ក្រុមហ៊ុន ម៉ូរីសុនកាក់ អឹមខេអេ អឌីត-អាក់ខោនធីង (Morisonkak MKA Audit-Accounting Co., Ltd) បានប្រកាសលក់កញ្ចប់ឥណទាន ឬសិទ្ធិប្រមូលបំណុលរបស់ធនាគារព្រីនស៍ ឱ្យទៅធនាគារផ្សេង ដើម្បីយកប្រាក់គិតគូរឱ្យអ្នកដាក់ប្រាក់បញ្ញើ និងម្ចាស់បំណុលធនាគារ។ ការប្រកាសនេះ គឺជាវិធានការមួយបន្ថែមទៀត ក្រោយម្ចាស់ធនាគារព្រីនស៍ លោក ចេន ហ្ស៊ី កំពុងទទួលការកាត់ទោសនៅប្រទេសចិន។
ក្រោយប្រកាសឱ្យអតិថិជនទៅបិទគណនីធនាគារ និងផ្អាកប្រតិបត្តិការថ្មី ពេលនេះក្រុមហ៊ុន ម៉ូរីសុនកាក់ អឹមខេអេ អឌីត-អាក់ខោនធីង (Morisonkak MKA Audit-Accounting Co., Ltd) ដែលទទួលបានសិទ្ធិជម្រះបញ្ជីធនាគារព្រីនស៍ បានប្រកាសលក់កញ្ចប់ឥណទាន ឱ្យទៅធនាគារផ្សេង។
យោងតាមសេចក្ដីជូនដំណឹង នៅថ្ងៃទី២២ ខែមករា ក្រុមហ៊ុន ម៉ូរីសុនកាក់ ឱ្យដឹងថា នីតិវិធីនៃការលក់កញ្ចប់ឥណទាននេះ នឹងត្រូវធ្វើឡើងតាមរយៈការចរចាលើលក្ខខណ្ឌវិជ្ជាជីវៈ និងការដេញថ្លៃ (Bidding) ប្រកបដោយតម្លាភាព។ ខ្លឹមសារលិខិតដដែល បានអំពាវនាវដល់គ្រឹះស្ថានធនាគារ និងហិរញ្ញវត្ថុ ដែលមានចំណាប់អារម្មណ៍ ក្នុងការចូលរួមដេញថ្លៃកញ្ចប់ឥណទាននេះ គឺត្រូវទំនាក់ទំនងទៅការិយាល័យអ្នកជម្រះបញ្ជីដែលមានអាសយដ្ឋានស្ថិតនៅទីស្នាក់ការកណ្តាលនៃធនាគារព្រីនស៍។
ក្រុមហ៊ុន ម៉ូរីសុនកាក់ ឱ្យដឹងបន្ថែមថា ការដាក់លក់កញ្ចប់ឥណទាននេះ គឺដើម្បីរំលាយទ្រព្យសកម្មរបស់ធនាគារទៅជាសាច់ប្រាក់ ក្នុងគោលដៅធានាឱ្យបានជាអតិបរមាដល់ប្រយោជន៍អ្នកដាក់ប្រាក់បញ្ញើ និងម្ចាស់បំណុលធនាគារ។
ការដាក់លក់កញ្ចប់ឥណទាន គឺមានន័យថាជាការលក់សិទ្ធិប្រមូលបំណុល ឱ្យទៅស្ថាប័នហិរញ្ញវត្ថុ ឬធនាគារផ្សេង ដើម្បីបំប្លែងបំណុលដែលអតិថិជនបានខ្ចី ឱ្យទៅជាសាច់ប្រាក់ដុំភ្លាមៗ ដើម្បីយកប្រាក់នោះទៅជម្រះឱ្យអតិថិជនដែលដាក់ប្រាក់បញ្ញើនៅធនាគារដែលកំពុងមានបញ្ហានោះ។
ករណីនេះ ក្រុមហ៊ុន មូរីសុនកាក់ បញ្ជាក់ដែរថា អតិថិជនដែលបានខ្ចីប្រាក់ពីធនាគារ ព្រីនស៍ គឺត្រូវបន្តអនុវត្តកាតព្វកិច្ចបង់ប្រាក់កម្ចីស្របតាមច្បាប់ បទប្បញ្ញត្តិ និង កិច្ចសន្យាឥណទានដដែល ហើយរាល់ទ្រព្យបញ្ចាំ និងឯកសារពាក់ព័ន្ធនឹងកម្ចីទាំងអស់ នឹងត្រូវបានរក្សាទុកដោយសុវត្ថិភាព ស្របតាមច្បាប់ និងបទប្បញ្ញត្តិជាធរមាន។
គួរបញ្ជាក់ថា នេះគឺជាចំណាត់ការទី៤ហើយ ដែលក្រុមហ៊ុនជម្រះបញ្ជី មូរីសុនកាក់ អនុវត្តទៅលើធនាគារព្រីនស៍ មុនឈានទៅរកការរំលាយធនាគារតាមនីតិវិធី។ ក្រុមហ៊ុននេះ បានទទួលសិទ្ធិពីធនាគារជាតិ កាលពីថ្ងៃទី៨ ខែមករា ដោយចាប់ផ្ដើមពីការផ្អាកសេវាកម្មថ្មីៗ ការប្រកាសឱ្យម្ចាស់បំណុល និងអ្នកដាក់ប្រាក់បញ្ញើមកចុះឈ្មោះមុនឈានទៅដល់ការសងប្រាក់ ការរៀបចំបែបបទ និងដកប្រាក់ជាបណ្ដើរៗសម្រាប់អ្នកដាក់ប្រាក់បញ្ញើ និងចុងក្រោយនេះ គឺការប្រកាសលក់កញ្ចប់ឥណទាន ឬការប្រមូលបំណុល។
វិធានការនេះ ធ្វើឡើងក្រោយម្ចាស់ភាគហ៊ុនធំនៃធនាគារព្រីនស៍ គឺលោក ចេន ហ្ស៊ី ត្រូវបានសមត្ថកិច្ចចាប់ខ្លួន និងបញ្ជូនទៅកាត់ទោសនៅប្រទេសចិន កាលពីថ្ងៃទី៦ ខែមករា ជុំវិញឧក្រិដ្ឋកម្មអនឡាញ ការជួញដូរមនុស្ស លាងលុយកខ្វក់ និងបទល្មើសផ្សេងទៀត៕
