ភាពតានតឹងជុំវិញផែនការរបស់ប្រធានាធិបតីអាមេរិក លោក ដូណាល់ ត្រាំ ក្នុងការគ្រប់គ្រងកោះ Greenland បានបង្កជាការបែកបាក់ក្នុងទំនាក់ទំនងដែលធ្លាប់តែរឹងមាំ ដូចដែកថែប រវាងចលនា MAGA និងក្រុមស្ដាំនិយមជ្រុលរបស់អឺរ៉ុប។
ការបែកបាក់នេះ ហាក់ដូចជាសញ្ញាបង្ហាញថា ត្រឹមតែការតម្រឹមមនោគមវិជ្ជាតែមួយមុខ ប្រហែលជាមិនគ្រប់គ្រាន់ដើម្បីសម្រាលក្តីបារម្ភក្នុងចំណោមអ្នកជាតិនិយមអឺរ៉ុប ចំពោះអន្តរាគមន៍និយមរបស់លោក ត្រាំ នៅបរទេសនោះទេ។
មេដឹកនាំស្ដាំនិយមជ្រុលក្នុងប្រទេសអាល្លឺម៉ង់ អ៊ីតាលី និងបារាំង បានរិះគន់យ៉ាងខ្លាំងចំពោះផែនការលើកោះ Greenland របស់លោក Trump។ សូម្បីតែលោក Nigel Farage ដែលជាសម្ព័ន្ធមិត្តដ៏យូរអង្វែងរបស់លោក ត្រាំ និងជាប្រធានគណបក្សជាតិនិយម Reform UK ក៏បានហៅចំណាត់ការលើកោះ Greenland របស់លោក ត្រាំ ថាជា “សកម្មភាពប្រកបដោយអរិភាពយ៉ាងខ្លាំង”។
ក្នុងអំឡុងពេលដេញដោលកាលពីថ្ងៃ២០មករានៅក្នុងសភាអឺរ៉ុប សមាជិកសភាស្ដាំនិយមជ្រុលដែលជាធម្មតាតម្រឹមខ្លួនជាមួយលោក Trump បានគាំទ្រយ៉ាងលើសលប់លើការបញ្ឈប់កិច្ចព្រមព្រៀងពាណិជ្ជកម្មរវាងសហភាពអឺរ៉ុប និងសហរដ្ឋអាមេរិក ដោយសារតែការមិនសប្បាយចិត្តនឹងការគំរាមកំហែងរបស់លោក ត្រាំ ដោយហៅទង្វើទាំងនោះថាជា “ការបង្ខិតបង្ខំ” និង “ការគំរាមកំហែងដល់អធិបតេយ្យភាព”។
ភាពខុសគ្នាស្រឡះបែបនេះ រវាងលោក ត្រាំ និងអ្នកដើរតាមរបស់លោកនៅអឺរ៉ុប បានបង្កើតឱ្យមានការភ្ញាក់ផ្អើលយ៉ាងខ្លាំង។
គណបក្សស្ដាំនិយមជ្រុលបានកើនឡើងពីអំណាចយ៉ាងខ្លាំងក្នុងឆ្នាំ២០២៤ នៅទូទាំងសហភាពអឺរ៉ុប ដែលធ្វើឱ្យរង្គោះរង្គើដល់មហាអំណាចប្រពៃណីក្នុងចំណោមប្រទេសទាំង ២៧ នៃប្លុកនេះ ចាប់ពីអេស្ប៉ាញរហូតដល់ស៊ុយអែត។ យោងតាមវិទ្យាស្ថានអាល្លឺម៉ង់ សម្រាប់កិច្ចការអន្តរជាតិ និងសន្តិសុខ ក្រុមនយោបាយរបស់ពួកគេឥឡូវនេះ កាន់កាប់អាសនៈ ២៦% នៅក្នុងសភាអឺរ៉ុប។
កាលពីមិនដល់មួយឆ្នាំមុន គណបក្សស្ដាំនិយមជ្រុលរបស់អឺរ៉ុប បានជួបជុំគ្នានៅទីក្រុងម៉ាឌ្រីដ ដើម្បីអបអរសាទរការបោះឆ្នោតរបស់លោក Trump ក្រោមបដា “ធ្វើឱ្យអឺរ៉ុបអស្ចារ្យឡើងវិញ” ខណៈដែលលោក Elon Musk មុនពេលធ្លាក់ចេញពីការពេញចិត្តរបស់លោក ត្រាំ បានជួយលើកកម្ពស់ឥទ្ធិពល និងបុគ្គលស្ដាំនិយមជ្រុលអឺរ៉ុបនៅលើបណ្តាញសង្គម X រួមទាំងគណបក្សស្ដាំនិយមជ្រុល Alternative for Germany (AfD) របស់អាល្លឺម៉ង់ផងដែរ។
អនុប្រធានាធិបតីអាមេរិក លោក JD Vance បានទទួលរងការមើលងាយពីផ្ទៃក្នុងប្រទេសអាល្លឺម៉ង់ និងទូទាំងអឺរ៉ុប បន្ទាប់ពីលោកបានជួបជាមួយមេដឹកនាំគណបក្ស AfD គឺលោកស្រី Alice Weidel ក្នុងអំឡុងពេលបោះឆ្នោតកាលពីខែកុម្ភៈ។ គណបក្សនេះ ដែលបណ្តាគណបក្សចរន្តធំៗបដិសេធមិនធ្វើការជាមួយ បានធ្វើឱ្យនយោបាយអាល្លឺម៉ង់មានការប្រែប្រួល ដោយការបង្កើនវត្តមានរបស់ខ្លួនទ្វេដងនៅក្នុងសភា Bundestag ដើម្បីក្លាយជាគណបក្សធំជាងគេលំដាប់ទីពីររបស់ប្រទេស។
ទោះជាយ៉ាងណាក៏ដោយ ការបែងចែកយ៉ាងជ្រាលជ្រៅនៅក្នុងចលនា MAGA ផ្ទាល់ ជុំវិញវិធីសាស្រ្តរបស់លោក ត្រាំ ចំពោះកិច្ចការបរទេស បានជះឥទ្ធិពលដល់អឺរ៉ុប ដោយសកម្មភាពរបស់លោកលើកោះ Greenland ប្រទេសវ៉េណេស៊ុយអូឡា និងអ៊ីរ៉ង់ បានបង្ខំឱ្យសម្ព័ន្ធមិត្តនយោបាយរបស់លោកផ្តល់អាទិភាព លើជំនឿមនោគមវិជ្ជារបស់ពួកគេ ជាងការគោរពចំពោះប្រធានាធិបតីអាមេរិក៕
