ប្រធានាធិបតីអ៊ុយក្រែន លោក Volodymyr Zelensky បានមានប្រសាសន៍ថា ក្រុមការងារជួសជុលជាង ២០០ក្រុម កំពុងធ្វើការដើម្បីស្ដារប្រព័ន្ធអគ្គិសនីឡើងវិញក្នុងទីក្រុងគៀវ បន្ទាប់ពីមានការវាយប្រហារយ៉ាងខ្លាំងក្លាពីសំណាក់រុស្ស៊ី ដែលបានកំណត់គោលដៅលើវិស័យថាមពលរបស់ប្រទេសនេះ។
លោក Zelensky បានបន្តថា អគារស្នាក់នៅជាង ១ ១០០ ខ្នង នៅក្នុងរដ្ឋធានី នៅតែមិនទាន់មានអគ្គិសនីប្រើប្រាស់នៅឡើយទេ ហើយលោកបានពិភាក្សាជាមួយមន្ត្រីនានា អំពីការគាំទ្រដល់សហគមន៍នៅក្នុងតំបន់រងគ្រោះផ្សេងទៀតនៃប្រទេស។
ថ្មីៗនេះ រុស្ស៊ីបានចាប់ផ្ដើមធ្វើការវាយប្រហារជាថ្មីឡើងវិញ បន្ទាប់ពីការផ្អាករយៈពេលមួយសប្តាហ៍ដែលប្រធានាធិបតីអាមេរិក លោក Donald Trump បានស្នើសុំឱ្យលោក Vladimir Putin អនុវត្ត ខណៈដែលភាពត្រជាក់ខ្លាំងបានវាយលុកពាសពេញប្រទេសអ៊ុយក្រែន។
ទន្ទឹមនឹងនេះ មន្ត្រីអាមេរិក អ៊ុយក្រែន និងរុស្ស៊ី កំពុងជួបប្រជុំគ្នាម្តងទៀតនៅក្នុងទីក្រុង Abu Dhabi ដើម្បីពិភាក្សាអំពីព័ត៌មានលម្អិតនៃផែនការសន្តិភាព។
«គិតត្រឹមថ្ងៃនេះ ស្ថានភាពដែលលំបាកបំផុតគឺស្ថិតនៅក្នុងទីក្រុងគៀវ និងតំបន់ជុំវិញ, ខេត្ត Kharkiv និងតំបន់ជុំវិញ, ខេត្ត Sumy និងខេត្ត Poltava» នេះជាអ្វីដែលលោក Zelensky បានសរសេរនៅលើបណ្តាញសង្គមនាថ្ងៃទី៤ខែកុម្ភៈ។
លោកថា៖ «វាក៏មានការលំបាកផងដែរនៅក្នុងផ្នែកផ្សេងទៀតនៃភាគកណ្តាលអ៊ុយក្រែន រួមមាន ខេត្ត Dnipro និងខេត្ត Cherkasy »។
លោកបានបន្ថែមថា ក្រុមការងារជួសជុលបន្ថែមទៀត នឹងត្រូវបញ្ជូនមកជួយស្ដារថាមពលអគ្គិសនីឡើងវិញ «ដើម្បីធានាឱ្យមានការប្តូរវេនត្រឹមត្រូវសម្រាប់សមាជិកក្រុមការងារ – ព្រោះពួកគាត់មានការនឿយហត់យ៉ាងខ្លាំង»។
អាជ្ញាធរបានបង្កើតមជ្ឈមណ្ឌលនានានៅជុំវិញទីក្រុង សម្រាប់ឱ្យប្រជាជនមកកំដៅខ្លួន។ ពួកគេក៏កំពុងនាំចូលម៉ាស៊ីនភ្លើងបន្ថែមទៀត ដើម្បីទប់ទល់នឹងរយៈពេលដាច់ភ្លើងយូរ ខណៈដែលវិស្វករព្យាយាមជួសជុលការខូចខាត។
នៅក្នុងទីក្រុង Kharkiv ភាគខាងកើត រោងចក្រអគ្គិសនីមួយកន្លែងត្រូវបានខូចខាតយ៉ាងធ្ងន់ធ្ងរ រហូតមិនអាចជួសជុលបានឡើយ។
រដ្ឋមន្ត្រីក្រសួងថាមពលអ៊ុយក្រែន លោក Denys Shmyhal បានមានប្រសាសន៍ថា ប្រព័ន្ធថាមពលរបស់ប្រទេសនឹងត្រូវចំណាយពេលមួយរយៈដើម្បីជួសជុល ក្នុងនោះរួមមានរោងចក្រផលិតកម្ដៅ និងអគ្គិសនីរួមគ្នា (CHP) Darnytsia ក្នុងទីក្រុងគៀវ ដែលលោក Shmyhal បានបញ្ជាក់ថា បានរង«ការខូចខាតយ៉ាងធ្ងន់ធ្ងរ»។
នាយករដ្ឋមន្ត្រីអង់គ្លេស លោក Keir Starmer បានមានប្រសាសន៍ថា ការវាយប្រហាររបស់រុស្ស៊ីលើវិស័យថាមពលរបស់អ៊ុយក្រែន កាលពីយប់ថ្ងៃទី២ខែកុម្ភៈ ខណៈដែលសីតុណ្ហភាពធ្លាក់ចុះដល់ -20 អង្សាសេ គឺជាទង្វើ «សាហាវយង់ឃ្នង» និង «ថោកទាបជាទីបំផុត»។
លោកបានធ្វើការអត្ថាធិប្បាយបែបនេះ បន្ទាប់ពីការសន្ទនាតាមទូរស័ព្ទជាមួយ លោក Trump ប៉ុន្មានម៉ោងក្រោយពីរុស្ស៊ីបានវាយប្រហារលើរោងចក្រអគ្គិសនី និងហេដ្ឋារចនាសម្ព័ន្ធសំខាន់ៗក្នុងទីក្រុងគៀវ និងកន្លែងផ្សេងទៀត។
លោក Trump បានប្រាប់អ្នកយកព័ត៌មានថា លោក Putin បាន «រក្សាសម្តីរបស់គាត់» ចំពោះការផ្អាកវាយប្រហាររយៈពេលមួយសប្តាហ៍។
នៅពេលត្រូវបានសួរថា តើលោកមានការខកចិត្តចំពោះការវាយប្រហារសារជាថ្មីរបស់រុស្ស៊ីដែរឬទេ លោក Trump បានឆ្លើយថា កិច្ចព្រមព្រៀងនោះ «គឺនៅថ្ងៃអាទិត្យ ហើយគាត់ [Putin] បានអនុវត្តពីថ្ងៃអាទិត្យ ដល់ថ្ងៃអាទិត្យ»។
លោកបន្តថា៖ «វាច្រើនណាស់ ដឹងទេ រយៈពេលមួយសប្តាហ៍ យើងទទួលយកអ្វីដែលយើងអាចធ្វើបាន ពីព្រោះនៅទីនោះពិតជាត្រជាក់ខ្លាំងណាស់»។
ប្រធានាធិបតីអាមេរិករូបនេះ បាននិងកំពុងដឹកនាំកិច្ចខិតខំប្រឹងប្រែងដើម្បីបញ្ចប់សង្គ្រាម ប៉ុន្តែសមភាគីរុស្ស៊ីរបស់លោក បានបដិសេធការអំពាវនាវឱ្យមានការឈប់បាញ់។
កងទ័ពអាកាសអ៊ុយក្រែន បានឱ្យដឹងថា ខ្លួនត្រូវបានវាយប្រហារដោយដ្រូនជាង ១០០ គ្រឿង កាលពីព្រឹកព្រលឹមថ្ងៃទី៤ខែកុម្ភៈ។ ខណៈពេលដែលពួកគេបានស្ទាក់ចាប់បានភាគច្រើន ក៏មានសេចក្តីរាយការណ៍អំពីការវាយប្រហារដោយដ្រូនចំគោលដៅចំនួន ១៤ កន្លែង រួមជាមួយការធ្លាក់កម្ទេចកំទីផងដែរ។ ការវាយប្រហារនេះ បានបណ្តាលឱ្យមនុស្សយ៉ាងហោចណាស់៧នាក់ស្លាប់៕
