ប្រធានាធិបតីអាមេរិក លោក Donald Trump បានប្រកាសថា មាន «ក្របខណ្ឌនៃកិច្ចព្រមព្រៀងនាពេលអនាគតទាក់ទងនឹងកោះ Greenland»។ ការប្រកាសរបស់ លោក ត្រាំ នេះបានបង្កឱ្យមានការភ្ញាក់ផ្អើល បន្ទាប់ពីភាពតានតឹងបានកើនឡើងជាច្រើនថ្ងៃ ដែលឈានដល់ការគំរាមកំហែងដាក់ទណ្ឌកម្មសេដ្ឋកិច្ច លើសម្ព័ន្ធមិត្តជិតស្និទ្ធរបស់អាមេរិកចំនួន ៨ ដែលបានប្រឆាំងនឹងផែនការរបស់លោក ក្នុងការដណ្តើមយកទឹកដីស្វយ័តពាក់កណ្តាលរបស់ប្រទេសដាណឺម៉ាកមួយនេះ។
ប្រធានាធិបតី Trump បានធ្វើការប្រកាសនេះ នៅលើបណ្តាញសង្គម Truth Social របស់លោកកាលពីថ្ងៃទី២១ខែមករា បន្ទាប់ពីកិច្ចពិភាក្សានៅក្នុងវេទិកាសេដ្ឋកិច្ចពិភពលោកក្នុងទីក្រុង Davos ប្រទេសស្វីស។
លោកបានមានប្រសាសន៍ថា៖ «ដោយផ្អែកលើជំនួបដ៏មានផ្លែផ្កាបំផុតដែលខ្ញុំបានធ្វើជាមួយអគ្គលេខាធិការអង្គការ NATO លោក Mark Rutte យើងបានបង្កើតនូវក្របខណ្ឌនៃកិច្ចព្រមព្រៀងនាពេលអនាគត ទាក់ទងនឹងកោះ Greenland»។
លោកមិនបានផ្តល់ព័ត៌មានលម្អិតនោះទេ ប៉ុន្តែបានមានប្រសាសន៍ថា ការចរចានឹងបន្តដើម្បីឈានទៅសម្រេចបាននូវកិច្ចព្រមព្រៀងនេះ។
ចំណែកលោក Rutte វិញ បានមានប្រសាសន៍ថា លោកមិនបានពិភាក្សាអំពីបញ្ហាសំខាន់នៃអធិបតេយ្យភាពរបស់ដាណឺម៉ាក លើកោះ Greenland នៅក្នុងជំនួបរបស់លោកជាមួយ លោក Trump នោះទេ។ ទស្សនៈនៅក្នុងប្រទេសដាណឺម៉ាកគឺថា បញ្ហានេះនៅឆ្ងាយពីការបញ្ចប់ ហើយរាល់កិច្ចព្រមព្រៀងណាមួយត្រូវតែសម្រេចរួមគ្នា រវាងកោះ Greenland ប្រទេសដាណឺម៉ាក និងសហរដ្ឋអាមេរិក។
នាយករដ្ឋមន្ត្រីដាណឺម៉ាក លោកស្រី Mette Frederiksen បានមានប្រសាសន៍ថា ជនជាតិដាណឺម៉ាកអាចចរចា «លើគ្រប់បញ្ហានយោបាយ រួមមាន សន្តិសុខ ការវិនិយោគ និងសេដ្ឋកិច្ច»។
លោកស្រីបានថ្លែងក្នុងសេចក្តីថ្លែងការណ៍មួយកាលពីថ្ងៃទី២២ខែមករាថា៖ «ប៉ុន្តែយើងមិនអាចចរចាលើអធិបតេយ្យភាពរបស់យើងបានទេ។ ខ្ញុំទទួលបានព័ត៌មានថា រឿងនេះក៏មិនមែនជាករណី (ដែលត្រូវបានចរចា) នោះដែរ»។
លោកស្រី Aaja Chemnitz ដែលជាសមាជិកសភា Greenland មួយរូបក្នុងចំណោមពីររូបនៅក្នុងសភាដាណឺម៉ាក បានមានប្រសាសន៍ថា៖ «ក្នុងករណីណាក៏ដោយ Nato គ្មានសិទ្ធិចរចាលើអ្វីទាំងអស់ដោយគ្មានយើង ដែលជា Greenland នោះទេ។ គ្មានអ្វីដែលពាក់ព័ន្ធនឹងយើង អាចសម្រេចបានដោយគ្មានយើងឡើយ»។
រដ្ឋមន្ត្រីការបរទេសចក្រភពអង់គ្លេស លោកស្រី Yvette Cooper បានមានប្រសាសន៍ថា លោកស្រីសង្ឃឹមថាចំណុចនេះមានន័យថា នឹងមាន «ការពិភាក្សាដោយផ្ទាល់ដែលដាណឺម៉ាកបានស្នើសុំ សម្រាប់ដាណឺម៉ាក Greenland និងសហរដ្ឋអាមេរិក លើផ្លូវឆ្ពោះទៅមុខជុំវិញកោះ Greenland និងការការពារអធិបតេយ្យភាពរបស់ Greenland»។
ការបញ្ជាក់សារជាថ្មីរបស់ដាណឺម៉ាក និង Greenland ថាអធិបតេយ្យភាពមិនមែនជាបញ្ហាសម្រាប់ចរចានោះ ហាក់បីដូចជាមានគោលបំណងបដិសេធរបាយការណ៍នៅក្នុងកាសែត New York Times ដែលមន្ត្រីមិនបញ្ចេញឈ្មោះបាននិយាយថា គំនិតមួយដែលកំពុងត្រូវបានពិភាក្សា គឺការឱ្យដាណឺម៉ាកប្រគល់អធិបតេយ្យភាពលើតំបន់តូចៗនៃកោះ Greenland ដែលសហរដ្ឋអាមេរិកនឹងសាងសង់មូលដ្ឋានទ័ព។ ការរៀបចំនោះនឹងមានលក្ខណៈប្រហាក់ប្រហែលទៅនឹងស្ថានភាពនៃមូលដ្ឋានទ័ពពីរនៅក្នុងប្រទេសស៊ីប (Cyprus) ដែលត្រូវបានគ្រប់គ្រងដោយចក្រភពអង់គ្លេស។
តំបន់ Akrotiri និង Dhekelia ស្ថិតនៅក្រោមអធិបតេយ្យភាពរបស់ចក្រភពអង់គ្លេស ចាប់តាំងពីប្រទេសស៊ីបបានទទួលឯករាជ្យក្នុងឆ្នាំ ១៩៦០។ សន្ធិសញ្ញានោះ ត្រូវបានធ្វើវិសោធនកម្មតាំងពីពេលនោះមក ប៉ុន្តែជាមូលដ្ឋាន វាត្រូវបានចាត់ទុកថាជាទឹកដីរបស់អង់គ្លេស។
លោកស្រី Yvette Cooper មិនបានបញ្ជាក់ថាតើលោកស្រីបានដឹងពីខ្លឹមសារនៃកិច្ចព្រមព្រៀងក្របខ័ណ្ឌនោះទេ ប៉ុន្តែលោកស្រីបានលើកឡើងពី «ការពិភាក្សាជាក់ស្តែងមួយចំនួនអំពីសន្តិសុខរបស់កោះ Greenland ខណៈពេលដែលត្រូវបញ្ជាក់ឱ្យបានច្បាស់បំផុតថា អធិបតេយ្យភាពរបស់ Greenland មិនមែនជាប្រធានបទសម្រាប់ការចរចានោះទេ»។
ក្នុងការជជែកវែកញែកដើម្បីគាំទ្រដល់ការដណ្តើមយកកោះ Greenland លោក Trump បានលើកឡើងពីការគំរាមកំហែងនៃនាវាចិន និងរុស្ស៊ីនៅជុំវិញកោះនេះ បើទោះបីជាដាណឺម៉ាកនិយាយថា គ្មានការគំរាមកំហែងណាមួយនៅ «ថ្ងៃនេះ» ក៏ដោយ។
ចំពោះចំណុចនេះ សម្ព័ន្ធមិត្ត Nato បានព្យាយាមផ្ដល់ទំនុកចិត្តដល់សហរដ្ឋអាមេរិកថា ពួកគេនឹងបង្កើនសន្តិសុខនៅតំបន់អាក់ទិក ហើយលោក Mark Rutte បានប្រាប់ទីភ្នាក់ងារសារព័ត៌មាន Reuters កាលពីថ្ងៃ២២មករាថា កិច្ចព្រមព្រៀងក្របខ័ណ្ឌនេះក៏នឹងតម្រូវឱ្យមានការរួមចំណែកនេះផងដែរ។
លោកបានប្រាប់ទីភ្នាក់ងារសារព័ត៌មានថា៖ «ខ្ញុំគ្មានការសង្ស័យទេថា យើងអាចធ្វើកិច្ចការនេះបានយ៉ាងឆាប់រហ័ស។ ពិតណាស់ ខ្ញុំសង្ឃឹមថា នឹងសម្រេចបានក្នុងឆ្នាំ២០២៦ ឬសូម្បីតែនៅដើមឆ្នាំ២០២៦ ទៀតផង»៕
