នៅពេលប្រជាជាតិខ្មែរកំពុងឈឺចាប់ ហូរឈាមស្រក់ទឹកភ្នែកដោយសារថៃប្រមាថមើលងាយ និងឈ្លានពានទឹកដី ឈ្មួញរកស៊ីឈើដុះស្លែ គឺកាន់តែសម្រុកកាប់បំផ្លាញព្រៃឈើ និងជីកយករ៉ែខ្មែរកាន់តែខ្លាំងឡើងថែមទៀត ខណៈសកម្មជនព្រៃឈើមួយចំនួន ត្រូវបានចាប់ឃុំខ្លួន និងមួយចំនួនរត់ភៀសខ្លួនទៅសុំសិទ្ធិជ្រកកោណនៅក្រៅប្រទេស បន្ទាប់ពីទទួលរងការគំរាមសម្លាប់មួយពូជ ដោយសារតែភាពសកម្មក្នុងការចេញមុខការពារធនធានធម្មជាតិ។
លោក ហេង ស្រស់ ជាសកម្មជនបរិស្ថានដ៏លេចធ្លោមួយរូប ដែលទើបតែទទួលបានសិទ្ធិជ្រកកោណទៅរស់នៅប្រទេសអូស្ត្រាលី កាលពីពេលថ្មីៗនេះ ក្រោយពីទទួលរងការគំរាមសម្លាប់មួយគ្រួសារ ពីក្រុមហ៊ុនរបស់លោកឧកញ៉ា លី យ៉ុងផាត់ នៃបក្សប្រជាជនកម្ពុជា បានប្រាប់វីអូឌីនៅថ្ងៃទី២៣ខែមករានេះថា ការចាប់សកម្មជនបរិស្ថានដាក់ពន្ធនាគារ និងការគំរាមកំហែងធ្វើទុក្ខបុកម្នេញគំរាមសម្លាប់លើសកម្មជនបរិស្ថាន ដូចជារូបលោកជាដើម វាមិនមែនជារឿងចៃដន្យនោះទេ។
លោកបញ្ជាក់ថា ទាំងរដ្ឋាភិបាលនៃបក្សប្រជាជនទាំងឈ្មួញឈើគ្រាក់ៗ និងទាំងមន្ត្រីក្រោមឱវាទពួកគេបានសហការគ្នារៀបចំផែនការដើម្បីកម្ចាត់សកម្មជនព្រៃឈើ និងអ្នកនយោបាយប្រឆាំងមួយចំនួនចេញដើម្បីពួកគេយកឱកាសបូមនិងច្បាមយកធនធានធម្មជាតិទាំងនៅលើដីទាំងនៅក្រោមដី ដើម្បីធ្វើមានធ្វើបានសម្រាប់ក្រុមបក្ខពួកគ្នាគេ។
លោកថា៖ «ហើយការយកទៅធ្វើមានធ្វើបាននេះ ដោយសារតែយកទៅពង្រឹងអំណាចរបស់ខ្លួនហ្នឹងឯងវាអត់មានអីទៅវែងឆ្ងាយទេ ហើយព្រៃឈើក៏ដូចជាទ្រព្យសម្បត្តិជាតិ ដូចជារ៉ែ ដូចជាព្រៃឈើហ្នឹង វានឹងបាត់បង់កាន់តែច្រើនថែមបន្តទៅទៀត ដោយសារតែក្រោមស្នាដៃការដឹកនាំដែលបណ្តែតបណ្តោយឱ្យតែក្រុមបក្ខពួកពួកគាត់រកស៊ីជួញដូរទាំងអស់ហ្នឹង។ ជាក់ស្តែងដូចយើងឃើញហើយ ដូចក្រុមហ៊ុនទ្រីភាព ក្រុមហ៊ុនអង្គរប្លាយវូត ក្រុមហ៊ុនធំៗដែលកំពុងរកស៊ីកាប់បំផ្លាញព្រៃឈើ និងរកស៊ីអាជីវកម្មរ៉ែហ្នឹង កំពុងតែសម្រុកច្បាមយកធនធានក្រោមដីនិងធនធានលើដីទាំងអស់»។
សកម្មជនបរិស្ថានរស់នៅខេត្តស្ទឹងត្រែង ដែលតែងតែមានភាពសកម្មយ៉ាងខ្លាំងក្នុងការដឹកនាំប្រជាសហគមន៍ចុះល្បាតព្រៃ ដើម្បីចូលរួមទប់ស្កាត់ការបំផ្លាញធនធានធម្មជាតិរូបនេះ ធ្លាប់ត្រូវបានក្រុមហ៊ុនអ្នកមានអំណាចគំរាមបាញ់សម្លាប់មួយគ្រួសារ បន្ទាប់ពីលោកបានចុះទៅថតរូបសកម្មភាពបូមខ្សាច់ខុសច្បាប់មួយកន្លែង នៅក្នុងស្រុកបុទុមសាគរ ខេត្តកោះកុង របស់ក្រុមហ៊ុនអ្នកឧកញ៉ា លី យ៉ុងផាត់ សមាជិកព្រឹទ្ធសភាគណបក្សប្រជាជនកម្ពុជា និងជាប្រធានសមាគមឧកញ៉ាកម្ពុជា។
លោក ហេង ស្រស់ និយាយថា កាលពីថ្ងៃទី១៤ ខែវិច្ឆិកា ឆ្នាំ២០២៤ អាខោនហ្វេសប៊ុកឈ្មោះ សាន់ ហា ដែលលោកអះអាងថា ជាកូនចៅរបស់លោក លី យ៉ុងផាត់ បានផ្ញើសារគំរាមសម្លាប់លោកទាំងគ្រួសារ។ ក្នុងសារនោះគេគំរាមថា នឹងមិនទុកជីវិតឱ្យលោកនិងគ្រួសារទេបើលោកហ៊ានទៅជាន់ទឹកដីខេត្តកោះកុងនិងខេត្តចំនួន៦ទៀត មាន កំពង់ធំ ព្រះវិហារ ក្រចេះ ស្ទឹងត្រែង រតនគិរី និងមណ្ឌលគិរី ដោយគេប្រាប់ថា ការធ្វើអាជីវកម្មរបស់ពួកគេ គឺបានបង់ប្រាក់ឱ្យមន្ត្រីនិងអាជ្ញាធរពាក់ព័ន្ធរួចអស់ហើយ។
យ៉ាងណាក្តី ក្រោយការគំរាមសម្លាប់មួយគ្រួសារនេះ លោក ស្រស់ នៅតែសកម្មក្នុងការចេញមុខការពារធនធានធម្មជាតិរហូតដល់ថ្ងៃទី២៣ ខែវិច្ឆិកា ឆ្នាំ២០២៤ លោកត្រូវបានសមត្ថកិច្ចចាប់ខ្លួននៅខេត្តស្ទឹងត្រែង។ ក្រៅពីនេះ លោកតែងទទួលរងការធ្វើទុក្ខបុកម្នេញជាបន្តបន្ទាប់ ដូចជា មានអ្នកជិះឡាន ជិះម៉ូតូតាមបុកលោកជាដើម។
ប្រជាសហគមន៍ព្រៃឡង់ កាលពីពេលថ្មីៗនេះ បាននាំគ្នាចុះល្បាតព្រៃឡង់ក្នុងខេត្តស្ទឹងត្រែង និងខេត្តព្រះវិហារ ដោយរកឃើញថា បទល្មើសព្រៃឈើនៅតែកើតមានពេញបន្ទុក។ ពួកគេថា មន្ត្រីបរិស្ថានដែលឈរជើងយាមក្នុងតំបន់ព្រៃឡង់ នៅតែបើកដៃឱ្យក្រុមជនល្មើសចូលកាប់បំផ្លាញព្រៃឈើ ក្នុងដែនជម្រកសត្វព្រៃ ព្រៃឡង់ កាន់តែខ្លាំងក្នុងពេលដែលថៃឈ្លានពានកម្ពុជា។
តំបន់ព្រៃឡង់ដែលជាតំបន់ព្រៃស្រោង និងពាក់កណ្តាលស្រោង ចាប់ពីចំណុចភ្នំក្រៀលក្នុងស្រុកជ័យសែនខេត្តព្រះវិហារ រហូតដល់ស្រុកថាឡាបរិវ៉ាត់ ខេត្តស្ទឹងត្រែង គឺជាតំបន់ដែលសត្វព្រៃរស់នៅបានក្លាយទៅជាកន្លែងកាប់បំផ្លាញព្រៃឈើពេញបន្ទុកក្នុងរយៈពេលជាង២ខែមកនេះ។
តំបន់ដែលមានដើមឈើធំៗ ត្រូវបានគេកាប់ដឹកជញ្ជូនចេញជារៀងរាល់ថ្ងៃ ខណៈតំបន់ដែលមានដើមឈើតូចៗ ត្រូវបានគេកាប់ឈូសឆាយដុតរានយកដី ដោយពុំឃើញមន្ត្រីបរិស្ថានចុះទប់ស្កាត់ឡើយ។ នេះបើតាមប្រជាសហគមន៍ព្រៃឡង់។
លោក អ៊ុក ម៉ៅ សកម្មជនបរិស្ថានម្នាក់ក្នុងចំណោមប្រជាសហគមន៍ ដែលចុះល្បាតព្រៃទាំងនោះ បានប្រាប់វីអូឌីថា ពួកលោកបានប្រទះឃើញបទល្មើសព្រៃឈើកើតឡើងពេញបន្ទុក ហើយបានផ្តល់ព័ត៌មានទៅដល់មន្ត្រីបរិស្ថាននៅក្នុងតំបន់នោះ ប៉ុន្តែមន្ត្រីទាំងនោះ មិនបានចុះទប់ស្កាត់ឡើយ ដោយរុញដាក់គ្នាទៅវិញទៅមក ខណៈជារៀងរាល់ថ្ងៃមានគោយន្តជាច្រើនគ្រឿង ដឹកឈើចេញពីតំបន់នោះ ដោយពុំឃើញមានការទប់ស្កាត់។
លោកថា៖ «ទី១គាត់កាប់អាឈើល្អៗយកទៅលក់ ដល់អស់ឈើល្អចេញទៅជាចម្ការទៅដាំដំឡូង ដាំចន្ទីជាពិសេសដាំកៅស៊ូ។ បរិស្ថានការពារព្រៃត្រូវហើយ ប៉ុន្តែដល់បទល្មើសអារឈើរំលំឈើ គាត់អត់ទប់ស្កាត់ផង។ អាហ្នឹងគាត់គ្រាន់តែយកលេសថាជាមន្ត្រីការពារព្រៃ ប៉ុន្តែការពារព្រៃអស់ព្រៃ យើងឃើញហើយកន្លែងណាដូចកន្លែងណាដែរ ឱ្យតែមានបរិស្ថានអីហ្នឹង ព្រៃឈើរិលតែទាំងអស់ហ្នឹង»។
វីអូឌី មិនអាចទាក់ទង លោក មឿន សុភេទ ប្រធានមន្ទីរបរិស្ថានខេត្តព្រះវិហារ និងលោក ខ្វៃ អាទិត្យា អ្នកនាំពាក្យក្រសួងបរិស្ថាន ដើម្បីស្នើសុំធ្វើត្ថាធិប្បាយលើបញ្ហានេះបានទេ នៅថ្ងៃទី២៣ខែមករានេះ។
ប៉ុន្តែលោក អ៊ាង សុផល្លែត រដ្ឋមន្ត្រីក្រសួងបរិស្ថាន បានថ្លែងនៅក្នុងកិច្ចប្រជុំនៅក្រសួងបរិស្ថាន កាលពីខែឧសភា ឆ្នាំ២០២៥ថា បុគ្គលដែលចូលទៅកាន់កាប់ដីនៅក្នុងតំបន់ការពារធនធានធម្មជាតិ អ្នកទាំងនោះគឺជាជនល្មើសកាប់បំផ្លាញឈូសឆាយព្រៃឈើដោយខុសច្បាប់។ ដូច្នេះមន្ទីរបរិស្ថានទាំង២៥រាជធានីខេត្ត និងក្រសួងបរិស្ថាន ត្រូវចាត់វិធានការដោយដាក់ពាក្យប្តឹងបុគ្គលល្មើសទាំងនោះទៅតុលាការ។
លោកថា៖ «ការពិតការងារការការពារធនធានធម្មជាតិ យើងបានផ្ទេរទៅជូនថ្នាក់ក្រោមជាតិហើយ។តួនាទីសំខាន់ក្នុងការគ្រប់គ្រងការពារធនធានធម្មជាតិនេះ អាជ្ញាធរដែនដី គឺមន្ទីរបរិស្ថានយើង។ ទោះជាយ៉ាងនេះក៏ដោយ ក្រសួងបរិស្ថានមិនព្រងើយកន្តើយទេ ក្នុងនាមជាអាណាព្យាបាលយើងបានកំពុងតែធ្វើការងារដូចខ្ញុំបានលើកឡើងមួយជំហ៊ានម្តងៗ ឈានឆ្ពោះទៅមុខក្នុងការគ្រប់គ្រងធនធានធម្មជាតិរបស់យើងឱ្យទៅជាប្រព័ន្ធដ៏លែងឈឺក្បាលតទៅទៀត»។
ជាមួយគ្នានេះ កាលពីថ្ងៃទី១៧ខែមករា អង្គការមាតាធម្មជាតិ បានបង្ហោះលើបណ្តាញសង្គមថា ខណៈពលរដ្ឋខ្មែរកំពុងរវល់ជាមួយជម្លោះព្រំដែនកម្ពុជា ថៃ ការបំផ្លាញធនធានធម្មជាតិដ៏ធ្ងន់ធ្ងរ កំពុងកើតឡើងដោយស្ងៀមស្ងាត់ នៅភាគខាងជើងនៃខេត្តរតនគិរី។ អង្គការនេះចង្អុលថា ក្រុមហ៊ុនដែលកាន់កាប់ដោយកូនៗរបស់លោកទ្រី ភាព បុរសខ្លាំងដែលល្បីល្បាញខាងជីកយករ៉ែ និងបំផ្លាញធនធានធម្មជាតិខ្មែរ កំពុងអនុវត្តសកម្មភាពជីកយករ៉ែមាសនៅក្នុងឧទ្យានជាតិដ៏ចំណាស់មួយ បំពុលប្រភពទឹកសំខាន់ និងគំរាមកំហែងដល់ជីវិតសហគមន៍មូលដ្ឋាន ជាពិសេសជនជាតិដើមភាគតិចព្រៅ ក្នុងភូមិតាបូក ស្រុកតាវែង ឃុំតាវែងលើ ខេត្តរតនគិរី។
អង្គការនេះ កត់សម្គាល់ថា មកដល់ថ្ងៃទី២៣ខែមករានេះ មានរយៈពេល ៥៧០ថ្ងៃហើយ ដែលសកម្មជនចលនាមាតាធម្មជាតិចំនួន៥នាក់ ត្រូវបានរដ្ឋាភិបាលចាប់ឃុំខ្លួនដោយអយុត្តិធម៌ ខណៈអ្នកទោសមនសិការជាង៩០នាក់ទៀត កំពុងជាប់ឃុំព្រាត់ប្រាស់ពីគ្រួសារ និងមនុស្សជាទីស្រឡាញ់របស់ពួកគេ។ មាតាធម្មជាតិ លើកឡើងទៀតថា ពួកគេទាំងនេះ មិនមែនជាឧក្រិដ្ឋជនឡើយ ពួកគេមិនបានគំរាមកំហែងដល់សន្តិសុខជាតិទេ។ “ឧក្រិដ្ឋកម្ម” តែមួយគត់របស់ពួកគេ គឺការនិយាយការពិត ការការពារធនធានធម្មជាតិរបស់កម្ពុជា និងការធ្វើសកម្មភាពដើម្បីផលប្រយោជន៍សាធារណៈ។
នៅពេលមានការចុះផ្សាយពីការនៅតែមានការកាប់បំផ្លាញព្រៃឈើ ខណៈថៃកំពុងឈ្លានពានកម្ពុជា លោក ផន ផល្លា ប្រធានអង្គការមែឃឈើដែលធ្លាប់ធ្វើការរិះគន់យ៉ាងខ្លាំង តាមរយៈវិដេអូដែលលោកបានចុះទៅថតផ្ទាល់នៅទីតាំងដីព្រៃកប់សពរបស់ជនជាតិដើមភាគតិច នៅស្រុកពេជ្រាដា ខេត្តមណ្ឌលគិរី កាលពីខែតុលាឆ្នាំ២០២៥ ដែលត្រូវបានមន្ត្រីចេញប្លង់ទៅឱ្យបុគ្គលឯកជនកាន់កាប់ បានសរសេរនៅលើបណ្តាញសង្គមរបស់លោក នៅថ្ងៃទី២២ខែមករាថា«បំផ្លាញព្រៃ បំផ្លាញទឹក បំផ្លាញដី គឺស្មើនឹងបំផ្លាញជាតិឯង»។
លោក សេង វណ្ណលី អ្នកតាមដានភូមិសាស្ត្រនយោបាយ ក៏បានសរសេរលើបណ្តាញសង្គមរបស់លោកនៅថ្ងៃទី២៣ខែមករានេះថា ខណៈពេលដែលពលរដ្ឋខ្មែរកំពុងតាមដានយ៉ាងជិតដិតលើបញ្ហាព្រំដែន ការបំផ្លាញធនធានធម្មជាតិដ៏ស្ងប់ស្ងាត់ កំពុងតែកើតឡើងយ៉ាងធ្ងន់ធ្ងរនៅទឹកដីខេត្តរតនគិរី។ ក្រុមហ៊ុនរបស់គ្រួសារលោកឧកញ៉ា ទ្រី ភាព ដែលមានឥទ្ធិពលកំពុងធ្វើសកម្មភាពជីកយករ៉ែមាស នៅក្នុងតំបន់ឧទ្យានជាតិ ដែលជាបេះដូងនៃធម្មជាតិខ្មែរ។
ដោយសារតែកន្លងមក មន្ត្រីជំនាញរបស់រដ្ឋាភិបាលតែងតែបដិសេធចំពោះព័ត៌មាន ដែលចុះផ្សាយទាក់ទងនឹងបទល្មើសធនធានធម្មជាតិថា ជាព័ត៌មានក្លែងក្លាយ លោក សេង វណ្ណលី សូមឱ្យមន្ត្រីមានសមត្ថកិច្ចឈប់ប្រើពាក្យ«ព័ត៌មានក្លែងក្លាយ» ដើម្បីបិទបាំងភាពមិនប្រក្រតី ប៉ុន្តែសូមចុះទៅពិនិត្យការពិតបង្ហាញតម្លាភាព និងផ្ដល់សេចក្ដីសុខជូនពលរដ្ឋម្ចាស់ស្រុកវិញ៕
