សាលាឧទ្ធរណ៍ខេត្តបាត់ដំបង នៅថ្ងៃសុក្រនេះ លើកពេលប្រកាសសាលដីកាលើអ្នកកាសែតពីររូប ដែលពួកគេត្រូវបានសាលាដំបូងខេត្តសៀមរាប ផ្តន្ទាទោសឱ្យជាប់ពន្ធនាគារ១៤ឆ្នាំ ដោយសារតែបង្ហោះរូបភាព ឈឺឆ្អាលរឿងថៃឈ្លានពានមកលើបូរណភាពទឹកដីខ្មែរ។
សមាគមការពារសិទ្ធិមនុស្សអាដហុក និយាយនៅលើគេហទំព័ររបស់ខ្លួនថា នៅព្រឹកថ្ងៃទី១៣ ខែមីនា ឆ្នាំ២០២៦ វេលាម៉ោងប្រមាណ១០ព្រឹក សាលាឧទ្ធរណ៍បាត់ដំបង បានបើកសវនាការលើបណ្តឹងឧទ្ធរណ៍របស់ លោក ផន សុភាព អ្នកសារព័ត៌មានបាត់ដំបងប៉ុស្តិ៍ និង លោក ភាព ភារ៉ា ជាអ្នកសារព័ត៌មាន TSP68 TV Online ដែលជាប់ចោទពីបទ ប្រគល់ឱ្យរដ្ឋបរទេសនូវព័ត៌មានជាអាទិ៍ដែលអាចធ្វើឱ្យអន្តរាយដល់ការការពារជាតិតាមអំណាចមាត្រា៤៤៥ នៃក្រមព្រហ្មទណ្ឌនៃព្រះរាជាណាចក្រកម្ពុជា។
អាដហុក បន្តថា ការលើកពេលប្រកាសនេះ បន្ទាប់ពីចៅក្រមធ្វើការសាកសួរដេញដោលអស់រយៈពេលប្រមាណជាង១ម៉ោង។ បន្ទាប់មក ប្រធានក្រុមប្រឹក្សាជំនុំជំរះបានសម្រេចលើកពេលប្រកាសសាលដីកាទៅថ្ងៃទី២៦ ខែមីនា ឆ្នាំ២០២៦ វេលាម៉ោង៨ព្រឹក។
អ្នកសារព៍ត័មានទាំងពីររូបនេះ ត្រូវបានសាលាដំបូងខេត្តសៀមរាប សម្រេចផ្តន្ទាទោសកាលពីថ្ងៃទី១៧ ខែធ្នូ ឆ្នាំ២០២៥ ឱ្យជាប់ពន្ធនាគារក្នុងម្នាក់ៗមានរយៈ១៤ឆ្នាំ ក្រោមបទចោទខាងលើដោយសារតែពួកគេទាំងពីរនាក់ បានបង្ហោះរូបភាពដែលខ្លួនបានថតនៅប្រាសាទតាក្របី ជាប់គ្រាប់មីននៅចំហៀងខាងក្រោយ ខណៈលោកទាំងពីរបានយកជំនួយមនុស្សធម៌ទៅជូនក្រុមទាហានជួរមុខ។
ការចោទប្រកាន់នេះ រងការរិះគន់ថា ជារឿងអយុត្តិធម៌ធ្ងន់ធ្ងរសម្រាប់អ្នកសារព័ត៌មាន ដែលឈឺចាប់ទៅនឹងទង្វើឈ្លានពានរបស់ថៃ ខណៈមេដឹកនាំធ្វើឱ្យបាត់បង់ទឹកដីខ្មែរជាង៤០ទីតាំង ធ្លាក់ទៅក្នុងដៃថៃគ្រប់គ្រងរហូតបច្ចុប្បន្ន តែតុលាការមើលមិនឃើញពីទោសកំហុសទេ ទោះមាត្រា៤៤០ នៃក្រមព្រហ្មទណ្ឌ ចែងថា បទប្រគល់ឱ្យរដ្ឋបរទេសនូវដែនដីជាតិទាំងស្រុង ឬមួយផ្នែក ជាអំពើក្បត់ជាតិ ត្រូវផ្តន្ទាទោសដាក់ពន្ធនាគារអស់មួយជីវិត៕
