សហជីពសេរីកម្មករនៃព្រះរាជាណាចក្រកម្ពុជា (FTUWKC) ស្នើអគ្គស្នងការនគរបាលជាតិ ដែលជាសេនាធិការរបស់រដ្ឋាភិបាល ជំរុញការស្រាវជ្រាវ ស៊ើបអង្កេត និងកំណត់អត្តសញ្ញាណឃាតក ដែលបាញ់សម្លាប់មេដឹកនាំសហជីព លោក ជា វិជ្ជា ខណៈសំណុំរឿងឃាតកម្មនេះ មានរយៈពេល២២ឆ្នាំ ដែលគ្រួសារជនរងគ្រោះ មិនទាន់ទទួលបានយុត្តិធម៌នៅឡើយ។
ក្នុងលិខិតរបស់អ្នកស្រី ទូច សើ ប្រធានសហជីពសេរីកម្មករនៃព្រះរាជាណាចក្រកម្ពុជា ដាក់ជូនអគ្គស្នងការនគរបាលជាតិ ចុះថ្ងៃទី១៩ ខែមករា ឆ្នាំ២០២៦ និងត្រូវបានផ្សព្វផ្សាយនៅថ្ងៃអង្គារនេះ បានលើកឡើងថា តំណាងអយ្យការអមសាលាដំបូងរាជធានីភ្នំពេញ កាលពីថ្ងៃទី២៨ ខែមករា ឆ្នាំ២០១៤ បានចេញលិខិតផ្លូវការឱ្យអគ្គស្នងការដ្ឋាននគរបាលជាតិ ស្នើធ្វើការស្រាវជ្រាវ ស៊ើបអង្កេត កំណត់អត្តសញ្ញាណជនប្រព្រឹត្តបទល្មើស និងប្រមូលភស្តុតាងបញ្ជូនទៅអយ្យការ ដ៊ើម្បីចាត់ការតាមនីតិវិធី ពាក់ព័ន្ធនឹងសំណុំរឿងឃាតកម្មលើលោក ជា វិជ្ជា ។
ប៉ុន្តែគិតមកដល់បច្ចុប្បន្ននេះ អគ្គស្នងការដ្ឋាននគរបាលជាតិ នៅមិនទាន់បានបង្ហាញលទ្ធផលនៃការស្រាវជ្រាវ ស៊ើបអង្កេត និងកំណត់អត្តសញ្ញាណឃាតក ដែលបាញ់សម្លាប់លោក ជា វិជ្ជា យ៉ាងព្រៃផ្សៃនោះនៅឡើយទេ ដែលធ្វើឱ្យសហជីព ព្រមទាំងក្រុមគ្រួសារ សាច់ញាតិ និងមិត្តភ័ក្តលោក ជា វិជ្ជា ជាដើមនោះ នៅបន្តរងចាំពន្លឺយុត្តិធម៌យ៉ាងអន្ទះសា។
ការណ៍នេះ ប្រធានសហជីពរូបនេះ បានស្នើដល់អគ្គស្នងការនគរបាលជាតិ ពន្លឿននីតិវិធីក្នុងការស្រាវជ្រាវ និងចាប់ឃាតកយកមកផ្តន្ទាទោស ដើម្បីផ្តល់យុត្តិធម៌ដល់ក្រុមគ្រួសារ សាច់ញាតិជនរងគ្រោះ ព្រមទាំងឈានទៅរកការកាត់បន្ថយ និងលុបបំបាត់នូវវប្បធម៌និទណ្ឌភាព ពង្រឹងនីតិរដ្ឋ និងយុត្តិធម៌សង្គមពិតប្រាកដនៅកម្ពុជា។
វីអូឌី មិនអាចសុំការអត្ថាធិប្បាយជុំវិញករណីនេះ ពីអ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន បាននៅឡើយទេ នៅថ្ងៃអង្គារនេះ។
ស្របពេលនៃការប្រារព្ធខួប ២២ឆ្នាំនៃការស្លាប់របស់មេដឹកនាំសហជីពដ៏ល្បីល្បាញ លោក ជា វិជ្ជា ដែលប្រព្រឹត្តទៅនៅថ្ងៃទី២២ ខែមករា ឆ្នាំ២០២៦នេះដែរ សហជីពសេរីកម្មករនៃព្រះរាជាណាចក្រកម្ពុជា ក៏បានដាក់លិខិតជូនដំណឹងទៅរដ្ឋបាលរាជធានីភ្នំពេញ កាលពីថ្ងៃទី០៥ខែមករា ស្តីពីការជួបជុំមនុស្ស ៧៥នាក់ ដាក់កម្រងផ្កាគោរពវិញ្ញាណក្ខន្ធ លោក ជា វិជ្ជា ផងដែរ។
ក្រោយមក នៅថ្ងៃទី១៦ ខែមករា អាជ្ញាធរក្រុងភ្នំពេញ អនុញ្ញាតឱ្យសហជីពសេរីកម្មករនៃព្រះរាជាណាចក្រកម្ពុជា រៀបចំការជួបជុំនេះ នៅទីតាំងរូបសំណាកលោក ជា វិជ្ជា ស្ថិតនៅសួនច្បារខាងលិចវិមានឯករាជ្យ ដោយមានភ្ជាប់លក្ខខណ្ឌមួយចំនួន។ នេះបើតាមលិខិតរបស់រដ្ឋាភិបាលរាជធានីភ្នំពេញ។
លិខិតនោះ បន្តថា ដើម្បីធានាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ រដ្ឋបាលរាជធានីភ្នំពេញ បានណែនាំសហជីព អនុវត្តនូវលក្ខខណ្ឌមួយចំនួន ក្នុងនោះ កំណត់អត្តសញ្ញាណអ្នកចូលរួមឱ្យច្បាស់លាស់ដោយមិនអនុញ្ញាតឱ្យជនបរទេសចូលរួម ក្នុងករណីបើមានជនបរទេសចូលរួមត្រូវស្របតាមច្បាប់របស់កម្ពុជា។ ត្រូវផ្សព្វផ្សាយក្រុមសីលធម៌ដល់អ្នកចូលរួម ដោយមិនត្រូវយកវេទិកានេះធ្វើសកម្មភាពនយោបាយ ហើយការថ្លែងសាររបស់សាច់ញាតិ ក៏មិនត្រូវពាក់ព័ន្ធនឹងសារនយោបាយ។
រដ្ឋបាលរាជធានីភ្នំពេញ ក៏បានណែនាំដល់សហជីពសេរីកម្មករ ត្រូវទទួលខុសត្រូវលើការងារការពារសន្តិសុខ សុវត្ថិភាព និងសណ្តាប់ធ្នាប់ខាងក្នុង ហើយសមត្ថកិច្ចទទួលខុសត្រូវការពារពីខាងក្រៅ រៀបចំចំណតសម្រាប់អ្នកចូលរួមពិធី ឬគួរប្រើប្រាស់មធ្យោបាយរួមសម្រាប់អ្នកចូលរួម ព្រមទាំងសម្អាតអនាម័យនៅកន្លែងរៀបចំពិធីផងដែរ។
លោក ជា វិជ្ជា ជាអតីតប្រធានសហជីពសេរីកម្មករនៃព្រះរាជាណាចក្រកម្ពុជា ត្រូវបានគេបាញ់ចំសៀតផ្កា និងដើមទ្រូង ដេកស្លាប់ក្នុងថ្លុកឈាម នាព្រឹកថ្ងៃទី២២ ខែមករា ឆ្នាំ២០០៤ ខណៈលោកកំពុងឈរនៅក្នុងតូបកាសែតមួយ ខាងលិចវត្តលង្កា ក្នុងទីក្រុងភ្នំពេញ។
ការបាញ់សម្លាប់លោក ជា វិជ្ជា កើតមានឡើង បន្ទាប់ពីលោកបានទទួលរងការព្រមានសម្លាប់ និងការគំរាមកំហែងពីជនមិនស្គាល់មុខជាបន្តបន្ទាប់ ចំពោះសកម្មភាពសហជីពដ៏សកម្មរបស់លោក ដើម្បីទាមទារអត្ថប្រយោជន៍ដល់កម្មកររួមមានទាំងការទាមទារដំឡើងប្រាក់ឈ្នួលផងដែរ។
បន្ទាប់ពីកើតហេតុនេះ មនុស្ស២នាក់ ត្រូវបានចាប់ខ្លួន ដោយចោទប្រកាន់ថា ជាឃាតករបាញ់សម្លាប់ ប្រធានសហជីពដ៏ល្បីល្បាញរូបនេះ។ ក្រោយជាប់ឃុំអស់ជាច្រើនឆ្នាំ និងរកមិនឃើញពីអំពើល្មើស ទាំងលោក សុខ សំអឿន និងលោក ប៊ន សំណាង ត្រូវបានគេដោះលែងវិញ។
គិតពីថ្ងៃផ្តល់សេរីភាពឱ្យពួកគេទាំងពីរនាក់ មិនទទួលបានសំណងនៃជំងឺចិត្ត និងប៉ះប៉ូវការខូចខាតកិត្តិយសអ្វីទាំងអស់រហូតមកដល់ពេលនេះ ហើយឃាតកពិត និងអ្នកបញ្ជានៅក្នុងសំណុំរឿងនៃបទឧក្រិដ្ឋនេះ នៅតែមិនទាន់ស្វែងរកចាប់ខ្លួន ដើម្បីយកមកអនុវត្តទោសបាននៅឡើយទេ។
ករណីលោក ជា វិជ្ជា ក៏ត្រូវបានក្រុមឃ្លាំមើលសិទ្ធិមនុស្ស មើលឃើញថា ស្ថិតក្នុងចំណោមសំណុំរឿងដែលមិនទាន់ដោះស្រាយបានចប់សព្វគ្រប់ផ្សេងទៀត ដូចយ៉ាងករណីឃាតកម្មលើអ្នកនាង ពិសិដ្ឋ ពិលិការ នៅឆ្នាំ១៩៩៩ និងព្រះតេជព្រះគុណ សំ ប៊ុនធឿន នៅឆ្នាំ២០០៣ជាដើម៕
