ការចាប់ខ្លួនលោក ចេន​ ហ្ស៊ី មិន​គ្រប់​គ្រាន់​ទេ​ខណៈ​មាន​ការ​ទាម​ទារ​ឱ្យ​ស៊ើប​អង្កេត​បណ្តាញ​អាជីវកម្ម​របស់​លោក

ការ​ស៊ើបអង្កេត​មួយ​របស់​វីអូឌី រកឃើញ​ថា​ លោក ចេន ហ្ស៊ី (Chen Zhi) ដែលត្រូវបានចាប់ខ្លួន​ កាលពីថ្ងៃទី៦ ខែមករា ឆ្នាំ​២០២៦ បានបង្កើតក្រុមហ៊ុនប្រមាណ៥០​ក្នុងប្រទេស​កម្ពុជា ហើយមានបណ្តាញជាមួយបុគ្គល​មួយ​ចំនួន​ដែល​ជាដៃគូរកស៊ីរបស់​លោក។ អ្នកតាមដាន​មើលឃើញថា​ការចាប់ខ្លួន​លោក​ ចេន ហ្ស៊ី បញ្ជូនទៅឱ្យ​អាជ្ញាធរចិន​មិនទាន់គ្រប់គ្រាន់​នៅ​ឡើយទេ ដោយជំរុញ​ឱ្យ​អាជ្ញាធរ​កម្ពុជា​ស៊ើបអង្កេត​មុខជំនួញរបស់លោក​ ហើយស្វែងរក​អ្នក​ពាក់ព័ន្ធនឹងលោក ចេន ហ្ស៊ី។

លោក ចេន ហ្ស៊ី ដែលជា​ជនជាតិចិន ​មានសញ្ជាតិខ្មែរ ហើយបានរងទណ្ឌកម្មសហរដ្ឋអាមេរិក និងអង់គ្លេស មុនពេលរងការចាប់ខ្លួន បានបង្កើតក្រុមហ៊ុន​យ៉ាងតិច​​៤៩ក្នុងប្រទេសកម្ពុជា។ នេះ​បើយោង​តាម​កំណត់ត្រា​របស់​ក្រសួងពាណិជ្ជកម្មដែល​​ត្រូវ​បានផ្ទៀងផ្ទាត់ដោយ​វីអូឌី។ ​ក្រុមហ៊ុន​ដែលមាន​បណ្តាញ​នឹង​លោក ចេន ហ្ស៊ី ដែលជា​ប្រធាន​សម្ព័ន្ធ​ក្រុមហ៊ុន​ព្រីនស៍គ្រុប(Prince Group) ត្រូវបាន​ប្រទេស​មហាអំណាច​ដាក់ទណ្ឌកម្ម​​ក្នុង​បទល្មើស​ឆបោក​តាម​អនឡាញ និងលាងលុយកខ្វក់។

បើតាមរបាយការណ៍របស់ធនាគារព្រីនស៍ដែលជាក្រុមហ៊ុនមួយក្នុងចំណោមក្រុមហ៊ុនជាច្រើនរបស់​លោក ចេន ហ្ស៊ី លោក​មាន​ប្រភេទអាជីវកម្ម ដូចជា​ការវិនិយោគលើវិស័យអចលនទ្រព្យ  សេវាតុបតែងសំណង់អគារ​ អគារសណ្ឋាគារ ការអភិវឌ្ឍអចលនទ្រព្យ និងការគ្រប់គ្រង​អចលនទ្រព្យ។ ចំពោះអាជីវកម្មពាក់ព័ន្ធនឹងវិស័យប្រព័ន្ធផ្សព្វ​ផ្សាយ​​វិញ លោក ចេន ហ្ស៊ី បានវិនិយោគទៅលើក្រុមហ៊ុន​ផ្គត់ផ្គង់ទីផ្សារ​និងការផ្គត់ផ្គង់សេវាអ៊ីនធឺណិត។ លោកក៏មាន​អាជីវកម្ម​ផ្តល់សេវាកម្មដល់ការគ្រប់គ្រងសេវាកម្សាន្ត ផ្សារទំនិញលក់រាយ សេវាលម្អសួនច្បារ និងការវិនិយោគមូលធន​ឯកជនជាដើម។ នេះបើយោងតាមរបាយការណ៍របស់ធនាគារព្រីនស៍ ចេញផ្សាយកាលពីកន្លងទៅ។

លោក ចេន ហ្ស៊ី ដែល​ជា​អ្នកមានឥទ្ធិពលក្នុងវិស័យអាជីវកម្ម និងជាទីប្រឹក្សា​របស់​លោក ហ៊ុន ម៉ាណែត និង​លោក ហ៊ុន សែន​ បានបង្កើតក្រុមហ៊ុនជាច្រើន ក្រោយ​លោក​ទទួល​បានសញ្ជាតិ​ខ្មែរ​ កាលពី​ឆ្នាំ​២០១៤។

ក្នុងមុខជំនួញល្បែងវិញ លោក ចេន ហ្ស៊ី ​បាន​បង្កើត​កាស៊ីណូ​ក្នុង​ខេត្តព្រះសីហនុ ឈ្មោះJin Bei។ ដៃគូពាណិជ្ជកម្ម​ដ៏លេចធ្លោមួយ​របស់​លោក​ ចេន ហ្ស៊ី គឺ​​លោក ហ្គុយ ឆាយ (Guy Chhay)ក៏រង​ទណ្ឌកម្ម​របស់អាមេរិក។ បើតាមរបាយការណ៍របស់ធនាគារព្រីនស៍ លោក ហ្គុយ ឆាយ ជាម្ចាស់ភាគហ៊ុន និងជាអនុប្រធានក្រុមប្រឹក្សាភិបាលរបស់ធនាគារមួយនេះ។ របាយការណ៍បញ្ជាក់ថា ​លោក ហ្គុយ ឆាយ ​មានអាជីវកម្ម​ផ្សេងទៀតក្នុងវិស័យទីផ្សារ​ សេវាកម្មបោះពុម្ព សេវាអ៊ីនធឺណិត ការចែកចាយទំនិញប្រើប្រាស់រហ័ស អចលនទ្រព្យ និងការវិនិយោគ។

លោក ហ្គុយ ឆាយ ក៏មានងារជា​ទីប្រឹក្សារបស់លោក ហេង សំរិន កាលលោក​នៅធ្វើជាប្រធានរដ្ឋសភា។ នេះបើ​យោងតាម​ព្រះរាជក្រឹត្យ ចុះថ្ងៃទី១១ ខែមិថុនា ឆ្នាំ២០២០។

ចំណែក​កាលពីឆ្នាំ២០២៤ ស្នងការនគរបាលរាជធានីភ្នំពេញបាន​ផ្សព្វផ្សាយការចែកអំណោយ​មួយ​នៅ​លើទំព័រហ្វេសប៊ុករបស់ខ្លួន ដោយហៅលោក ហ្គុយ ឆាយ ជា«ឧកញ៉ា» និង«ទីប្រឹក្សា»របស់​លោក ស សុខា រដ្ឋមន្រ្តីក្រសួងមហាផ្ទៃ។

គេមិនទាន់ដឹងនៅឡើយទេថាតើអាជ្ញាធរកម្ពុជានឹង​ស៊ើបអង្កេត​លើបុគ្គល ហ្គុយ ឆាយ ឬយ៉ាងណា។

ចំណែក​បុគ្គលម្នាក់ទៀតដែលជា​បណ្តាញ​នឹង​លោក ចេន ហ្ស៊ី​ ឈ្មោះ  អ៊ឹង ដារ៉ា ដែលល្បីឈ្មោះ​រកស៊ីកាស៊ីណូក្នុងប្រទេស​​កម្ពុជា ​​ក៏រងទណ្ឌកម្មរបស់ប្រទេស​មហាអំណាចមួយនេះផងដែរ។ លោកបានចុះបញ្ជីកាស៊ីណូចំនួនពីរក្នុងខេត្តព្រះសីហនុ ក្រោមឈ្មោះJin Bei Group និងJin Bei។ នេះបើយោងតាមបញ្ជីឈ្មោះ​កាស៊ីណូចេញផ្សាយ​ដោយ​គណៈកម្មការគ្រប់គ្រង​ល្បែងពាណិជ្ជកម្ម​ដែលវីអូឌីទទួលបាន។

លោក អ៊ឹង ដារ៉ា ក៏ជាដៃគូពាណិជ្ជកម្ម​ជាមួយអ្នកស្រី មាស សុភារី ដែលជាកូនស្រីរបស់លោក មាស សុភា អតីតនាយ​ឧ​ត្ត​ម​សេនីយ៍  មេបញ្ជាការ​កងទ័ពជើងគោក បច្ចុប្បន្នជាឧត្តមប្រឹក្សាផ្ទាល់ព្រះ មហាក្សត្រ។

គេក៏មិនទាន់ដឹងនៅឡើយទេថាតើអាជ្ញាធរកម្ពុជានឹងមានចំណាត់ការបែបណាលើបុគ្គលឈ្មោះអ៊ឹង ដារ៉ា ដែរ។

ចំណែក​លោក ស សុខា រដ្ឋមន្រ្តី​ក្រសួងមហាផ្ទៃ ក៏ធ្លាប់ជាដៃគូរកស៊ីជាមួយ​លោក ចេន ហ្ស៊ី ផងដែរ ដោយ​បង្កើតក្រុមហ៊ុនJin Bei មុនពេលលោក​ឡើងធ្វើជារដ្ឋមន្រ្តីក្រសួងមហាផ្ទៃជំនួស​ឪពុករបស់​លោក គឺលោក ស ខេង។ ប៉ុន្តែក្រោយមក​ ឈ្មោះរបស់​លោក​ ស សុខា ត្រូវបានប្តូរមកជាអតីតម្ចាស់ក្រុមហ៊ុនវិញ។ នេះបើយោងតាមកំណត់ត្រា​របស់​ក្រសួងពាណិជ្ជកម្ម។

កាលពីខែតុលា ឆ្នាំ២០២៥ ក្រសួងមហាផ្ទៃបានបដិសេធថា​លោក ស សុខា មិន​​ជាប់​​ពាក់​ព័ន្ធ​​ជាមួយ​​នឹ​​ងកា​ស៊ីណូអ​ន​ឡាញ​ឡើយ។

លោក ចេន ហ្ស៊ី ក៏ធ្លាប់ជាទីប្រឹក្សារបស់​លោក ស ខេង ផងដែរ។

កាលពីដើមខែមករា ២០២៦ អ្នកសារព័ត៌មានវីអូឌី​បានចុះទៅពិនិត្យមើលអគារ​Jin Bei ក្នុងខេត្តព្រះសីហនុ។ អគារនេះត្រូវបានលុបឈ្មោះJin Beiចេញវិញ។ ប៉ុន្តែ​កាស៊ីណូ​ផ្សេងទៀតពាក់ព័ន្ធនឹង​ក្រុមហ៊ុនJin BeiឬហៅថាJin Bei 2 នៅបន្តបើកដំណើរការធម្មតា ដោយ​គ្រាន់តែ​លុបឈ្មោះJin Beiចេញ។

​ក្រុមហ៊ុន​ដែល​ត្រូវបានចុះបញ្ជី​នៅក្រសួងពាណិជ្ជកម្ម ក្រោម​ឈ្មោះលោក ចេន ហ្ស៊ី និងដៃគូរបស់លោក មានចំនួន ៤៩ រួមមាន PRINCE BANK PLC., PRINCE GROUP PLC , PRINCE HAPPINESS PLAZA,  PRINCE REAL ESTATE CAMBODIA GROUP និង ៤៥ក្រុមហ៊ុនផ្សេងទៀត។

ខាង​ក្រោម​នេះ​ជា​ក្រុមហ៊ុន​ដែល​ត្រូវបានចុះបញ្ជី​នៅក្រសួងពាណិជ្ជកម្ម ក្រោម​ឈ្មោះលោក ចេន ហ្ស៊ី និងដៃគូរបស់លោក៖

ក្រុមហ៊ុនមេដែលគេស្គាល់ច្រើន​ក្នុង​ប្រទេស​កម្ពុជា គឺ​Prince Holding / Prince Group និងធនាគារ​​ព្រីនស៍ តែម្តង។ នៅក្នុងការ​បង្កើតក្រុមហ៊ុន Prince Group លោក ចេន ហ្ស៊ី ក៏មានបណ្តាញនឹង​បុគ្គលម្នាក់ទៀតជាជនជាតិខ្មែរ គឺលោក ហ៊ន់ សុរចនា ផងដែរ។

វីអូឌី បានព្យាយាមទាក់ទងសុំការបកស្រាយពី​លោក ហ៊ន់ សុរចនា តាមទូរសព្ទជាច្រើនដងកាលពីពាក់កណ្តាលខែមករា ឆ្នាំ២០២៦នេះ ដោយទូរសព្ទចូល តែមិនមានអ្នកទទួល។

ក្រៅពីនោះ លោក ចេន ហ្ស៊ី ក៏មានដៃគូពាណិជ្ជកម្មម្នាក់ទៀត ឈ្មោះ បូ ឈិន ដែលជាអតីតម្ចាស់ក្រុមហ៊ុន Cambodia Airways ហើយ​លោកមានមុខជំនួញជាច្រើនក្នុងប្រទេស​កម្ពុជា។

នៅក្នុង​ផ្នែក​ផ្គត់ផ្គង់បណ្តាញអ៊ីនធឺណិតវិញ លោក ចេន ហ្ស៊ី ក៏បានបង្កើត​​ក្រុមហ៊ុនមួយឈ្មោះថា​​ CITYLINK ហើយដៃគូរកស៊ីរបស់លោក ​មានឈ្មោះកែវ ចរិយា និង​​ កែវ ប្រាថ្នា។ នេះបើយោងតាមកំណត់ត្រារបស់ក្រសួងពាណិជ្ជកម្ម។

វីអូឌីក៏បានព្យាយាមទាក់ទងឈ្មោះ កែវ ចរិយា និង កែវ ប្រាថ្នា ជាច្រើនដងតាមរយៈលេខទូរសព្ទដែលត្រូវបានចុះបញ្ជីនៅលើគេហទំព័ររបស់​ក្រសួងពាណិជ្ជកម្មផងដែរកាលពីពាក់កណ្តាលខែមករា ឆ្នាំ២០២៦ ដើម្បីសុំការឆ្លើយតបអំពីរឿងនេះ ក៏ប៉ុន្តែលេខទូរសព្ទទាំងនោះសុទ្ធតែមិនអាចទាក់ទងបាន។

នៅក្នុងផ្នែកផ្តល់សេវាកម្សាន្ត និងទេសចរណ៍វិញ លោក ចេន ហ្ស៊ី បានបង្កើតក្រុមហ៊ុនឈ្មោះBay of Lights Entertainment ដែលស្ថិតនៅតំបន់រាម ក្នុងខេត្តព្រះសីហនុ។

Bay of Lights របស់​លោក ចេន ហ្ស៊ី ត្រូវបានប្តូរឈ្មោះមកជា​​Flame Resortវិញ ក្រោយមានទណ្ឌកម្ម​លើក្រុមហ៊ុនព្រីនស៍ គិតមកត្រឹមដើមខែមករា ឆ្នាំ២០២៦នេះ។

មកទល់ពេលនេះ គេមិនទាន់ដឹង​នៅឡើយទេថា​​តើ​អាជ្ញាធរកម្ពុជា​នឹងស៊ើបអង្កេតលើបុគ្គលដែល​ពាក់ព័ន្ធនឹងមុខជំនួញរបស់​​​លោក ចេន ហ្ស៊ី ឬយ៉ាងណា។

វីអូឌី បានទាក់ទងលោក ប៉ែន សុវិជាតិ អ្នកនាំពាក្យ​ក្រសួងពាណិជ្ជកម្ម តាមរយៈប្រព័ន្ធតេលេក្រាម កាលពីថ្ងៃ​ទី​២១ ខែ​មករា ឆ្នាំ​២០២៦ ដើម្បីសុំការអត្ថាធិប្បាយអំពីការដែលលោក ចេន ហ្ស៊ី មានក្រុមហ៊ុនចុះបញ្ជីរហូតដល់ ៤៩​ក្រុម​ហ៊ុន និងថាតើអាចនឹងមានការស៊ើបអង្កេតទៅលើក្រុមហ៊ុនជំនួញរបស់លោក ចេន ហ្ស៊ី និងអ្នកពាក់ព័ន្ធ ឬ​ទេ? យ៉ាងណា ពុំមានការឆ្លើយតបណាមួយឡើយរហូតមកដល់ម៉ោងផ្សាយនេះ។

ពាក់ព័ន្ធនឹងការចាប់ខ្លួនលោក ចេន ហ្ស៊ី ក្រសួងការបរទេសកម្ពុជាបញ្ជាក់ថា​ការចាប់ខ្លួននេះ ធ្វើឡើងដោយផ្អែកតាមច្បាប់ និងការប្តេជ្ញាចិត្តរបស់កម្ពុជា។ ក្រសួងបន្ថែមថា​​អាជ្ញាធរកម្ពុជាបានដកសញ្ជាតិ​លោក ចេន ហ្ស៊ី ដោយ​សារ​​រក​ឃើញ​ថា ការទទួលបានសញ្ជាតិនោះមានការក្លែងបន្លំ ឬដោយការផ្តល់ព័ត៌មានមិនពិត។

លោក ស៊ឹង សែន​ករុណា អ្នក​តាម​ដាន​សិទ្ធិ​មនុស្ស​មួយ​រូ​ប​​ដែល​​កំពុង​​ស្នាក់​នៅ​​ប្រទេស​អូស្រ្តាលី ​ជំរុញ​ឱ្យមាន​ការ​ស៊ើបអង្កេត​លើការ​ចុះបញ្ជី​របស់​ក្រុមហ៊ុន​ពាក់ព័ន្ធនឹង​លោក ចេន ហ្ស៊ី និងស្វែងរក​ថា​តើ​បុគ្គលណាខ្លះពាក់ព័ន្ធនឹងលោក​ ចេន ហ្ស៊ី។

លោក​បញ្ជាក់ថា៖ «មិនមែនគ្រាន់តែចាប់បញ្ជូនខ្លួនត្រឹមប៉ុណ្ណឹង​ទេ។ ដូច្នេះអ្វីដែលជាបញ្ហាបន្ទាប់នោះគឺត្រូវមានការ​ស្វែង​រកបក្ខពួកបន្តបន្ទាប់ទៀត ហើយនិងមន្រ្តីដែល​ពាក់ព័ន្ធជាច្រើនរូប ឧកញ៉ាជាច្រើនរូបផ្សេងទៀតដែលរក​ស៊ី​របរ​ជាមួយ លោក ចេន ហ្ស៊ី ហើយប្រព្រឹត្តបទល្មើសដូចគ្នា»។

លោក​​បង្ហាញការ​សង្ស័យថា​ការណ៍ដែល​ លោក ចេន ហ្ស៊ី បង្កើត​ក្រុមហ៊ុនច្រើន​បែបនេះ គឺដើម្បី​លាងលុយកខ្វក់។

អ្នកជំនាញផ្នែកឧក្រិដ្ឋកម្មឆ្លងដែនអន្តរជាតិ លោក  Jacob Sims ប្រាប់វីអូឌីតាមសារអ៊ីម៉ែលកាលពីថ្ងៃទី ១២ ខែមករាឆ្នាំ២០២៦ ​ថា ​ហេតុផលនៃការចាប់ខ្លួនលោក ចេន ហ្ស៊ី អាចមក​ពី​ការចោទប្រកាន់​របស់តុលាការអាមេរិក​ កាលពីខែតុលា ២០២៥ និង​ការចង់បានរបស់ចិនដែលមិនចង់ឃើញរឿងអាស្រូវលាងលុយកខ្វក់របស់​ក្រុមហ៊ុន​ព្រីនស៍ ​ត្រូវបានលាតត្រដាងនៅតុលាការអាមេរិក។

លោកបន្ថែម​ថា៖ «លោក ហ៊ុន សែន និងបណ្តាញគាំទ្រអំណាចរបស់​គណបក្សប្រជាជន​កម្ពុជាទាំងមូលដែលលោក ចេន ហ្ស៊ី បានជួយពង្រឹងតាមរយៈប្រាក់ចំណេញខុសច្បាប់របស់ខ្លួន, ត្រូវបង្ខំចិត្តជ្រើសរើសរវាងជម្រើសអាក្រក់ៗ ហើយការបញ្ជូនលោក ចេន ហ្ស៊ី ទៅកាន់ទីក្រុងប៉េកាំង គឺជាជម្រើស​ងាយស្រួលបំផុត»។

អ្នកជំនាញរូបនោះបន្ថែមថា​​អាជ្ញាធរកម្ពុជា​​ត្រូវចោទប្រកាន់ និងចាប់ខ្លួនភ្លាមៗអ្នកប្រព្រឹត្តអំពើខុសច្បាប់ ផ្សេងទៀត ដែល​លោក​បាន​លើកឡើង ដូចជា​​លោក កុក អាន លោក លី យ៉ុងផាត់ លោក ទ្រី ភាព លោក ស សុខា លោក ហ៊ុន តូ និង​លោក ហ៊ុន សែន ខ្លួនឯង។ លោកបញ្ជាក់ថា​​វិធីសាស្ត្រដែលមានប្រសិទ្ធភាពបំផុតក្នុងការដាក់សម្ពាធ​លើ​ក្រុមឧក្រិដ្ឋជនដែលមានអំណាច គឺការ​បន្តដាក់សម្ពាធជាប់លាប់​ពី​សហគមន៍អន្តរជាតិ៕