សៀវភៅ «កម្ពុជាឈ្នះថៃសម័យ-តេជោធិបតី» និពន្ធដោយមន្រ្តីក្រសួងមហាផ្ទៃ ដែលត្រូវគេចែកចាយលើបណ្តាញសង្គមនោះ រងការរិះគន់ថាសរសេរខុសពីការពិតដើម្បីបោកប្រាស់ពលរដ្ឋ និងបណ្តុះវប្បធម៌បញ្ជើចបញ្ជើមេដឹកនាំដែលនាំជាតិទៅរកគ្រោះថ្នាក់។
ការរិះគន់នេះ ក្រោយមានការចែកចាយលើបណ្តាញសង្គមពីសៀវភៅដែលមានចំណងជើងថា «កម្ពុជាឈ្នះថៃសម័យ-តេជោធិបតី» និពន្ធដោយអ្នកនាំពាក្យរងក្រសួងមហាផ្ទៃ លោក ទូច សុខៈ។
ជុំវិញរឿងនេះ តំណាងរាស្រ្តគណបក្សសង្រ្គោះជាតិ លោក អ៊ំ សំអាន ចាត់ទុកសៀវភៅនេះថា ជាការសរសេរខុសពីការពិតដើម្បីបោកប្រាស់ពលរដ្ឋ និងលើកសរសើរលោក ហ៊ុន ម៉ាណែត តែប៉ុណ្ណោះ។
ក្នុងន័យនេះ លោកថា បើពិនិត្យមើលជាក់ស្តែង គ្មានចំណុចណាដែលកម្ពុជាឈ្នះថៃទេ គឺមានតែចាញ់ថៃ ដោយលោកថា ថៃបានកាន់កាប់ដីខ្មែរ៤០ទីតាំង ក៏លោក ហ៊ុន ម៉ាណែត មិនហ៊ានឃាត់ថៃ មិនឱ្យសងសំណងរឹងលើដីខ្មែរដែរ។
លោកថា៖ «នៅពេលដែលសរសើរលើកជើងមេដឹកនាំរបៀបនេះ! ខ្ញុំគិតថា មិនអាចកែលម្អការដឹកនាំរបស់មេដឹកនាំដែលបានប្រព្រឹត្តនូវកំហុសឆ្គងអីហ្នឹងទេ អ៊ីចឹងហើយការដឹកនាំហ្នឹងមិនអាចរីកចំរើនទៅមុខ! មិនអាចលុបបំបាត់អំពើអយុត្តិធម៌ក្នុងសង្គមហើយបើនិយាយពីទឹកដីហ្នឹងអាច! មេដឹកនាំយល់ថា ប្រជាជនជឿ អ៊ីចឹងមិនបាច់ខំទាមទារ! ទឹកដីទាំងអស់ហ្នឹង៤០ទីតាំងហ្នឹង! កាត់ទៅឲ្យថៃដើម្បីដូរ យកសន្តិភាពទៅ អាហ្នឹងវាអាចទៅធ្វើឲ្យបាត់បង់ដីយើង នៅពេលដែលសរសេរខុសពីការពិតអ៊ីចឹង»។
បន្ថែមលើនេះ គណនីហ្វេសប៊ុកឈ្មោះ Khmer Sovannaphumi បានសរសេរក្នុងន័យដើមថា៖ «សៀវភៅនេះលក់ដាច់ទេ? មានអ្នកណាខ្លះបានទិញ និងអាន? បើអាចយកសៀវភៅហ្នឹងទៅដាក់តាំងបង្ហាញតាមព្រំដែនទៅ ក្រែងទ័ពថៃវាដក បានទឹកដី និងប្រាសាទមកវិញ»។
ជាមួយគ្នានេះ អ្នកនាំពាក្យគណបក្សប្រជាធិបតេយ្យជឿនលឿន លោក ប៉ោ មករា ថាលោកមិនទាន់បានអានខ្លឹមសារនៃសៀវភៅនេះទេ តែលោកថា បើតាមចំណងជើងអាចវាយតម្លៃថាជាទូទៅថា នៅកម្ពុជាវប្បធម៌បញ្ជើចបញ្ជើ ទំយើរ ទៅលើបុគ្គល ឬមេដឹកនាំ នៅតែមានប្រជាប្រិយភាព។
បន្ថែមលើនេះ លោកថា មេដឹកនាំដែលចូលចិត្តវប្បធម៌បែបនេះ គឺមិនអាចដោះស្រាយវិបត្តិជាតិបានទេ។
លោកថា៖ «មួយវិញទៀត នៅពេលដែលមេដឹកនាំចូលចិត្តនូវការបញ្ចើចបញ្ចើរ! ទំយើលើកជើង! ខ្ញុំគិតថាមេដឹកនាំមិនអាចទទួលនូវរបាយការណ៍ពិត! សម្រាប់ដោះស្រាយបញ្ហាជាតិធំៗដូច្នេះវប្បធម៌នៃការបញ្ចើចបញ្ចើរ ទំយើ លើកជើង ហ្នឹង! វាក៏ជាគេហៅថា លេសមួយនៃមន្ត្រីស្ពឹកស្រពន់ មន្ត្រីពុករលួយនៃមន្ត្រីដែលចូលចិត្ត រណែបរណប លន់តួ លូនក្រាបហ្នឹង! យកមកដើម្បីធ្វើអំពើពុករលួយក៏ដូចជាធ្វើបាបពលរដ្ឋស្លូតត្រង់»។
ជុំវិញរឿងនេះ VOD មិនអាចសុំការឆ្លើយតបពីអ្នកនាំពាក្យរងក្រសួងមហាផ្ទៃ លោក ទូច សុខៈបាននៅឡើយទេគិតត្រឹមម៉ោងផ្សាយនេះ។
ដោយឡែក អ្នកតាមដានភូមិសាស្រ្តនយោបាយតំបន់អាស៊ី និងប៉ាស៊ីហ្វិក លោក សេង វណ្ណីលើកឡើងតាមបណ្តាញសង្គមហ្វេសប៊ុកលោកថា ការលើកសរសើរអតីតនាយករដ្ឋមន្ត្រី ហ៊ុន សែន និងលោកនាយករដ្ឋមន្ត្រី ហ៊ុន ម៉ាណែត ពីសំណាក់មន្ត្រីបក្ស គឺជាការឆ្លុះបញ្ចាំងពីវប្បធម៌នយោបាយដែលផ្អែកលើភក្តីភាព និងសាមគ្គីភាពផ្ទៃក្នុងរបស់គណបក្សកាន់អំណាច ដើម្បីរក្សាស្ថិរភាពនយោបាយ និងបង្ហាញទៅកាន់មហាជននូវភាពឯកភាពគ្នាដែលមិនអាចបំបែកបាន។
លោកបន្តថា ទន្ទឹមនឹងនេះ ការលើកតម្កើងមេដឹកនាំ ក៏ជាយុទ្ធសាស្ត្រទំនាក់ទំនងសាធារណៈ ដើម្បីកសាងរូបភាពវិជ្ជមាន និងទប់ទល់នឹងរលកនៃការរិះគន់ពីមជ្ឈដ្ឋានខាងក្រៅ ខណៈដែលក្នុងរចនាសម្ព័ន្ធអំណាចបែបនេះ ការបង្ហាញការគាំទ្រដាច់ខាតគឺជាវិធីសាស្ត្រមួយដែលមន្ត្រីប្រើប្រាស់ដើម្បីរក្សាតំណែង និងទំនុកចិត្តពីថ្នាក់ដឹកនាំកំពូល។
បើតាម លោក វណ្ណី ទោះបីជាមានការមើលឃើញខុសគ្នាពីសំណាក់ពលរដ្ឋ ជុំវិញបញ្ហាអំពើពុករលួយ ឬបក្ខពួកនិយមក៏ដោយ ក៏រដ្ឋាភិបាលតែងតែបកស្រាយថា បញ្ហាទាំងនោះគឺជាបញ្ហាប្រឈមដែលកំពុងស្ថិតក្នុងដំណើរការកែទម្រង់ជាជំហ៊ានៗ ជាជាងការទទួលស្គាល់ថា វាជាភាពបរាជ័យនៃប្រព័ន្ធដឹកនាំទាំងមូល។ ការណ៍នេះ បង្កើតឱ្យមានគម្លាតនៃការយល់ឃើញរវាងមន្ត្រីរដ្ឋាភិបាលដែលមើលឃើញតែសមិទ្ធផល និងពលរដ្ឋដែលជួបប្រទះផ្ទាល់នូវបញ្ហាសង្គមប្រចាំថ្ងៃ។
លោកគូសបញ្ជាក់ថា ក្នុងបរិបទនេះ ការអែបអបមិនមែនគ្រាន់តែជាចរិតលក្ខណៈបុគ្គលប៉ុណ្ណោះទេ ប៉ុន្តែវាបានក្លាយជាយុទ្ធសាស្ត្ររស់រាន និងការស្វែងរកលាភសក្ការៈនៅក្នុងរចនាសម្ព័ន្ធរដ្ឋបាល។ នៅពេលដែលការតំឡើងបុណ្យស័ក្តិ ឬការទទួលបានតំណែង មិនបានផ្អែកលើសមត្ថភាព ឬប្រព័ន្ធគុណាធិបតេយ្យច្បាស់លាស់ មន្ត្រីមួយចំនួនជ្រើសរើសយកការលើកជើង និងការសរសើរមិនដាច់ពីមាត់ ដើម្បីធ្វើឱ្យថ្នាក់លើពេញចិត្ត និងមានអារម្មណ៍ថាខ្លួនមានសុវត្ថិភាពក្នុងអំណាច។
ទម្លាប់បែបនេះ បង្កើតឱ្យមានបរិយាកាស «ព័ត៌មានតែម្ខាង» ដែលធ្វើឱ្យមេដឹកនាំពិបាកនឹងទទួលបានការពិតអំពីទុក្ខសោករបស់ពលរដ្ឋ ឬចំណុចខ្វះខាតនៃគោលនយោបាយរបស់ខ្លួន ដោយសារតែមន្ត្រីជុំវិញខ្លួនរាយការណ៍តែរឿងល្អៗ និងការជោគជ័យក្លែងក្លាយ។ ក្នុងរយៈពេលវែង វប្បធម៌អែបអបនេះហើយដែលជាឧបសគ្គដ៏ធំបំផុតដល់ការកែទម្រង់ស្ថាប័ន ព្រោះវាបំផ្លាញតម្លាភាព និងជំរុញឱ្យអំពើពុករលួយកាន់តែរីកដុះដាលក្រោមរូបភាពនៃការការពារគ្នាទៅវិញទៅមកក្នុងបក្ខពួក៕
