ការវាយប្រហារដោយកាំភ្លើង និងគ្រាប់បែកជាបន្តបន្ទាប់នៅទូទាំងខេត្ត Balochistan ភាគនិរតីនៃប្រទេសប៉ាគីស្ថាន បានសម្លាប់ជនស៊ីវិល ៣១ នាក់ និងបុគ្គលិកសន្តិសុខ ១៧ នាក់។ នេះបើយោងតាមការលើកឡើងរបស់លោក Sarfraz Bugti អភិបាលខេត្តនៃតំបន់នោះនៅថ្ងៃទី១ខែកុម្ភៈ។
ជាមួយគ្នានេះ បើតាមលោក Bugti កងកម្លាំងសន្តិសុខដែលបានឆ្លើយតបទៅនឹងអំពើហិង្សានេះ បានសម្លាប់ខ្មាន់កាំភ្លើងយ៉ាងហោចណាស់ ១៤៥ នាក់។ ក្រុមឧទ្ទាមកងទ័ពរំដោះបាឡូជីស្ថាន (BLA) កាលពីពេលមុន បាននិយាយថា ខ្លួននៅពីក្រោយការវាយប្រហារនេះ ដោយអះអាងថាមានទាហានរាប់សិបនាក់ត្រូវបានសម្លាប់។
ការកើនឡើងនៃអំពើហិង្សានេះ គឺជាថ្ងៃដ៏សាហាវបំផុតមួយនៅក្នុងខេត្តដែលក្រីក្រមួយនេះ ដែលរដ្ឋាភិបាលប៉ាគីស្ថានបានប្រយុទ្ធប្រឆាំងនឹងការបះបោររបស់ក្រុមជនជាតិភាគតិច អស់រយៈពេលជាច្រើនទសវត្សរ៍មកហើយ។
ប៉ាគីស្ថាន បានចោទប្រកាន់ប្រទេសឥណ្ឌាថា បានគាំទ្រក្រុម BLA។ ចំណែកឯទីក្រុងញូដេលីវិញ បានបដិសេធម្តងហើយម្តងទៀតចំពោះការចោទប្រកាន់បែបនេះ។
កងទ័ព បាននិយាយថា ការវាយប្រហារជាច្រើនបានកំណត់គោលដៅលើជនស៊ីវិល នៅជុំវិញទីក្រុង Quetta ដែលជាទីរួមខេត្ត និងទីតាំងផ្សេងៗទៀត។
ការវាយប្រហារដោយគ្រាប់បែកដៃ និងកាំភ្លើងនៅក្នុងទីក្រុង និងទីប្រជុំជនចំនួន ១២ នៅទូទាំងខេត្ត បានកំណត់គោលដៅលើទីតាំងប៉ូលីស និងកងកម្លាំងពាក់កណ្តាលយោធា ក៏ដូចជាពន្ធនាគារ និងអគាររដ្ឋាភិបាលផងដែរ។
មានសេចក្តីរាយការណ៍ថា អគាររដ្ឋបាលសំខាន់ៗមួយចំនួនក្នុងទីក្រុង Quetta និងផ្លូវថ្នល់នៅក្បែរនោះ ត្រូវបានបិទខ្ទប់ក្នុងអំឡុងពេលថ្ងៃ។ សេវាទូរស័ព្ទចល័តត្រូវបានកាត់ផ្តាច់ ហើយសេវារថភ្លើងក្នុងតំបន់ត្រូវបានផ្អាក។
ក្រោយមក នាយករដ្ឋមន្ត្រី Shehbaz Sharif បានសរសើរដល់កងទ័ព ដោយប្តេជ្ញាថា «នឹងបន្តសង្គ្រាមប្រឆាំងនឹងភេរវកម្ម រហូតដល់វាត្រូវបានលុបបំបាត់ទាំងស្រុង»។
ក្រុម BLA ចោទប្រកាន់រដ្ឋាភិបាលសហព័ន្ធរបស់ប៉ាគីស្ថានថា បានកេងប្រវ័ញ្ចធនធានរ៉ែដ៏សម្បូរបែបនៃខេត្តដ៏ធំបំផុតមួយនេះ ដោយមិនឱ្យប្រជាជនក្នុងតំបន់ទទួលបានផលប្រយោជន៍។
សកម្មជនក្នុងតំបន់ ក៏បានទម្លាក់កំហុសលើកងកម្លាំងសន្តិសុខប៉ាគីស្ថាន ចំពោះការបាត់ខ្លួនដោយបង្ខំ ដែលការចោទប្រកាន់នេះ ត្រូវបានទីក្រុងអ៊ីស្លាម៉ាបាដបដិសេធ។
ខេត្ត Balochistan គ្របដណ្តប់លើផ្ទៃដីជិត ៤៤% នៃផ្ទៃដីសរុបរបស់ប្រទេស ដោយមានព្រំប្រទល់ជាប់នឹងប្រទេសអ៊ីរ៉ង់ និងអាហ្វហ្គានីស្ថាន ហើយគ្របដណ្តប់លើផ្នែកខ្លះនៃឆ្នេរសមុទ្រអារ៉ាប់។ វាគឺជាទីកន្លែងរស់នៅរបស់ប្រជាជនប្រហែល ៥% នៃប្រជាជនសរុបជាង ២៤០ លាននាក់ក្នុងប្រទេស។
ខេត្តនេះក៏ជាតំបន់ដែលសម្បូរធនធានធម្មជាតិបំផុតផងដែរ រួមមានហ្គាស និងរ៉ែផ្សេងៗ៕
