបានកាត់ទោសប្រហារជីវិត។
ក្រុមគ្រួសាររបស់លោក Erfan Soltani បានប្រាប់ BBC Persian ថា រូបគេនឹងត្រូវប្រហារជីវិតនៅថ្ងៃទី១៤ខែមករា។ ក្រោយមក ពួកគេបានប្រាប់ក្រុមសិទ្ធិមនុស្សឃឺដ Hengaw ដែលមានមូលដ្ឋាននៅប្រទេសន័រវែសថា ការប្រហារជីវិតត្រូវបានពន្យារពេល។
កាលពីថ្ងៃទី១៥ខែមករា ប្រព័ន្ធផ្សព្វផ្សាយរដ្ឋអ៊ីរ៉ង់ បាននិយាយថា លោក Soltani ត្រូវបានចាប់ខ្លួនក្នុងអំឡុងពេលតវ៉ាមែន ប៉ុន្តែបានបដិសេធថា រូបគេមិនត្រូវបានកាត់ទោសប្រហារជីវិតនោះទេ។
ថ្លែងចេញពីសេតវិមាន លោក Trump បានមានប្រសាសន៍ថា រដ្ឋបាលរបស់លោកត្រូវបានគេប្រាប់ពី “ប្រភពដែលមានសិទ្ធិអំណាចច្បាស់លាស់” ថា “ការសម្លាប់នៅក្នុងប្រទេសអ៊ីរ៉ង់កំពុងបញ្ឈប់ ហើយមិនមានផែនការសម្រាប់ការប្រហារជីវិតនោះទេ”។
ដើម្បីឆ្លើយតបទៅនឹងរបាយការណ៍អំពីការប្រហារជីវិតដែលអាចកើតមាន រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា “ការព្យួរកគឺមិនអាចទៅរួចទេ” ហើយនឹង “គ្មានការព្យួរកនៅថ្ងៃនេះ ឬថ្ងៃស្អែកឡើយ”។
ថ្លែងទៅកាន់សារព័ត៌មាន Fox News លោកក៏បានព្រមានប្រធានាធិបតីសហរដ្ឋអាមេរិកថា “កុំឱ្យធ្វើខុសដដែលៗដូចដែលលោកបានធ្វើកាលពីខែមិថុនា” ដោយបន្ថែមថា “ប្រសិនបើលោកព្យាយាមធ្វើការពិសោធន៍ដែលបរាជ័យ លោកនឹងទទួលបានលទ្ធផលដដែល”។
កាលពីខែមិថុនា ឆ្នាំ២០២៥ សហរដ្ឋអាមេរិក បានទម្លាក់គ្រាប់បែកលើទីតាំងនុយក្លេអ៊ែរចំនួន ៣ របស់អ៊ីរ៉ង់ ដោយសារការភ័យខ្លាចថា ទីក្រុងតេអេរ៉ង់អាចប្រើប្រាស់ទីតាំងទាំងនោះ ដើម្បីផលិតអាវុធនុយក្លេអ៊ែរ។
បាតុកម្មដំបូងឡើយដែលបង្កឡើងដោយការដួលរលំនៃរូបិយប័ណ្ណអ៊ីរ៉ង់ បានចាប់ផ្តើមនៅចុងខែធ្នូ ប៉ុន្តែបានរីកធំឡើងយ៉ាងឆាប់រហ័សទៅជាវិបត្តិភាពស្របច្បាប់ កាន់តែទូលំទូលាយសម្រាប់ថ្នាក់ដឹកនាំសាសនារបស់អ៊ីរ៉ង់៕
