ប្រទេសចិន និងចក្រភពអង់គ្លេស បានប្តេជ្ញាពង្រឹងការសន្ទនា និងកិច្ចសហប្រតិបត្តិការនៅក្នុងទីក្រុងប៉េកាំង កាលពីថ្ងៃទី២៩ខែមករា ខណៈដែលមេដឹកនាំនៃប្រទេសទាំងពីរបានជួបគ្នា ដែលជាសញ្ញានៃភាពកក់ក្តៅនៃទំនាក់ទំនងរវាងប្រទេសទាំងពីរឡើងវិញ។
ប្រធានាធិបតីចិន លោក Xi Jinping បានអំពាវនាវឱ្យមាន “ជំពូកថ្មី” នៅក្នុងទំនាក់ទំនង ហើយនាយករដ្ឋមន្ត្រីអង់គ្លេស លោក Keir Starmer បានមានប្រសាសន៍ថា ទំនាក់ទំនងបច្ចុប្បន្ន គឺស្ថិតក្នុង “ស្ថានភាពដ៏រឹងមាំ”។
បន្ទាប់មក លោក Starmer បានប្រកាសថា កិច្ចព្រមព្រៀងមួយចំនួនត្រូវបានសម្រេចជាមួយទីក្រុងប៉េកាំង រួមមានការអនុញ្ញាតឱ្យពលរដ្ឋអង់គ្លេសចូលប្រទេសចិន ដោយមិនចាំបាច់មានទិដ្ឋាការក្នុងរយៈពេលរហូតដល់ ៣០ថ្ងៃ និងកិច្ចព្រមព្រៀងមួយ ដើម្បីសិក្សាពីលទ្ធភាពនៃការឈានទៅរកការចរចាលើកិច្ចព្រមព្រៀងសេវាកម្មទ្វេភាគី។
ចក្រភពអង់គ្លេស គឺជាប្រទេសនាំចេញសេវាកម្មធំជាងគេទីពីរនៅលើពិភពលោក ហើយតម្រូវការពីប្រទេសចិននៅក្នុងវិស័យនេះ កំពុងតែមានការកើនឡើង។ ភាពជាដៃគូផ្នែកសេវាកម្មនេះ អាចនឹងជួយសម្រួលដល់ក្រុមហ៊ុនអង់គ្លេសក្នុងការធ្វើអាជីវកម្មនៅក្នុងប្រទេសចិនឱ្យកាន់តែងាយស្រួលជាងមុន។
ក្នុងអំឡុងពេលនៃកិច្ចពិភាក្សានៅវិមាន Great Hall of the People លោក Xi និងលោក Starmer បានព្រមព្រៀងគ្នាក្នុងការអភិវឌ្ឍន៍ “ភាពជាដៃគូយុទ្ធសាស្ត្រគ្រប់ជ្រុងជ្រោយ ប្រកបដោយស្ថិរភាព និងយូរអង្វែង” នេះបើតាមការចុះផ្សាយរបស់ទីភ្នាក់ងារសារព័ត៌មានរដ្ឋ Xinhua។
បន្ថែមពីនេះ លោក Xi បានជំរុញឱ្យប្រទេសទាំងពីរ ក្នុងនាមជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ និងជាប្រទេសដែលមានសេដ្ឋកិច្ចធំៗ បង្កើនកិច្ចសហការដើម្បីការពារសន្តិភាព និងស្ថិរភាពពិភពលោក។
លោកបានមានប្រសាសន៍ថា៖ «ប្រទេសចិនមានឆន្ទៈក្នុងការធ្វើការជាមួយចក្រភពអង់គ្លេស ដើម្បីប្រកាន់ខ្ជាប់នូវទស្សនវិស័យប្រវត្តិសាស្ត្រដ៏ទូលំទូលាយ ងើបឱ្យផុតពីការខ្វែងគំនិតគ្នា គោរពគ្នាទៅវិញទៅមក… បើកទំព័រថ្មីមួយក្នុងទំនាក់ទំនង និងកិច្ចសហប្រតិបត្តិការរវាងចិន និងអង់គ្លេស ដែលផ្តល់ផលប្រយោជន៍ដល់ប្រជាជនទាំងពីរ និងពិភពលោក»។
លោក Xi បានបញ្ជាក់ថា ទំនុកចិត្តគ្នាទៅវិញទៅមកគួរតែជាគ្រឹះនៃទំនាក់ទំនង ដោយលោកបានបន្ថែមថា៖ «មិនថាប្រទេសចិនអភិវឌ្ឍន៍ និងរីកចម្រើនខ្លាំងកម្រិតណានោះទេ វានឹងមិនបង្កជាការគំរាមកំហែងដល់ប្រទេសដទៃឡើយ»។
លោក Starmer ដែលបានចាប់ផ្ដើមដំណើរកម្សាន្តរយៈពេលបួនថ្ងៃ ទៅកាន់ប្រទេសចិន កាលពីថ្ងៃទី២៨ខែមករា គឺជានាយករដ្ឋមន្ត្រីអង់គ្លេសដំបូងគេ ដែលបានមកបំពេញទស្សនកិច្ច ចាប់តាំងពីលោកស្រី Theresa May ក្នុងឆ្នាំ ២០១៨។
លោកកំពុងស្ថិតក្នុងបេសកកម្ម ដើម្បីជួសជុលទំនាក់ទំនងរបស់ប្រទេសលោកជាមួយទីក្រុងប៉េកាំង បន្ទាប់ពីទំនាក់ទំនងបានល្អក់កករ ក្រោមការដឹកនាំរបស់គណបក្សអភិរក្ស ទោះបីជាមានការខិតខំប្រឹងប្រែងនាពេលកន្លងមក ក្នុងការបង្កើត “យុគសម័យមាស” នៃទំនាក់ទំនងរវាងប្រទេសទាំងពីរក៏ដោយ។
លោកក៏បានមកបំពេញទស្សនកិច្ចក្នុងពេលដែលបណ្តាប្រទេសសេដ្ឋកិច្ចលោកខាងលិច កំពុងព្យាយាមស្វែងរកផ្លូវក្នុងបរិយាកាសអន្តរជាតិដែលកាន់តែមានភាពតានតឹង ក៏ដូចជាភាពមិនច្បាស់លាស់នៃសហរដ្ឋអាមេរិក ក្រោមការដឹកនាំរបស់ប្រធានាធិបតី Donald Trump។
របាយការណ៍របស់ Xinhua មិនបានលើកឡើងចំៗពីសហរដ្ឋអាមេរិកនោះទេ ប៉ុន្តែបានបញ្ជាក់ថា លោក Xi បានព្រមានអំពីគ្រោះថ្នាក់នៃការកើនឡើងនៃលទ្ធិឯកតោភាគីនិយម លទ្ធិគាំពារនិយម និងនយោបាយប្រើអំណាច — ដែលជាភាសាដែលប្រទេសចិនតែងតែប្រើ ដើម្បីសំដៅលើសកម្មភាពរបស់រដ្ឋបាលលោក Trump រួមទាំងការដំឡើងពន្ធយ៉ាងគំហុក និងការវាយប្រហារលើប្រទេសវេណេស៊ុយអេឡានាពេលថ្មីៗនេះ។
លោកមានប្រសាសន៍ថា៖ «ច្បាប់អន្តរជាតិមានប្រសិទ្ធភាពពិតប្រាកដ លុះត្រាតែគ្រប់ប្រទេសទាំងអស់គោរពតាម ហើយជាពិសេសមហាអំណាចត្រូវតែធ្វើជាអ្នកដឹកនាំ។ បើមិនដូច្នោះទេ យើងនឹងធាក់ថយក្រោយទៅរកពិភពលោកដែលដូចជាព្រៃផ្សៃ»៕
