សហភាពអឺរ៉ុប និងឥណ្ឌា បានប្រកាសពីកិច្ចព្រមព្រៀងពាណិជ្ជកម្មជាប្រវត្តិសាស្ត្រមួយ បន្ទាប់ពីការចរចាដែលបានអូសបន្លាយពេលជិតពីរទសវត្សរ៍ ខណៈភាគីទាំងពីរមានគោលបំណងពង្រឹងទំនាក់ទំនងឱ្យកាន់តែស៊ីជម្រៅ ចំពេលមានភាពតានតឹងជាមួយសហរដ្ឋអាមេរិក។
ប្រធានគណៈកម្មការអឺរ៉ុប លោកស្រី Ursula von der Leyen បានថ្លែងនៅក្នុងសន្និសីទសារព័ត៌មានមួយនៅទីក្រុងដេលីថា៖ «យើងធ្វើបានហើយ យើងបានសម្រេចនូវរាល់កិច្ចព្រមព្រៀងទាំងឡាយ»។ ចំណែកឯនាយករដ្ឋមន្ត្រីឥណ្ឌា លោក Narendra Modi បានហៅកិច្ចព្រមព្រៀងនេះថាជាព្រឹត្តិការណ៍ «ប្រវត្តិសាស្ត្រ»។
កិច្ចព្រមព្រៀងនេះ នឹងអនុញ្ញាតឱ្យមានការធ្វើពាណិជ្ជកម្មដោយសេរីនូវទំនិញនានា រវាងប្លុកនៃប្រទេសសហភាពអឺរ៉ុបទាំង២៧ និងប្រទេសដែលមានប្រជាជនច្រើនបំផុតក្នុងពិភពលោក ដែលភាគីទាំងពីរនេះរួមបញ្ចូលគ្នាមានទំហំជិត ២៥% នៃផលិតផលក្នុងស្រុកសរុប (GDP) ពិភពលោក និងមានទីផ្សារដែលរួមមានប្រជាជនចំនួនពីរពាន់លាននាក់។
តាមរយៈកិច្ចព្រមព្រៀងនេះ នឹងមានការកាត់បន្ថយពន្ធគយយ៉ាងច្រើនលើមុខទំនិញ និងសេវាកម្មជាច្រើន រួមទាំងការបង្កើតភាពជាដៃគូសន្តិសុខរួមគ្នាផងដែរ។
លោកស្រី von der Leyen និងប្រធានក្រុមប្រឹក្សាអឺរ៉ុប លោក António Costa កំពុងស្ថិតក្នុងទីក្រុងដេលី ជាទីកន្លែងដែលពួកគេបានជួបជាមួយលោក Modi នៅក្នុងកិច្ចប្រជុំកំពូលទ្វេភាគី។
គណៈកម្មការអឺរ៉ុប បានលើកឡើងថា កិច្ចព្រមព្រៀងនេះ នឹងលុបបំបាត់ពន្ធគយលើការនាំចេញភាគច្រើននៃផលិតផលគីមី គ្រឿងចក្រ និងឧបករណ៍អគ្គិសនី ក៏ដូចជាយន្តហោះ និងយានអវកាស បន្ទាប់ពីមានការកាត់បន្ថយជាដំណាក់កាល។ អ្វីដែលសំខាន់នោះ គឺពន្ធលើយានយន្តដែលបច្ចុប្បន្នមានកម្រិតខ្ពស់រហូតដល់ ១១០% នឹងត្រូវកាត់បន្ថយមកនៅត្រឹម ១០% ក្រោមកូតាចំនួន ២៥០ ០០០ គ្រឿង។ យោងតាមរបាយការណ៍របស់ Bloomberg ចំនួននេះ គឺមានទំហំធំជាង ៦ដង នៃកូតា ៣៧ ០០០ គ្រឿង ដែលឥណ្ឌាបានផ្ដល់ឱ្យចក្រភពអង់គ្លេស ក្នុងកិច្ចព្រមព្រៀងដែលបានចុះហត្ថលេខាកាលពីខែកក្កដាឆ្នាំមុន។
ឥណ្ឌា ក៏នឹងកាត់បន្ថយពន្ធលើស្រាបៀរ និងប្រេងអូលីវពីសហភាពអឺរ៉ុបផងដែរ។ ទីក្រុងព្រុចសែល បានបញ្ជាក់ថា កិច្ចព្រមព្រៀងនេះ នឹងគាំទ្រដល់លំហូរវិនិយោគ បង្កើនលទ្ធភាពចូលទៅកាន់ទីផ្សារអឺរ៉ុប និងពង្រឹងការធ្វើសមាហរណកម្មខ្សែចង្វាក់ផ្គត់ផ្គង់ឱ្យកាន់តែស៊ីជម្រៅ។
ទីក្រុងញូដេលី និយាយថា ការនាំចេញរបស់ខ្លួនស្ទើរតែទាំងអស់នឹងទទួលបាន «ការអនុគ្រោះ» ក្នុងការចូលទៅកាន់ទីផ្សារសហភាពអឺរ៉ុប ដោយក្នុងនោះមានដូចជា វាយនភណ្ឌ ស្បែក ផលិតផលសមុទ្រ សិប្បកម្ម ត្បូង និងគ្រឿងអលង្ការ ដែលនឹងត្រូវកាត់បន្ថយ ឬលុបបំបាត់ពន្ធគយ។
លោក Modi បានមានប្រសាសន៍ថា៖ «នេះគឺជាកិច្ចព្រមព្រៀងពាណិជ្ជកម្មសេរីដ៏ធំបំផុតរបស់ឥណ្ឌា។ វានឹងធ្វើឱ្យកសិករ និងអាជីវកម្មខ្នាតតូចរបស់ឥណ្ឌា ចូលទៅកាន់ទីផ្សារអឺរ៉ុបកាន់តែងាយស្រួល។ វាក៏នឹងជំរុញវិស័យផលិតកម្ម និងសេវាកម្ម ក៏ដូចជាលើកកម្ពស់ភាពជាដៃគូច្នៃប្រឌិតផងដែរ»។
កិច្ចព្រមព្រៀងពាណិជ្ជកម្មនេះ កើតឡើងក្នុងពេលដែលទាំងឥណ្ឌា និងសហភាពអឺរ៉ុប កំពុងប្រឈមមុខនឹងសម្ពាធសេដ្ឋកិច្ច និងភូមិសាស្ត្រនយោបាយពីសហរដ្ឋអាមេរិក៕
