ប្រទេសបារាំង កំពុងដាក់ពង្រាយនាវាចរណ៍ប្រហែល ១២ គ្រឿង រួមទាំងក្រុមនាវាផ្ទុកយន្តហោះចម្បាំងរបស់ខ្លួនទៅកាន់សមុទ្រមេឌីទែរ៉ាណេ សមុទ្រក្រហម និងអាចឈានទៅដល់ច្រកសមុទ្រ Hormuz ដែលជាផ្នែកមួយនៃការគាំទ្រផ្នែកការពារដល់សម្ព័ន្ធមិត្ត ដែលកំពុងរងការគំរាមកំហែងដោយជម្លោះនៅមជ្ឈិមបូព៌ា។
ថ្លែងនៅក្នុងប្រទេសស៊ីប មុនពេលទៅទស្សនានាវាផ្ទុកយន្តហោះ Charles de Gaulle ដែលបានមកដល់សមុទ្រមេឌីទែរ៉ាណេភាគខាងកើត នាចុងសប្តាហ៍នេះ ប្រធានាធិបតី Emmanuel Macron បានព្យាយាមផ្ដល់ភាពជឿជាក់ឡើងវិញដល់សមភាគីស៊ីប បន្ទាប់ពីដ្រូនជាច្រើនត្រូវបានស្ទាក់ចាប់បាន ខណៈកំពុងហោះសំដៅទៅរកកោះនេះកាលពីសប្តាហ៍មុន។
លោក Macron បានមានប្រសាសន៍បន្ទាប់ពីជំនួបជាមួយប្រធានាធិបតី Nikos Christodoulides និងនាយករដ្ឋមន្ត្រីក្រិក Kyriakos Mitsotakis នៅទីក្រុង Paphos ថា៖ «នៅពេលដែលប្រទេសស៊ីបរងការវាយប្រហារ នោះអឺរ៉ុបក៏រងការវាយប្រហារដែរ»។
បណ្តាប្រទេសនៅអឺរ៉ុបភាគច្រើន ត្រូវបានគេផាត់ចេញឱ្យនៅក្រៅ ខណៈដែលជម្លោះរវាងសហរដ្ឋអាមេរិក អ៊ីស្រាអែល និងអ៊ីរ៉ង់ បានកើនឡើងកម្ដៅ ដែលប៉ះពាល់ដល់បណ្តាប្រទេសអារ៉ាប់នៅតំបន់ឈូងសមុទ្រ និងអូសទាញប្រទេសលីបង់ឱ្យធ្លាក់ចូលក្នុងសមរភូមិ បន្ទាប់ពីក្រុមសកម្មប្រយុទ្ធ Hezbollah ដែលគាំទ្រដោយអ៊ីរ៉ង់បានវាយប្រហារលើអ៊ីស្រាអែល។
ប៉ុន្តែជាមួយនឹងផ្លូវនាវាចរណ៍នៅមជ្ឈិមបូព៌ាដែលកំពុងរងផលប៉ះពាល់ ហើយតម្លៃប្រេងបានហក់ឡើងខ្ពស់ជាង ១០០ ដុល្លារក្នុងមួយបារ៉ែល មហាអំណាចអឺរ៉ុបកំពុងប្រឈមមុខនឹងបញ្ហាថាតើត្រូវការពារផលប្រយោជន៍របស់ពួកគេដោយរបៀបណា។
លោក Macron បានមានប្រសាសន៍ថា៖ «គោលបំណងរបស់យើងគឺរក្សាជំហរការពារយ៉ាងតឹងរ៉ឹង ដោយឈរជាមួយបណ្តាប្រទេសទាំងអស់ ដែលរងការវាយប្រហារដោយអ៊ីរ៉ង់នៅក្នុងការសងសឹករបស់ខ្លួន ដើម្បីធានានូវភាពជឿជាក់របស់យើង និងដើម្បីរួមចំណែកដល់ការកាត់បន្ថយភាពតានតឹងក្នុងតំបន់។ ជាចុងក្រោយ យើងមានគោលដៅធានានូវសេរីភាពនៃការធ្វើនាវាចរណ៍ និងសន្តិសុខផ្លូវទឹក»។
សកម្មភាពកងទ័ពជើងទឹកចម្បាំងរបស់សហភាពអឺរ៉ុបនៅក្នុងតំបន់នេះ គឺផ្តោតលើប្រតិបត្តិការ Aspides (មានន័យថា “ខែល” ជាភាសាក្រិក) ដែលជាបេសកកម្មជើងទឹកនៅសមុទ្រក្រហមត្រូវបានបង្កើតឡើងក្នុងដើមឆ្នាំ ២០២៤ ដើម្បីការពារនាវាពីការវាយប្រហារដោយក្រុមសកម្មប្រយុទ្ធហ៊ូធី (Houthi) ដែលមានសម្ព័ន្ធភាពជាមួយអ៊ីរ៉ង់ និងគាំទ្រក្រុមសកម្មប្រយុទ្ធប៉ាឡេស្ទីនហាម៉ាស ក្នុងសង្គ្រាមជាមួយអ៊ីស្រាអែល។
លោក Mitsotakis បានលើកឡើងថា៖ «ខ្ញុំក៏នឹងចូលរួមជាមួយសហការីអឺរ៉ុបដទៃទៀត ដើម្បីពង្រឹងប្រតិបត្តិការ Aspides ជាមួយនឹងនាវាបន្ថែមទៀត»។ លោកបន្តថា៖ «មានពួកយើងតិចតួចណាស់ដែលកំពុងចូលរួម ប៉ុន្តែនៅទីនេះផងដែរ យើងនឹងត្រូវបង្ហាញសាមគ្គីភាពអឺរ៉ុបឱ្យកាន់តែជាក់ស្តែង»។
លោក Macron ដែលកងទ័ពជើងទឹករបស់លោកបានផ្តល់នាវាចម្បាំងមួយគ្រឿងរួចហើយសម្រាប់បេសកកម្មនោះ បានមានប្រសាសន៍ថា នឹងមាននាវាសរុបចំនួនពីរគ្រឿង ប៉ុន្តែជារួម បារាំងនឹងដាក់ពង្រាយនាវាចម្បាំងចំនួន ៨ គ្រឿង ក្រុមនាវាផ្ទុកយន្តហោះ និងនាវាផ្ទុកឧទ្ធម្ភាគចក្រចំនួន ២ គ្រឿងទៅកាន់តំបន់នោះ។
លោក Macron បានបញ្ជាក់ថា យុទ្ធនាការនោះអាចនឹងរួមបញ្ចូលទាំងច្រកសមុទ្រ Hormuz ផងដែរ ដើម្បីគាំទ្រដល់នាវាពាណិជ្ជកម្ម និងនាវាដឹកប្រេងដែលជាការបើកច្រកសមុទ្រ Hormuz ឡើងវិញជាបណ្តើរៗ ឱ្យបានឆាប់បំផុតតាមដែលអាចធ្វើទៅបាន បន្ទាប់ពីដំណាក់កាលជម្លោះដ៏ស្រួចស្រាវបំផុតបានបញ្ចប់៕
