ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) និងសមភាគីរុស្ស៊ី លោក វ៉្លាឌីមៀ ពូទីន (Vladimir Putin) បានពិភាក្សាគ្នាអំពីសង្គ្រាមនៅប្រទេសអ៊ីរ៉ង់ និងលទ្ធភាពនៃសន្តិភាពក្នុងប្រទេសអ៊ុយក្រែន កាលពីថ្ងៃទី៩ខែមីនា ប៉ុន្មានម៉ោងបន្ទាប់ពីប្រមុខវិមានក្រឹមឡាំងបានព្រមានថា វិបត្តិថាមពលសកលកំពុងគំរាមកំហែងដល់សេដ្ឋកិច្ចពិភពលោក។
ជម្លោះនេះ បានបង្កឱ្យមានការហក់ឡើងនៃតម្លៃប្រេងខ្លាំងបំផុត ចាប់តាំងពីការឈ្លានពានរបស់រុស្ស៊ីលើអ៊ុយក្រែនក្នុងឆ្នាំ២០២២ ទោះបីជាការកើនឡើងយ៉ាងគំហុកនៃតម្លៃប្រេងឆៅ កាលពីថ្ងៃទី៩ខែមីនា ត្រូវបានធ្លាក់ចុះមកវិញខ្លះកាលពីថ្ងៃទី១០ខែមីនា ហើយតម្លៃភាគហ៊ុននៅអាស៊ី និងអឺរ៉ុបបានចាប់ផ្តើមងើបឡើងវិញក៏ដោយ។
វិមានក្រឹមឡាំង បានឱ្យដឹងថា លោក ត្រាំ បានទូរសព្ទទៅ លោក ពូទីន ហើយនៅក្នុងការសន្ទនាតាមទូរសព្ទលើកដំបូងរបស់ពួកគេក្នុងឆ្នាំនេះ ពួកគេបានពិភាក្សាអំពីគំនិតរបស់រុស្ស៊ីសម្រាប់ការបញ្ចប់ជម្លោះក្នុងប្រទេសអ៊ីរ៉ង់ឱ្យបានឆាប់រហ័ស ស្ថានភាពយោធានៅអ៊ុយក្រែន និងឥទ្ធិពលនៃព្រឹត្តិការណ៍នានា នៅប្រទេសវេណេស៊ុយអេឡា មកលើទីផ្សារប្រេងសកល។
លោក ត្រាំ បានប្រាប់សន្និសីទសារព័ត៌មាននៅក្លឹបវាយកូនហ្គោលរបស់លោកក្នុងរដ្ឋផ្លរីដាថា៖ «ខ្ញុំមានការសន្ទនាយ៉ាងល្អជាមួយប្រធានាធិបតី ពូទីន» ដោយលោកបានបន្ថែមថា លោក ពូទីន ចង់ជួយជ្រោមជ្រែងលើបញ្ហាអ៊ីរ៉ង់។
លោក ត្រាំ បន្តថា៖ «ខ្ញុំបាននិយាយថា “អ្នកអាចជួយបានកាន់តែច្រើន ដោយបញ្ចប់សង្គ្រាមរវាងអ៊ុយក្រែន និងរុស្ស៊ីឱ្យរួចរាល់ នោះនឹងមានប្រយោជន៍ជាង”»។
កាលពីពេលមុន លោក ពូទីន បានលើកឡើងថា សង្គ្រាមរវាងអាមេរិក-អ៊ីស្រាអែល លើប្រទេសអ៊ីរ៉ង់ បានបង្កឱ្យមានវិបត្តិថាមពលសកល ខណៈពេលដែលលោកបានព្រមានថា ការផលិតប្រេងដែលពឹងផ្អែកលើការដឹកជញ្ជូនតាមច្រកសមុទ្រ ហ័រមូស (Hormuz) ក្បែរឆ្នេរសមុទ្រអ៊ីរ៉ង់ អាចនឹងត្រូវបញ្ឈប់ក្នុងពេលឆាប់ៗនេះ។
លោក ពូទីន បានមានប្រសាសន៍ថា ប្រទេសរុស្ស៊ី ដែលជាអ្នកនាំចេញប្រេងធំជាងគេលំដាប់ទីពីររបស់ពិភពលោក និងជាអ្នកកាន់កាប់ទុនបំរុងឧស្ម័នធម្មជាតិធំបំផុតនោះ គឺបានត្រៀមខ្លួនរួចជាស្រេច ដើម្បីធ្វើការងារជាមួយអតិថិជនអឺរ៉ុបឡើងវិញ ប្រសិនបើពួកគេចង់ត្រឡប់មកមានកិច្ចសហប្រតិបត្តិការរយៈពេលវែងជាមួយគ្នាវិញ។
រដ្ឋបាលរបស់ លោក ត្រាំ កំពុងពិចារណាកាត់បន្ថយទណ្ឌកម្មប្រេងលើប្រទេសរុស្ស៊ី។ នេះបើយោងតាមប្រភពបីដែលដឹងពីផែនការនេះ។
ប្រភពនានា បានប្រាប់ទីភ្នាក់ងារសារព័ត៌មាន Reuters ថា ការពិភាក្សាអាចគ្របដណ្តប់លើការបន្ធូរបន្ថយទណ្ឌកម្មជាទូទៅ ក៏ដូចជាជម្រើសគោលដៅជាក់លាក់សម្រាប់ប្រទេសមួយចំនួន ដូចជា ប្រទេសឥណ្ឌា ដើម្បីទិញប្រេងរុស្ស៊ីដោយមិនចាំបាច់បារម្ភពីការផាកពិន័យពីសហរដ្ឋអាមេរិក រួមទាំងពន្ធគយផងដែរ។
វិធានការនេះ មានបំណងជំរុញការផ្គត់ផ្គង់ប្រេងពិភពលោក បន្ទាប់ពីមានការរអាក់រអួលក្នុងការដឹកជញ្ជូននៅមជ្ឈិមបូព៌ា ប៉ុន្តែវាក៏អាចធ្វើឱ្យកិច្ចខិតខំប្រឹងប្រែងរបស់សហរដ្ឋអាមេរិក ក្នុងការបង្អត់ចំណូលរបស់រុស្ស៊ីសម្រាប់សង្គ្រាមនៅអ៊ុយក្រែន មានភាពស្មុគស្មាញផងដែរ។
លោក ត្រាំ បានប្រាប់អ្នកយកព័ត៌មានដោយមិនបានបញ្ជាក់ឈ្មោះប្រទេសថា៖ «យើងក៏កំពុងលើកលែងទណ្ឌកម្មពាក់ព័ន្ធនឹងប្រេងមួយចំនួន ដើម្បីបញ្ចុះតម្លៃ។ ដូច្នេះ យើងមានទណ្ឌកម្មលើប្រទេសមួយចំនួន។ យើងនឹងដកទណ្ឌកម្មទាំងនោះចេញ រហូតទាល់តែបញ្ហានេះត្រូវបានដោះស្រាយរួចរាល់»។
លោកបន្ថែមថា៖ «បន្ទាប់មក អ្នកណាទៅដឹង ប្រហែលជាយើងមិនចាំបាច់ដាក់ទណ្ឌកម្មទាំងនោះវិញទេ ព្រោះវានឹងមានសន្តិភាពខ្លាំង។ ប៉ុន្តែនៅពេលដែលពេលវេលាមកដល់ កងទ័ពជើងទឹកអាមេរិក និងដៃគូរបស់ខ្លួន នឹងអមដំណើរនាវាដឹកប្រេងឆ្លងកាត់ច្រកសមុទ្រ ប្រសិនបើចាំបាច់»៕
