សកម្មភាពកាប់ដើមឈើធំៗធ្វើអាជីវកម្ម ការទន្ទ្រានព្រៃអភិរក្សរានយកដី និងការដាក់អន្ទាក់ចាប់សត្វព្រៃ រួមទាំងគ្រាប់ផ្តោងរបស់ថៃថ្មីៗនេះ បណ្តាលឱ្យដំរី២ក្បាលស្លាប់ផងនោះ ត្រូវជនជាតិដើមភាគតិចកួយ លើកឡើងថា គឺជាមូលហេតុចម្បងធ្វើឱ្យសត្វដំរីព្រៃនៅព្រៃការពារព្រះរកាបន្តបាត់បង់ ហើយអាចនឹងផុតពូជនៅថ្ងៃអនាគត ប្រសិនបើរដ្ឋាភិបាលមិនរកមធ្យោបាយដោះស្រាយឱ្យទាន់ពេលទេ។
ប្រការនេះ ប្រជាសហគមន៍រស់នៅក្នុងស្រុកជាំក្សាន្ត ស្រុកត្បែងមានជ័យ និងស្រុកឆែប ជិត ២០០ នាក់ នៅដើមសប្តាហ៍នេះ បានរួមគ្នាប្រារព្ធពិធីបុណ្យដំរី និងបំបួសព្រៃឈើ ឋិតក្នុងដែនជម្រកសត្វព្រៃព្រះរកា-ឆែប ក្នុងបំណងរំឭកដឹងគុណអ្នកលះបង់ការពារព្រៃឈើ និងបង្ហាញក្តីស្រឡាញ់ចំពោះព្រៃឈើ សត្វព្រៃ ព្រមទាំងបំផុសស្មារតីពលរដ្ឋ និងអាជ្ញាធរសហការគ្នាថែទាំព្រៃឱ្យគង់។
គណៈកម្មការបណ្តាញព្រៃព្រះរកា អ្នកស្រី ជួន ឃឹម ប្រាប់វីអូឌីនៅថ្ងៃទី០៥ ខែមិនាថា ដំរីព្រៃរស់នៅក្នុងដែនជម្រកសត្វព្រៃព្រះរកា-ឆែប កាន់តែថយចុះពីមួយឆ្នាំទៅមួយឆ្នាំ ប្រសិនបើរដ្ឋាភិបាលមិនរកមធ្យោបាយអភិរក្សឱ្យល្អនោះទេ ពួកវានឹងផុតពូជពេលដ៏ខ្លីខាងមុខ។
អ្នកស្រីទទូចឱ្យក្រសួងបរិស្ថាន និងស្ថាប័នពាក់ព័ន្ធ ដាំកូនឈើស្តារព្រៃឡើងវិញ និងថែទាំកូនឈើឱ្យល្អដើម្បីផ្តល់ទីតាំងដំរីងាយស្រួលរស់នៅ។
អ្នកស្រី ជួន ឃឹម និយាយថា៖ «ភូមិ/ឃុំគាត់អត់ជួយឈឺឆ្អាលទេ ហើយមេបានៅកន្លែងមួយៗបើគាត់ចេះផ្សព្វផ្សាយពលរដ្ឋឱ្យចូលរួមអី អាហ្នឹងវាអាចព្រៃឈើយើងនៅគង់វង្ស។ បើឃើញដឹកឈើមួយៗចូលទៅ គាត់ថា បិទភ្នែកច្រមុះទៅ កុំឱ្យចាប់គ្នា ចាប់អី។ ខ្ញុំថា បើធ្វើអីចុះវានៅគង់វង្សអី ព្រៃ បើភូមិ/ឃុំជួយផ្សព្វផ្សាយ ការពារព្រៃឈើវាមិនអស់ទេ»។
មន្ទីរបរិស្ថានខេត្តព្រះវិហារ ឱ្យដឹងថា គ្រាប់ផ្លោងរបស់យោធាថៃ បានសម្លាប់ជីវិតសត្វដំរីម្តាយ និងកូន ដែលទើបនឹងកើត ក្នុងដែនជម្រកសត្វព្រៃព្រះរកា-ឆែប ខេត្តព្រះវិហារ។
អនុប្រធានមន្ទីរបរិស្ថានខេត្តព្រះវិហារ លោក ឈុន ឆេង បានថ្លែងក្នុងកម្មវិធីនោះថា ពេលនេះដែនជម្រកសត្វព្រៃព្រះរកា-ឆែប រដ្ឋាភិបាលបានពង្រីកដែនអភិរក្សទំហំជាង ៣៤ ម៉ឺនហិកតា (៣៤.៨៨៩) ហើយមន្ត្រីឧទ្យានុរក្សមានតិចតួចនៅឡើយ ដែលទាមទារឱ្យប្រជាសហគមន៍សហការអភិរក្សព្រៃឈើ។
ក្នុងពិធីបុណ្យនោះ លោក ឈុន ឆេង បានដឹកនាំមន្ត្រីឧទ្យានុរក្ស សហការជាមួយក្រុមស្នូលបណ្ដាញព្រៃព្រះរកា រៀបចំពិធីរំលឹកឧទ្ទិសដល់វិញ្ញាណសត្វដំរី និងពិធីបុណ្យខួបបំបួសព្រៃព្រះរការយៈពេល ៣ថ្ងៃ នៅដើមខែមិនានេះ។
ពិធីបុណ្យនេះមានព្រះសង្ឃ ព្រឹទ្ធាចារ្យ សហគមន៍មូលដ្ឋាន ក្រុមសង្គមស៊ីវិលសរុបជិត ២០០អង្គ/នាក់ ប្រារព្ធឡើង ក្នុងបំណងលើកកម្ពស់ទ្រព្យសម្បត្តិជាតិ និងអភិរក្សធនធានព្រៃឈើ សត្វព្រៃ ជីវចម្រុះ និងដើមច្បោះជ័រទឹក ដែលជាប្រភពចំណូលរបស់សហគមន៍។
ក្រុមស្នូលបណ្ដាញព្រៃព្រះរកា លោក ស៊ុត សាវ៉ន ប្រាប់វីអូឌីថា បច្ចុប្បន្នដែនជម្រកសត្វព្រៃព្រះរកា ក្លាយជាទីវាលមួយផ្នែកធំ និងតំបន់អភិរក្សខ្លះទៀតអស់ដើមឈើធំៗ នៅសល់តែព្រៃរេចរឹល ពិបាកដល់ដំរីចិញ្ចឹមជីវិត និងបង្កកំណើត។
លោកបញ្ជាក់ថា ប្រសិនបើអាជ្ញាធរដាំស្តារព្រៃឡើងវិញ នឹងកាត់បន្ថយកម្ដៅទប់ស្កាត់បម្រែបម្រួលអាកាសធាតុនិងលើកកម្ពស់ជីវភាពសហគមន៍។
លោក ស៊ុត សាវ៉ន និយាយថា៖ «កន្លែងមួយចំនួនវាអស់ដើមឈើធំៗគេកាប់ វាវាល វាក្តៅ បើសិនជាយើងស្ដារឡើងវិញ វាអាចដើមឈើលូតលាស់វិញធំៗដែរ។ បើយើងត្រួសត្រាយដាំដើមឈើឡើងវិញ វានឹងប្រសើរឡើងវា នឹងល្អ»។
ជុំវិញរឿងនេះ នាយកប្រតិបត្តិអង្គការពន្លកខ្មែរ លោក ប៉ឹក សោភ័ណ សង្កេតឃើញថា ជនជាតិដើមភាគតិចគោរពស្រឡាញ់សត្វព្រៃ និងសត្វដំរី ដែលពួកគាត់មានជំនឿថា សត្វដំរីនាំមកនូវត្រជាក់ត្រជំ និងចម្រុងចម្រើន។
លោកថា រដ្ឋាភិបាលធ្លាប់បង្ហាញឆន្ទៈស្ដារព្រៃឈើឡើងវិញ ហើយក្រសួងបរិស្ថានបានប្ដេជ្ញាចិត្ត ប្រឹងប្រែងការពារព្រៃឈើដែរ ក៏ប៉ុន្តែនៅពុំទាន់គ្រប់ជ្រុងជ្រោយនៅឡើយ។
លោក ប៉ឹក សោភ័ណ ថ្លែងថា៖ «អ្វីដែលបារម្ភគឺ ក្រសួងក៏ដូចជាមន្ទីរ លោកលើកឡើងពីកង្វល់ថា មានមន្ត្រីតិចតួចជួយការពារមានតែសហគមន៍ និងមន្ត្រីឧទ្យានុរក្សជួយការពាររួមគ្នា វាអាចនឹងឋិតថេរគង់វង្សបានយូរអង្វែង»។
ដែនជម្រកសត្វព្រៃព្រះរកា-ឆែប ត្រូវក្រសួងបរិស្ថានដាក់បញ្ចូលជាព្រៃអភិរក្សមានទំហំជាង ៩ម៉ឺនហិកតា ឋិតនៅភូមិសាស្ត្រប្រជុំបីស្រុក គឺស្រុកជាំក្សាន្ត ស្រុកត្បែងមានជ័យ និងស្រុកឆែប របស់ខេត្តព្រះវិហារ ក៏ប៉ុន្តែក្រោយមករដ្ឋាភិបាលពង្រីកដែនអភិរក្សនេះ រហូតដល់ជាង ៣៤ម៉ឺនហិកតា លាតសន្ធឹងជាប់ព្រំដែនកម្ពុជា-ថៃ រហូតដល់ខេត្តស្ទឹងត្រែង។
មន្ត្រីបរិស្ថានខេត្តព្រះវិហារ លើកឡើងថា សព្វថ្ងៃ ព្រៃអភិរក្សមួយនេះ មានឆ្មាំអភិរក្សរបស់ក្រសួងបរិស្ថានជាង ២០នាក់ ដែលឈរជើងការពារព្រៃ។ រីឯសត្វដំរីព្រៃកំពុងរស់នៅក្នុងព្រៃអភិរក្សនេះ មានជាង ២០ក្បាល ដែលផ្លាស់ទីរកចំណីជាហ្វូង និងដំរីខ្លះឆ្លងដែនដល់ព្រំដែនកម្ពុជា-ថៃ នេះបើយើងតាមការស្រាវជ្រាវក្រុមស្នូលព្រៃព្រះរការ-ឆែប៕
