ប្រធានាធិបតីចិន លោក Xi Jinping និងប្រធានាធិបតីរុស្ស៊ី លោក Vladimir Putin បានលើកសរសើរពីចំណងទាក់ទងរវាងប្រទេសទាំងពីរ ក្នុងអំឡុងពេលនៃការសន្ទនាតាមវីដេអូនានាថ្ងៃទី៤ខែកុម្ភៈ ដែលត្រូវបានធ្វើឡើងនៅមុនការឈានចូលមកដល់នៃខួបលើកទីបួន នៃសង្គ្រាមឈ្លានពានរបស់ទីក្រុងមូស្គូលើប្រទេសអ៊ុយក្រែន។
នៅក្នុងការផ្សាយរបស់ទូរទស្សន៍រដ្ឋរុស្ស៊ី អំពីកិច្ចពិភាក្សានេះ លោក Putin បានមានប្រសាសន៍ថា ទំនាក់ទំនងទីក្រុងមូស្គូ-ទីក្រុងប៉េកាំង គឺជាកត្តាស្ថិរភាពដ៏សំខាន់មួយក្នុងអំឡុងពេលដែលពិភពលោក កំពុងមានភាពវឹកវរកើនឡើង ហើយលោកបានកោតសរសើរចំពោះភាពជាដៃគូថាមពលដ៏ជិតស្និទ្ធរបស់ប្រទេសទាំងពីរថា ជាយុទ្ធសាស្ត្រ និងផ្ដល់ផលប្រយោជន៍ឱ្យគ្នាទៅវិញទៅមក។
លោក Xi ដែលបានថ្លែងតាមរយៈអ្នកបកប្រែ បានអំពាវនាវឱ្យប្រទេសទាំងពីររៀបចំ «ផែនការដ៏អស្ចារ្យ» ដើម្បីបន្តពង្រឹងទំនាក់ទំនងទ្វេភាគី ដែលលោកបានបញ្ជាក់ថា កំពុងបោះជំហានទៅមុខក្នុងទិសដៅដ៏ត្រឹមត្រូវ។
យោងតាមការដកស្រង់សម្តីដោយស្ថានីយទូរទស្សន៍រដ្ឋចិន CCTV លោក Xi បានមានប្រសាសន៍ថា៖ «ភាគីទាំងពីរគួរតែចាប់យកឱកាសប្រវត្តិសាស្ត្រនេះ រក្សាការផ្លាស់ប្តូរកម្រិតខ្ពស់ឱ្យបានជិតស្និទ្ធ និងពង្រឹងកិច្ចសហប្រតិបត្តិការជាក់ស្តែងលើវិស័យផ្សេងៗ»។
ចិន និងរុស្ស៊ី បានប្រកាសពីភាពជាដៃគូយុទ្ធសាស្ត្រ «គ្មានដែនកំណត់» ប៉ុន្មានថ្ងៃមុនពេល លោក Putin បញ្ជូនកងទ័ពរាប់ម៉ឺននាក់ ចូលទៅក្នុងប្រទេសអ៊ុយក្រែន កាលពីខែកុម្ភៈ ឆ្នាំ២០២២។
ចាប់តាំងពីពេលនោះមក ប្រទេសចិន បានក្លាយជាខ្សែជីវិតសេដ្ឋកិច្ចសម្រាប់រុស្ស៊ី តាមរយៈការបង្កើនពាណិជ្ជកម្មជាមួយអ្នកជិតខាងភាគខាងជើងរបស់ខ្លួន ខណៈដែលមហាអំណាចលោកខាងលិចបានដាក់ទណ្ឌកម្មយ៉ាងធ្ងន់ធ្ងរលើទីក្រុងមូស្គូ។
ជំនួយការវិមានក្រឹមឡាំង លោក Yuri Ushakov បានមានប្រសាសន៍ថា លោក Putin និងលោក Xi បានជជែកគ្នាអស់រយៈពេល ១ ម៉ោង និង ២៥ នាទី ហើយលោក Putin បានទទួលយកការអញ្ជើញឱ្យទៅបំពេញទស្សនកិច្ចនៅប្រទេសចិន ក្នុងឆមាសទីមួយនៃឆ្នាំនេះ។
លោក Ushakov បានមានប្រសាសន៍ថា មេដឹកនាំទាំងពីរបានព្រមព្រៀងគ្នាលើការពង្រីកពាណិជ្ជកម្ម រួមទាំងក្នុងវិស័យថាមពលផងដែរ ហើយជំហររបស់រុស្ស៊ី និងចិនគឺមានភាពជិតស្និទ្ធ ឬស្របគ្នាលើបញ្ហាអន្តរជាតិភាគច្រើន។
លោក Xi និងលោក Putin បានជួបគ្នាលើកចុងក្រោយនៅទីក្រុងប៉េកាំង នៅពេលដែលប្រទេសចិនបានរៀបចំក្បួនព្យុហយាត្រាយោធាដ៏ធំមួយកាលពីខែកញ្ញា ដែលមានការចូលរួមពីមេដឹកនាំកូរ៉េខាងជើង លោក Kim Jong Un ផងដែរ។
ក្នុងអំឡុងជំនួបនោះ លោក Xi បានមានប្រសាសន៍ថា ទំនាក់ទំនងចិន-រុស្ស៊ី បាន «ស៊ូទ្រាំនឹងភាពចលាចលអន្តរជាតិ» ហើយបានសន្យាថានឹងសម្របសម្រួលជាមួយទីក្រុងមូស្គូលើបញ្ហានានា ដែលពាក់ព័ន្ធនឹងផលប្រយោជន៍ស្នូលរបស់ពួកគេ។
អ៊ុយក្រែន និងសហភាពអឺរ៉ុប បានចោទប្រកាន់ទីក្រុងប៉េកាំងថាបានផ្តល់ជំនួយយោធាដោយផ្ទាល់ ដល់កិច្ចខិតខំប្រឹងប្រែងសង្គ្រាមរបស់រុស្ស៊ី។ ទីក្រុងប៉េកាំង បានបដិសេធការចោទប្រកាន់នេះ ដោយលើកឡើងថាខ្លួនមិនមែនជាភាគីនៃជម្លោះនោះឡើយ។
ការសន្ទនាតាមទូរស័ព្ទកាលពីថ្ងៃទី៤ខែកុម្ភៈនេះ ត្រូវបានធ្វើឡើងចំពេលដែលសន្ធិសញ្ញាកាត់បន្ថយអាវុធនុយក្លេអ៊ែររវាងរុស្ស៊ី និងសហរដ្ឋអាមេរិក នឹងត្រូវផុតកំណត់នៅសប្តាហ៍នេះ។
កាលពីថ្ងៃទី៣ខែកុម្ភៈ ក្រុមអ្នកការទូតជាន់ខ្ពស់ចិន និងរុស្ស៊ី បានជួបគ្នានៅទីក្រុងប៉េកាំង ដើម្បីពិភាក្សាអំពីស្ថានភាពសន្តិសុខពិភពលោក ការគ្រប់គ្រងអាវុធពហុភាគី និងបញ្ហាផ្សេងៗទៀត ហើយបានឈានដល់ «ការឯកភាពគ្នាយ៉ាងទូលំទូលាយ»។ នេះបើយោងតាមក្រសួងការបរទេសចិន៕
