មេដឹកនាំកំពូលរបស់ប្រទេសអ៊ីរ៉ង់ លោក Ayatollah Ali Khamenei បានព្រមានថា រាល់ការវាយប្រហារណាមួយនឹងបង្កឱ្យមានជម្លោះក្នុងតំបន់ ខណៈដែលសហរដ្ឋអាមេរិកបន្តបង្កើនកម្លាំងទ័ពរបស់ខ្លួននៅក្បែរនោះ។
ទីភ្នាក់ងារសារព័ត៌មានពាក់កណ្តាលផ្លូវការ Tasnim បានដកស្រង់សម្តីលោក Khamenei ដែលបានថ្លែងថា៖ «ជនជាតិអាមេរិកគួរតែដឹងថា ប្រសិនបើពួកគេចាប់ផ្តើមសង្គ្រាម លើកនេះវានឹងក្លាយជាសង្គ្រាមក្នុងតំបន់»។
លោក Donald Trump បានលើកឡើងកាលពីពេលមុនថា ប្រទេសអ៊ីរ៉ង់កំពុងស្ថិតក្នុង «ការពិភាក្សាដ៏ធ្ងន់ធ្ងរ» ហើយលោកសង្ឃឹមថា វានឹងនាំទៅរកអ្វីមួយដែល «អាចទទួលយកបាន» ខណៈដែលមន្ត្រីសន្តិសុខកំពូលរបស់អ៊ីរ៉ង់ លោក Ali Larijani ក៏បាននិយាយផងដែរថា ក្របខ័ណ្ឌសម្រាប់ការចរចាកំពុងមានវឌ្ឍនភាព។
លោក Trump បានគំរាមធ្វើអន្តរាគមន៍លើប្រទេសអ៊ីរ៉ង់ ពាក់ព័ន្ធនឹងមហិច្ឆតានុយក្លេអ៊ែររបស់ខ្លួន និងបន្ទាប់ពីការបង្ក្រាបយ៉ាងសាហាវលើការតវ៉ាប្រឆាំងរដ្ឋាភិបាល។
ជាផ្នែកមួយនៃការបង្កើនកម្លាំងទ័ព សហរដ្ឋអាមេរិកបានបញ្ជូននាវាផ្ទុកយន្តហោះ USS Abraham Lincoln ទៅកាន់តំបន់នោះ ហើយកាលពីចុងសប្តាហ៍មុន បញ្ជាការដ្ឋានកណ្តាលរបស់សហរដ្ឋអាមេរិក បានឱ្យដឹងថា នាវានេះកំពុងធ្វើប្រតិបត្តិការនៅក្នុងសមុទ្រអារ៉ាប់។
លោក Khamenei បានបន្ថែមថា៖ «លោក Trump តែងតែនិយាយថា លោកបានបញ្ជូននាវាទាំងនោះមក ប៉ុន្តែប្រជាជាតិអ៊ីរ៉ង់ មិនត្រូវខ្លាចរឿងទាំងនេះឡើយ»។
អ៊ីរ៉ង់ត្រូវបានគេរំពឹងថា នឹងចាប់ផ្តើមសមយុទ្ធកងទ័ពជើងទឹកដោយប្រើគ្រាប់ពិតរយៈពេលពីរថ្ងៃនៅថ្ងៃ១កុម្ភៈ ក្នុងច្រកសមុទ្រ Hormuz ដែលជាផ្លូវនាវាចរណ៍ដ៏សំខាន់បំផុតមួយក្នុងពិភពលោក និងជាផ្លូវគន្លឹះសម្រាប់ការផ្គត់ផ្គង់ថាមពល។
ប្រហែលមួយភាគប្រាំនៃប្រេងដែលជួញដូរក្នុងពិភពលោក ឆ្លងកាត់តាមផ្លូវទឹកនេះ ដែលមានទទឹងប្រហែល ៣៣ គីឡូម៉ែត្រ (២១ ម៉ៃល៍) នៅត្រង់ចំណុចតូចបំផុតរវាងអ៊ីរ៉ង់ និងអូម៉ង់។ កាលពីមុន អ៊ីរ៉ង់ធ្លាប់បានគំរាមបិទច្រកសមុទ្រនេះ ប្រសិនបើខ្លួនរងការវាយប្រហារ។
សហរដ្ឋអាមេរិក បានព្រមានអ៊ីរ៉ង់ប្រឆាំងនឹង «អាកប្បកិរិយាមិនមានសុវត្ថិភាព និងមិនមានវិជ្ជាជីវៈ» ណាមួយនៅក្បែរកម្លាំងទ័ពរបស់ខ្លួនក្នុងតំបន់នោះ។
រដ្ឋមន្ត្រីការបរទេសអ៊ីរ៉ង់ លោក Abbas Araghchi បានឆ្លើយតបថា៖ «បច្ចុប្បន្ន កងទ័ពសហរដ្ឋអាមេរិកកំពុងព្យាយាមបង្គាប់បញ្ជាថា តើកងកម្លាំងប្រដាប់អាវុធដ៏មានអំណាចរបស់យើង គួរធ្វើការហ្វឹកហាត់បាញ់គោលដៅនៅក្នុងទឹកដីរបស់ខ្លួនដោយរបៀបណា»។
កាលពីថ្ងៃទី៣១ខែមករា ការផ្ទុះចំនួនពីរលើកក្នុងប្រទេសអ៊ីរ៉ង់ បានបង្កើនការព្រួយបារម្ភក្នុងប្រទេស។ អាជ្ញាធរមូលដ្ឋានបាននិយាយថា ការផ្ទុះទាំង២នេះ បានសម្លាប់មនុស្ស៥នាក់ និងរបួស ១៤ នាក់គឺបណ្តាលមកពីការលេចធ្លាយហ្គាស។ នេះបើយោងតាមសារព័ត៌មាន Tehran Times របស់អ៊ីរ៉ង់។
កាលពីថ្ងៃទី២៩ខែមករា លោក Trump បាននិយាយថា លោកបានប្រាប់អ៊ីរ៉ង់ថា អ៊ីរ៉ង់ត្រូវធ្វើរឿងពីរយ៉ាង ដើម្បីចៀសវាងសកម្មភាពយោធារបស់សហរដ្ឋអាមេរិក៖ «ទីមួយ មិនត្រូវមាននុយក្លេអ៊ែរ និងទីពីរ បញ្ឈប់ការសម្លាប់ក្រុមអ្នកតវ៉ា»។
ទីភ្នាក់ងារព័ត៌មានសកម្មជនសិទ្ធិមនុស្ស (HRANA) ដែលមានមូលដ្ឋាននៅសហរដ្ឋអាមេរិក និយាយថា ខ្លួនបានបញ្ជាក់ពីការសម្លាប់មនុស្សច្រើនជាង ៦,៣០០ នាក់ ចាប់តាំងពីភាពចលាចលបានចាប់ផ្តើមនៅចុងខែធ្នូ ហើយកំពុងស៊ើបអង្កេតលើរបាយការណ៍អ្នកស្លាប់ចំនួន ១៧,០០០ នាក់ផ្សេងទៀត។
ក្រុមមួយទៀត គឺអង្គការសិទ្ធិមនុស្សអ៊ីរ៉ង់ (IHR) ដែលមានមូលដ្ឋាននៅប្រទេសន័រវែស បានព្រមានថា ចំនួនអ្នកស្លាប់ចុងក្រោយអាចលើសពី ២៥,០០០ នាក់៕
