សាច់ញាតិអតីតប្រធានគណបក្សកម្លាំងជាតិ លោក ស៊ុន ចន្ធី ឱ្យដឹងថា តុលាការក្រុងភ្នំពេញ គ្រោងនឹងបើកសវនាការជំនុំជម្រះលើសំណុំរឿងថ្មីមួយទៀត របស់អ្នកនយោបាយរូបនេះ នៅពាក់កណ្តាលខែកុម្ភៈ ឆ្នាំ២០២៦នេះ ដែលត្រូវបានចោទប្រកាន់ពីបទ រួមគំនិតក្បត់។
លោក ស៊ុន ចន្ធី ត្រូវបានសមត្ថកិច្ចចាប់ខ្លួនភ្លាមៗកាលពីថ្ងៃទី០៩ ខែឧសភា ឆ្នាំ២០២៤ នៅព្រលានយន្តហោះអន្តរជាតិភ្នំពេញ ក្រោយលោកត្រឡប់មកពីប្រទេសជប៉ុនវិញ ក្រោយលោកបានបញ្ចេញមតិរិះគន់រដ្ឋាភិបាល ក្នុងការចែកប័ណ្ណក្រីក្រ ថាមានការរើសអើង។
ក្រោយមកនៅថ្ងៃទី២៦ ខែធ្នូ ឆ្នាំ២០២៤ សាលាដំបូងរាជធានីភ្នំពេញ បានសម្រេចផ្តន្ទាទោសដាក់ពន្ធនាគារអតីតប្រធានគណបក្សកម្លាំងជាតិរូបនេះ ចំនួន ២ឆ្នាំ និងពិន័យជាប្រាក់ចំនួន ១ពាន់ដុល្លារ និងដកសិទ្ធិទាំងស្រុងពីការបោះឆ្នោត នៅក្នុងបទចោទប្រកាន់ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
ភរិយាលោក ស៊ុន ចន្ធី គឺអ្នកស្រី យាន ស្រីយ៉ាន បានលើកឡើងនៅក្នុងទំព័រហ្វេសប៊ុករបស់ខ្លួននៅថ្ងៃទី០២ខែកុម្ភៈថា អ្នកស្រីបានទទួលដំណឹងថ្មីបន្ថែមពីមេធាវីការពារក្តីឱ្យស្វាមីរបស់អ្នកស្រី ពីរឿងក្តីថ្មីមួយទៀត ដែលផ្ទេរមកពីសាលាដំបូងខេត្តកំពង់ធំ ដោយតុលាការចោទប្រកាន់ពីបទ រួមគំនិតក្បត់ ហើយសាលាដំបូងរាជធានីភ្នំពេញ នឹងបើកសវនាការជំនុំជម្រះនៅថ្ងៃទី១២ ខែកុម្ភៈ ឆ្នាំ២០២៦ខាងមុខនេះ។
អ្នកស្រីបានសរសេរក្នុងន័យថាដើមបន្ថែមថា៖ «គ្រួសារខ្ញុំបានក្បត់អ្វី?»។ អ្នកស្រីបន្តថា៖ «មើលទៅប្រុងដាក់គុកប្តីខ្ញុំ រហូតដល់កូនប្រុសខ្ញុំពេញកំលោះទេដឹងលោកព្រះ យូរៗទៅខ្ញុំដូចជាអស់សំណើចទៅវិញ ហួសថ្លែងគ្រប់រឿង»។
អ្នកស្រី យាន ស្រីយ៉ាន ធ្លាប់បានលើកឡើងដែរថា អ្នកនយោបាយបក្សប្រឆាំង សំណុំរឿងចាស់មិនទាន់ចប់ ចូលរឿងថ្មីបន្តដូចរឿងភាគ។ ហើយយុត្តិធម៌នឹងមាននៅពេលប្រទេសកម្ពុជា មានលទ្ធិប្រជាធិបតេយ្យពេញលេញ។
លោក ជូង ជូងី មេធាវីការពារក្តីលោក ស៊ុន ចន្ធី មិនអាចសុំការបញ្ជាក់បន្ថែមបានទេ នៅថ្ងៃទី០៣ ខែកុម្ភៈនេះ៕
