សេចក្តីសម្រេចចិត្តរបស់ព្រឹទ្ធសភាអាមេរិកដែលគាំទ្រដោយបក្សទាំងពីរ កាលពីថ្ងៃទី៤ខែមីនា ក្នុងគោលបំណងរឹតត្បិតសមត្ថភាពរបស់ប្រធានាធិបតី Donald Trump ក្នុងការធ្វើសង្គ្រាមនៅប្រទេសអ៊ីរ៉ង់ បានបរាជ័យ ខណៈដែលការវាយប្រហារនៅតែបន្តកើតមាន។
វិធានការអំណាចសង្គ្រាមនេះ ត្រូវបានបដិសេធក្នុងសំឡេងឆ្នោត ៥៣ ទល់នឹង ៤៧ ដែលភាគច្រើនបែងចែកទៅតាមខ្សែបន្ទាត់បក្ស។ វិធានការនេះ នឹងផ្អាកសកម្មភាពយោធាអាមេរិកនៅអ៊ីរ៉ង់ ប្រសិនបើគ្មានការយល់ព្រមពីសភា។
ខាងគណបក្សប្រជាធិបតេយ្យ បានលើកឡើងថា លោក Trump បានផាត់សភាឱ្យនៅដោយឡែក និងបានផ្តល់ហេតុផលផ្លាស់ប្តូរចុះឡើងសម្រាប់ការធ្វើសង្គ្រាម។ សមាជិកបក្សសាធារណរដ្ឋភាគច្រើន បានរារាំងសេចក្តីសម្រេចចិត្តនេះ ប៉ុន្តែអ្នកខ្លះបាននិយាយថា ពួកគេអាចនឹងប្តូរចិត្ត ប្រសិនបើសង្គ្រាមរីករាលដាលកាន់តែខ្លាំងនៅក្នុងសប្តាហ៍ខាងមុខ។
សហរដ្ឋអាមេរិក និងអ៊ីស្រាអែល បានចាប់ផ្តើមវាយប្រហារលើអ៊ីរ៉ង់ កាលពីថ្ងៃទី២៨ខែកុម្ភៈ។ សាធារណរដ្ឋឥស្លាមមួយនេះ បានឆ្លើយតបវិញ ដោយការបើកការវាយប្រហារលើអ៊ីស្រាអែល និងបណ្តារដ្ឋសម្ព័ន្ធមិត្តរបស់អាមេរិកនៅក្នុងតំបន់ឈូងសមុទ្រ។
ដោយគ្មានផ្លូវចេញច្បាស់លាស់នៅចំពោះមុខ រដ្ឋមន្ត្រីក្រសួងសង្គ្រាម លោក Pete Hegseth បាននិយាយថា សង្គ្រាមអាចនឹងអូសបន្លាយពេល ៨ សប្តាហ៍ ដែលវាស្ទើរតែទ្វេដងនៃរយៈពេលដែល លោក Trump បានលើកឡើងកាលពីចុងសប្តាហ៍។
មានសមាជិកព្រឹទ្ធសភាពីររូប បានបោះឆ្នោតផ្ទុយពីបក្សរបស់ខ្លួន ក្នុងការបោះឆ្នោតកាលពីថ្ងៃទី៤ខែមីនា។ សមាជិកព្រឹទ្ធសភាបក្សប្រជាធិបតេយ្យ លោក John Fetterman មកពីរដ្ឋ Pennsylvania បានជំទាស់នឹងវិធានការនេះ ខណៈដែលសមាជិកព្រឹទ្ធសភាបក្សសាធារណរដ្ឋ លោក Rand Paul មកពីរដ្ឋ Kentucky បានបោះឆ្នោតគាំទ្រ។
ក្រៅពីនោះ អ្នកផ្សេងទៀតបានបោះឆ្នោតទៅតាមខ្សែបន្ទាត់បក្សរៀងៗខ្លួន។
សមាជិកព្រឹទ្ធសភាលោកស្រី Susan Collins ដែលជាសមាជិកបក្សសាធារណរដ្ឋកណ្តាលនិយមមកពីរដ្ឋ Maine បានបោះឆ្នោតប្រឆាំងនឹងវិធានការនេះ ដោយបាននិយាយបន្ទាប់ពីការបោះឆ្នោតថា ការអនុម័តច្បាប់នេះនឹងផ្ញើសារខុសទៅកាន់ប្រទេសអ៊ីរ៉ង់ និងកងទ័ពអាមេរិក។
លោកស្រីបានមានប្រសាសន៍ថា៖ «នៅចំណុចរបត់នេះ ការផ្តល់ការគាំទ្រយ៉ាងមុតមាំដល់សមាជិកកងទ័ពរបស់យើង គឺមានសារៈសំខាន់ខ្លាំងណាស់ ក៏ដូចជាការពិគ្រោះយោបល់បន្តបន្ទាប់រវាងរដ្ឋបាល និងសភាផងដែរ»។
មេដឹកនាំបក្សប្រជាធិបតេយ្យនៅព្រឹទ្ធសភាលោក Chuck Schumer បាននិយាយមុនពេលបោះឆ្នោតគាំទ្រវិធានការនេះថា៖ «តើអ្នកឈរនៅខាងប្រជាជនអាមេរិក ដែលនឿយហត់នឹងសង្គ្រាមមិនចេះចប់មិនចេះហើយ នៅមជ្ឈិមបូព៌ា ឬក៏ឈរនៅខាង លោក Donald Trump និងលោក Pete Hegseth ខណៈដែលពួកគេកំពុងនាំយើងទាំងងងឹតងងុលឱ្យធ្លាក់ចូលទៅក្នុងសង្គ្រាមមួយផ្សេងទៀត?»។
ច្បាប់នេះ នឹងត្រូវបញ្ជូនទៅបោះឆ្នោតនៅថ្ងៃ៥មីនានៅក្នុងសភាតំណាងរាស្ត្រ ដែលវានឹងត្រូវប្រឈមមុខនឹងការលំបាកយ៉ាងខ្លាំង។
ទោះបីជាប្រធានាធិបតីមានអំណាចទូលំទូលាយ ក្នុងការបើកប្រតិបត្តិការយោធា ដោយមិនចាំបាច់មានការប្រកាសសង្គ្រាមជាផ្លូវការក៏ដោយ ក៏សភាត្រូវតែទទួលបានការជូនដំណឹងក្នុងរយៈពេល ៤៨ ម៉ោង បន្ទាប់ពីអរិភាពបានចាប់ផ្តើម។
មេដឹកនាំជាន់ខ្ពស់នៃសភាត្រូវបានជូនដំណឹងមុនពេលការវាយប្រហារដំបូងបានចាប់ផ្តើម ហើយលោក Trump បានជូនដំណឹងដល់សភាក្នុងលិខិតមួយ កាលពីថ្ងៃទី២ខែមីនា ទោះបីជាលោកនៅតែប្រកាន់ជំហរថា វាមិនចាំបាច់ក៏ដោយ។
កន្លងមក លោក Trump ធ្លាប់បានបញ្ជាឱ្យមានប្រតិបត្តិការយោធាដោយគ្មានការយល់ព្រមពីសភា ដូចជា ការវាយប្រហាររបស់សហរដ្ឋអាមេរិកលើទីតាំងនុយក្លេអ៊ែររបស់អ៊ីរ៉ង់ កាលពីឆ្នាំមុន និងការចាប់ខ្លួនប្រធានាធិបតីវេណេ ហ្ស៊ុយអេឡា លោក Nicolás Maduro កាលពីខែមករាជាដើម៕
