យុវជនជនជាតិដើមភាគតិចកួយ រស់នៅខេត្តស្ទឹងត្រែង គឺលោក ម៉ៅ វាសនា វ័យ ១៨ឆ្នាំ ត្រូវជាកូនប្រុសបង្កើតសកម្មជនការពារព្រៃឈើ លោក អ៊ុក ម៉ៅ ទាមទាររកយុត្តិធម៌ ក្រោយពីប្រធានពន្ធនាគារនៅខេត្តព្រះវិហារ លោក យន់ ម៉ានី និងព្រះរាជអាជ្ញារងខេត្តនេះ លោក ស្រេង វុទ្ធា បន្តឃុំខ្លួនរូបលោក លើសពេលកំណត់ ផ្ទុយពីខ្លឹមសារសាលដីកាសាលាឧទ្ធរណ៍ត្បូងឃ្មុំ ចុះថ្ងៃទី០៣ ខែកញ្ញា ឆ្នាំ២០២៥។
យុវជនជនជាតិដើមភាគតិចកួយ លោក ម៉ៅ វាសនា ប្រាប់វីអូឌីនៅថ្ងៃទី២០ ខែមករាថា ការរស់នៅក្នុងពន្ធនាគារលំបាកវេទនាចង្អៀតណែន ហើយលោកដេកបន់ឱ្យតែដល់ថ្ងៃចេញពីទីនោះ ក៏ប៉ុន្តែដល់ថ្ងៃចេញពីពន្ធនាគារ បែរជាគេមិនដោះលែង ហើយត្រូវពន្យារពេលឃុំខ្លួនលោក លើស៤ថ្ងៃទៀត។
លោកថា ទង្វើនេះជារឿងអយុត្តិធម៌ប៉ះពាល់សិទ្ធិសេរីភាព និងបញ្ហាផ្លូវចិត្តរបស់លោក។
លោក ម៉ៅ វាសនា និយាយថា៖ «ការជាប់ដំបូងៗ អត់សូវគិតអីប៉ុន្មានទេ ដល់ពេលកាត់ទោសរួចចាប់ផ្តើមគិត សប្បាយចិត្ត យើងដឹងថ្ងៃយើងចេញ។ តែដល់ពេលថ្ងៃចេញ គេអត់ឱ្យចេញ។ បរិយាកាសមិនល្អ ស្អុយដេកប៉ះគ្នាមិនបាន ដេកប៉ះគ្នា វាយគ្នាផ្អើលពេញហ្នឹងទៅ»។
កាលពីថ្ងៃទី១៣ ខែមករា ឆ្នាំ២០២៦ លោក ម៉ៅ វាសនា បានផ្តិតមេដៃ ប្តឹងប្រធានពន្ធនាគារនៅខេត្តព្រះវិហារ លោក យន់ ម៉ានី និងព្រះរាជអាជ្ញារងខេត្តនេះ លោក ស្រេង វុទ្ធា ទៅកាន់ព្រះរាជអាជ្ញាធរខេត្តព្រះវិហារ ពីបទ ប៉ះពាល់ដល់សេរីភាពបុគ្គល បទមិនព្រមដោះលែងបុគ្គលដែលត្រូវបានឃុំដោយខុសច្បាប់ និងបទអូសបន្លាយការឃុំខ្លួនដោយខុសច្បាប់។
ចំណែកសកម្មជនការពារព្រៃឈើ នៅខេត្តស្ទឹងត្រែង លោក អ៊ុក ម៉ៅ ទាមទារឱ្យប្រធានពន្ធនាគារខេត្តព្រះវិហារ និងព្រះរាជអាជ្ញារងកែតម្រូវកំហុសឆ្គងរបស់ខ្លួនដោយត្រូវទទួលពិន័យរដ្ឋបាល និងផ្តល់សំណងជំងឺចិត្តដល់ជនរងគ្រោះ ចៀសវាងកុំឱ្យករណីនេះកើតមាន ចំពោះអ្នកផ្សេងទៀត។
លោក អ៊ុក ម៉ៅ និយាយថា៖ «តុលាការនិងប្រធានគុកហ្នឹង គាត់អត់គោរពច្បាប់ គាត់ធ្វើខុស ខ្ញុំចង់ឱ្យគាត់កែសម្រួលត្រង់ថា បើច្បាប់អនុវត្តអី ឱ្យគាត់អនុវត្តហ្នឹង កុំឱ្យគាត់ខុសទៀត។ ខ្ញុំចង់ឱ្យមន្ត្រីកែតម្រូវអ្វីដែលខុសត្រូវ.»។
វីអូឌី មិនទាន់អាចទាក់ទងសុំការបំភ្លឺជុំវិញរឿងនេះ ពីប្រធានពន្ធនាគារនៅខេត្តព្រះវិហារ លោក យន់ ម៉ានី និងព្រះរាជអាជ្ញារងខេត្តនេះ លោក ស្រេង វុទ្ធា បាននៅឡើយទេគិតត្រឹមម៉ោងផ្សាយនេះ។
តែយ៉ាងណា ពន្ធនាគារខេត្តព្រះវិហារ បានចេញសេចក្តីបំភ្លឺ នៅថ្ងៃទី១៧ ខែមករា ឆ្លើយតបតាមបណ្តាញសង្គមហ្វេសប៊ុក របស់គណនីហ្វេសប៊ុកផេក ឈោ្មះ Em Soksovann ប្រធានគណបក្សដើម្បីកម្ពុជា ដោយបកស្រាយថា ពន្ធនាគារពិតជាបានដោះលែងទណ្ឌិតឈ្មោះ ម៉ៅ វាសនា នៅថ្ងៃទី១៦ ខែកញ្ញា ឆ្នាំ២០២៥ គឺផ្អែកតាមដីកាបង្គាប់ឱ្យដោះលែងរបស់អយ្យការអមសាលាដំបូងខេត្តព្រះវិហារ ចុះថ្ងៃទី១៦ ខែកញ្ញា ឆ្នាំ២០២៥។ លើសពីនេះអង្គភាពពន្ធនាគារខេត្តព្រះវិហារ បដិសេធចំពោះការចោទប្រកាន់តាមបណ្ដឹងរបស់បុគ្គលឈ្មោះ ម៉ៅ វាសនា ដែលបង្ហោះតាមបណ្តាញសង្គម គណនីហ្វេសប៊ុកផេកឈ្មោះ Em Soksovann ប្រធានគណបក្សដើម្បីកម្ពុជា។
ឆ្លើយតបរឿងនេះ ប្រធានគណបក្សដើម្បីកម្ពុជា លោក ឯម សុខសុវណ្ណ យល់ថា សំណុំរឿងនេះមិនមែនសម្រាប់តែយុវជនជនជាតិដើមកួយ លោក ម៉ៅ វាសនា ម្នាក់ប៉ុណ្ណោះទេ គឺសំដៅដល់ពលរដ្ឋទូទៅ ត្រូវទទួលបានយុត្តិធម៌ ព្រោះរឿងនេះកើតមានច្រើនតែកម្រមានអ្នកណាហ៊ានប្ដឹងផ្តល់។
លោកថា ទង្វើរបស់ប្រធានពន្ធនាគារ និងព្រះរាជអាជ្ញារងរូបនេះ ផ្ទុយពីច្បាប់ពីពន្ធនាគារ ប៉ះពាល់ដល់សេរីភាពមនុស្សដែលទាមទារឱ្យទទួលខុសត្រូវតាមច្បាប់។
លោក ឯម សុខសុវណ្ណ ថ្លែងថា៖ «កាលជាប់គុកហ្នឹង គ្នាអត់គ្រប់អាយុ ១៨ណាបង គ្នាប្រើសិទ្ធិគ្នាតាមច្បាប់ ហេតុអីក៏អ្នកឯង អ្នកចេះអនុវត្តច្បាប់ហើយ ម៉េចក៏អ្នកឯងនៅតែបំពានគ្នាទៀត? គ្នាទទួលស្គាល់អស់ហើយកំហុសគ្នា។ លុយប៉ុន្មាន ៥ម៉ឺនរៀល។ គ្នាជាជនរងគ្រោះ គ្នាជាអនីតិជនទៅហើយ ព្រាត់ប្រាសក្រុមគ្រួសារ គ្នាពិបាកទៅហើយដោយសារសង្គមហ្នឹង។ មេគុកជាអ្នកគ្រប់គ្រងពន្ធនាគារ ច្បាប់ស្តីពីពន្ធនាគារចែងច្បាស់ណាស់ មិនមែនតែតុលាការទេ អ្នកមើលការខុសត្រូវ»។
ខ្លឹមសារពាក្យបណ្តឹងរបស់លោក ម៉ៅ វាសនា គឺប្តឹងព្រះរាជអាជ្ញារង លោក ស្រេង វុទ្ធា និង ប្រធានពន្ធនាគារលោក យន់ ម៉ានី ពីបទឃុំខ្លួនលោក លើសការកំណត់រយៈពេល ៤ថ្ងៃ ប៉ះពាល់សិទ្ធិសេរីភាពរបស់លោក ដែលមានចែងក្នុងច្បាប់។ លោកថា ទោះបីលោកជាទណ្ឌិតដែលផ្ដន្ទាទោសដោយតុលាការ ហើយលោកព្រមទទួលស្គាល់កំហុសហើយ ក៏ប៉ុន្តែសូមមេត្តាតុលាការ និងប្រធានពន្ធនាគារ កុំប្រើប្រាស់អំណាចឃុំឃាំងលោកតាមតែអំពើចិត្តបែបនេះ។
លោកស្នើឱ្យព្រះរាជអាជ្ញាខេត្តព្រះវិហារ និងក្រសួងមហាផ្ទៃ ផ្ដន្ទាទោសលោក យន់ ម៉ានី និងលោក ស្រេង វុទ្ធា តាមច្បាប់ និងសំណងជំងឺចិត្តម្ភៃម៉ឺនដុល្លារអាមេរិក៕
