សាច់ញាតិរបស់លោក សុខ ស៊ុនណារ៉េត ស្នើសាលាឧទ្ធរណ៍ភ្នំពេញពិចារណាក្នុងការទម្លាក់បទចោទ ដោយលោកនៅតែបញ្ជាក់ថា មិនបានប្រព្រឹត្តកំហុសដូចការចោទប្រកាន់ ខណៈអគ្គព្រះរាជអាជ្ញាសាលាឧទ្ធរណ៍ភ្នំពេញ បានស្នើទៅតុលាការដាក់ពិន័យលើលោក ណារ៉េត បន្ថែមលើការផ្តន្ទាទោសដាក់ពន្ធនាគារដែលធ្វើឡើងដោយសាលាដំបូងខេត្តកំពង់ស្ពឺ។
ការស្នើនេះ ធ្វើឡើងនៅក្នុងសវនាការនៅសាលាឧទ្ធណ៍ភ្នំពេញ នាព្រឹកថ្ងៃទី១៩ ខែមករា ឆ្នាំ២០២៦នេះ ក្រោយលោក សុខ ស៊ុនណារ៉េត និងមេធាវីរបស់លោក ប្តឹងជំទាស់នឹងការសម្រេចរបស់សាលាដំបូងខេត្តកំពង់ស្ពឺ ដែលផ្តន្ទាទោសរូបលោកដាក់ពន្ធនាគាររយៈពេល ៤ឆ្នាំ ក្រោមការចោទពីបទរក្សាទុកដោយខុសច្បាប់នូវសារធាតុញៀន។
លោក សុខ ស៊ុនណារ៉េត ដែលជាឪពុករបស់លោក ស៊ន តារា អ្នកអត្ថាធិប្បាយនយោបាយ ត្រូវបានសមត្ថកិច្ចខេត្តកំពង់ស្ពឺ ចាប់ខ្លួន កាលពីថ្ងៃទី១៣ ខែវិច្ឆិកា ឆ្នាំ២០២៤ អំឡុងពេលមេបញ្ជាការភូមិភាគ៣ បានហៅលោកឱ្យទៅជួប ហើយលោកត្រូវបានតុលាការខេត្តកំពង់ស្ពឺ ចោទប្រកាន់ និងបញ្ជូនទៅឃុំខ្លួននៅពន្ធនាគារបណ្តោះអាសន្នតែម្តង។
លោក ស៊ន សារ៉ាត់ កូនប្រុសរបស់លោក សុខ ស៊ុនណារ៉េត បានថ្លែងប្រាប់អ្នកសារព័ត៌មានថា ក្នុងសវនាការនាព្រឹកថ្ងៃចន្ទនេះ ឪពុករបស់លោកនៅតែរក្សាជំហរដូចនៅសាលាដំបូងដែរ គឺមិនទទួលស្គាល់នូវការចោទប្រកាន់នោះទេ ហើយគាត់បានស្នើសុំសាលាឧទ្ធរណ៍ រកយុត្តិធម៌ និងដោះលែងរកគាត់ឱ្យមានសេរីភាពវិញ។
លោកឱ្យដឹងដែរថា អំឡុងពេលជិតបញ្ចប់សវនាការ អគ្គព្រះរាជអាជ្ញា បានស្នើសុំដល់ប្រធានក្រុមប្រឹក្សាជំនុំជម្រះ ធ្វើការពិន័យបន្ថែមលើការដាក់ទោសទណ្ឌទៅលើឪពុករបស់លោក ដោយសារនៅដំណាក់កាលសាលាដំបូង តុលាការមិនបានពិន័យជាប្រាក់ ដែលការណ៍នេះ លោកថាជារឿងគួរឱ្យសោកស្តាយ ឪពុករបស់លោកជាប់ពន្ធនាគារទាំងអយុត្តិធម៌ហើយ បែរជាអគ្គព្រះរាជអាជ្ញាស្នើបន្ថែមពិន័យទៀត។
លោក សារ៉ាត និយាយថា៖ «វាគួរឱ្យសោកស្តាយ មិនត្រឹមតែបណ្តឹងរបស់គាត់ ដែលគាត់ច្រានចោល ដែលគាត់ស្នើសុំឱ្យមានការទម្លាក់ទេ បែរជាព្រះរាជអាជ្ញាសាលាឧទ្ធរណ៍ ស្នើបន្ថែមឱ្យមានការពិន័យថែមទៀត គេអត់បញ្ជាក់[ថាចំនួនប៉ុន្មាន]ទេ ស្នើសុំប្តឹងឱ្យមាការដាក់ពិន័យថែមទៀត[…]ជាថ្មីម្តងទៀត ជាសំណូមពរដដែលជាដដែលទេ គឺសំណូមពរដល់ប្រមុខរដ្ឋាភិបាល សម្តេចទាំងពីរ មេត្តាយោគយល់និងអនុគ្រោះដល់ឪពុករបស់ខ្ញុំដែលមានវ័យជរា អនុគ្រោះនិងយោគយល់ដល់គាត់ដែលបម្រើជាតិជាង៣០ឆ្នាំមកនេះ សុំឱ្យគាត់មានសេរីភាពឡើងវិញ ដើម្បីជួបជុំគ្រួសារ»។
លោក សុខ ស៊ុនណារ៉េត កន្លងមក ក៏ធ្លាប់បានប្រាប់តុលាការថា លោកជាមនុស្សស្អាតស្អំ ដោយមិនបានរក្សាទុកសារធាតុញៀនក្នុងរថយន្តដែលលោកបានប្រើប្រាស់នោះទេ ស្របពេលលោកជាអតីតយោធិន ចូលបម្រើការងារជូនជាតិដោយភក្ដីភាព ស្ទើរពេញមួយជីវិត ដោយបន្សល់ទុកនូវស្នាមរបួស និងជំងឺរ៉ាំរ៉ៃមកទល់សព្វថ្ងៃ។
មន្ត្រីអង្កេតជាន់ខ្ពស់នៃសមាគមការពារសិទ្ធិមនុស្សអាដហុក លោក គឹម ពិសិដ្ឋ ដែលតាមដានសំណុំរឿងនេះ ចាប់អារម្មណ៍ទៅលើអង្គហេតុមួយចំនួន ពាក់ព័ន្ធនឹងដំណើរការចាប់ខ្លួន លោក សុខ ស៊ុនណារ៉េត។ លោកថា លោក ណារ៉េត ត្រូវបានថ្នាក់លើរបស់គាត់ហៅទៅអង្គភាព ហើយពេលគាត់ធ្វើដំណើរបានពាក់កណ្តាលផ្លូវ ក៏ស្រាប់តែមានកម្លាំងកងរាជអាវុធហត្ថ នាំខ្លួនគាត់ទៅឆែកឆេរ និងសួរនាំ ហើយក្នុងអំឡុងពេលនោះកូនប្រុសគាត់ គឺលោក ស៊ន តារា ដែលរស់នៅក្រៅប្រទេស កំពុងតែសកម្មក្នុងការបញ្ចេញមតិអំពីបញ្ហាសង្គម និងនយោបាយនៅកម្ពុជា។
លោកយល់ថា៖ «អញ្ចឹងថា នេះជាការធ្វើការរឹតត្បិត ជាការរំខានទៅដល់ក្រុមគ្រួសារ ឬក៏បុគ្គលដែលហ៊ានបញ្ចេញមតិសម្រាប់រិះគន់ផងដែរ»។
បើតាម លោក គឹម ពិសិដ្ឋ សាលាឧទ្ធរណ៍ភ្នំពេញ នឹងប្រកាសសាលក្រមលើសំណុំរឿង លោក សុខ ស៊ុនណារ៉េត នៅថ្ងៃទី២៩ ខែមករា ឆ្នាំ២០២៦ ខាងមុខនេះ។
វីអូឌី មិនអាចសុំការអត្ថាធិប្បាយជុំវិញករណីនេះ ពីអ្នកនាំពាក្យសាលាឧទ្ធរណ៍ភ្នំពេញ លោក ឃុន លាងម៉េង បានទេនៅថ្ងៃចន្ទនេះ។
ជុំវិញករណីនេះ អ្នកនយោបាយនៅក្រៅប្រទេស មានប្រតិកម្មជាហូរហែថា ការចាប់ខ្លួនលោក សុខ ស៊ុនណារ៉េត ជាយុទ្ធសាស្ត្រថ្មីរបស់គ្រួសារត្រកូលហ៊ុន ដែលចង់បំបិទមាត់សំឡេងរិះគន់ ស្របពេលដែលកូនរបស់លោក ណារ៉េត គឺលោក ស៊ន តារា ជាអ្នកអធិប្បាយនយោបាយដ៏លេចធ្លោមួយរូបនៅលើបណ្តាញសង្គម តែងរិះគន់មិនសំចៃពីសកម្មភាពរដ្ឋាភិបាលកម្ពុជា។
ក្រុមអ្នកនយោបាយប្រឆាំងរស់នៅក្រៅប្រទេស យល់ថា ការចាប់ខ្លួនលោក សុខ ស៊ុនណារ៉េត គឺជារឿងនយោបាយសុទ្ធសាទ។ ក៏ប៉ុន្តែបក្សកាន់អំណាច បានបញ្ជាក់ថា ការចាប់ខ្លួនធ្វើឡើងដោយផ្អែកលើបទល្មើសជាក់ស្តែង ដែលនៅក្នុងនោះ លោក សុខ ស៊ុនណារ៉េត ត្រូវបានរកឃើញថា មានរក្សាទុកដោយខុសច្បាប់នូវសារធាតុញៀន។
ចំណែក ក្រុមអ្នកតស៊ូមតិកម្ពុជា ហៅកាត់ថា CAT បានចេញសេចក្តីថ្លែងការណ៍មួយ កាលពីចុងខែវិច្ឆិកា ឆ្នាំ២០២៤ ដោយចាត់ទុកសកម្មភាពរបស់រដ្ឋាភិបាល និងប្រធានរដ្ឋសភា ទៅលើឪពុកលោក ស៊ន តារា ថាជាការបំបិតសំឡេងអ្នកដែលហ៊ានរិះគន់ចំពោះការ់ដឹកនាំរបស់ខ្លួន។ ករណីនេះ ក្រុមអ្នកតស៊ូមតិកម្ពុជា បានអំពាវនាវឱ្យមានការដោះលែងឪពុកលោក ស៊ន តារា ឱ្យមានសេរីភាពវិញ៕
