ភរិយាកងទ័ពជួរមុខម្នាក់ប្រចាំការនៅតំបន់មុំបី ខេត្តព្រះវិហារ ដង្ហោយរកជំនួយព្យាបាលប្ដី ដែលរងរបួសដោយសារផ្សែងពុលក្នុងពេលថៃវាយប្រហារឈ្លានពានជាលើកទីពីរ ខណៈជំងឺយោធិនរូបនោះ ឈានដល់ដំណាក់កាលលាងឈាម និងត្រូវដូរក្រៀន ដើម្បីសង្គ្រោះជីវិត។
អ្នកស្រី សុត ឃន ដែលថាត្រូវជាភរិយាទាហានជួរមុខរូបនោះ បានថ្លែងប្រាប់វីអូឌីនៅថ្ងៃទី១១ ខែមីនាថា ស្វាមីអ្នកស្រី គឺលោក យ៉ែម ឡាំង បានរងរបួសដោយផ្សែងពុល ក្នុងពេលប្រយុទ្ធគ្នា ដែលបានដឹកមកព្យាបាលនៅរាជធានីភ្នំពេញ។
អ្នកស្រីអះអាងថា ក្រោយត្រូវផ្សែងពុល និងដឹកមកព្យាបាលនៅរាជធានីភ្នំពេញ ប្ដីអ្នកស្រីក៏ត្រូវបានគ្រូពេទ្យរកឃើញមានជំងឺខូចតម្រងនោម ឬខូចក្រលៀនមួយទៀត។ អ្នកស្រីបន្តថា ស្វាមីអ្នកស្រីត្រូវលាងឈាមជាប្រចាំ ១សប្ដាហ៍ ៣ដង នៅមន្ទីរពេទ្យព្រះតេតុមាលា ឬពេទ្យធំ។
ដោយជួបក្ដីលំបាកក្នុងជីវភាពប្រចាំថ្ងៃ ខណៈអ្នកស្រីពុំអាចធ្វើការអ្វីបានក្រៅពីនៅថែប្ដីរាល់ថ្ងៃ ទើបអ្នកស្រី សុត ឃន ទទូចស្នើដល់រដ្ឋាភិបាលជួយព្យាបាលក្រលៀនស្វាមីអ្នកស្រីឱ្យបានជាសះស្បើយឡើងវិញ។
អ្នកស្រី សុត ឃន និយាយថា៖ «ចាស! ខ្ញុំចង់ឱ្យបានប្ដីខ្ញុំបានដូរក្រលៀន ហើយនិងឱ្យបានកូនខ្ញុំរៀនចប់អញ្ចឹងណា៎បង។ ខ្ញុំនឹងសង្ឃឹមអី រកអីទៀតទេបងអើយ ព្រោះអីថវិកាក៏ខ្ញុំអត់មាន ហើយអ្នកថែមានតែខ្ញុំ ហើយខ្ញុំក៏អត់ស្រួលដែរណា៎»។
បច្ចុប្បន្ន អ្នកស្រី និងស្វាមីជួលបន្ទប់តូចមួយតម្លៃ ៥០ដុល្លារក្នុង១ខែ នៅទួលសង្កែ រាជធានីភ្នំពេញ ដើម្បីទៅមកពេទ្យធំលាងឈាមជាប្រចាំ។ ទោះយ៉ាងណា អ្នកស្រីថា ការលាងឈាមនិងសម្រាកពេទ្យពុំត្រូវចំណាយទេ ប៉ុន្តែអ្នកស្រីត្រូវទិញថ្នាំក្រៅខ្លះៗតាមវេជ្ជបញ្ជារបស់គ្រូពេទ្យ ក្រោមហេតុផលថា ថ្នាំនៅឱសថស្ថានក្រៅមានថ្នាំល្អត្រូវនឹងស្ថានភាពជំងឺប្ដីអ្នកស្រី។
លោក យ៉ែម ឡាំង មានវ័យ ៤៣ឆ្នាំ បម្រើជាកងទ័ពនៅខេត្តព្រះវិហារ ១៨ឆ្នាំហើយ និងត្រូវបានបញ្ជូនទៅត្រៀមជួរមុខនៅតំបន់មុំបី ស្រុកជាំក្សាន្ត ខេត្តព្រះវិហារ តាំងពីមុនផ្ទះសង្គ្រាមលើកទី១ ខែកក្កដា ២០២៥មក។ នេះបើតាមការអះអាងរបស់អ្នកស្រី សុត ឃន ជាភរិយា។ ពួកគេមានកូន ២នាក់ស្ថិតក្នុងបន្ទុក និងកំពុងរៀនសូត្រផង។
ក្រៅពីប្រាក់ខែទាហានរបស់ស្វាមី អ្នកស្រីពុំមានចំណូលអ្វីផ្សេងមកទ្រទ្រង់ការចំណាយប្រចាំថ្ងៃទេ ទាំងកូនរៀន បន្ទប់ជួល ថ្នាំប្ដី ហើយត្រូវសងលុយធនាគារប្រចាំខែដែលអ្នកស្រីជំពាក់រហូត ១ម៉ឺនដុល្លារ ពីការជួលអាត្រាក់ព្យួរស្រែជាដើម។
ក្រោយសង្គ្រាមឈ្លានពានរបស់ថៃ ធនាគារជាតិកម្ពុជា បានចេញសារចរលុបបំណុលទាហានដែលបាត់បង់ជីវិតទាំងស្រុង និងបន្ធូរបន្ថយ និងពន្យារពេលបង់ត្រឡប់ទៅធនាគារសម្រាប់ទាហានរងរបួស។
ចំណែកមន្ត្រីគណបក្សប្រឆាំងនៅក្រៅប្រទេសថា នេះជាការទទួលខុសត្រូវរបស់រដ្ឋាភិបាលជួយដល់កងទ័ពជួរមុខ ក្រោយសង្គ្រាម។ អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន ថ្លែងប្រាប់វីអូឌី នៅថ្ងៃទី១១ ខែមីនា ថា រដ្ឋាភិបាលលោក ហ៊ុន ម៉ាណែត ត្រូវធានាសុខមាលភាពរបស់កងទ័ព ដោយមិនត្រូវឱ្យគ្រួសារកងទ័ពជួបការលំបាកនោះទេ។
លើសពីនេះ លោកស្នើឱ្យរដ្ឋាភិបាលត្រកូលហ៊ុន ត្រូវប្រើថវិកាជាតិឱ្យចំគោលដៅ ជាពិសេសទាហានដែលលះបង់សាច់ស្រស់ឈាមស្រស់ការពារបូរណភាពទឹកដី និងបញ្ឈប់ប្រើលុយខុសខ្ទង់ដូចជា ចំណាយលុយទិញសកម្មជនបក្សប្រឆាំងឱ្យចូលគាំទ្រខ្លួនជាដើម។
លោក អ៊ុំ សំអាន និយាយថា៖ «បាទ! ជំងឺខូចក្រលៀនហ្នឹង គឺថា… ជាការយកចិត្តទុកដាក់របស់រដ្ឋាភិបាលលោក ហ៊ុន ម៉ាណែត ដែរ ព្រោះគាត់មានបញ្ហាសុខភាព ក៏ដោយសារតែគាត់នៅការពារទឹកដីជួរមុខហ្នឹង ហើយករណីហ្នឹង វាមិនច្រើនប៉ុន្មានទេ អាហ្នឹងគួរតែជួយសង្គ្រោះគាត់ កុំយកលុយកាក់ទៅចំណាយទិញសកម្មជនបក្សប្រឆាំង រៀបចំបុណ្យអង្គរសង្ក្រាន្តហ្នឹង ដែលជារឿងឥតប្រយោជន៍បាទ»។
វីអូឌី ពុំសុំការឆ្លើយតបពីមន្ត្រីនាំពាក្យរដ្ឋាភិបាល លោក ប៉ែន បូណា បានទេនៅថ្ងៃទី១១ ខែមីនា ស្ដីពីករណីទាហានដែលខូចក្រលៀនរូបនេះ។ តែយ៉ាងណា លោក ប៉ែន បូណា ថ្លែងកាលពីថ្ងៃទី១០ ខែមីនា ថា រដ្ឋាភិបាលបានដាក់ចេញនូវគោលនយោបាយ និងយន្តការជាច្រើន ដើម្បីជួយសម្រួលដល់គ្រួសារកងទ័ពដូចជាបង្កើតមុខរបរ ជួយកូនៗពួកគេឱ្យរៀនចប់បរិញ្ញាបត្រ និងរៀបចំឥណទានសាជាថ្មី និងដោះស្រាយបំណុលជូនយុទ្ធជនក្នុងសមរភូមិ ព្រមទាំងបង្កើតជាមូលនិធិសម្រាប់ជួយទ្រទ្រង់ក្រុមគ្រួសារយុទ្ធជនជាដើម។
លោក ប៉ែន បូណា និយាយថា៖ «សកម្មភាពនេះសបញ្ជាក់ឱ្យឃើញថា រាជរដ្ឋាភិបាលកម្ពុជា ថ្នាក់ដឹកនាំ និងប្រជាជនកម្ពុជាទាំងអស់ ចងចាំជានិច្ចនូវវីរភាពដ៏អង់អាចក្លាហានរបស់វីរកងទ័ព វីរកងនគរបាលជាតិ និងវីរកងរាជអាវុធហត្ថ ដែលបានបូជាជីវិតដើម្បីការពារទឹកដី និងការពារសេចក្ដីសុខសាន្តជូនប្រជាពលរដ្ឋខ្មែរគ្រប់ៗគ្នា»។
នេះជាករណីទី១ដែលកងទ័ពជួរមុខ រងរបួសពីផ្សែងពុលរបស់ថៃ និងខូចក្រលៀនត្រូវការលាងឈាមជាប្រចាំ ក្រោយការវាយប្រហារឈ្លានពានរបស់ថៃ។ សម្រាប់អ្នកស្រី សុត ឃន កំពុងមើលថែប្ដីដែលដេកដួលតែក្នុងបន្ទប់តូច និងត្រូវលាងឈាមពេលធ្វើទុក្ខម្ដង គឺត្រូវការការគាំទ្រយ៉ាងខ្លាំងពីរដ្ឋាភិបាល។ លើសពីនេះ អ្នកស្រីមានបំណងធំជាងគេ គឺចង់បានការព្យាបាលតាមរយៈការដូរក្រលៀនឱ្យស្វាមី ដើម្បីឱ្យស្វាមីអាចបន្តជីវិតមើលថែគ្រួសារ និងជាការទទួលបានផលតបស្នងមកវិញ ពីរដ្ឋាភិបាល ដែលស្វាមីអ្នកស្រីបានប្ដូរជីវិតការពារទឹកដី៕
