មេដឹកនាំកំពូលថ្មី លោក មូជតាបា ខាមេនី (Mojtaba Khamenei) បានថ្លែងនៅក្នុងសេចក្តីថ្លែងការណ៍ដែលត្រូវបានអានលើទូរទស្សន៍រដ្ឋ កាលពីថ្ងៃទី១២ខែមីនាថា ប្រទេសអ៊ីរ៉ង់នឹងសងសឹកចំពោះឈាមរបស់អ្នកបូជាជីវិត បន្តបិទច្រកសមុទ្រ Hormuz និងវាយប្រហារមូលដ្ឋានទ័ពអាមេរិក ដែលនេះជាការលើកឡើងលើកដំបូងរបស់លោក ចាប់តាំងពីបានឡើងកាន់តំណែងតពីឪពុកដែលត្រូវបានគេសម្លាប់។
នៅក្នុងសុន្ទរកថាប្រកបដោយភាពតានតឹង លោក Khamenei បានមានប្រសាសន៍ថា សហរដ្ឋអាមេរិកត្រូវតែបិទមូលដ្ឋានទ័ពទាំងអស់របស់ខ្លួននៅក្នុងតំបន់។ លោកបានបន្តថា ច្រកសមុទ្រដែលរត់កាត់តាមឆ្នេរសមុទ្រអ៊ីរ៉ង់ និងផ្គត់ផ្គង់ប្រេងមួយភាគប្រាំនៃពិភពលោក គួរតែបន្តបិទដើម្បីដាក់សម្ពាធលើសត្រូវ។
នាវាដឹកប្រេងចំនួនពីរគ្រឿងទៀត បានឆាបឆេះនៅក្នុងកំពង់ផែអ៊ីរ៉ាក់ នៅថ្ងៃទី១២ខែមីនា បន្ទាប់ពីមានការវាយប្រហារដោយទូកផ្ទុកគ្រឿងផ្ទុះដែលគេសង្ស័យថាជារបស់អ៊ីរ៉ង់ ដែលនេះគឺជាការបង្កើនការវាយប្រហារដែលបានកាត់ផ្ដាច់ការផ្គត់ផ្គង់ប្រេងពីមជ្ឈិមបូព៌ា និងប្រឆាំងនឹងការអះអាងរបស់ប្រធានាធិបតីអាមេរិក លោក Donald Trump ដែលថាបានឈ្នះសង្រ្គាមដែលលោកបានចាប់ផ្តើមកាលពីពីរសប្តាហ៍មុន។
រូបភាពដែលត្រូវបានផ្ទៀងផ្ទាត់ដោយទីភ្នាក់ងារព័ត៌មាន Reuters ដែលត្រូវបានថតចេញពីច្រាំងនៃកំពង់ផែ Basra បានបង្ហាញឱ្យឃើញនូវនាវាដែលកំពុងត្រូវបានលេបត្របាក់ដោយអណ្តាតភ្លើងពណ៌ទឹកក្រូចយ៉ាងសន្ធោសន្ធៅ ដែលបានបំភ្លឺផ្ទៃមេឃនាពេលរាត្រី បន្ទាប់ពីការវាយប្រហារដែលអាជ្ញាធរអ៊ីរ៉ាក់ បានទម្លាក់កំហុសលើទូករបស់អ៊ីរ៉ង់។ យ៉ាងហោចណាស់ មានសមាជិកនាវិកម្នាក់បានបាត់បង់ជីវិត។
ប៉ុន្មានម៉ោងមុននេះ នាវាបីគ្រឿងផ្សេងទៀត ក៏ត្រូវបានគេវាយប្រហារនៅក្នុងតំបន់ឈូងសមុទ្រផងដែរ។ កងឆ្មាំបដិវត្តន៍អ៊ីរ៉ង់បានចេញមុខទទួលខុសត្រូវ ចំពោះការវាយប្រហារយ៉ាងហោចណាស់មួយលើនាវាដឹកទំនិញរបស់ថៃដែលត្រូវបានដុតបំផ្លាញ ដោយកងឆ្មាំបាននិយាយថា នាវានោះមិនបានអនុវត្តតាមបញ្ជារបស់ខ្លួន។ ចំណែកឯនាវាដឹកកុងតឺន័រមួយគ្រឿងទៀត ក៏ត្រូវបានវាយប្រហារដោយគ្រាប់រ៉ុក្កែតមិនស្គាល់អត្តសញ្ញាណនៅជិតអារ៉ាប់រួម នៅថ្ងៃទី១២ខែមីនាផងដែរ។ សង្រ្គាមដែលបានចាប់ផ្តើមជាមួយនឹងយុទ្ធនាការទម្លាក់គ្រាប់បែករបស់សហរដ្ឋអាមេរិក និងអ៊ីស្រាអែល កាលពីចុងខែកុម្ភៈ រហូតមកដល់ពេលនេះ បានសម្លាប់មនុស្សប្រហែល ២ ០០០ នាក់ និងបង្កឱ្យមានអ្វីដែលទីភ្នាក់ងារថាមពលអន្តរជាតិ ពណ៌នាថា ជាការរំខានដ៏ធំបំផុតដល់ការផ្គត់ផ្គង់ថាមពលសកលក្នុងប្រវត្តិសាស្ត្រ។
ស្របពេលដែលមានការបដិសេធចំពោះការអះអាងរបស់សហរដ្ឋអាមេរិក និងអ៊ីស្រាអែល ដែលថាបានកម្ទេចគ្រាប់ចុចនៃអាវុធរយៈចម្ងាយឆ្ងាយរបស់អ៊ីរ៉ង់ភាគច្រើននោះ មានសេចក្តីរាយការណ៍ថា យន្តហោះដ្រូនជាច្រើនទៀតត្រូវបានគេមើលឃើញថាកំពុងហោះចូលទៅក្នុងប្រទេសគុយវ៉ែត អ៊ីរ៉ាក់ អារ៉ាប់រួម បារ៉ែន និងអូម៉ង់ នៅថ្ងៃទី១២ខែមីនា។
ក្រុមកងជីវពលហេសបូឡា (Hezbollah) នៅលីបង់ ដែលគាំទ្រដោយអ៊ីរ៉ង់ បានបាញ់រ៉ុក្កែតក្នុងចំនួនដ៏ច្រើនបំផុតមិនធ្លាប់មានក្នុងសង្រ្គាមនេះ ចូលទៅក្នុងប្រទេសអ៊ីស្រាអែល ដែលបង្កឱ្យមានការវាយប្រហារសងសឹកថ្មីពីសំណាក់អ៊ីស្រាអែលទៅលើទីក្រុងបេរូត។
តម្លៃប្រេងបានហក់ឡើងវិញលើសពី ១០០ ដុល្លារក្នុងមួយបារ៉ែល បន្ទាប់ពីបានធ្លាក់ចុះកាលពីដើមសប្តាហ៍ នៅពេលដែល លោក Trump បាននិយាយថា សង្រ្គាមនឹងត្រូវបញ្ចប់ក្នុងពេលឆាប់ៗ។ អ៊ីរ៉ង់បានលើកឡើងថា ខ្លួននឹងមិនអនុញ្ញាតឱ្យប្រេងឆ្លងកាត់ច្រកសមុទ្រ Hormuz ដែលជាផ្លូវពាណិជ្ជកម្មថាមពលដ៏សំខាន់បំផុតរបស់ពិភពលោកឡើយ រហូតទាល់តែការវាយប្រហាររបស់សហរដ្ឋអាមេរិក និងអ៊ីស្រាអែលត្រូវបានបញ្ឈប់។
លោក Trump បានព្យាយាមជាច្រើនលើកដើម្បីធ្វើឱ្យទីផ្សារថាមពលមានស្ថិរភាពឡើងវិញក្នុងសប្តាហ៍នេះ ដោយនិយាយថា ការឡើងថ្លៃប្រេងនឹងកើតឡើងក្នុងរយៈពេលខ្លីប៉ុណ្ណោះ។
ប៉ុន្តែលោកមិនបានពន្យល់ពីរបៀបដែលសង្រ្គាមនឹងបញ្ចប់ ឬបង្ហាញផែនការណាមួយដើម្បីបើកច្រកសមុទ្រដែលត្រូវបានបិទខ្ទប់នោះឡើងវិញឡើយ។ មន្ត្រីសហរដ្ឋអាមេរិក និងអ៊ីស្រាអែលបាននិយាយថា គោលបំណងគឺដើម្បីបំផ្លាញកម្មវិធីមីស៊ីល និងនុយក្លេអ៊ែររបស់អ៊ីរ៉ង់ ប៉ុន្តែលោក Trump ក៏បានទាមទារឱ្យអ៊ីរ៉ង់ “ចុះចាញ់ដោយគ្មានលក្ខខណ្ឌ” និងទាមទារអំណាចក្នុងការកំណត់អ្នកដឹកនាំរបស់ប្រទេសនេះផងដែរ៕
