កម្ពុជាបានបើកប្រតិបត្តិការឆ្មក់បង្ក្រាបទ្រង់ទ្រាយធំមួយលើក្រុមឧក្រិដ្ឋជនឆបោក ដោយបានឃាត់ខ្លួនមនុស្សជាង ២០០០នាក់ ចំពេលមានសម្ពាធពីប្រទេសចិនឱ្យបង្ក្រាបលើឧស្សាហកម្មឆបោកតាមប្រព័ន្ធអនឡាញ។
យោងតាមក្រសួងមហាផ្ទៃកម្ពុជា ជនជាតិចិនជិត ១ ៨០០នាក់ ស្ថិតក្នុងចំណោមអ្នកដែលត្រូវបានឃាត់ខ្លួនទាំងនោះ។
សេចក្តីថ្លែងការណ៍របស់ក្រសួង បានឱ្យដឹងថា កងកម្លាំងនគរបាលកម្ពុជា បានបើកប្រតិបត្តិការអនុវត្តច្បាប់ក្នុងទ្រង់ទ្រាយធំ កាលពីព្រឹកថ្ងៃទី៣១ ខែមករា នៅទីតាំងឆបោកតាមប្រព័ន្ធអនឡាញមួយក្នុងក្រុងបាវិត ដែលជាក្រុងធំបំផុតនៅក្នុងខេត្តស្វាយរៀង ភាគអាគ្នេយ៍នៃប្រទេស ជាប់ព្រំដែនជាមួយវៀតណាម។
ជនបរទេសសរុបចំនួន ២ ០៤៤ នាក់ ត្រូវបានឃាត់ខ្លួន ក្នុងនោះមាន ១ ៧៩២ នាក់មកពីចិនដីគោក ៥ នាក់មកពីតៃវ៉ាន់ និង ១៧៧ នាក់មកពីវៀតណាម។
ក្រសួងបានបន្តថា ក្នុងនោះមានជនជាតិមីយ៉ាន់ម៉ាចំនួន ១៧៩ នាក់ទៀត ខណៈដែលអ្នកនៅសេសសល់មានប្រភពមកពីបណ្តាប្រទេសជិតខាងក្នុងតំបន់អាស៊ីអាគ្នេយ៍ និងអាស៊ីខាងត្បូង។
សេចក្តីថ្លែងការណ៍ មិនបានបញ្ជាក់ថា តើកម្ពុជាមានបំណងធ្វើបត្យាប័នជនសង្ស័យបរទេសទាំងនោះ ទៅកាន់ប្រទេសកំណើតរបស់ពួកគេវិញឬយ៉ាងណានោះទេ។
ទោះជាយ៉ាងណាក៏ដោយ ជនជាតិចិនត្រូវបានគេរំពឹងថានឹងត្រូវប្រគល់ទៅឱ្យទីក្រុងប៉េកាំង ដូចករណីមេក្លោងឧក្រិដ្ឋកម្មតាមអ៊ីនធឺណិត លោក Chen Zhi ស្ថាបនិក និងជាប្រធានក្រុមហ៊ុន Prince Holding Group ដែលត្រូវបានបញ្ជូនត្រឡប់ទៅវិញកាលពីដើមខែមករា។
លោក Chen ត្រូវបានចោទប្រកាន់ពីសកម្មភាពខុសច្បាប់ផ្សេងៗ រួមមាន ការបើកកាស៊ីណូ ការឆបោក ប្រតិបត្តិការខុសច្បាប់ និងការលាក់បាំងផលនៃបទល្មើស។
សារព័ត៌មាន Cambodia China Times បានរាយការណ៍កាលពីយប់ថ្ងៃទី៣១ខែមករាថា ការឆ្មក់បង្ក្រាបនៅក្រុងបាវិតនេះ គឺជា «ប្រតិបត្តិការដ៏ធំបំផុត» ចាប់តាំងពីកម្ពុជាបានចាប់ផ្តើមយុទ្ធនាការបង្ក្រាបការឆបោកតាមអនឡាញទូទាំងប្រទេសនាពេលថ្មីៗនេះ។
អ្នកនាំពាក្យក្រសួងមហាផ្ទៃ លោក ទូច សុខៈ បានលើកឡើងកាលពីថ្ងៃទី១ខែកុម្ភៈថា៖ «នេះពិតជាឆ្លុះបញ្ចាំងឱ្យឃើញថា រាជរដ្ឋាភិបាលកម្ពុជានឹងមិនបន្ធូរបន្ថយការបង្ក្រាបលើឧក្រិដ្ឋជនឆបោកតាមអនឡាញឡើយ»។
លោកបានកត់សម្គាល់ថា កម្ពុជា «មិនមែនជាឋានសួគ៌ប្រកបដោយសុវត្ថិភាពនោះទេ ប៉ុន្តែគឺជាឋាននរកសម្រាប់ក្រុមឧក្រិដ្ឋជន»។
ទីតាំងនៅក្នុងក្រុងបាវិតនោះ រួមមានអគារចំនួន ២២ និងបានដំណើរការក្រោមរូបភាពជាកាស៊ីណូ។ តាមសេចក្តីរាយការណ៍ ទីតាំងនេះត្រូវបានប្រើប្រាស់សម្រាប់សកម្មភាពខុសច្បាប់ជាយូរមកហើយ រួមមាន ការឆបោកតាមប្រព័ន្ធទូរគមនាគមន៍ និងតាមអនឡាញ។
សកម្មភាពបង្ក្រាបក្នុងពេលដំណាលគ្នាដែលកំណត់គោលដៅលើសកម្មភាពខុសច្បាប់ទាំងនេះ ក៏ត្រូវបានធ្វើឡើងនៅក្នុងតំបន់ជាច្រើនទៀតផងដែរ រួមទាំងខេត្តព្រះសីហនុ ដែលស្ថិតនៅចម្ងាយប្រហែល ២៥០ គីឡូម៉ែត្រ ភាគនិរតីនៃរាជធានីភ្នំពេញ។
យោងតាមសារព័ត៌មាន Cambodia China Times ការបង្ក្រាបយ៉ាងខ្លាំងក្លានេះ បានធ្វើឱ្យទីតាំងឆបោកមួយចំនួនសម្រេចចិត្តបិទទ្វារដោយខ្លួនឯង ខណៈដែលអ្នកពាក់ព័ន្ធបានចាកចេញពីតំបន់នោះ។
រាជរដ្ឋាភិបាលកម្ពុជាបានពង្រឹងការបង្ក្រាបលើបទល្មើសពាក់ព័ន្ធនឹងការឆបោក ចាប់តាំងពីខែមុនមក ដែលជាវិធានការមួយជំរុញដោយផ្នែកខ្លះពីសម្ពាធរបស់ប្រទេសចិន៕
