តំណាងពាណិជ្ជកម្មរបស់ប្រធានាធិបតីសហរដ្ឋអាមេរិក បានទទូចថា គោលនយោបាយពន្ធគយរបស់លោក ដូណាល់ ត្រាំ “មិនមានការផ្លាស់ប្តូរទេ” បើទោះបីជាតុលាការកំពូលបានសម្រេចកាលពីថ្ងៃទី២០ខែកុម្ភៈ ឱ្យលុបចោលនូវសម្អាងហេតុផ្លូវច្បាប់មួយ ដែលលោក ត្រាំ បានប្រើប្រាស់ដើម្បីដាក់ពន្ធគយជាច្រើនយ៉ាងណាក្តី។
លោក Jamieson Greer តំណាងពាណិជ្ជកម្មសហរដ្ឋអាមេរិក បានមានប្រសាសន៍ក្នុងបទសម្ភាសន៍ជាមួយសារព័ត៌មាន ABC News កាលពីថ្ងៃទី២២ខែកុម្ភៈថា៖ «ឧបករណ៍ផ្លូវច្បាប់ដើម្បីអនុវត្តវា—អាចនឹងផ្លាស់ប្តូរ ប៉ុន្តែគោលនយោបាយមិនបានផ្លាស់ប្តូរទេ»។
ពន្ធគយ គឺជាពន្ធលើទំនិញនាំចូល។ ពន្ធនេះ ត្រូវបានបង់ជូនរដ្ឋាភិបាលដោយក្រុមហ៊ុនទាំងឡាយណា ដែលនាំចូលផលិតផលបរទេស។
តុលាការកំពូល បានសម្រេចថា លោក ត្រាំ បានប្រើប្រាស់អំណាចហួសដែនកំណត់ ចំពោះការប្រើប្រាស់ឧបករណ៍ជាក់លាក់មួយ ដើម្បីដាក់ចេញនូវកម្មវិធីពន្ធគយជាសកលដ៏ទូលំទូលាយកាលពីខែមេសាកន្លងទៅ។
សេចក្តីសម្រេចនេះ អនុវត្តចំពោះតែការប្រើប្រាស់ច្បាប់ស្តីពីអំណាចសេដ្ឋកិច្ចក្នុងគ្រាអាសន្នអន្តរជាតិឆ្នាំ១៩៧៧ (IEEPA) របស់លោក ត្រាំ ប៉ុណ្ណោះ ដែលច្បាប់នេះជាមូលដ្ឋានគ្រឹះនៃពន្ធគយភាគច្រើនដែលលោកបានដាក់ចេញក្នុងអំឡុងពេលអាណត្តិទីពីររបស់លោកនៅក្នុងសេតវិមាន។
ទន្ទឹមនឹងនេះ ប្រព័ន្ធពន្ធគយចម្រុះដ៏ស្មុគស្មាញ និងជាក់លាក់ជាងមុន ដែលកំណត់គោលដៅលើការនាំចូលទំនិញមួយចំនួនមកសហរដ្ឋអាមេរិក ឬការនាំចូលពីប្រទេសជាក់លាក់ណាមួយ នៅតែបន្តអនុវត្តដដែល។ ចំណែកឯផលិតផលមួយចំនួនទៀត ត្រូវបានលើកលែង។
ប្រធានាធិបតីសហរដ្ឋអាមេរិករូបនេះ បានឆ្លើយតបទៅនឹងសេចក្តីសម្រេចរបស់តុលាការកំពូល ដោយប្រើប្រាស់ច្បាប់ផ្សេងមួយទៀតភ្លាមៗ ដើម្បីប្រកាសអត្រាពន្ធគយថ្មី ១០% លើការនាំចូលទំនិញពីគ្រប់ប្រទេសទាំងអស់។ កាលពីថ្ងៃទី២១ខែកុម្ភៈ លោកបានតម្លើងអត្រានេះដល់ ១៥%។
អត្រាថ្មីនេះ នឹងចាប់ផ្តើមមានប្រសិទ្ធភាពចាប់ពីថ្ងៃទី២៤ខែកុម្ភៈតទៅ។
លោក Greer បាននិយាយថា ផែនការនេះនឹងមាន “តម្លៃប្រហាក់ប្រហែលទៅនឹងប្រភេទពន្ធគយដែលយើងបានដាក់អនុវត្តនៅក្រោមច្បាប់ IEEPA”។
ច្បាប់ដែលលោក ត្រាំ កំពុងប្រើប្រាស់នាពេលនេះ អាចអនុវត្តបានត្រឹមតែរយៈពេល ១៥០ ថ្ងៃប៉ុណ្ណោះ ដែលបន្ទាប់ពីនោះ ត្រូវតែមានការពិគ្រោះយោបល់ជាមួយសភា ដើម្បីសុំការបន្តសុពលភាព។
ជាមួយគ្នានេះដែរ រដ្ឋបាលរបស់លោក ក៏កំពុងសិក្សាលើយន្តការផ្លូវច្បាប់ផ្សេងៗទៀត ដែលខ្លួនអាចប្រើដើម្បីតម្លើងពន្ធបន្ថែមទៀតផងដែរ ដែលចំណុចនេះត្រូវបានលើកឡើងដោយលោក Greer នៅក្នុងមតិយោបល់របស់លោកទៅកាន់ ABC។
លោក Greer បានពន្យល់ថា៖ «យើងបានរកឃើញវិធីដើម្បីកសាងអ្វីដែលយើងកំពុងធ្វើឡើងវិញ។ ឥឡូវនេះ វាមិនមានភាពបត់បែនដូចអ្វីដែលប្រធានាធិបតី ធ្លាប់មាននៅក្រោមអំណាចមុន ដែលលោកបានប្រើប្រាស់នោះទេ ប៉ុន្តែវាផ្តល់ឱ្យយើងនូវឧបករណ៍ដែលមាននិរន្តរភាពខ្លាំង»។
ប្រធានាធិបតីសហរដ្ឋអាមេរិក បានអះអាងជាយូរមកហើយថា ពន្ធគយនឹងជំរុញផលិតកម្មក្នុងស្រុក និងបង្កើតការងារ ហើយលោកក៏បានប្រើប្រាស់វា ដើម្បីសម្រេចគោលដៅនយោបាយផ្សេងៗទៀតផងដែរ។
ប៉ុន្តែ អ្នករិះគន់ បានព្រមានថា ពន្ធគយបណ្តាលឱ្យតម្លៃទំនិញខ្ពស់សម្រាប់អ្នកប្រើប្រាស់ និងខូចខាតដល់សេដ្ឋកិច្ចសកល៕
