ប្រជានេសាទរស់នៅភូមិកែវផុស ឃុំកែវផុស ស្រុកស្ទឹងហាវ ខេត្តព្រះសីហនុ ចំនួន២៦២នាក់ ទាមទារឱ្យអាជ្ញាធរមូលដ្ឋាន ទប់ស្កាត់ឈ្មួញមកបោះបង្គោលហ៊ុំព័ទ្ធដីឆ្នេរសមុទ្រធ្វើអាជីវកម្មចិញ្ចឹមខ្យង លើផ្ទៃទឹកជាង៣០ហិកតា ដែលថា បង្កផលប៉ះពាល់ដល់ការរកចំណូលប្រចាំថ្ងៃរបស់ពួកគេ។
ការជំរុញនេះ ធ្វើឡើងតាមរយៈស្នាមមេដៃនៅលើលិខិតមួយច្បាប់ កម្រាស ១៦ទំព័រ ដែលវីអូឌីទទួលបាននៅថ្ងៃទី៣ខែមីនានេះ ពួកគេស្នើមេឃុំកែវផុសជួយអន្តរាគមន៍ទប់ស្កាត់នូវទង្វើរបស់ លោក ប៊ុយ ផៃ ប្រធានសហគមន៍កែវផុសដែលថា បានអនុញ្ញាតឱ្យបុគ្គលរស់នៅមូលដ្ឋានផ្សេង ចុះមកបោះបង្គោលរបងហ៊ុំព័ទ្ធយកដីឆ្នេរសមុទ្រធ្វើជាអាជីវកម្មចិញ្ចឹមខ្យងលើផ្ទៃដីជាង ៣០ហិកតា។
បើតាមលិខិតនោះ ការធ្វើអាជីវកម្មចិញ្ចឹមខ្យងនេះ ធ្វើឱ្យប្រជានេសាទពួកគាត់ ដែលមានមុខរបរដើររក ក្តាមខ្យង អូសមង និងចូលទូកជាដើម ពិបាករកកម្រៃសម្រាប់ចិញ្ចឹមជីវិតប្រចាំថ្ងៃ។
លិខិតដដែល ឱ្យដឹងទៀតថា ក្រុមប្រជានេសាទបានចោទ លោក ប៊ុយ ផៃ ថាជាអ្នកអនុញ្ញាតឲ្យឈ្មួញមកពីមូលដ្ឋានខាងក្រៅ ចុះមកហ៊ុំព័ទ្ធដីឆ្នេរសមុទ្របើកអាជីវកម្មដោយខុសច្បាប់។ ហើយថា ទីតាំងដីឆ្នេរសមុទ្រ៣១ហិកតា នៅឃុំកែវផុសនេះ គឺពួកគាត់ធ្លាប់ធ្វើរបរនេសាទតាំងពីដើមរៀងមក ពោលគឺតាំងពីដូនតាមកម៉្លេះ។
ដែលការណ៍នេះពួកគេជំរុញឱ្យមេឃុំ ជួយអន្តរាគមន៍បញ្ឈប់សកម្មភាពឈ្មួញ និងត្រូវដកបង្កោលរបង ដែលហ៊ុំព័ទ្ធដីឆ្នេរសមុទ្រទាំងនោះចេញឱ្យអស់ ដើម្បីទុកតំបន់នេះ ឱ្យពួកគាត់ធ្វើរបរនេសាទជាលក្ខណៈគ្រួសារ ដើម្បីរកប្រាក់ចំណូលចិញ្ចឹមជីវិតដូចដើមវិញ។
វីអូឌី មិនអាចទាក់ទង លោក ប៊ុយ ផៃ ប្រធានសហគមន៍កែវផុស និងលោក ផេង ម៉ីន មេឃុំកែវផុស ដើម្បីបំភ្លឺជុំវិញវិវាទខាងលើបានទេ គិតត្រឹមម៉ោងផ្សាយនេះ។
ប៉ុន្តែយោងតាមការបញ្ជាក់ពីមន្ត្រីអាជ្ញាធរឃុំកែវផុសមិនបញ្ចេញឈ្មោះ ឱ្យដឹងថា បញ្ហានៅសហគមន៍កែវផុសនេះ ថ្នាក់ដឹកនាំរដ្ឋបាលស្រុកស្ទឹងហាវ កំពុងរកដំណោះស្រាយធ្វើយ៉ាងណាឲ្យភាគីទាំងពីរ អាចទទួលយកបានទាំងអស់គ្នា។ ហើយថា អាចនឹងដោះស្រាយបញ្ចប់នៅសប្តាហ៍ខាងមុខនេះ ។
ទាក់ទិនបញ្ហានេះដែរ លោក ឯម ភា ប្រធានជលផលកំពង់សោម ត្រូវបានសារព័ត៌មានក្នុងស្រុកដកស្រង់សំដីមកចុះផ្សាយថា ករណីវិវាទផ្តើមពីការបោះបង្គោលរបងហ៊ុំព័ទ្ធដីឆ្នេរសមុទ្រ ដើម្បីធ្វើអាជីវកម្មចិញ្ចឹមខ្យង នៅតំបន់កែវផុសនេះ។ លោកថា អាជ្ញាធរមូលដ្ឋាន និងភាគីពាក់ព័ន្ធកំពុងជួបប្រជុំដោះស្រាយ។ លើសពីនេះ លោកថា ក្នុងនាមជំនាញគឺមិនហាមឃាត់ចំពោះការធ្វើអាជីវកម្មចិញ្ចឹមខ្យងនៅមូលដ្ឋាននេះទេ ប៉ុន្តែស្នើឲ្យភាគីបើកធ្វើអាជីវកម្ម ត្រូវរកទីតាំងណាមួយ ដើម្បីកុំឲ្យប៉ះពាល់ដល់ផលប្រយោជន៍ របស់ប្រជានេសាទ ដែលរកអាស្រ័យផលនៅតំបន់នោះ ។
ម្យ៉ាងទៀត រាល់ការបើកធ្វើអាជីវកម្មអ្វីមួយ ក៏ត្រូវរៀបចំស្នើសុំច្បាប់ទម្លាប់ ឲ្យបានត្រឹមត្រូវជាមុនដែរ ព្រោះគម្រោងបើកធ្វើអាជីវកម្មចិញ្ចឹមខ្យងនៅឆ្នេរសមុទ្រតំបន់កែវផុស មិនទាន់មានច្បាប់អនុញ្ញាតទេ។
លោកបន្តថា ចំពោះទំនាស់រវាងអ្នកនេសាទ ជាមួយអ្នកធ្វើអាជីវកម្មចិញ្ចឹមខ្យង នៅឆ្នេរសមុទ្រឃុំកែវផុសនេះ ក្រុមការងារអាជ្ញាធរឃុំស្រុក ក៏ធ្លាប់បានអញ្ជើញភាគីពាក់ព័ន្ធមកជួប្រជុំ ដើម្បីបំភ្លឺរឿងនេះដែរ ប៉ុន្តែប្រជាពលរដ្ឋ អ្នកប្រកបរបរនេសាទមិនបានចូលរួមទេ គឺឃើញមានតែសហគមន៍ និងតំណាងសហគមន៍តែងចូលរួមតែប៉ុណ្ណោះ។
លោកថា៖ «ក្នុងនាមជំនាញសូមស្នើដល់អាជ្ញាធរជួយរកវិធីធ្វើម៉េចកន្លែងណា មានផលប៉ះពាល់ជាមួយប្រជានេសាទ ដែលកន្លែងពួកគាត់អាស្រ័យផល យើងកុំចិញ្ចឹមកន្លែងហ្នឹង គឺយើងងាកទៅកន្លែងណាដែលមិនមានបញ្ហាប្រឈមជាមួយពួកគាត់។ អាហ្នឹងវាជាដំណោះស្រាយឈ្នះៗ។ ហើយក្នុងនាមជំនាញ យើងសាទរ ដែលគាត់បានចូលរួមអភិវឌ្ឍន៍វារីវប្បកម្ម ស្របទៅតាមយុត្តិសាស្ត្ររបស់ក្រសួងដែរ» ។
សម្រាប់មន្ត្រីសង្គមស៊ីវិលធ្វើការពាក់ព័ន្ធ លើការងារថែរក្សាធនធានធម្មជាតិប្រចាំខេត្តព្រះសីហនុ ក៏បានសំណូមពរថា វិវាទខាងលើនេះ អាជ្ញាធរពាក់ព័ន្ធត្រូវពិនិត្យដោះស្រាយចប់ឲ្យបានឆាប់ ដើម្បីកុំឲ្យវិវាទរីកធំ និងអូសបន្លាយដល់ការប្រកបរបររកទទួលទានរបស់ប្រជានេសាទនៅឃុំកែវផុស។
លោក សុខ សុខុម ប្រធានអង្គការស្រឡាញ់ធនធានធម្មជាតិកម្ពុជា ហៅកាត់ ស៊ីអ៊ិនរ៉ូ (CNRO) បានឲ្យដឹងនៅថ្ងៃពុធ ទី០៤ ខែមីនាថា លោកក៏ទទួលបានលិខិតផ្តិតស្នាមមេដៃរបស់ប្រជានេសាទឃុំកែវផុស ស្នើជួយស្វែងរកដំណោះស្រាយ លើករណីមានឈ្មួញចូលមកបោះបង្គោលរបង ហ៊ុំព័ទ្ធដីឆ្នេរសមុទ្រធ្វើអាជីវកម្មចិញ្ចឹមខ្យងនេះដែរ។
លោកបន្តថា រូបលោក បានត្រឹមស្នើសុំបន្តទៅអាជ្ញាធរឃុំកែវផុស ឲ្យជួយសម្របសម្រួលបញ្ចប់វិវាទនេះឲ្យបានឆាប់ ដើម្បីកុំឲ្យប៉ះពាល់ដល់ការប្រកបរបរចិញ្ចឹមជីវិតប្រចាំថ្ងៃរបស់ប្រជាពលរដ្ឋ ហើយព្យាយាមដោះស្រាយធ្វើយ៉ាងណា ឲ្យភាគីទាំងសងខាង អាចទទួលយកបានទាំងអស់គ្នា ។
យ៉ាងណាក៏ដោយចុះ ប្រជានេសាទរស់នៅឃុំកែវផុស ស្រុកស្ទឹងហាវ ខេត្តព្រះសីហនុ ក៏បានសំណូមពរបន្ថែមទៅដល់ លោក ម៉ាង ស៊ីណេត អភិបាលខេត្តព្រះសីហនុ ឲ្យជួយពន្លឿនដោះស្រាយកង្វល់ពួកគាត់ ចប់ឲ្យបានឆាប់ផង។ ដ្បិតសកម្មភាពឈ្មួញចូលមកបោះបង្គោលរបងហ៊ុំព័ទ្ធដីឆ្នេរសមុទ្រ ក្នុងឃុំកែវផុស បានប៉ះពាល់ធ្ងន់ធ្ងរ ដល់ការធ្វើរបរនេសាទប្រចាំថ្ងៃរបស់ពួកគាត់។ ហើយថា អាជ្ញាធរឃុំកែវផុស ហាក់មិនសូវយកចិត្តទុកដាក់ ជួយដោះស្រាយកង្វល់ជូនពួកគាត់នោះទេ៕
