គ្រួសារយុទ្ធជនពលីនៅខេត្តព្រះវិហារ ព្រួយបារម្ភពីសម្ពាធបំណុល ហើយគ្មានលទ្ធភាពសងបំណុលធនាគារ ក្រោយពីប្តីដែលជាកងទ័ពជួរមុខ ច្បាំងជាមួយទ័ពសៀមដោយត្រូវផ្សែងពុលធ្លាក់ខ្លួនឈឺធ្ងន់ កាលពីខែធ្នូ ឆ្នាំ ២០២៥ ទើបតែបាត់បង់ជីវិតកាលពីថ្ងៃទី១៥ ខែមករា ឆ្នាំ២០២៦។
គាត់អះអាងថា ក្រោយពីប្តីបាត់បង់ជីវិត មានសប្បុរសជន និងមន្ត្រីរដ្ឋាភិបាលឧបត្ថម្ភថវិកាមួយចំនួន និងផ្គត់ផ្គង់សម្ភារៈរៀបចំបុណ្យសព ក៏ប៉ុន្តែទោះយ៉ាងណា គាត់នៅតែត្រូវការរដ្ឋាភិបាលជួយជ្រោមជ្រែងបន្ថែមទៀត រឿងបញ្ហាបំណុល និងប្រាក់ឧបត្ថម្ភផ្គត់ផ្គង់ជីវភាព បន្ទាប់ពីអត់ប្តីដែលជាអ្នកជំហររឹងមាំក្នុងគ្រួសារ។
ស្ត្រីឈ្មោះ សរ នឿន អាយុ ៤២ឆ្នាំ រស់នៅភូមិជ័យសែន ឃុំស្រអែម ស្រុកជាំក្សាន្ត ខេត្តព្រះវិហារ ប្រាប់វីអូឌីនៅថ្ងៃទី៣០ ខែមករាថា ប្តីអ្នកស្រី ឈ្មោះ អឿន ភារុណ អាយុ ៤០ឆ្នាំ ត្រូវផ្សែងពុល ខណៈពេលប៉ះប្រយុទ្ធគ្នាជាមួយទ័ពថៃនៅចំណុចជើងភ្នំខ្មោច ដោយបន្សល់ទុកអ្នកស្រីម្នាក់ក្លាយជាស្ត្រីមេម៉ាយគ្មានកូន រស់នៅម្នាក់ឯង គ្មានការងារធ្វើ និងមុខរបរច្បាស់លាស់នៅឡើយ។
អ្នកស្រីថា គ្រួសារអ្នកស្រីជំពាក់បំណុលធនាគារ ៨០លានរៀល ដែលបានខ្ចីដើម្បីសង់ផ្ទះ និងធ្វើកសិកម្ម កាលពីដើមឆ្នាំ២០២៥ ដោយរំពឹងប្រាក់ខែរបស់ប្តី បង្វិលសងធនាគារជារៀងរាល់ខែ។
អ្នកស្រី សរ នឿន និយាយថា៖ «ថប់ដង្ហើមពេទ្យថតទៅរលាកសួត ណែនទ្រូង រាជរដ្ឋាភិបាលជួយដោះស្រាយបំណុលឱ្យខ្ញុំ ព្រោះខ្ញុំប្តីស្លាប់បាត់ហើយ អត់មានអីសងធនាគារ។ កាលប្តីខ្ញុំយក មកធ្វើចម្ការ»។
ស្ត្រីដដែល បន្ថែមថា ការពីប្តីនៅមានជីវិត ហើយគាត់ទំនេរពីកិច្ចការយោធា គាត់ប្រកបរបរកសិកម្មចិញ្ចឹមសត្វ និងដាំបន្លែ នៅផ្ទះ ដើម្បីផ្គត់ផ្គង់គ្រួសារ ហើយបន្ទាប់ពីប្តីលាចាកលោកទៅ មុខរបរទាំងអស់នេះ នឹងបាត់បង់។
កាលពីថ្ងៃទី១០ ខែធ្នូ ឆ្នាំ២០២៥នេះ ធនាគារជាតិនៃកម្ពុជា បានណែនាំឱ្យគ្រឹះស្ថានធនាគារ និងហិរញ្ញវត្ថុ ផ្ដល់ការអនុគ្រោះដល់យោធិនដែលបានពលី, ដោយសម្រេចលុបបំណុល ៨០លានរៀល ចំពោះយោធិនពលី, លុបបំណុល ១០លានរៀល ចំពោះយោធិនពិការ និងលើកលែងការផាកពិន័យ, ការទូទាត់សងការប្រាក់ និងពន្យារសងប្រាក់ដើម ចំពោះយោធិនក្នុងសមរភូមិប្រយុទ្ធ។
ឆ្លើយតបរឿងនេះ អ្នកស្រី សរ នឿន បន្ថែមថា មកទល់ពេលនេះ មិនទាន់ឃើញធនាគារដោះស្រាយបញ្ហាបំណុលនេះ ជូនគ្រួសារអ្នកស្រី ដែលមានប្តីជាយោធាពលីនៅឡើយទេ។ អ្នកស្រីអំពាវនាវឱ្យមន្ត្រីរដ្ឋាភិបាលជួយអន្តរាគមន៍ដោះស្រាយបំណុល។
អ្នកស្រី សរ នឿន និយាយថា៖ «កាលគាត់នៅទៅ គាត់ធ្វើនេះ ធ្វើនោះបានលុយឱ្យយើងដែរ អត់ពីប្តីទៅ ខ្ញុំអត់ដឹងរកអី។ ពិបាកដែលពេលអត់ពីប្តី ពិបាកចិត្តខ្លាំងរឿងដោះស្រាយបំណុលធនាគារ»។
ប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា បានថ្លែងជាសាធារណ:កាលពីពេលថ្មីៗនេះ ឆ្លើយតបចំពោះការលះបង់របស់យុទ្ធជនពលី អះអាងថា លោកនាយករដ្ឋមន្ត្រី ហ៊ុន ម៉ាណែត បានដាក់ចេញគោលនយោបាយជួយសម្រួលដល់ក្រុមគ្រួសារកងទ័ពពលី រួមមាន ផ្តល់មុខរបរចិញ្ចឹមជីវិត ស្រោចស្រង់សមាជិកគ្រួសារ ផ្ដល់អាហារូបករណ៍ដល់កូនៗសិក្សាដល់កម្រិតបរិញ្ញាបត្រ រៀបចំឥណទានសារជាថ្មី ដោះស្រាយបំណុលជូនវីរយុទ្ធជនក្នុងសមរភូមិ និងបង្កើតមូលនិធិទ្រទ្រង់ដល់គ្រួសារយុទ្ធជនពលី ថែមទៀត។
លោកថា មកទល់ពេលនេះ គ្រឹះស្ថានផ្តល់ប្រាក់កម្ចី និងធនាគារបានលុបបំណុល ទាំងប្រាក់ដើម សរុប ១លានដុល្លារអាម៉េរិក សម្រាប់យោធិនជួរមុខ យោធិនរងរបួស និងគ្រួសារយុទ្ធជនពលី។
លោក ប៉ែន បូណា ថ្លែងថា៖ «សម្តេច ហ៊ុន ម៉ាណែត បានសម្ដែងការដឹងគុណជ្រាលជ្រៅបំផុត ចំពោះការលះបង់មិនអាចកាត់ថ្លៃបានរបស់វីរកងទ័ព និងវីរនគរបាលជាតិអង់អាចក្លាហានគ្រប់រូប បំពេញភារកិច្ចដ៏ឧត្ដុង្គឧត្ដមការពារអធិបតេយ្យភាព និងបូរណភាពទឹកដី។ គុណូបការៈទាំងនេះ ពិតជាមានតម្លៃលើសអ្វីៗទាំងអស់ ហើយនិងត្រូវចារទុកក្នុងប្រវត្តិសាស្ត្រសម្រាប់ពលរដ្ឋគ្រប់រូប និងគ្រប់ជំនាន់»។
ចំណែក ក្រុមប្រឹក្សាជាតិតស៊ូដឹកនាំដោយ លោក សម រង្ស៊ី ធ្លាប់ចេញសេចក្ដីថ្លែងការណ៍ជំរុញឱ្យរដ្ឋាភិបាលកម្ពុជា គិតគូរតបស្នងគុណបំណាច់របស់យុទ្ធជនខ្មែរ ដែលកាន់អាវុធក្រាញននៀលប្រយុទ្ធការពារទឹកដីកម្ពុជានៅសមរភូមិជួរមុខ។
លោកថា រដ្ឋាភិបាលកម្ពុជា ត្រូវលុបចោលបំណុលទាំងអស់ ដែលគ្រួសារយុទ្ធជនសមរភូមិជួរមុខជំពាក់ធនាគារ ហើយរដ្ឋាភិបាលត្រូវបង់សងជំនួសវិញ។ លើសពីនេះ រដ្ឋាភិបាលត្រូវរៀបចំតម្លើងប្រាក់ខែ បុណ្យស័ក្ដិ ក្នុងលក្ខខណ្ឌពិសេស ព្រមទាំងសង់ផ្ទះជូនពួកគាត់ និងគ្រួសារឲ្យស័ក្ដិសមចំពោះការពលិកម្មការពារទឹកដី។
ដោយឡែក យុទ្ធជនពលី រដ្ឋាភិបាលគួរប្រគល់ប្រាក់បំណាច់ដល់គ្រួសារពួកគាត់ យ៉ាងតិចមួយគ្រួសារ ១០ម៉ឺនដុល្លារអាមេរិក។
វីអូឌី មិនទាន់អាចទាក់ទងសុំការបំភ្លឺបន្ថែមជុំវិញរឿងនេះ ពីប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា និងអ្នកនាំពាក្យក្រសួងការពារជាតិ លោកស្រី ម៉ាលី សុជាតា បាននៅឡើយទេ គឹមត្រឹមម៉ោងផ្សាយនេះ។
អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន សង្កេតឃើញថា មន្ត្រីយោធាជាប់ខ្សែស្រឡាយអ្នកមានអំណាចក្នុងជួររដ្ឋាភិបាលមានជីវភាពហឺហារ មានទ្រព្យស្ដុកស្ដម្ភ និងឋានន្តរសក្ដិខ្ពស់ៗ រហូតដល់ពាក់ផ្កាយ ផ្ទុយស្រឡះពីយោធាការពារព្រំដែន។
លោកថា យុទ្ធជនការពារព្រំដែននៅមានជីវភាពក្រលំបាកនៅឡើយ ដែលទាមទារឱ្យរដ្ឋាភិបាលយកចិត្តទុកដាក់បន្ថែមទៀត ឱ្យសមតាមវីរភាពយុទ្ធជនខ្មែរ ដែលហ៊ានបូជាជីវិតដើម្បីជាតិមាតុភូមិ។
លោកថា៖ «ទាហានជួរមុខពេលដល់ស្លាប់បានយើងដឹង មើលផ្ទះគាត់ក្រ អ្នកខ្លះអត់មានផ្ទះនៅផង ខ្លះសុំផ្ទះគេនៅ ជីវភាពក្រីក្រ។ ខ្ញុំយល់ឃើញថា មិនមានការយកចិត្តដាក់ពីរដ្ឋាភិបាលលោក ហ៊ុន សែន និងលោក ហ៊ុន ម៉ាណែត ចំពោះទាហានតស៊ូពិតប្រាកដអត់ខ្សែមានខ្នង។ ការតម្លើងបុណ្យស័ក្ដិក៏មិនបានឡើងនឹងគេ ដូចទាហានមានខ្សែមានខ្នងដែរ»។
លោក អ៊ុំ សំអាន បន្ថែមថា កន្លងទៅ ទាហានខ្មែរធ្វើសង្គ្រាម ធ្លាក់ខ្លួនពិការភាព បាក់ដៃ បាក់ជើង និងពិការភ្នែកជាដើម ក្រោយពីចប់សង្គ្រាម បានដើរសុំទានគេ និងខ្លះរើសអេតចាយចិញ្ចឹមជីវិត រស់នៅយ៉ាងលំបាកវេទនា ខ្វះការជួយជ្រោមជ្រែងទំនុកបម្រុងពីរដ្ឋ។
លោកថា ការយកចិត្តទុកដាក់ទំនុកបម្រុងដល់យោធាពលី និងយោធាពិការ រួមចំណែកលើកទឹកចិត្តកងទ័ព មានកម្លាំងចិត្តការពារទឹកដី។
ចំណែក ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ជំរុញឱ្យរដ្ឋាភិបាលរឹបអូសទ្រព្យសម្បត្តិពីក្រុមឧកញ៉ា និងមន្ត្រីខិលខូចដែលកេងប្រវ័ញ្ចជាតិ បំផ្លាញធនធានធម្មជាតិ ទៅឧបត្ថម្ភជួយដល់គ្រួសារយោធាពលី និងគ្រួសារយោធាពិការជាដើម។
លោកថា ការយកចិត្តទុកដាក់ជួយគ្រួសារកងទ័ពពលី ជាការរួមចំណែកពង្រឹងស្មារតីសាមគ្គីជាតិ និងជាការលើកទឹកចិត្តដល់កងទ័ព។
លោក ម៉ែន ណាត និយាយថា៖ «ពួកឧកញ៉ាធំៗគេងប្រវ័ញ្ចជាតិ បំផ្លិចបំផ្លាញធម្មជាតិអីហ្នឹង យកលុយបានពីការបំផ្លាញហ្នឹង យកទៅជួយរដ្ឋាភិបាល ដើម្បីយកលុយហ្នឹងជួយកងទ័ពជួរមុខ ជួយធ្វើទំនើបកម្មវិស័យកងទ័ព។ ឱ្យមានសមានចិត្តអ៊ីចឹង ចូលរួមចំណែកសាមគ្គី ស្មារតីជាតិ។ អំពើពុករលួយនេះ រដ្ឋាភិបាលក្រសួងការពារជាតិ ត្រូវមើលឱ្យឃើញ អ្នកណាកិបកេងប្រាក់ខែកងទ័ព ដាក់ពិន័យធ្ងន់ធ្ងរ ពិន័យមិនស្ដាប់ដកហូតដំណែង និងដាក់គុកទៀត»។
អង្គភាពអ្នកនាំពាក្យរដ្ឋាភិបាល បង្ហោះសារតាមបណ្ដាញសង្គមថា មកទល់ពេលនេះ គ្រឹះស្ថានមីក្រូហិរញ្ញវត្ថុដែលជាសមាជិករបស់សមាគមមីក្រូហិរញ្ញវត្ថុកម្ពុជា បានសម្រេចលើកលែងការប្រាក់សរុបជាង ១០,៦លានដុល្លារអាម៉េរិក សម្រាប់គ្រួសារជនភៀសសឹក និងបានលុបចោលបំណុល (ទាំងប្រាក់ដើម ទាំងការប្រាក់) សរុប ១លានដុល្លារអាម៉េរិក សម្រាប់យោធិនជួរមុខ យោធិនរងរបួស និងគ្រួសាររបស់យោធិនពលី។ គ្រឹះស្ថានមីក្រូហិរញ្ញវត្ថុបានរៀបចំឥណទានឡើងវិញក្នុងទំហំទឹកប្រាក់ ៥០០លានដុល្លារអាម៉េរិក ដើម្បីសម្រាលសំពាធហិរញ្ញវត្ថុជូនដល់ជនភៀសសឹក និងអតិថិជនដែលរងផលប៉ះពាល់ផ្សេងៗទៀត។
ទោះជាយ៉ាងណា មន្ត្រីសង្គមស៊ីវិល ទទូចឱ្យរដ្ឋាភិបាល តាមដានពីការអនុវត្តគោលនយោបាយនេះ ព្រោះគ្រួសារយោធាពលីមួយចំនួន មិនទាន់ទទួលបានដំណោះស្រាយពីរដ្ឋាភិបាលនៅឡើយទេ៕
