ក្រុមអ្នកតស៊ូមតិកម្ពុជា (ហៅកាត់ថា CAT) នៅថ្ងៃទី២ ខែកុម្ភៈ បានចេញផ្សាយសេចក្តីវិភាគផ្លូវច្បាប់មួយ ដោយអះអាងថា ការបញ្ជូនខ្លួនលោក ចេន ហ្ស៊ី ទៅកាន់ប្រទេសចិន គឺជាសកម្មភាពដែលរំលោភលើរដ្ឋធម្មនុញ្ញ និងច្បាប់ជាធរមានរបស់កម្ពុជាយ៉ាងធ្ងន់ធ្ងរ។
ការចេញមុខមកប្រតិកម្មនេះ ធ្វើឡើងបន្ទាប់ពីក្រសួងការបរទេសកម្ពុជា បានចេញសេចក្តីបំភ្លឺ កាលពីថ្ងៃទី២៦ ខែមករា ឆ្នាំ២០២៦ ដោយការពារថាការបញ្ជូនខ្លួននេះ គឺជាការអនុវត្តច្បាប់យ៉ាងម៉ឺងម៉ាត់ ប៉ុន្តែក្រុមអ្នកតស៊ូមតិយល់ឃើញថា នេះគឺជាការបំភាន់មតិសាធារណៈ និងជាការលាក់បាំងអាថ៌កំបាំងដែលរដ្ឋាភិបាលព្យាយាមបិទបាំង ។
ផ្អែកតាមការពិនិត្យលើសេចក្តីបំភ្លឺរបស់រដ្ឋាភិបាល ក្រុមអ្នកតស៊ូមតិ បានរកឃើញថា ការបណ្តេញចេញដែលយោងតាមការប្តេជ្ញាចិត្តរវាងកម្ពុជា និងចិន បង្ហាញថា រដ្ឋាភិបាលឱ្យតម្លៃលើកិច្ចសន្យាជាមួយបរទេសធំជាងច្បាប់ និងរដ្ឋធម្មនុញ្ញរបស់ជាតិខ្លួនឯង។ តាមច្បាប់កំពូលនៃព្រះរាជាណាចក្រកម្ពុជា ពលរដ្ឋគ្រប់រូបមានសិទ្ធិការពារខ្លួនតាមផ្លូវច្បាប់ ហើយការបញ្ជូនខ្លួនចេញភ្លាមៗបែបនេះ ធ្វើឱ្យសិទ្ធិទទួលបានការការពារត្រូវបាត់បង់ទាំងស្រុង និងជាការកម្ទេចភស្តុតាងក្នុងការរកការពិតនៃបទល្មើសដែលកើតឡើងក្នុងប្រទេសកម្ពុជា។
ចំពោះការលើកឡើងរបស់រដ្ឋាភិបាល ស្ដីពី ការដកហូតសញ្ជាតិដោយសារការបន្លំព័ត៌មាន ក្រុមអ្នកតស៊ូមតិ បានបកស្រាយថា រដ្ឋាភិបាលមិនមានតួនាទីជាអ្នកសម្រេចថាបុគ្គលណាម្នាក់បន្លំ ឬមិនបន្លំនោះទេ ព្រោះអំណាចក្នុងការសម្រេចសេចក្តី និងបញ្ជាក់ពីភាពត្រឹមត្រូវនៃព័ត៌មាន គឺជាសមត្ថកិច្ចដាច់ដោយឡែករបស់តុលាការ មិនមែនជាការចោទប្រកាន់ឯកតោភាគីដោយអំណាចនីតិប្រតិបត្តិនោះឡើយ។
ក្នុងន័យនេះ លោក ចេន ហ្ស៊ី ទទួលបានសញ្ជាតិខ្មែរតាមព្រះរាជក្រឹត្យ និងមានតួនាទីជាទីប្រឹក្សាថ្នាក់ដឹកនាំកំពូលៗ ដូចជា លោក ហ៊ុន សែន និងលោក ហ៊ុន ម៉ាណែត ដែលការដកហូតសញ្ជាតិត្រូវឆ្លងកាត់នីតិវិធីតុលាការជាមុនសិន។
ជាមួយគ្នានេះដែរ ក្រុមអ្នកតស៊ូមតិ សង្កេតឃើញថា លោក ចេន ហ្ស៊ី មានឋានៈខ្ពស់ស្មើរដ្ឋមន្ត្រី និងមានសកម្មភាពសង្គមសេដ្ឋកិច្ចយ៉ាងទូលំទូលាយ ដែលបង្ហាញថាទំនាក់ទំនងរបស់លោកជាមួយថ្នាក់ដឹកនាំ គឺជាទំនាក់ទំនងពិសេស និងអាថ៌កំបាំង ដែលអាចសន្និដ្ឋានបានថា លោក ចេន ហ្ស៊ី គឺជាភ្នាក់ងារបរទេសដែលដើរតួជាស្ពានចម្លងប្រភពទុនពីប្រទេសចិនមកកាន់កម្ពុជា ឬសូម្បីតែជាភ្នាក់ងារតំណាងក្នុងកិច្ចព្រមព្រៀងអនុញ្ញាតឱ្យជនជាតិចិន មករស់នៅកម្ពុជាក្នុងចំនួនដ៏ច្រើនលើសលប់ ។
ការរំលោភបំពានអំណាចនេះ ក៏ត្រូវបានឆ្លុះបញ្ចាំងតាមរយៈការរំលងមាត្រា៥១ នៃរដ្ឋធម្មនុញ្ញ ស្តីពីការបែងចែកអំណាចរវាងនីតិបញ្ញត្តិ នីតិប្រតិបត្តិ និងតុលាការ។ ក្រុមអ្នកតស៊ូមតិ បានលើកឡើងជាសំណួរផ្លូវច្បាប់ថា តើការបញ្ជូនខ្លួនតាមយន្តហោះចិននេះ ផ្អែកលើមូលដ្ឋានច្បាប់អ្វី ហើយសកម្មភាពនេះហាក់ដូចជាការបំបាត់ភស្តុតាងនៃឧក្រិដ្ឋកម្មបច្ចេកវិទ្យា និងការលាងសម្អាតប្រាក់ ដែលធ្វើឱ្យកម្ពុជាមិនអាចរកការពិតឃើញ ។
ក្រុមអ្នកតស៊ូមតិ មានការសង្ស័យថា ករណីនេះ ពាក់ព័ន្ធនឹងកិច្ចព្រមព្រៀងនយោបាយ និងសេដ្ឋកិច្ចរវាងគណបក្សប្រជាជនកម្ពុជា និងបក្សកុម្មុយនីស្តចិន ដោយការបញ្ជូនលោក ចេន ហ្ស៊ី ចេញដោយបង្ខំ និងប្រញាប់ប្រញាល់ គឺជាវិធីតែមួយគត់ ដើម្បីបិទបាំងដានស៊ើបអង្កេតរបស់តុលាការ ដែលអាចនឹងនាំឱ្យរកឃើញការពិតពាក់ព័ន្ធនឹងថ្នាក់ដឹកនាំកំពូលៗក្នុងសំណុំរឿងថ្នាក់ជាតិ។
ក្រុមអ្នកតស៊ូមតិ បញ្ជាក់ថា ពួកគេមិនការពារជនល្មើសឡើយ ប៉ុន្តែផ្តល់ការវិភាគតាមជ្រុងច្បាប់ ដើម្បីជាកញ្ចក់ឆ្លុះបញ្ចាំងពីតថភាពសង្គម ក្រោមរបបគ្រប់គ្រងបច្ចុប្បន្ន។
គិតមកទល់ពេលនេះ តុលាការប្រទេសចិន នៅមិនទាន់កាត់ទោសមេខ្លោងឧក្រិដ្ឋកម្មឆបោកតាមប្រព័ន្ធអនឡាញ គឺលោក ចេន ហ្ស៊ី នៅឡើយទេ ខណៈសហគមន៍ជាតិ និងអន្តរជាតិ កំពុងរង់ចាំមើលនីតិវិធី ដ្បិតករណីនេះមានជាប់ពាក់ព័ន្ធនឹងក្រុមមនុស្សជាច្រើន ក្នុងនោះក៏មានមន្ត្រីរដ្ឋាភិបាល និងអ្នកជំនួញគ្រាក់ៗនៅកម្ពុជាផងដែរ៕
